Wan Kwestin

?Afta we ol man oli winim laswan traem long en blong Wan Taosen Yia Rul blong Kraes, bambae i save gat wan man we i mekem sin bakegen mo i ded from?

Long buk blong Revelesen i gat tu vas we tufala i save givhan long yumi blong faenem ansa long kwestin ya. Faswan i talem se: “Ded wetem Hades, oli sakem tufala i go long lugun blong faea. Lugun blong faea ya, hemia seken ded ya.” (Revelesen 20:​14, NW ) Narafala vas i talem se: “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”​—Revelesen 21:4.

Makem gud wanem taem we tufala vas ya bambae i kamtru. Fastaem, God bambae i mekem laswan jajmen long olgeta we oli laef tru long Amagedon, wetem olgeta we oli laef bakegen long ded, mo olgeta we oli bon afta long Amagedon. Hem i jajem olgeta folem ol samting we “hem i bin raetemdaon long ol buk,” hemia ol samting we hem i wantem ol man blong mekem long wan taosen yia ya. Afta long jajmen ya, bambae hem i sakem ‘ded mo Hades’ (NW ) i go long lugun blong faea. (Revelesen 20:​12, 13) Long Revelesen japta 21, aposol Jon i raetemdaon wan narafala vison we bambae i kamtru long taem blong Wan Taosen Yia Rul blong Jisas Kraes. Vison ya bambae i jes kamtru fulwan long en blong Jajmen Dei ya blong wan taosen yia. Long taem ya, Jisas bambae i givim kingdom i gobak long Papa blong hem, ale, i olsem we Jeova i stap fulwan wetem ol man. Hemia i min se oli no moa nidim wan man blong stanap long fes blong God from olgeta. Bambae i olsem we Jeova hem wan i stap wetem ‘ol man blong hem’ blong olwe. From we ransom sakrefaes blong Kraes bambae i wok fulwan, ol man bambae oli kam stretgud olgeta. Nao long taem ya, promes ya se “i no moa gat man i ded” bambae i kamtru.​—Revelesen 21:​3, 4.

Ol vas ya antap oli stap tokbaot ded we i kamaot from sin blong Adam. Ransom sakrefaes blong Jisas bambae i karemaot ded ya. (Rom 5:​12-21) Taem ded ya i finis, bambae ol man oli stret gud olgeta, olsem Adam fastaem. Be nating se Adam i stretgud olgeta, hem i ded. Jeova i bin talem long hem se hem i no mas kakae long ‘tri ya we frut blong hem i mekem hem i save ol fasin we i gud, mo ol fasin we i nogud.’ Jeova i talem se: “Sipos yu kakae frut blong hem, be long sem dei nomo, bambae yu ded.” (Jenesis 2:17) Ded ya i kamaot from wan sin we Adam i minim nomo blong mekem. Afta long laswan traem long en blong Wan Taosen Yia Rul blong Kraes, ol man bambae oli fri yet blong mekem jus blong olgeta wanwan. (Revelesen 20:​7-10) Bambae oli fri yet blong jusum sipos oli wantem gohed blong mekem wok blong Jeova no oli no wantem. Maet bambae wan man i save tanem baksaed long Jeova olsem we Adam i bin mekem, be yumi no save talem se samting ya bambae i kamtru no nogat.

?Afta long laswan traem, taem ded mo Hades i no moa gat, wanem bambae i hapen long man we i jusum blong rebel? Long taem ya, bambae i no moa gat ded we i kamaot long Adam. Bambae i no moa gat Hades no beregraon, mo bambae i no moa gat janis blong laef bakegen. Nating se i olsem, bambae Jeova i save kilim i ded man ya we i wantem rebel. Hem i save sakem hem i go long lugun blong faea we i min se man ya i no moa save laef bakegen samtaem. Ded ya, hem i olsem ded we i kasem Adam mo Iv. Hem i defren long ded ya we Adam i pasem long ol man.

Be yumi no nid blong ting se bambae samting ya i hapen. Olgeta we oli gotru long laswan traem bambae oli defren long Adam long wan fasin we i impoten tumas. Laswan traem ya bambae i traem ol man fulwan. Yumi save sua long samting ya from we Jeova i save olsem wanem blong jekem evri samting long saed blong wan man. Yumi save sua se long laswan traem, olgeta we oli yusum fasin fri blong olgeta blong jusum rod we i no stret, bambae oli lus. Taswe, i tru se afta we man i winim laswan traem finis, hem i save jusum yet blong rebel agens long God, mo bambae hem i lus from. Be bambae yumi sapraes sipos wan man i mekem olsemia.

[Tok blong pija long pej 11]

?Afta long laswan traem, long wanem fasin bambae ol man oli olsem Adam?