“Kamaot Long Wol, Olsem We i Kamaot Long Heven”

“Folem bilif blong Katolik skul, i gat Fo Laswan Samting long laef blong man. Ol samting ya hemia: Ded, Jajmen, Helfaea, Heven.” —Buk ya Catholicism we George Brantl i raetem.

I GUD blong makem se wol i no stap long lis ya blong ol Fo Laswan Samting. Yumi no sapraes long samting ya from we Katolik Jos mo plante narafala skul tu, oli bilif se wan dei wol ya bambae i lus olgeta. Tingting ya long saed blong wol i kam klia moa long buk ya Dictionnaire de théologie catholique. Aninit long smol stamba tok ya “En blong Wol ya,” oli raetem se: “Katolik Jos i bilif mo i tijim se wol ya we God i wokem i stap naoia, bambae i no stap blong olwe.” Mo tu, niufala buk ya Catholic catechism, i tokbaot tingting ya i se: “Wol blong yumi . . . i stap go blong lus nomo.” ?Be sipos wol blong yumi i stap go blong lus, olsem wanem long ol promes blong Baebol long saed blong paradaes long wol?

Baebol i tokbaot klia wan paradaes we bambae i stap long wol ya long fiuja. Olsem nao, profet Aesea i tokbaot wol ya mo ol man we bambae oli stap long hem, se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. Ol man we bambae oli stap long ples ya, oli man blong mi we mi mi jusumaot olgeta finis, mo bambae oli save stap longtaem, olsem tri we i save stap longtaem. Ol samting we olgeta oli hadwok long hem, bambae oli save harem gud long hem longtaem.” (Aesea 65:​21, 22) Ol man Jiu we God i talem ol promes  ya long olgeta, oli suagud se graon blong olgeta​—wetem ful wol ya—​wan dei bambae i kam paradaes we ol man oli save haremgud long hem blong olwe.

Ol Sam 37 i mekem yumi sua long promes ya. “Ol man we tingting blong olgeta i stap daon, bambae oli tekem graon ya i blong olgeta.” (Ol Sam 37:11) Vas ya i no stap tokbaot taem we neson blong Isrel i gobak blong stap long Promes Lan, nogat. Semfala Sam ya i talem klia se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) * Makem we vas ya i soem se laef we i no save finis long wol bambae i wan presen blong “ol man we tingting blong olgeta i stap daon.” Wan Franis Baebol i tokbaot tok ya “tingting daon” we i stap long vas ya, i se: “Hem i gat wan mining we i bigfala moa i bitim hemia we i stap long ol Baebol; hemia i minim olgeta we oli pua, olgeta we oli trabol no we ol man oli mekem i nogud long olgeta from we oli stap mekem ol samting we Yahweh [Jeova] i wantem, olgeta we oli gat tingting daon long hat blong olgeta mo we oli wantem obei long God.”

?Long Wol No Long Heven?

Long Bigfala toktok we Jisas i mekem antap long Hil, hem i mekem wan promes we i pulum yumi blong tingbaot vas ya we i stap antap. Jisas i talem se: ‘Olgeta we tingting blong olgeta i stap daon oli save harem gud, from we God bambae i givim wol ya long olgeta.’ (Matiu 5:5) Yes, bakegen yumi luk se bambae wol ya i wan presen blong ol man we oli obei long God mo presen ya bambae i stap olwe. Be Jisas i talem klia long ol aposol blong hem se hem i stap rerem wan ples blong olgeta “long haos blong Papa blong [hem],” mo se bambae oli stap wetem hem long heven. (Jon 14:​1, 2; Luk 12:32; 1 Pita 1:​3, 4) ?Sipos i olsem, wanem mining blong ol promes ya long saed blong ol blesing long wol? ?Ol promes ya oli stret yet tede? ?Sipos yes, be oli stret long hu?

Plante man blong stadi long Baebol oli talem se “wol ya” we Jisas i tokbaot long Bigfala toktok blong hem antap long Hil, mo “graon” we Ol Sam 37 i tokbaot, i wan pijatok nomo. Long buk ya Bible de Glaire, Fulcran Vigouroux i talem se, ol vas ya oli yusum “wan pijatok we i minim heven mo Jos.” Marie-Joseph Lagrange, wan Franis man we i stadi long Baebol, i talem se promes ya long saed blong wol ya “i no wan promes se ol man we oli gat tingting daon bambae oli tekem graon ya we oli stap laef long hem i blong olgeta, nating se hemia wol naoia no wol we i stretgud olgeta long fiuja. Be promes ya i blong tokbaot ol man we bambae oli stap long kingdom blong heven.” Wan narafala man blong stadi long Baebol i talem se, promes ya i wan “pijatok blong tokbaot heven.” Sam narafala man blong stadi bakegen oli talem se, “promes lan ya Kenan i wan pijatok nomo blong tokbaot wan hom long heven, kingdom blong God, wan ples we God i rerem blong ol man we tingting blong olgeta i stap daon. Hemia semfala mining blong pijatok ya long Ol Sam 37 mo long sam narafala vas bakegen.” ?Be, i stret blong yumi talem se wol ya i no stap long promes ya blong God?

Plan Long Saed Blong Wol Ya

Long stat, wol ya i joen long plan we God i gat blong ol man. Man blong raetem Ol Sam i talem se: “Heven i ples blong Hae God nomo, be wol ya, hem i givim long man.” (Ol Sam 115:16) Taswe, plan we God i gat long saed blong ol man i joen wetem wol ya, i no wetem heven. Jeova i talem long faswan man mo woman blong tufala i mekem se garen blong Iden i kavremap ful wol. (Jenesis 1:28) Plan ya i no blong smoltaem nomo. Jeova i talem long Baebol se wol ya bambae i stap blong olwe. Hem i talem se: “Ol man oli bon long wol ya, oli stap smoltaem nomo, nao oli ded. Biaen, ol narafala man oli bon, oli stap smoltaem, nao biaen olgeta ya tu oli ded bakegen, be wol ya, hem i stap sem mak nomo, i no jenis nating.”​—Prija 1:4; 1 Kronikel 16:30; Aesea 45:18.

Jeova i Hae God mo hem i meksua se ol promes blong hem oli kamtru. From samting ya, oltaem ol promes blong Hem oli stap kamtru. Baebol i yusum plan ya we wota i stap go antap long klaod mo i foldaon bakegen olsem ren, blong soemaot se ol promes blong God oli mas kamtru. Hem i talem se: “Taem ren i kamdaon long heven, mo sno tu, hem i mas gobak long heven, be hem i no save gobak long heven olsem nomo. Fastaem hem i mekem we graon i wetwetgud, nao i save karem frut mo gru. . . . Bambae i mas hapen olsem long tok [blong God] we i kamaot long maot blong mi. I no save kambak long mi sipos i no gat frut blong hem, be bambae i kamaot olsem we mi haremgud long hem, mo bambae i mekem samting we mi mi sanem hem from.” (Aesea 55:​10, 11, NW ) God i mekem ol promes long ol man. Sam taem i save pas fastaem bifo we ol promes ya oli kamtru. Be ol promes ya oli no lus taem ol yia oli pas, nogat. Oli “gobak” long God afta we evri samting we hem i talem oli kamtru.

 Jeova i “harem gud” blong wokem wol ya blong ol man. Long en blong namba sikis dei, hem i talem se evri samting we hem i wokem oli “gud tumas.” (Jenesis 1:​31) Wan long ol plan blong God we i no kamtru yet, hemia se wol ya bambae i kam wan paradaes bakegen we bambae i stap blong olwe. Yes, ol promes blong God ‘oli no save kambak long hem sipos i no gat frut blong olgeta.’ Olgeta promes long saed blong laef we i stretgud olgeta long wol, we ol man bambae oli haremgud blong olwe long hem mo we oli gat pis mo oli sef, bambae oli kamtru.​—Ol Sam 135:6; Aesea 46:10.

Plan Blong God Bambae i Kamtru We i No Save Mestem

Sin blong faswan papa mo mama blong yumi, Adam mo Iv, i blokem blong smoltaem, plan blong God blong mekem wol ya i kam wan paradaes. Afta we tufala i no obei, God i ronemaot tufala long garen. Taswe, tufala i lusum janis ya we tufala i gat blong mekem plan blong Hem i kamtru long saed blong wan paradaes wol we i fulap long ol man we oli stretgud olgeta. Nating se i olsem, God i mekem rod blong plan blong hem i kamtru. ?Olsem wanem hem i mekem samting ya?​—Jenesis 3:​17-19, 23.

Samting we i hapen long garen blong Iden i sem mak long wan man we i stat wokem haos blong hem long wan gudfala yad. Taem hem i putum fandesen blong haos ya finis, wan man i kam mo i spolem wok we hem i mekem. Be man blong bildim haos i no lego plan blong hem. Defren olgeta, hem i faenem rod blong meksua se hem i finisim haos blong hem, nating se i nidim sam moa mane blong wokem haos ya. Hemia i no mekem se faswan plan blong hem i nogud.

Long sem fasin, Jeova i faenem rod blong meksua se plan blong hem i kamtru. Smoltaem afta we faswan papa mama blong yumi i sin, Jeova i talemaot wan hop blong ol pikinini blong tufala, se ‘wan man we i kamaot biaen long Ebraham’ bambae i finisim ol nogud frut blong sin we tufala ya i mekem. Taem profet tok ya i kamtru, i klia we impoten man ya hemia pikinini blong God, Jisas, we i kam long wol mo i givim laef blong hem olsem wan sakrefaes blong pemaot ol man. (Galesia 3:16; Matiu 20:28) Afta we Jisas i laef bakegen long ded mo i go antap long heven, hem i kam King blong Kingdom. Jisas i man ya we i gat tingting daon mo we God i givim wol ya long hem, wetem olgeta ya tu we God i jusumaot olgeta blong oli laef bakegen long heven blong rul wetem Jisas long Kingdom ya. (Ol Sam 2:​6-9) I no longtaem, gavman ya bambae i rul antap long wol ya blong mekem plan blong God i kamtru mo blong mekem wol ya i kam wan paradaes. Plante milian man we oli gat tingting daon, bambae ‘God i givim wol ya long olgeta.’ Hemia i min se bambae oli kasem blesing from rul blong Kingdom ya we Jisas Kraes mo olgeta we oli joen wetem hem oli rul long hem.​—Jenesis 3:15; Daniel 2:44; Ol Wok 2:​32, 33; Revelesen 20:​5, 6.

“Kamaot Long Wol, Olsem We i Kamaot Long Heven”

Long wan vison we aposol Jon i luk, hem i tokbaot tu grup blong man we God bambae i sevem olgeta. Wan grup i go long heven mo narafala grup i stap long wol. Hem i luk ol king we oli stap sidaon long ol jea blong olgeta long heven. Olgeta ya oli sam long ol gudfala disaepol blong Jisas we God i bin jusumaot olgeta long wol ya. Baebol i tokbaot olgeta ya we bambae oli joen wetem Kraes se “oli king, oli rul long olgeta man long wol.” (Revelesen 5:​9, 10) Makem tufala samting we i joen blong mekem plan blong God i kamtru. Wol ya we i kam wan paradaes, i stap aninit long rul blong Kingdom blong heven we Jisas Kraes mo olgeta we oli joen wetem hem oli rul long hem. Olgeta rod ya blong God oli mekem se plan blong hem blong mekem wol ya i kam paradaes bambae i kamtru fulwan.

Long prea we Jisas i tijim ol disaepol blong hem long hem, hem i pulum olgeta blong oli prea long God blong i mekem samting we hem i wantem i “kamaot long wol, olsem we i kamaot long heven.” (Matiu 6:​9, 10, NW ) ?Olsem wanem? ?Tok ya blong Jisas bambae i gat mining sipos wol ya i lus? ?Wanem mining blong prea ya sipos hem i wan pijatok nomo blong tokbaot heven? ?Tok ya bambae i stret sipos olgeta stret man bambae oli go long heven? Samting we God i wantem long saed blong wol ya i kliagud long Baebol, stat long faswan buk blong hem i go kasem ol vison long buk blong Revelesen. Wol ya i mas kam wan paradaes olsem we God i bin tingbaot fastaem. Hemia nao samting we God i wantem se i kamtru. Ol man blong God long wol ya oli prea blong ol samting we God i wantem oli kamtru long wol ya.

Faswan tingting blong Man ya we i Wokem yumi, i blong ol man oli kasem laef we i no save finis long wol ya. God ya i “no save jenis.” (Malakae 3:6; Jon 17:3; Jemes 1:17) Blong bitim wan handred yia finis, Wajtaoa i eksplenem tufala samting ya we oli joen blong mekem plan blong God i kamtru. Ol save ya oli givhan long yumi blong kasem save ol promes blong Baebol long saed blong wan paradaes wol long fiuja. Mifala i askem long yu blong yu tingting dip long poen ya. Yu save storian wetem ol Witnes blong Jeova long saed ya, no yu save raet long wan adres we i stap long magasin ya.

[Futnot]

[Tok blong pija long pej 4]

Baebol i tokbaot klia wan Paradaes we bambae i stap long wol ya long fiuja