?Olsem Wanem Blong Kam Long ‘Man Blong Harem Prea’?

“Yu we yu stap harem prea, ol man blong olgeta laen bambae oli kam long yu.—OL SAM 65:​2, NW.

1. ?Wanem i mekem se ol man mo woman oli defren long ol narafala laef samting? ?Hemia i openem rod blong yumi gat wanem janis?

 I GAT plante taosen defren kaen laef samting long wol. Be i gat wan kaen nomo we oli naf blong wosipim Man we i Wokem olgeta. Hemia ol man mo woman. Ol man mo woman nomo oli luksave se oli nidim blong wosipim God, mo olgeta oli harem se oli wantem mekem wosip long hem. Hemia i openem rod blong yumi wanwan i gat nambawan janis ya blong frengud wetem Papa blong yumi long heven.

2. ?Sin i mekem wanem trabol i kamaot long fasin fren blong man wetem God?

² God i wokem man blong hem i naf blong kam long Man we i Wokem hem. Fastaem Adam mo Iv i no gat sin. From samting ya, tufala i save kam long God enitaem nomo, olsem wan pikinini we i save toktok wetem papa blong hem enitaem. Be taem tufala i mekem sin, tufala i lusum nambawan blesing ya. Tufala i brekem loa blong God ale tufala i lusum gudfala fasin fren we tufala i gat wetem hem. (Jenesis 3:​8-13, 17-24) ?Olsem wanem? ?Hemia i min se ol pikinini blong Adam we oli gat sin oli no save toktok wetem God? Si, Jeova i letem olgeta oli kam long hem yet. Be blong kam long hem, i gat sam samting we oli mas mekem. ?Wanem ol samting ya?

?Yumi Mas Mekem Wanem Blong Yumi Save Kam Long God?

3. ?Ol sinman oli mas gat wanem blong oli save kam long God? ?Stori blong hu i soemaot samting ya?

³ Samting we tufala boe blong Adam i mekem, i givhan long yumi blong luksave wanem samting we God i wantem ol sinman blong mekem, blong oli save kam long Hem. Ken mo Ebel tugeta i mekem sakrefaes blong kam long God. God i glad long sakrefaes blong Ebel, be hem i no wantem sakrefaes blong Ken. (Jenesis 4:​3-5) ?Wanem samting i mekem se sakrefaes blong tufala i no sem mak? Hibrus 11:4 i talem se: “Ebel i stap bilif strong long God, taswe hem i givim wan presen i go long God, we i gud moa, i winim presen blong Ken. Mo from we hem i stap bilif strong long God olsem, taswe God i soemaot long hem se hem i wan stret man.” I klia se bilif nao i wan samting we man i mas gat blong hem i save kam long God. Be taem yumi ridim tok we Jeova i talem long Ken, yumi luk wan narafala samting bakegen we yumi nidim. Jeova i talem se: “Sipos fasin blong yu i stret, bambae mi mi glad long yu.” Yes, God bambae i glad blong letem Ken i kam long hem sipos Ken i mekem fasin blong hem i stret. Be Ken i no wantem lesin long advaes ya we God i givim long hem, ale hem i kilim Ebel i ded. From samting ya, long ful laef blong hem, hem i no gat prapa ples blong hem, be hem i stap wokbaot olbaot nomo. (Jenesis 4:​7-12) Ale yumi luk se stat long taem bifo olgeta, man i mas gat bilif mo gudfala fasin blong hem i save kam long God.

4. ?Yumi mas luksave wanem samting taem yumi wantem kam long God?

⁴ Sipos yumi wantem kam long God, i impoten we yumi luksave se fasin blong sin i stap long yumi. Olgeta man oli sinman, mo sin i save blokem man blong i no save kam long God. Profet Jeremaea i raetem tok ya long saed blong Isrel se: “Hae God, mifala i mekem sin . . . Kros ya blong yu i strong tumas, i olsem klaod we i tik tumas, nao ol prea blong mifala i no save gotru long hem.” (Ol Krae 3:​42, 44) Nating se yumi evriwan i sinman, long olgeta yia we oli pas finis, God i soemaot  se hem i glad blong lesin long prea blong olgeta we oli kam long hem wetem bilif, stret tingting, mo we oli glad blong obei long ol loa blong hem. (Ol Sam 119:145) ?Hu nao sam long olgeta ya? ?Yumi save lanem wanem from ol prea blong olgeta?

5, 6. ?Yumi save lanem wanem from fasin blong Ebraham taem hem i kam long God?

⁵ Wan long ol man ya, hemia Ebraham. Yumi save se God i letem Ebraham i kam long hem, from we God i talem se Ebraham i ‘fren blong hem.’ (Aesea 41:8) ?Yumi save lanem wanem from fasin blong Ebraham taem hem i kam long God? Olfala ya we i gat strong bilif i stap toktok long Jeova long saed blong hu bambae i kasem ol samting blong hem afta we hem i ded, i se: “[“?Bambae yu givim wanem long mi?,” NW ] Mi mi no gat pikinini blong mi we bambae i holem olgeta samting we mi mi gat.” (Jenesis 15:​2, 3; 17:18) Long wan narafala taem, Ebraham i talem long Jeova se hem i wari long ol man long tufala rabis taon ya, Sodom mo Gomora, se hu long olgeta bambae oli stap sef taem God i jajem olgeta. (Jenesis 18:​23-33) Ebraham i prea from ol narafala tu. (Jenesis 20:​7, 17) Mo plante taem Ebraham i mekem olsem Ebel, hem i givim wan presen long Jeova taem i wantem kam long hem.​—Jenesis 22:​9-14.

⁶ Long olgeta taem ya, Ebraham i no fraet blong toktok wetem Jeova. Nating se i olsem, oltaem hem i gat tingting daon long fored blong Man ya we i Wokem hem. Makemgud ol tok long Jenesis 18:27 we Ebraham i talem wetem bigfala respek, se: “Masta, plis yu no tingbaot we mi mi man nomo, nao mi girap long fes blong yu blong tokbaot samting ya. Mi save we mi mi no gat raet blong tok.” !Hemia nambawan fasin blong folem!

7. ?Ol man blong Jeova bifo oli tokbaot wanem long ol prea blong olgeta?

⁷ Ol man blong bifo oli prea long Jeova from ol defdefren samting, mo Jeova i harem prea blong olgeta. Jekob i mekem wan prea we i olsem wan strong promes long God. Jekob i askem long God blong i givhan long hem, nao biaen, hem i mekem promes ya se: “Bambae mi mi seraot olting ya we bambae yu yu givim long mi, long ten hif, nao bambae mi givim wan hif i gobak long yu bakegen.” (Jenesis 28:​20-22) Samtaem biaen, Jekob i mas go mitim brata blong hem, nao hem i plis long Jeova blong i lukaotgud long hem. Hem i prea se: “Hae God, plis yu blokem brata blong mi [Esao], yu sevem mi. Mi mi fraet.” (Jenesis 32:​9-12) Job tu i kam long Jeova, i mekem sakrefaes i go long hem long bihaf blong famle blong hem. Taem trifala fren blong Job i mekem sin long ol toktok blong olgeta, Job i prea long bihaf blong trifala, mo Jeova i “harem prea blong Job.” (Job 1:5; 42:​7-9) Ol stori ya oli givhan long yumi blong luksave wanem samting yumi save tokbaot taem yumi prea long Jeova. Mo tu, yumi luk se Jeova i glad blong lesin long ol prea blong ol man we oli kam long hem folem fasin we hem i wantem.

 Aninit Long Kontrak Blong Loa

8. ?Aninit long Loa, olsem wanem neson blong Isrel i kam long Jeova blong tokbaot wan bisnes?

⁸ Afta we Jeova i mekem rod blong ol man Isrel oli kamaot long Ijip, hem i mekem kontrak blong Loa wetem olgeta. Loa i talem se rod blong kam long God, hemia tru long ol pris we God i putumap. Sam Livaet oli mekem wok blong pris blong ol man Isrel. Taem neson ya i nidim blong tekem wan impoten desisen, wan man i prea long God long bihaf blong neson ya. Plante taem hemia king no wan profet we i prea. (1 Samuel 8:​21, 22; 14:​36-41; Jeremaea 42:​1-3) Olsem nao, taem oli openem tempol, King Solomon i prea long Jeova wetem olgeta hat blong hem. Mo Jeova i soemaot se hem i harem prea blong Solomon taem hem i mekem se laet i kam fulap insaed long tempol. Mo hem i talem se: “Olgeta prea we bambae yufala i mekem long ples ya, bambae mi rere blong harem olgeta.”​—2 Kronikel 6:​12–7:​3, 15.

9. ?Ol man Isrel oli mas mekem wanem blong oli save kam long Jeova long tempol?

⁹ Long Loa we Jeova i givim long ol man Isrel, hem i talem wan samting we oli mas mekem blong hem i glad blong letem olgeta oli kam long hem long tempol. ?Oli mas mekem wanem? Evri moning mo evri sapa, hae pris i mas kilim anamol blong bonem olsem sakrefaes, mo tu, hem i mas bonem insens i go long Jeova olsem wan presen. Afta we sam taem i pas, ol pris we oli daon moa long hae pris, olgeta tu oli mekem wok ya, be oli no save mekem long Dei blong Stretem ol Sin. Sipos ol pris oli no soem ona mo respek olsem long Jeova, bambae Jeova i no glad long wok blong olgeta.​—Eksodas 30:​7, 8; 2 Kronikel 13:11.

10, 11. ?Wanem i soemaot se Jeova i save harem prea blong wanwan man?

¹⁰ ?Ol man Isrel bifo oli save kam long God tru long ol man we Hem i makemaot olgeta nomo? Nogat. Baebol i soem se Jeova i glad tu blong harem prea blong ol man wanwan. Long prea we Solomon i mekem blong openem haos blong God, hem i talem long Jeova se: “Mifala i man blong yu, mo sipos i gat sam long mifala [ “no olgeta man Isrel wantaem,” NW ] we oli . . . leftemap han blong olgeta blong prea long yu, nating we yu yu stap long hom blong yu long heven, be plis yu harem prea blong olgeta.” (2 Kronikel 6:​29, 30) Buk blong Luk i talem se taem Sekaraea we i papa blong Jon Baptaes i bonem insens long tempol, wan bigfala hip blong ol man blong Jeova we oli no pris, oli “stap afsaed, oli stap prea.” I luk olsem se kastom blong ol man i blong hivap afsaed long tempol, blong oli prea long semtaem we pris i stap bonem insens i go long Jeova long olta we oli wokem long gol.​—Luk 1:​8-10.

¹¹ Taswe, Jeova i glad blong harem prea blong man we i prea long bihaf blong ful neson, mo prea blong ol wanwan man tu, sipos oli folem stret rod we hem i makemaot blong kam long hem. Tede yumi no moa stap aninit long kontrak blong Loa. Nating se i olsem, yumi save lanem sam impoten samting long saed blong prea taem yumi luk olsem wanem ol man Isrel bifo oli bin kam long God.

?Olsem Wanem Kristin Kongregesen i Kam Long Jeova?

12. ?Wanem rod i stap blong ol Kristin oli save kam long Jeova?

¹² Tede yumi stap aninit long plan blong Kristin kongregesen. I no moa gat wan tempol we ol pris oli go long hem blong prea long bihaf blong ol man blong God, mo we yumi lukluk i go long hem taem yumi prea long God. Nating se i olsem, Jeova i gat wan rod yet blong yumi save kam long  hem. ?Wanem rod ya? Long yia 29 K.T., tabu spirit i kamdaon long Jisas nao God i mekem hem i kam Hae Pris. Long taem ya, wan tempol long saed blong spirit i stat blong wok. * Tempol ya i niufala rod blong kam long Jeova, mo blong mekem wosip long hem. Niufala rod ya i stanap long sakrefaes blong Jisas Kraes we i tekemaot sin blong yumi.​—Hibrus 9:​11, 12.

13. ?Long saed blong prea, wanem samting long tempol blong Jerusalem we i sem mak long tempol long saed blong spirit?

¹³ Plante samting long tempol long Jerusalem oli pija blong samting long tempol long saed blong spirit. Sam long olgeta oli joen wetem prea. (Hibrus 9:​1-10) Olsem nao, evri moning mo sapa long tempol oli bonem insens long wan olta we i stap long Rum we i Tabu. ?Hemia i pija blong wanem? Buk blong Revelesen i talem se ‘insens ya i olsem ol prea blong ol man blong God.’ (Revelesen 5:8; 8:​3, 4) Tabu spirit i pulum Deved blong raetem se: “Plis yu letem prea blong mi i kam long yu olsem smok blong insens we man i bonem i kam long yu.” (Ol Sam 141:2) Taswe, insens we smel blong hem i gud, i wan stret pija blong ol prea blong ol Kristin mo fasin blong olgeta blong presem Jeova.​—1 Tesalonaeka 3:10.

14, 15. (a) ?Olsem wanem long fasin blong ol tabu Kristin blong kam long Jeova? (b) ?Olsem wanem long fasin blong “ol narafala sipsip” blong kam long Jeova?

¹⁴ ?Hu i save kam long God long tempol ya long saed blong spirit? Long tempol bifo, ol pris mo Livaet oli gat blesing ya blong wok long smol yad blong tempol, be ol pris nomo oli gat raet blong go insaed long Rum we i Tabu. Ol Kristin we tabu spirit i makemaot olgeta blong oli laef long heven, oli gat wan spesel fasin long saed blong spirit. Smol yad blong tempol mo Rum we i Tabu, tufala i pija blong spesel fasin ya blong prea long God mo presem hem.

¹⁵ ?Olsem wanem long olgeta we bambae oli laef long wol ya, hemia “ol narafala sipsip”? (Jon 10:16) Profet Aesea i soemaot se “long laswan haf blong ol dei,” plante man blong olgeta kantri bambae oli kam mekem wosip long Jeova. (Aesea 2:​2, 3, NW ) Hem i talem tu se “ol man blong ol narafala kantri” bambae oli kam long Jeova. God i soemaot se hem i glad blong letem olgeta oli kam long hem, i se: ‘Bambae mi mekem yufala i glad sipos yufala i kam long haos blong mi blong prea.’ (Aesea 56:​6, 7) Revelesen 7:​9-15 (NW ) i givim moa save. Hem i tokbaot “wan bigfala kampani blong man” we oli kamaot long “olgeta kantri,” nao oli kam hivap long bigfala yad blong tempol long saed blong spirit. Oli stap prea mo mekem wosip long God “long dei mo long naet.” !Yumi haremgud tumas blong save se ol man blong God tede oli save kam long hem enitaem, wetem strong tingting se bambae hem i harem prea blong olgeta!

?Jeova i Harem Wanem Kaen Prea?

16. ?Ol faswan Kristin oli tijim yumi long wanem samting long saed blong prea?

¹⁶ Ol faswan Kristin oli ol man blong prea. ?Oli prea long saed blong wanem? Ol elda long faswan Kristin kongregesen oli bin askem Jeova blong lidim olgeta taem oli jusum ol man blong mekem wok insaed long ogenaesesen blong hem. (Ol Wok 1:​24, 25; 6:​5, 6) Epafras i prea from ol Kristin brata mo sista blong hem. (Kolosi 4:12) Olgeta long kongregesen blong Jerusalem oli prea from Pita taem hem i stap long kalabus. (Ol Wok 12:5) Ol faswan Kristin oli askem long God blong i halpem olgeta blong oli no fraet taem ol man oli  agensem olgeta. Oli se: “Hae God, naoia plis yu makemgud ol strong tok ya we oli stap mekem agens long mifala. Mifala i man blong wok blong yu. Plis yu givhan long mifala, blong bambae mifala i talemaot ol tok blong yu, we tingting blong mifala i strong.” (Ol Wok 4:​23-30) Disaepol Jemes i talem long ol Kristin se oli mas prea blong askem God blong i givim waes long olgeta taem oli kasem traem. (Jemes 1:5) ?Olsem wanem long yu? ?Yu yu stap askem Jeova blong halpem yu blong gat ol fasin ya?

17. ?Jeova i harem prea blong hu?

¹⁷ God i no stap harem prea blong olgeta man evriwan. ?Sipos i olsem, olsem wanem yumi save gat strong tingting se bambae God i harem prea blong yumi? Ol man we God i harem prea blong olgeta long taem bifo, oli kam long hem wetem hat we i tru mo wetem stret tingting. Oli gat bilif mo oli mekem ol gudfala wok blong soemaot bilif ya. Yumi save sua se Jeova bambae i harem prea blong ol man tede we oli gat ol semfala fasin ya.

18. ?Sipos ol Kristin oli wantem se God i harem prea blong olgeta, oli mas mekem wanem?

¹⁸ I gat wan moa samting yet we yumi mas mekem. Aposol Pol i eksplenem samting ya, i se: “Tru long hem . . . wan spirit nomo i tekem yumi i kam long Papa blong yumi.” ?Pol i stap tokbaot hu, taem i talem “tru long hem”? Hemia tru long Jisas Kraes. (Efesas 2:​13, 18, NW ) Yes, tru long Jisas nomo, yumi save kam long Papa blong yumi, we i no gat wan samting i blokem yumi.​—Jon 14:6; 15:16; 16:​23, 24.

19. (a) ?Wetaem Jeova i no wantem nating blong harem smel blong insens we ol man Isrel oli bonem? (b) ?Olsem wanem ol prea blong yumi oli save kam olsem insens we Jeova i laekem tumas smel blong hem?

¹⁹ Olsem yumi luk finis, insens we ol pris long Isrel oli bonem, hem i pija blong ol prea blong ol man blong God, we God i glad blong harem. Be sam samtaem, Jeova i no bin wantem nating blong harem smel blong insens we ol man Isrel oli bonem long olta. ?From wanem? From we, long semtaem we oli stap bonem insens long tempol, oli stap mekem wosip long ol aedol. (Esikel 8:​10, 11) Tede tu, Jeova i no save harem prea blong olgeta we oli talem se oli wosipim hem be long semtaem oli stap mekem fasin we i agensem loa blong hem. Ol prea blong olgeta i olsem insens we smel blong hem i nogud. (Ol Proveb 15:8) From samting ya, yumi mas mekem laef blong yumi i stap klin oltaem. Olsem nao, ol prea blong yumi bambae oli olsem insens we God i laekem tumas smel blong hem. Jeova i laekem tumas ol prea blong olgeta we oli folem ol stret rod blong hem. (Jon 9:31) Be i gat sam kwestin i stap yet. ?Yumi mas prea olsem wanem? ?Yumi save tokbaot wanem long ol prea blong yumi? ?Olsem wanem God i stap ansa long ol prea blong yumi? Nekis stadi bambae i tokbaot ansa blong ol kwestin ya wetem sam narafala kwestin bakegen.

[Futnot]

?Yu Yu Save Eksplenem?

• ?Olsem wanem ol sinman oli save kam long God long rod we hem i glad long hem?

• ?Long ol prea blong yumi, olsem wanem yumi save mekem olsem ol man blong God bifo?

• ?Yumi lanem wanem from ol prea blong ol faswan Kristin?

• ?Wetaem ol prea blong yumi oli olsem insens we God i laekem tumas blong harem smel blong hem?

[Kwestin]

[Tok blong pija long pej 23]

?From wanem God i laekem sakrefaes blong Ebel be i no laekem sakrefaes blong Ken?

[Tok blong pija long pej 24]

‘Mi mi man nomo, mi no gat raet blong tok’

[Tok blong pija long pej 25]

‘Bambae mi seraot olting we yu givim long mi long ten hif, nao bambae mi givim wan hif i gobak long yu’

[Tok blong pija long pej 26]

?Ol prea blong yu oli olsem insens we Jeova i laekem tumas blong harem smel blong hem?