Tok Blong Jeova i Wan Samting We i Laef

 Ol Bigfala Poen Long Buk Faef Blong Ol Sam

MAET ol rijman oli talem se: “Ol yang boe blong mifala bambae oli kam strong olsem ol yang tri we oli stap gru gud, mo ol dota blong mifala bambae oli naes olsem ol pos blong kona blong haos blong king we oli katem blong flasem haos ya, . . . ol garen blong mifala oli karem plante kakae, . . . ol sipsip long ol fenis blong mifala bambae oli karem pikinini we i plante we plante.” Mo tu maet man we i gat plante samting i talem se: “Sipos hem i mekem ol samting ya i kamtru long kantri ya blong yumi, bambae yumi glad we yumi glad.” Be defren olgeta, man blong raetem Sam i talem se: “Hae God i God blong yumi, mo from samting ya, yumi save harem gud.” (Ol Sam 144:​12-15) !Tru ya, ol man blong Jeova oli save harem gud! Jeova i wan God we i stap harem gud oltaem mo olgeta we oli mekem wosip long hem oli harem gud tumas. (1 Timoti 1:11) Yumi luk trutok ya long ol laswan singsing ya we oli kamaot long God, hemia Ol Sam 107 kasem 150.

Buk Faef blong Ol Sam i tokbaot ol nambawan fasin blong Jeova olsem lav we i kaengud, lav we i stap tru oltaem mo gud fasin. Moa we yumi save ol fasin blong Jeova, moa we yumi lavem hem mo fraetgud long hem. Samting ya i mekem we yumi harem gud. !Buk Faef blong Ol Sam i givim ol gudfala save long yumi!​—Hibrus 4:12.

HAREM GUD LONG LAV BLONG JEOVA

(Ol Sam 107:​1–119:176)

Ol man Jiu we oli aot long Babilon blong kambak long ples blong olgeta, oli singsing se: “I gud [ol man] oli talem tangkiu long Hae God from fasin blong hem we oltaem hem i lavem olgeta tumas, mo from ol bigbigfala samting we hem i stap mekem blong givhan long olgeta.” (Ol Sam 107:​8, 15, 21, 31) Deved i singsing blong presem God i se: “Fasin blong yu we oltaem yu stap holem ol promes blong yu, hem i hae we i hae, i go antap i kasem ol klaod.” (Ol Sam 108:4) Long nekis singsing ya, Deved i prea se: “Hae God, yu yu God blong mi. Plis yu givhan long mi. Oltaem yu yu lavem mi tumas, plis yu sevem mi.” (Ol Sam 109:​18, 19, 26) Sam 110 i wan profet tok long saed blong rul blong Mesaea. Sam 111:10 i talem se: “Man we i wantem kam waes, nambawan samting blong hem i mekem, hem i mas tinghevi long Hae God, mo i mas ona gud long hem.” Mo nekis Sam i talem se: “Man we i stap ona long [Jeova], mo we i glad blong obei long ol tok blong hem, hem i save harem gud.”​—Ol Sam 112:1.

Ol Halel Sam hemia Ol Sam 113 kasem 118. Oli putum nem ya long Ol Sam ya from we plante taem oli yusum tok ya “Aleluia” no “!Presem Ja!” Buk ya Misna, wan buk we oli raetem long ol yia 200 K.T., * mo we i gat ol rul we ol olfala blong ol man Jiu oli stap talemaot nomo, i talem se: Ol man Jiu oli singsing long ol singsing ya long lafet blong Pasova mo long ol trifala bigfala lafet blong olgeta we oli stap mekem evri yia. Sam 119 i wan Sam we i longfala moa long olgeta Sam mo long olgeta japta blong Baebol tu. Sam ya i pulum yumi blong tinghae long ol tok blong Jeova.

Ansa Blong Sam Kwestin Long Saed Blong Baebol:

109:23​—?Deved i minim wanem taem hem i talem se: “Mi mi olsem sado long sapa, we klosap i lus”? Long vas ya Deved i wantem talem se hem i harem we klosap nomo bambae hem i ded.​—Ol Sam 102:11.

110:​1, 2​—?Jisas Kraes we i “Masta blong [Deved]” i mekem wanem taem hem i stap sidaon long raet saed blong God? Afta we Jisas i laef bakegen, hem i go antap long heven mo i wet long raet saed blong papa blong hem kasem 1914, nao hem i stat rul olsem King. Long taem ya we Jisas i stap wet, hem i rul long ol man blong hem we tabu spirit i makemaot olgeta, i lidim olgeta long wok blong prij mo blong tijim ol man, mo tu hem i stap rerem olgeta blong oli rul wetem hem long Kingdom blong hem.​—Matiu 24:14; 28:​18-20; Luk 22:​28-30.

 110:4​—?Wanem promes ya we Jeova i ‘mekem finis we bambae hem i no harem nogud from’? Promes ya i kontrak ya we Jeova i mekem wetem Jisas Kraes blong wok olsem King mo Hae Pris.​—Luk 22:29.

113:​3 (NW )​—?Long wanem fasin ol man oli presem nem blong Jeova “stat long saed we san i kam antap i go kasem saed we san i godaon”? Hemia i no minim nomo wan grup blong man we i stap wosip long God evri dei. Taem san i kam antap long is mo i godaon long wes, laet blong san i saenem wol ya fulwan. Long sem fasin, long olgeta ples blong wol ol man oli mas presem Jeova. Be blong samting ya i hapen, i mas gat wan ogenaesesen we i traehad blong mekem olsem. Taswe, yumi ol Witnes blong Jeova, yumi glad long nambawan blesing ya we yumi gat blong presem God mo blong wok strong long wok ya blong talemaot Kingdom.

116:​15 (NW )​—?Olsem wanem tok ya i tru se, ‘taem ol man blong Jeova oli ded, hemia wan samting we i sas tumas long ae blong hem’? Ol man blong Jeova oli sas tumas long ae blong hem, mekem se Jeova i no save letem we ful grup blong olgeta i ded. Sipos Jeova i letem blong ol man blong hem oli ded, i olsem we ol enemi blong hem oli gat moa paoa i winim hem. Mo tu, bambae i no moa gat man i laef i stap long wol ya blong oli kam ol faswan man blong laef long niufala wol.

119:71​—?Olsem wanem panis no hadtaem i save mekem i gud long yumi? Hadtaem i save tijim yumi blong trastem Jeova moa, blong prea strong moa long hem, mo blong kamgud moa long fasin blong stadi long Baebol mo blong mekem wanem we Baebol i talem i wok long laef blong yumi. Antap long samting ya, fasin we yumi mekem taem yumi kasem hadtaem, i save mekem yumi luksave ol fasin we yumi nidim blong jenisim. Hadtaem we yumi kasem i no save spolem yumi sipos yumi luk traem ya olsem wan janis blong kamgud moa long sam fasin blong yumi.

119:96​—?Wanem mining blong tok ya se ‘ol gudgudfala samting oli gat en blong olgeta’? Man blong raetem Sam ya i stap tokbaot ol samting we long lukluk blong ol man oli gudfala tumas. Ating hem i stap tingbaot we long tingting blong yumi ol man, ol gudgudfala samting oli no save stap olwe mo oli gud long sam fasin nomo, oli gat mak blong olgeta. Defren olgeta, ol loa blong Jeova oli no gat mak blong olgeta. Oli gud tumas long olgeta haf blong laef blong yumi.

119:164​—?Wanem mining blong tok ya se yumi presem God “seven taem long wan dei”? Long plante ples long Baebol, namba seven i minim wan samting we i fulwan. Taswe, man blong raetem Sam ya i wantem talem se i stret nomo we yumi presem Jeova oltaem.

Ol Lesen blong Yumi:

107:​27-31. Taem Amagedon i kam, waes blong wol ya bambae i ‘no givhan long ol man.’ (Revelesen 16:​14, 16) Waes ya i no save sevem eni man long taem blong trabol ya. Olgeta we oli lukluk i go long Jeova blong i sevem olgeta, olgeta nomo bambae oli laef i stap blong “talem tangkiu long [hem] from fasin blong hem we oltaem hem i lavem olgeta tumas.”

109:​30, 31 (NW ); 110:5. From we soldia i karem naef blong faet long raet han blong hem mo i karem sil long lef han, ale sil ya i no save blokem raet han blong hem. Jeova i stap long “raet han” blong ol man blong hem, blong faet long saed blong olgeta. Hem i protektem mo halpem olgeta. !Hemia wan bigfala risen blong yumi “talem tangkiu tumas long [hem]!”

113:​4-9. Jeova i hae tumas taswe hem i mas mekem hem wan i stap daon “blong lukluk i kamdaon long skae.” Nating se hem i hae olsemia, hem i gat sore long olgeta we oli stap trabol, ol puaman, mo ol woman we oli no save karem pikinini. Haefala God ya Jeova i gat tingting daon mo hem i wantem we ol man we oli mekem wosip long hem, olgeta tu oli mas gat tingting daon.​—Jemes 4:6.

114:​3-7. Taem yumi lanem ol nambawan wok we Jeova i mekem blong givhan long ol man blong hem long Red Si, long Jodan Reva, mo long Hil ya Sinae, samting ya i mas gat bigfala paoa long yumi. “Graon” long vas ya i pija blong ol man, mo sam Baebol oli talem long vas ya se graon i mas “harem i soa” (vas 7 long NW ). Hemia i min se ol man oli mas gat bigfala respek mo ona long Masta blong yumi.

119:​97-101. Waes mo save we yumi kasem long Tok blong God i protektem yumi long saed blong spirit.

119:105. Tok blong God i olsem wan laet blong soemaot rod long yumi. Hemia i min se hem i save givhan long yumi blong dil wetem ol problem we yumi stap fesem long laef blong yumi tede. Olsem wan laet we i stap saenem rod blong yumi, Baebol i talemaot plan blong God long saed blong fiuja.

STAP GLAD NATING SE I GAT TRABOL

(Ol Sam 120:​1–145:21)

?Olsem wanem yumi save stanap strong nating we yumi kasem bigfala trabol mo traem? Ol Sam 120 kasem 134 i givim klia ansa long kwestin ya. Bambae yumi save stanap strong tru long ol hadtaem mo  yumi no lusum glad blong yumi, sipos yumi lukluk i go long Jeova blong i halpem yumi. Ol Sam ya we nem blong olgeta, Singsing blong Asen, oli ol singsing we ating ol man Isrel oli singim taem oli stap wokbaot i go antap long Jerusalem evri yia blong mekem lafet.

Ol Sam 135 mo 136 i tokbaot Jeova olsem Man We i Mekem olgeta samting we hem i wantem. Hem i defren olgeta long ol aedol we oli no save mekem wan samting nating. Long Sam 136, fashaf blong ol vas oli singsing blong talem tangkiu mo lashaf long ol vas i tokbaot from wanem oli stap talem tangkiu. Sam 137 i tokbaot ol man Jiu taem oli stap long Babilon mo oli harem nogud from oli wantem mekem wosip long Jeova long Saeon. Sam 138 kasem 145 oli ol singsing blong Deved. Hem i wantem ‘presem [Jeova] wetem olgeta tingting blong hem.’ ?From wanem? Hem i talem se: “Yu yu mekem mi long fasin we i narafala, mo i nambawan olgeta.” (Ol Sam 138:1; 139:14) Long Sam 140 kasem 144, Deved i prea long Jeova blong i protektem hem long ol man nogud, i prea se ol gudfala man bambae oli stretem hem, i prea blong Jeova i tekemaot hem long han blong ol enemi blong hem, mo blong i lidim hem blong i mekem ol gudfala fasin. Deved i tokbaot glad blong ol man blong Jeova. (Ol Sam 144:15) Afta we Deved i tokbaot bigfala paoa mo gudfala fasin blong Jeova, hem i talem se: “Oltaem bambae mi mi presem [Jeova]. Nem blong hem i tabu, mo i gud olgeta samting we hem i mekem oli stap presem hem oltaem, gogo i no save finis.”​—Ol Sam 145:21.

Ansa Blong Sam Kwestin Long Saed Blong Baebol:

122:3​—?Olsem wanem Jerusalem i wan taon we “oli wokem i gud tumas”? Olsem ol taon bifo, ol haos long Jerusalem, oli wokem olgeta kloklosap long olgeta. Ol haos long taon ya oli fasfas mekem se i isi blong blokem ol enemi blong olgeta. Mo tu, from we ol haos oli stap kloklosap long olgeta, ol man we oli laef long taon ya oli harem se oli save trastem ol man we oli stap klosap long olgeta blong oli givgivhan long olgeta mo protektem olgeta. Hemia i soemaot fasin joengud long saed blong spirit blong ol 12 laen blong Isrel taem oli stap wanples blong mekem wosip long Jeova.

123:2​—?Pijatok ya long saed blong wok boe mo gel we i stap lukluk i go long masta, i blong tijim yumi long wanem samting? Ol boe mo ol gel blong wok oli stap luk long masta no misis blong olgeta from tu risen: blong masta no misis i talem long olgeta wanem samting we hem i wantem blong oli mekem, mo blong i lukaotgud long olgeta mo givhan long olgeta long saed blong ol samting we oli nidim long laef. Long sem fasin, yumi lukluk i go long Jeova blong traem luksave wanem samting we hem i wantem mo blong yumi kasem blesing blong hem.

131:​1-3​—?Olsem wanem tingting blong Deved i “kwaet we i kwaet, olsem pikinini we [“i no moa titi,” NW ] i ledaon kwaet long han blong mama blong hem”? Wan pikinini we i no moa titi i lanem blong harem gud mo stap kwaet taem hem i stap long han blong mama blong hem. Long sem fasin, Deved i lanem blong mekem tingting blong hem i stap kwaet, “olsem pikinini we [“i no moa titi,” NW ] i ledaon kwaet long han blong mama blong hem.” ?Olsem wanem Deved i mekem samting ya? Hem i mekem olsem taem hem i no flas mo i no tinghae tumas long hem wan, mo taem hem i no ronem ol samting we oli strong tumas blong hem i mekem. Hem i no traem blong kasem haenem. Defren olgeta, Deved i luksave ol mak we hem i naf blong kasem mo hem i soemaot tingting daon. Yumi waes sipos yumi folem fasin blong Deved, speseli taem yumi wantem kasem wan wok insaed long kongregesen.

Ol Lesen Blong Yumi:

120:​1, 2, 6, 7. Ol man we oli giagiaman long saed blong narafala, mo ol man we oli talem ol tok blong stikim narafala, oli save mekem narafala i harem nogud bitim mak. Wan rod blong soemaot we yumi man blong “pis,” hemia blong lukaotgud long ol toktok blong yumi.

 120:​3, 4. Sipos wan “man blong giaman” i bin trikim yumi, yumi mas harem gud nomo from we yumi save se Jeova bambae i stretem bisnes ya long stret taem blong hem. Ol man blong giaman bambae oli mas kasem panis long han blong wan strong “soldia.” Hemia i soem se bambae oli kasem jajmen blong Jeova olsem we ‘faea i bonem olgeta.’

127:​1, 2. Long evri samting we yumi mekem, yumi mas lukluk i go long Jeova blong i lidim yumi.

133:​1-3. Fasin joengud blong ol man blong Jeova i leftemap tingting, i gud, mo i mekem yumi harem gud. Yumi no mas mekem ol fasin we oli save spolem fasin joengud ya, olsem, faenem poen long narafala, raorao, mo komplen.

137:​1, 5, 6. Ol man blong Jeova we oli stap kalabus long Babilon oli no fogetem Saeon, we i bin stap olsem pija blong ogenaesesen blong Jeova long wol. ?Olsem wanem long yumi? ?Yumi stap tru olwe long ogenaesesen we Jeova i stap yusum tede?

138:2. Jeova i ‘soemaot we nem blong hem mo ol tok we hem i putum, tufala i hae we i hae, i winim ol narafala samting.’ Tok ya i minim olgeta promes we hem i mekem long nem blong hem. Ol promes ya bambae oli kamtru long wan fasin we i bigwan moa i bitim samting we yumi save tingbaot. Yes, wan nambawan fiuja i stap long fored blong yumi.

139:​1-6, 15, 16. Jeova i save ol wok blong yumi mo ol tingting blong yumi, mo taem yumi no tok yet be hem i save finis ol samting we yumi wantem talem. Taem yumi jes stat long bel blong mama blong yumi mo ol bun blong yumi oli no joengud yet, be hem i save yumi finis. Fasin blong God blong save yumi wanwan i “dip we i dip,” yumi no naf blong kasem save long hem. !Yumi rili haremgud blong save se Jeova i stap luk ol trabol we yumi stap kasem, mo hem i kasem save tu olsem wanem ol trabol ya oli spolem yumi!

139:​7-12. Nomata se yumi stap long ples we i longlongwe mo i haed, be Jeova i save mekem yumi strong.

139:​17, 18. ?Olsem wanem? ?Save blong Jeova i mekem yumi harem gud? (Ol Proveb 2:10) Sipos yes, yumi faenem finis stamba blong glad we i no gat en blong hem. Ol tingting blong Jeova “oli plante moa, i winim sanbij long solwota.” Bambae i gat plante moa samting blong lanem long saed blong Jeova, gogo i no save finis.

139:​23, 24. Yumi mas wantem we Jeova i lukluk gud long ol tingting blong yumi blong luk sipos i gat “sam samting nogud”​—olsem ol tingting we oli no klin mo ol samting nogud we sin i pulum yumi blong wantem. Mo yumi mas wantem we Jeova i halpem yumi blong sakemaot ol tingting ya.

143:​4-7. ?Olsem wanem yumi save winim ol hadtaem we oli strong tumas? Man blong raetem Sam i talem long yumi wanem we yumi mas mekem: Yumi mas tingting dip long ol wok blong Jeova, yumi no mas fogetem ol samting we Jeova i mekem long yumi, mo yumi mas prea long hem blong i halpem yumi.

‘!YUMI MAS PRESEM JA!’

Buk Wan kasem Buk Fo blong Ol Sam oli finis wetem wan tok blong presem Jeova. (Ol Sam 41:​13; 72:​19, 20; 89:52; 106:48) Buk Faef i finis wetem semfala tok ya bakegen. Ol Sam 150:6 i talem se: “Yumi olgeta samting we yumi gat laef, yumi evriwan i mas presem [“Ja,” NW ]. !Oltaem yumi mas presem [Ja]!” Tok ya bambae i kamtru fulwan long niufala wol we God bambae i mekem.

Taem yumi stap wet blong luk nambawan taem ya, i gat plante samting i stap we i save pulum yumi blong presem trufala God mo leftemap nem blong hem. Taem yumi stap tingbaot glad we yumi gat from we yumi save Jeova mo from we yumi gat wan gudfala fasin fren wetem hem, samting ya i mas pusum yumi blong presem hem wetem wan tingting we i fulap long tangkiu.

[Futnot]

[Tok blong pija long pej 9]

Yumi sapraes long ol nambawan wok blong Jeova

[Tok blong pija long pej 10]

Ol tingting blong Jeova “oli plante moa, i winim sanbij long solwota”