Job​—Wan Man We i Stanap Strong Mo i Holemstrong Long God

“?Yu luk fasin blong Job, man ya blong wok blong mi? I no gat narafala man long wol ya we i olsem hem. Hem i wan gudfala man we tingting blong hem i stap strong long mi. Oltaem hem i stap mekem wosip long mi, mo i stap lukaot gud blong i no mekem wan samting we i no stret.”​—JOB 1:8.

1, 2. (a) ?Wanem ol bigfala trabol we oli kasem Job wantaem nomo? (b) ?Laef blong Job i olsem wanem bifo we ol trabol ya i kasem hem?

 LONG taem bifo, i gat wan man we laef blong hem i gud tumas. Hem i rijman, i gat haenem, gud helt, mo famle laef blong hem i hapi. Be wantaem nomo, ol samting ya i jenis. Hem i lusum ol mane mo olting blong hem. Smoltaem biaen, wan hariken i kilim evri pikinini blong hem i ded. Smoltaem biaen bakegen, hem i kasem wan strong sik, ale ol boela oli kamkamaot olbaot long bodi blong hem. Ating yu kasem save se man ya hem i Job, we buk blong Job long Baebol i stap tokbaot.​—Job, japta 1 mo 2.

² Job i talem wetem sore se: “Mi mi wantem tumas sipos God i save mekem laef blong mi i kam gud bakegen olsem bifo.” (Job 3:3; 29:2) Yumi evriwan i sem mak. Taem wan bigfala trabol i kasem yumi, yumi wantem nomo se ol samting i kam gud bakegen olsem bifo. Long saed blong Job, fastaem hem i gat wan gudfala laef, i luk olsem we hem i win. Ol haeman oli respektem hem mo oli kam luk hem blong kasem advaes. (Job 29:​5-11) Hem i gat mane, be hem i no trastem mane blong hem. (Job 31:​24, 25, 28) Taem hem i luk sam pikinini we oli no gat papa mama no sam wido we oli sot long sam samting, hem i givhan long olgeta. (Job 29:​12-16) Mo hem i stap tru long woman blong hem.​—Job 31:​1, 9, 11.

3. ?Wanem tingting blong Jeova long saed blong Job?

³ From we Job i wosipim God, hem i wan gudfala man we i no gat poen long hem. Jeova i talem se: “I no gat narafala man long wol ya we i olsem hem. Hem i wan gudfala man we tingting blong hem i stap strong long mi. Oltaem hem i stap mekem wosip long mi, mo i stap lukaot gud blong i no mekem wan samting we i no stret.” (Job 1:​1, 8) Be nating se Job i wan man blong stret fasin, ol bigfala trabol we oli kasem hem oli spolemgud laef blong hem. Olgeta samting we hem i bin wokhad blong kasem, oli lus evriwan. Mo hem i kasem bigfala traem taem hem i harem i soa tumas long bodi blong hem, i harem nogud long tingting blong hem, mo i no save faenem rod blong kamaot long trabol ya.

4. ?From wanem i gud we yumi tingting long ol trabol we i mekem Job i harem nogud?

⁴ I tru, i no Job nomo we i kasem ol bigfala trabol long laef blong hem. Plante Kristin tede oli kasem save long filing blong Job from ol trabol we oli harem nogud long hem. From samting ya, i gud yumi tingting  long tufala kwestin ya: ?Taem yumi kasem wan bigfala trabol, olsem wanem eksampol blong Job i save halpem yumi? ?Mo olsem wanem stori blong Job i save givhan long yumi blong kasem save moa long filing blong ol narafala we oli stap safa?

Fasin Blong Stap Tru Mo Holemstrong Long God i Kasem Traem

5. ?Setan i talem se Job i stap wosipim Jeova from wanem?

⁵ Traem we Job i kasem i spesel, from we Job i no save se Setan i bin sakem sam tok long God long saed blong hem. Setan i talem se tingting we i pusum Job blong mekem wosip long God i no stret. Long wan miting long heven, Jeova i tokbaot nambawan fasin blong Job. Nao Setan i ansa se: “Oltaem yu stap lukaot gud long hem wetem ol pikinini blong hem mo olgeta samting blong hem, mo yu stap blokemgud olgeta.” Long ol tok ya, Setan i stap talem se Job i wantem kasem ol gudfala samting blong hem nomo, taswe hem i mekem wosip long God. Mo tok ya i soemaot tingting we Setan i gat long saed blong ol narafala man blong God tu. Setan i talem long Jeova se: “Plis, yu pusum han blong yu, yu tajem ol samting we hem i gat, nao yu luk sipos hem bambae i no tok nogud long nem blong yu, stret long fes blong yu.” (NW )​—Job 1:​8-11.

6. ?Setan i stanemap wanem impoten poen?

⁶ Poen ya we Setan i stanemap i impoten. Hem i tok agensem fasin blong Jeova blong rul. ?Olsem wanem? ?God i save rulum heven mo wol long lav? ?Fasin blong ol man blong tingbaot olgeta nomo bambae i win evri taem, olsem Setan i talem? Jeova i letem Setan i traem Job. Hem i trastem man blong hem Job se bambae hem i holemstrong mo stap tru long Hem. Taswe, Setan nao i mekem ol bigfala trabol ya i kamaot long Job, wan afta narawan. Taem Setan i no winim Job long ol faswan traem, hem i kilim Job wetem wan bigfala sik. Setan i talem se: “Hem i save lego olgeta samting we hem i gat blong i sevem laef blong hem.”​—Job 2:4.

7. ?Olsem wanem ol man blong God tede oli kasem traem we i klosap sem mak long trabol we Job i kasem?

⁷ Bighaf blong ol Kristin tede oli no safa olsem Job. Be i tru se plante defdefren trabol oli kasem olgeta. Plante Kristin, ol man oli kilim olgeta mo mekem nogud long olgeta from bilif blong olgeta, no maet oli gat trabol long famle blong olgeta. Trabol long saed blong mane mo ol strong sik oli save mekem olgeta oli harem nogud tumas. Samfala oli bin lusum laef blong olgeta from bilif blong olgeta. Be yumi no mas ting se evri trabol we yumi kasem, Setan nao i mekem i kamaot. Sam trabol oli kamaot from ol mastik we yumi nomo i mekem, no from wan sik we yumi bon wetem. (Galesia 6:7) Mo tu, yumi evriwan i kam olfala mo yumi kasem ol trabol we i kamaot long ol olfala, mo yumi evriwan i kasem ol trabol we i kamaot from ol disasta olsem hariken. Baebol i soemaot klia se long taem blong yumi, Jeova i no stap mekem merikel blong blokem ol man blong hem long ol trabol ya.​—Prija 9:11.

8. ?Olsem wanem Setan i save yusum ol trabol we i stap kasem yumi?

⁸ Setan i save yusum ol trabol we i stap kasem yumi, blong traem spolem bilif blong yumi. Aposol Pol i harem nogud long wan trabol, hem i talem se ‘i olsem nil blong aranis we i stap stikim hem, i olsem man blong karem tok blong Setan we oltaem i stap kilim hem.’ (2 Korin 12:7) Maet hemia wan trabol long saed blong bodi, olsem ae i nogud no wan narafala samting olsem. Be Pol i save se Setan i save yusum trabol ya mo ol wari we i kamaot from, blong tekemaot glad blong hem mo blong mekem se hem i no moa holemstrong long God. (Ol Proveb 24:10) Tede, Setan i save pulum ol famle, ol fren, mo ol gavman tu, blong oli girap agensem ol man blong God.

9. ?From wanem yumi no mas sapraes sipos yumi kasem trabol no ol man oli agensem yumi?

⁹ ?Olsem wanem yumi save stanap strong tru long ol trabol ya? Yumi mas luk ol trabol ya olsem wan janis blong soemaot se yumi lavem Jeova mo se yumi tinghevi long fasin blong obei long hem olsem hae rula blong yumi. (Jemes 1:​2-4) Nomata wanem trabol yumi kasem, yumi mas tingbaot se i impoten tumas blong stap tru long God. Samting ya bambae i givhan long yumi blong holem strong long saed blong wosip blong yumi. Aposol Pita i raetem leta i go long ol  Kristin, i se: “Ol fren. I nogud yufala i sapraes long ol strong samting ya we oli kam blong traem bilif blong yufala. Ol samting olsem, i no yufala nomo i kasem, be plante narafala Kristin man tu oli kasem.” (1 Pita 4:12) Mo Pol tu i talem se: “Yu yu save we olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:12) Tede, Setan i stap putum poen yet agensem ol Witnes blong Jeova, olsem hem i mekem long Job. Yes, Baebol i talem se long ol las dei ya, Setan i kam strong moa blong agensem ol man blong God.​—Revelesen 12:​9, 17.

Rong Tingting Mo Nogud Advaes

10. ?From wanem i had moa long Job i bitim yumi?

¹⁰ I had moa long Job i bitim yumi, from we Job i no save from wanem ol trabol ya oli kasem hem. Hem i gat rong tingting, hem i talem se Jeova ‘i [bin] givim ol samting long hem mo Jeova i stap tekemaot olgeta bakegen.’ (Job 1:21) Ating Setan i wantem nomo blong givim tingting long Job se God nao i mekem ol trabol ya i kamaot long hem.

11. ?Wanem tingting blong Job taem trabol ya i kasem hem?

¹¹ Tingting blong Job i foldaon bigwan. Nating se i olsem, hem i no tok nogud long God olsem woman blong hem i wantem hem blong mekem. (Job 2:​9, 10) Job i talem se: ‘Laef blong ol rabis man i moa gud i bitim hemia blong mi.’ (Job 21:​7-9) Ating hem i wantem save from wanem God i stap panisim hem. Sam samtaem hem i wantem ded nomo. Hem i se: “God. Mi mi wantem tumas blong yu haedem mi long [beregraon], blong mi save stap long ples ya gogo kros blong yu i finis.”​—Job 14:13.

12, 13. ?Advaes blong trifala fren blong Job i mekem wanem long Job?

¹² I gat tri fren blong Job we trifala i kam luk hem blong “leftemap tingting blong hem.” (Job 2:11) Be ol tok blong trifala i no givhan long Job nating, ‘oli stap mekem hem i harem nogud nomo.’ (Job 16:2) Job i nidim kaen fren ya we hem i save talemaot ol trabol blong hem long olgeta. Be trifala ya oli jes mekem tingting blong Job i fasfas moa, mo hem i harem moa nogud i bitim bifo.​—Job 19:2; 26:2.

¹³ Ating Job i bin tingting olsem: ‘?From wanem mi nao mi kasem ol trabol ya? ?Mi mi mekem wanem blong pulum trabol ya i kam long mi?’ Trifala fren blong hem i talem ol tok we i givim rong tingting long Job. Trifala i ting se Job i bin mekem wan bigfala sin we i pulum trabol ya i kam long hem. Elifas i talem se: “?I gat wan stret man samtaem we bigfala trabol olsem i kasem hem? . . . Mi mi luk finis we ol man we oli stap mekem sin, mo oli stap wokem ol fasin nogud, oltaem oli stap kakae frut blong hem.”​—Job 4:​7, 8.

14. ?From wanem yumi no mas ting se man we i kasem trabol i bin mekem samting we i no stret?

¹⁴ I tru, yumi save kasem trabol sipos yumi no planem sid blong ol fasin we tabu spirit i wantem be yumi planem ol sid blong rabis fasin. (Galesia 6:​7, 8) Be long wol ya, nomata se yumi mekem gudfala fasin, yumi save kasem trabol. Mo tu, i no tru se ol stret man oli no kasem trabol. Long saed blong Jisas Kraes, ‘i no gat sam samting i spolem hem, mo hem i narafala olgeta long ol man nogud.’ Be oli nilim hem long pos mo hem i harem nogud gogo hem i ded. Aposol Jemes tu, ol man oli kilim hem i ded from bilif blong hem. (Hibrus 7:26; Ol Wok 12:​1, 2) Ol tok blong Elifas mo tufala fren blong hem i no stret, mo i pulum Job blong tokbak long trifala ya blong soemaot se hem i gat gudnem mo hem i no mekem wan samting we i no stret. Be trifala i gohed nomo blong talem se Job i stap safa from we hem i stap kasem panis blong rong we hem i bin mekem. Maet ol tok ya nao i mekem Job i ting se God i no stap mekem i stret.​—Job 34:5; 35:2.

Kasem Help Taem Yumi Fesem Trabol

15. ?Wanem tingting i save givhan long yumi taem yumi fesem wan trabol?

¹⁵ ?Stori blong Job i tijim yumi long wanem samting? Taem yumi lusum wan famle long ded, no yumi kasem bigfala sik, no ol man oli agensem yumi mo mekem nogud long yumi, yumi harem se i no stret nating we ol trabol ya i kasem yumi. Maet i luk olsem se ol narafala man oli no stap kasem plante problem olsem yumi. (Ol Sam 73:​3-12) I gud we yumi tingting long tufala impoten kwestin ya: ‘?Lav we mi mi gat long God i pusum mi blong mekem wok blong hem nomata wanem samting i kamaot long laef blong mi? ?Mi mi wantem tumas blong givhan long Jeova blong bambae hem i save “ansa long man ya we i stap faerap long hem” ’? (Ol Proveb 27:11; Matiu 22:37) Yumi neva mas letem ol rong tingting mo toktok blong ol narafala oli mekem se yumi no moa trastem fulwan Papa blong yumi long heven. Wan gudfala Kristin we hem i stap siksik blong plante yia, i talem se: “Wanem trabol we Jeova i letem mi mi kasem, mi save se mi mi naf blong stanap strong tru long hem. Mi save se hem bambae i givim paoa we mi nidim. Kam kasem naoia, hem i mekem olsem.”

16. ?Olsem wanem Tok blong God i save givhan long olgeta we oli fesem hadtaem?

 ¹⁶ Long saed blong ol trik blong Setan, Job i no kasem save long olgeta, be yumi tede, yumi save ol trik blong hem. Baebol i talem se: “Yumi savegud ol plan blong Setan,” hemia ol rabis trik blong hem. (2 Korin 2:11) Mo tu, tru long Baebol yumi save kasem fulap waes we i givhan gud long laef blong yumi. I gat ol stori blong ol man mo woman we oli holemstrong long God mo oli stanap strong tru long plante hadtaem. Aposol Pol, hem i wan man we i safa moa i bitim plante narafala. Hem i raetem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Wan Witnes long Yurop we hem i stap kalabus long Wol Wo Tu from bilif blong hem, hem i givim smol kakae we hem i kasem blong tri dei i go long wan man, blong man ya i givim wan Baebol long hem. Hem i se: “!Mi haremgud tumas blong kasem Baebol ya! Nating se mi hanggri we mi hanggri, be mi kasem ol save blong Baebol we i olsem kakae. Samting ya i halpem mi mo plante narafala tu, blong mifala i stap strong tru long ol traem mo trabol we mifala i kasem. Baebol ya, mi mi holem kasem tede.”

17. ?Wanem ol samting we God i givim blong halpem yumi blong stanap strong?

¹⁷ Antap long ol tok blong Baebol we i leftemap tingting blong yumi, i gat ol buk we oli tokbaot ol advaes blong Baebol we i save halpem yumi long taem blong trabol. Sipos yu luk long Watch Tower Publications Index, ating bambae yu faenem laef stori blong wan Kristin we hem i fesem sem traem olsem yu yu fesem. (1 Pita 5:9) Maet i gud tu blong tokbaot ol trabol blong yu wetem sam elda no sam narafala Kristin we oli gat fasin ya blong kasem save long filing blong narafala. Antap moa, yu mas prea, olsem nao yu save suagud se Jeova mo tabu spirit bambae i givhan long yu. ?Pol i mekem wanem blong stanap strong  agensem Setan we i stap ‘kilim’ hem? Hem i lanem blong dipen long paoa blong God. (2 Korin 12:​9, 10) Pol i raetem se: “Mi mi naf blong mekem evri samting long paoa blong Hemia we i stap givim paoa long mi.”​—Filipae 4:​13, NW.

18. ?Olsem wanem ol narafala Kristin oli save leftemap tingting blong wan Kristin we i kasem trabol?

¹⁸ Yes, i gat plante samting oli stap we oli save givhan long yu, mo yu no mas fraet blong yusum ol samting ya. Wan proveb i talem se: “?Yu yu letem tingting blong yu i foldaon long dei blong trabol? Paoa blong yu bambae i smol nomo.” (Ol Proveb 24:​10, NW ) Taem ol waet anis oli go insaed long wan haos, oli save kakae ol timba blong haos ya gogo haos i foldaon evriwan. Long sem fasin, taem tingting blong wan Kristin i foldaon, hemia i save mekem se hem i no moa gat paoa blong holemstrong long Jeova. Blong blokem samting ya, Jeova i givhan long yumi tru long ol man blong hem. Long naet we ol enemi blong Jisas oli holem hem, wan enjel i kamtru long hem blong mekem hem i strong. (Luk 22:43) Taem Pol i wan prisena mo oli stap tekem hem i go long Rom, ol Kristin brata oli kam mitim hem long haos blong maket long Apias, mo bakegen, long wan ples we i gat tri hotel long hem. Nao Pol i “talem tangkiu long God from, mo tingting blong hem i kam strong moa.” (Ol Wok 28:15) Wan Witnes long Jemani i stap tingbaot yet, help we hem i kasem taem hem i yangfala nomo. Long taem ya, oli karem hem i go long rabis kalabus blong ol Nasi long Ravensbrück. Sista ya i talem se: “Taem mi kamtru long kalabus ya, wan Kristin sista we i stap finis long ples ya i kam luk mi mo i mekem welkam long mi. I gat wan narafala nambawan sista tu, we i lukaotgud long mi mo i givhan bigwan long mi. Hem i kam olsem mama blong mi.”

“Stanap Strong”

19. ?Wanem i givhan long Job blong agensem Setan?

¹⁹ Jeova i talem se Job i wan man we ‘tingting blong hem i stap strong long Hem.’ (Job 2:3) Nating se tingting blong Job i foldaon mo hem i no kasem save from wanem hem i stap safa, be neva hem i lego strong tingting we hem i gat blong stap tru long Jeova. Job i stap laef blong mekem Jeova i glad, mo hem i no fogetem samting ya. Hem i talem klia se: “!Go kasem taem we mi mi ded, bambae mi no save lego fasin blong mi blong holemstrong long God!”​—Job 27:​5, NW.

20. ?From wanem i no blong nating nomo we yumi stanap strong?

²⁰ Strong tingting olsem we Job i gat, bambae i givhan long yumi blong holemstrong long Jeova nomata wanem trabol i kasem yumi​—ol traem, fasin agens, mo hadtaem. Jisas i talem long kongregesen blong Smana se: “I nogud yufala i stap fraet long ol samting we bambae i kam long yufala. Setan bambae i putum sam long grup blong yufala i go long kalabus blong traem yufala. Nao bambae yufala i gat trabol [hadtaem, wari, mo fasin agens] ten dei. Be yufala i mas stanap strong gogo yufala i ded, nao bambae mi givim niufala laef long yufala, blong ona long yufala, olsem praes we oli givim long man we i win long resis.”​—Revelesen 2:10.

21, 22. ?Taem yumi fesem trabol, wanem save bambae i leftemap tingting blong yumi?

²¹ Long wol ya we Setan i rula blong hem, yumi mas kasem trabol. Trabol ya bambae i traem fasin blong yumi blong stanap strong mo blong holemstrong long Jeova. Be Jisas i mekem promes long yumi se bambae yumi gat wan gudfala fiuja, mo from samting ya, yumi no nid blong fraet. Bigfala samting se yumi mas stanap strong. Pol i talem se: ‘Ol trabol ya we i kasem yumi oli no save stap longtaem,’ be “frut blong olgeta” no blesing we bambae Jeova i givim long yumi, ‘i gud tumas mo i no save finis samtaem.’ (2 Korin 4:​17, 18) Taem yumi tingbaot ol hapi yia blong laef we Job i gat afta we hem i winim traem blong hem, yumi luksave se bigfala trabol we hem i kasem i blong sot taem nomo.​—Job 42:16.

²² Nating se i olsem, bambae i gat sam traem long laef blong yumi we yumi ting se bambae oli neva finis mo oli bigwan tumas we yumi no save winim. Long nekis stadi, bambae yumi tokbaot sam moa samting we yumi lanem long stori blong Job, long saed blong fasin blong stanap strong longtaem. Mo tu, bambae yumi luk ol samting we yumi save mekem blong givhan long ol narafala blong stanap strong taem oli fesem hadtaem.

?Bambae Yu Yu Ansa Olsem Wanem?

• ?Wanem bigfala poen we Setan i stanemap long saed blong fasin blong Job blong holemstrong long Jeova?

• ?From wanem yumi no mas sapraes taem yumi kasem trabol?

• ?Olsem wanem Jeova i givhan long yumi blong stanap strong?

[Kwestin]

[Tok blong pija long pej 15]

Stadi, storian wetem ol Kristin we oli fesem ol traem finis, talemaot evri samting tru long prea, ol samting ya i save halpem yumi blong stanap strong