‘Yufala i Harem Finis We Job i Stanap Strong’
‘Yufala i Harem Finis We Job i Stanap Strong’
“Yufala i harem finis tok blong fasin blong Job, we hem i [“stanap strong,” NW ]. Mo yufala i save finis ol samting we Hae God i mekem long hem biaen. Hae God i kaen tumas, mo hem i gat sore long man.”—JEMES 5:11.
1, 2. ?Wanem traem we wan man mo woman Polan i kasem?
WAN yia bifo we ami blong Hitler i winim taon ya Danzig (naoia oli kolem Gdańsk) long not blong kantri ya Polan, man ya Harald Abt i kam wan Witnes blong Jeova. Biaen, ol trufala Kristin long ples ya oli kasem hadtaem, mo laef blong olgeta i stap long denja. Ol Gestapo oli traem blong fosem Harald blong saenem wan pepa we i talem se hem i lego bilif blong hem. Be Harald i no wantem. Oli sakem Harald i go long prisen blong sam wik, mo biaen, oli sanem hem i go long rabis kalabus blong ol Nasi long Sachsenhausen. Long ples ya, oli talem ol tok blong traem mekem hem i fraet mo oli kilim hem bakegen mo bakegen. Wan gad blong prisen ya i poen i go long ples we oli bonem ol dedbodi long hem, nao i talem long Harald se: “Sipos yu no lego bilif blong yu, long 14 dei, smok blong dedbodi blong yu bambae i go antap go kasem Jeova ya we yu stap wosipim.”
2 Taem ol polis oli holem Harald, woman blong hem we nem blong hem Elsa, i stap wetem smol gel blong tufala we i gat ten manis blong hem. Smol gel ya i stap titi yet, be ol Gestapo oli no gat sore. Oli tekemaot smol gel blong Elsa, mo oli sanem Elsa i go long rabis kalabus blong Auschwitz we oli talem se hem i wan ples blong ded nomo. Be Elsa i no ded. Hem wetem man blong hem tufala i laef i stap plante yia tru long hadtaem ya. Long Wajtaoa blong Eprel 15, 1980 (Inglis), yu save ridim stori blong tufala mo olsem wanem tufala i stanap strong. Harald i raetem se: “Mi mi spenem 14 yia long ol rabis kalabus mo presin from bilif blong mi. Samfala oli askem long mi se: ‘?Olsem wanem? ?Woman blong yu i givhan long yu blong stanap strong?’ !Yes hem i givhan bigwan! Long stat blong ol traem ya, mi save finis se woman blong mi i no save lego bilif blong hem, mo samting ya i givim paoa long mi. Mi save se long tingting blong hem i moagud we mi mi ded from bilif blong mi, i bitim we mi go fri from we mi tanem baksaed long bilif blong mi. . . . Long ol yia we Elsa i stanap strong, hem i kasem plante hadtaem long ol rabis kalabus long Jemani.”
3, 4. (a) ?Hu ol man we eksampol blong olgeta i save givhan long ol Kristin blong stanap strong? (b) ?From wanem Baebol i talem long yumi blong tingbaot Job?
3 I no isi blong stanap strong tru long hadtaem, olsem plante Witnes oli save talem. From samting ya, Baebol i talem long ol Kristin se: “I gud yufala i stap tingbaot ol profet ya bifo we oli stap tok long nem blong Hae God. Ol man oli mekem olgeta oli harem nogud tumas, be tingting blong olgeta i no foldaon. Long fasin ya, olgeta oli soemaot wan gudfala rod long yumi.” (Jemes 5:10) Long ol yia we oli pas finis, ol man oli mekem i nogud long plante man blong God we oli no mekem rong. Eksampol blong ‘olgeta witnes ya we oli plante we plante,’ i save givhan long yumi blong stanap strong long Kristin resis we yumi stap long hem.—Hibrus 11:32-38; 12:1.
4 Long olgeta man long Baebol, Job i soem nambawan eksampol long saed blong fasin blong stanap strong. Jemes i raetem se: “Olgeta [we] oli stap stanap strong longtaem, yumi talem se God i mekem olgeta oli harem gud. Mo yufala i harem finis tok blong fasin blong Job, we hem i [“stanap strong,” NW ]. Mo yufala i save finis ol samting we Hae God i mekem long hem biaen. Hae God i kaen tumas, mo hem i gat sore long man.” (Jemes 5:11) Stori blong Job i soemaot ol blesing we Jeova i givim long man we i stap tru long hem. Antap moa, stori ya i tokbaot plante samting we oli save givhan long yumi long ol hadtaem. Buk blong Job i givhan long yumi blong faenem ansa long ol kwestin ya: ?Taem yumi kasem traem, from wanem yumi mas traehad blong kasem save ol samting long saed blong traem ya we oli moa impoten? ?Wanem ol fasin mo tingting we oli save givhan long yumi blong stanap strong? ?Olsem wanem yumi save givhan long ol Kristin brata sista blong yumi we oli stap safa, blong oli stap strong?
Kasem Save Long Evri Samting Long Saed Blong Wan Traem
5. ?Wanem faswan bigfala samting we yumi mas tingbaot taem yumi kasem traem mo hadtaem?
5 Blong holem stret tingting taem yumi kasem hadtaem, yumi mas kasem save long evri samting long saed blong traem ya. Sipos no, ol prapa trabol blong yumi i save kam olsem wan tik klaod, we i mekem se yumi no moa lukluk klia ol impoten samting long saed blong wosip. Samting we i impoten moa i winim ol narafala samting, hemia blong stap tru long God. Papa blong yumi long heven i talem ol tok we yumi wanwan i mas tinghevi long hem, i se: “Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.” (Ol Proveb 27:11) !Hemia wan spesel ona! Nating se yumi sinman mo yumi gat plante slak fasin, be yumi save mekem Man we i Wokem yumi i glad. Yumi mekem olsem taem yumi lavem Jeova bigwan, nao yumi naf blong stanap strong tru long ol trabol mo traem. Trufala Kristin lav i mekem se yumi save stanap strong tru long olgeta trabol. Lav ya i mekem se yumi win evritaem.—1 Korin 13:7, 8.
6. ?Olsem wanem Setan i stap faerap long Jeova? ?Mo hem i go kasem wanem mak?
6 Buk blong Job i soemaot klia se man ya we i stap faerap long Jeova, hemia Setan. Buk ya i soemaot tu se enemi ya Setan we yumi no save luk hem, i rabis we i rabis, mo hem i wantem tumas blong spolem fasin fren blong yumi wetem God. Stori blong Job i halpem yumi blong luksave se Setan i stap tok agensem olgeta man blong Jeova, i stap talem se oli mekem wok blong Hem blong kasem samting blong olgeta nomo, mo i wantem pruvum se lav we oli gat long Jeova i save kam kolkol. Blong plante taosen yia finis, Setan i stap sakem ol tok olsem. Taem oli aotem Setan long heven, wan voes i kamaot long heven, i talem se Setan i “agensem ol brata blong yumi,” hem i stap talemaot ol poen agens long olgeta ‘long fes blong God, long dei mo long naet.’ (Revelesen 12:10) Sipos yumi stanap strong mo stap tru long God, yumi save soemaot se ol poen we Setan i talemaot oli no tru.
7. ?Wanem beswan samting we yumi save mekem taem yumi kasem trabol long saed blong bodi?
7 Yumi no mas fogetem se Setan bambae i traem yusum enikaen trabol we yumi kasem, blong mekem yumi seraot long Jeova. Tingbaot: ?Setan i jusum wanem taem blong traem Jisas? Taem ya we Jisas i hanggri, i no bin kakae blong plante dei. (Luk 4:1-3) Be Jisas i frengud wetem Jeova mo samting ya i givim paoa long hem, taswe hem i naf blong stanap strong agensem ol traem blong Setan. !Yes, i impoten tumas we yumi frengud wetem Jeova! Samting ya bambae i givim paoa long yumi blong stanap strong tru long ol trabol long saed blong bodi, olsem sik mo ol problem blong olfala. Nating se ‘bodi blong yumi i stap kam nogud moa oltaem,’ be tingting blong yumi bambae i no kam nogud, from we ‘evri dei, God i stap mekem tingting blong yumi i niuwan bakegen.’—2 Korin 4:16.
8. (a) ?Olsem wanem ol nogud tingting mo filing oli save daonem paoa blong yumi? (b) ?Wanem tingting we Jisas i holem?
8 Taem yumi harem nogud, hemia i save tekemaot paoa we yumi kasem from fasin blong yumi blong fren wetem Jeova. Maet yu stap tingting se: ‘?From wanem Jeova i letem trabol ya i kasem mi?’ Sipos wan Kristin brata i mekem wan samting long yu we i no kaen, maet yu askem se: ‘?Weswe brata ya i save mekem i nogud long mi olsemia?’ Filing ya blong harem nogud i save mekem se yu tingbaot ol trabol blong yu nomo, be yu fogetem samting we i moa impoten i winim ol narafala samting. Taem trifala fren blong Job oli talem ol tok we i no stret, Job i harem nogud tumas, mekem se i no sik ya long bodi blong hem nomo we i mekem hem i harem nogud, be ol nogud filing blong hem tu oli ademap moa trabol long hem. (Job 16:20; 19:2) Long sem fasin, aposol Pol i soemaot se taem yumi stap kros longtaem, yumi “givim janis long Setan.” (Efesas 4:26, 27) Taswe, taem wan Kristin i harem nogud from wan samting, i nogud hem i faerap mo tok kros long narafala. I nogud tu we hem i tingting tumas long wan trabol, se i no stret we trabol ya i kasem hem. I moagud we hem i folem fasin blong Jisas mo ‘putum tingting blong hem i stap strong long [Jeova] God, we i stap jajem ol man long stret fasin.’ (1 Pita 2:21-23) Sipos yumi tekem “sem tingting” we Jisas i gat, hemia nao bigfala samting we i save blokem ol traehad blong Setan blong oli no spolem yumi.—1 Pita 4:1.
9. ?God i mekem yumi save wanem samting long saed blong ol trabol mo traem we oli kasem yumi?
9 Antap moa, taem yumi kasem trabol yumi neva mas ting se samting ya i kamaot from we God i no glad long yumi. Job i gat rong tingting olsemia. Hem i harem nogud finis long ol strong tok we ol giaman fren blong hem oli stap sakem long hem, be rong tingting ya i mekem hem i harem nogud moa. (Job 19:21, 22) Baebol i talem klia se: “I no gat samting nogud we i save pulum God blong mekem hem i gorong. Mo i no fasin blong God blong pulum man blong mekem hem i foldaon long sin.” (Jemes 1:13) Jeova i gat narafala fasin. Hem i mekem promes se bambae hem i givhan long yumi blong stanap strong tru long enikaen trabol, mo bambae hem i mekem rod blong yumi save winim enikaen traem. (Ol Sam 55:22; 1 Korin 10:13) Sipos yumi stap klosap long God taem trabol i kasem yumi, yumi save holem stret tingting mo skelemgud ol samting, nao yumi naf blong stanap strong mo blokem Setan.—Jemes 4:7, 8.
Ol Samting We i Givhan Long Yumi Blong Stanap Strong
10, 11. (a) ?Wanem i givhan long Job blong stanap strong? (b) ?Olsem wanem klin tingting long fes blong God i givhan long Job?
10 Nating se Job i kasem bigfala trabol, mo ol “fren” blong hem oli sakem ol nogud tok long hem, mo tingting blong hem i fasfas from we hem i no save se trabol ya i kamaot long hu, be hem i neva lego Jeova. ?Fasin blong Job blong stanap strong i save tijim yumi long wanem samting? I klia se bigfala samting we i mekem Job i stanap strong, se hem i stap tru long Jeova. ‘Hem i fraet long God mo i tanem baksaed long ol samting we i nogud.’ (Job 1:1, NW ) Hemia fasin blong laef blong Job. Hem i no save lego Jeova, nating se hem i no kasem save from wanem ol trabol ya oli kasem hem wantaem nomo. Job i gat strong tingting se hem i mas mekem wosip long God taem ol samting i rongud mo long taem blong trabol tu.—Job 1:21; 2:10.
11 Narafala samting we i givhan long Job, hemia se tingting blong hem i klin long fes blong God. Long taem ya we hem i ting se bambae hem i ded, hem i haremgud from we hem i bin mekem bes blong hem blong givhan long ol narafala, hem i bin folem ol stret rul blong Jeova, mo hem i no bin joen long enikaen giaman wosip.—Job 31:4-11, 26-28.
12. ?Taem Elihu i givim advaes long Job, Job i mekem wanem?
12 I tru se Job i nidim advaes blong stretem tingting blong hem. Ale hem i gat tingting daon mo i lesin long advaes ya. Hemia nao wan narafala stamba fasin we i givhan long hem blong stanap strong. Taem Elihu i givim waes advaes long Job, Job i lesin wetem respek. Hem i letem Jeova i stretem hem tu. Hem i se: “Sore, mi mi stap tokbaot ol samting we mi no save. . . . Mi mi sem tumas long ol samting ya we mi stap talem, mi harem nogud tumas from. Naoia mi tanem tingting blong mi, mi lego ol fasin ya finis, mo mi stap sidaon long asis blong graon, mo long asis faea.” (Job 42:3, 6) Nating se Job i stap harem nogud long bigfala sik we hem i gat, be hem i glad se ol advaes we i stretem tingting blong hem i mekem se hem i kam klosap moa long God. Hem i se: “[Jeova, naoia] mi save we yu yu gat olgeta paoa, mo yu save mekem olgeta samting we yu wantem.” (Job 42:2) Taem Jeova i tokbaot ol samting we oli soemaot bigfala paoa blong Hem, Job i kasem save klia moa se Jeova i hae we i hae, be hem, hem i smol we i smol.
13. ?Olsem wanem fasin sore i givhan long Job?
13 Naoia, bambae yumi tokbaot nambawan eksampol we Job i givim long saed blong fasin sore. Ol giaman fren blong hem oli mekem hem i harem nogud tumas, be taem Jeova i askem long Job blong prea long bihaf blong olgeta, Job i mekem. Afta, Jeova i mekem bodi blong Job i kamgud bakegen. (Job 42:8, 10) I klia se, sipos yumi stap kros longtaem long narafala, samting ya bambae i no givhan long yumi blong stanap strong. Be lav mo sore bambae i givhan long yumi. Taem yumi lego kros, yumi haremgud mo yumi kasem paoa from wosip we yumi mekem. Mo tu, Jeova bambae i blesem yumi.—Mak 11:25.
Ol Man Blong Givim Waes Advaes We Oli Halpem Yumi Blong Stanap Strong
14, 15. (a) ?Wanem ol fasin we wan man blong givim advaes i nidim blong mekem narafala i haremgud bakegen? (b) Eksplenem from wanem Elihu i rili givhan long Job.
14 Wan narafala samting we yumi save lanem long stori blong Job, hemia se i gud tumas taem ol man blong givim advaes oli waes. Ol man ya oli olsem ol trufala brata we oli rili ‘givhan long yumi long taem blong trabol.’ (Ol Proveb 17:17) Be i gat sam man blong givim advaes we oli no mekem man i haremgud bakegen. Oli mekem man i harem moa nogud, olsem yumi luk long stori blong Job. Wan gudfala man blong givim advaes i mas sem mak long Elihu. Hem i mas kasem save long filing blong narafala, i mas soem respek, mo i mas kaengud. Maet ol elda no sam narafala Kristin oli mas stretem tingting blong plante brata we oli harem se trabol we oli kasem i hevi tumas long olgeta. Ol man ya blong givim advaes oli save lanem plante samting long stori blong Job.—Galesia 6:1; Hibrus 12:12, 13.
15 Tingbaot nambawan fasin blong Elihu. Hem i stap sidaon longtaem, i lesingud long ol rong tingting we trifala fren blong Job oli talem, nao biaen hem i jes ansa. (Job 32:11; Ol Proveb 18:13) Elihu i toktok long Job olsem we Job i wan gudfala fren blong hem. (Job 33:1) Trifala giaman fren blong Job, trifala i mekem olsem we trifala i moagud i bitim Job. Be Elihu i defren. Hem i se: “Mi tu, God i mekem mi long red graon, stret olsem we i mekem yu.” Elihu i no wantem talem ol tok we i spolem Job moa, Job i stap safa inaf finis. (Job 33:6, 7; Ol Proveb 12:18) Elihu i no tok long Job from sam mastik we hem i bin mekem, be hem i talem ol gudfala tok blong presem hem from stret fasin blong hem. (Job 33:32, NW ) Samting we i moa impoten, se Elihu i gat tingting blong God mo hem i givhan long Job blong tingbaot se Jeova i no save mekem samting we i no stret. (Job 34:10-12) Hem i leftemap tingting blong Job blong i wet long Jeova, bitim we hem i traem pruvum se hem i wan stret man. (Job 35:2; 37:14, 23) Ol Kristin elda mo sam narafala oli save lanem plante samting from fasin blong Elihu.
16. ?Olsem wanem trifala giaman fren blong Job oli kam ol tul blong Setan?
16 Waes advaes we Elihu i givim i defren olgeta long ol tok blong spolem Job we Elifas, Bildad, mo Sofa i talem. Jeova i talem long trifala ya se: “Taem yufala i tokbaot mi, tok blong yufala i no tru nating.” (Job 42:7) Nating we trifala i bin talem se trifala i wantem givhan long Job, be trifala i olsem ol tul blong Setan, oli no olsem ol fren we oli stap tru long Job. Long stat olgeta, trifala i gat tingting finis se ol trabol blong Job i fol blong hem nomo. (Job 4:7, 8; 8:6; 20:22, 29) Elifas i talem se God i no trastem ol man blong hem, mo se hem i no kea sipos yumi mekem i stret no nogat. (Job 15:15; 22:2, 3) Hem i talem tu se Job i bin mekem sam bigfala sin, be tok ya i no tru nating. (Job 22:5, 9) Elihu i toktok long defren fasin. Hem i givhan long Job blong kasem stret tingting bakegen long saed blong fasin fren blong hem wetem God. Hemia nao samting we evri man blong givim advaes we i gat lav, i wantem mekem.
17. ?Yumi mas tingbaot wanem samting taem yumi kasem wan bigfala traem?
17 Buk blong Job i tijim yumi long wan moa samting long saed blong fasin blong stanap strong. God blong yumi we i lavem yumi, hem i stap luk ol trabol blong yumi. Hem i wantem givhan long yumi mo hem i naf blong givhan tu. Long fas haf blong stadi ya, yumi tokbaot Elsa Abt. Tingbaot tok we hem i talem afta we hem i gotru long ol trabol ya. Hem i se: “Bifo we ol polis oli holem mi, mi bin ridim wan leta we wan Kristin woman i raetem. Long leta ya, hem i talem se taem yumi kasem wan strong traem, spirit blong Jeova i mekem se yumi filim wan spesel kaen pis. Mi bin ting se sista ya i stap bitim mak long ol tok blong hem. Be taem mi gotru long ol traem blong mi, mi kasem save long tok blong sista ya. Hemia nao samting we i hapen. I had blong eksplenem pis ya sipos yu no bin kasem. Be i tru, samting ya i hapen long mi. Yes, Jeova i rili givhan.” Elsa i no stap tokbaot wanem we Jeova i naf blong mekem no wanem we Jeova i bin mekem plante taosen yia bifo, long taem blong Job. Nogat. Hem i stap tokbaot taem blong yumi. !Yes, “Jeova i rili givhan”!
Man We i Stanap Strong i Save Haremgud
18. ?Olsem wanem fasin blong stanap strong i givhan long Job?
18 Smol nomo long yumi bambae i fesem ol trabol we i bigwan tumas, olsem ol trabol we Job i kasem. Be nomata wanem trabol we rabis wol ya i mekem long yumi, i gat plante risen from wanem yumi mas holemstrong long God, olsem Job i bin mekem. Yes, fasin blong Job blong stanap strong i givhan long hem biaen. From we Job i stanap strong, hem i kam stretgud long ol fasin blong hem, hem i no sot long wan gudfala fasin. (Jemes 1:2-4) Job i fren moa wetem God. Hem i se: “Fastaem, ol narafala man nomo oli stap tokbaot yu long mi, be naoia, mi mi luk yu stret long ae blong mi.” (Job 42:5) Job i pruvum se Setan i wan man blong giaman, from we hem i no save fosem Job blong i lego Jeova. Plante handred yia biaen, Jeova i tokbaot man blong hem Job, se Job i stap soemaot yet gudfala eksampol blong stret fasin. (Esikel 14:14) Yes, ol tok blong Baebol long saed blong fasin blong Job blong holemstrong long God mo stanap strong longtaem, i givim paoa long ol man blong God tede tu.
19. ?From wanem i no blong nating nomo we yu stanap strong?
19 Taem Jemes i raetem leta blong hem i go long ol Kristin long faswan handred yia, hem i tokbaot fasin blong stanap strong. Hem i talem se fasin ya i mekem man i haremgud. Hem i yusum eksampol blong Job blong soem se Jeova i givim bigfala blesing long ol man we oli stap tru long hem. (Jemes 5:11) Long Job 42:12, yumi ridim se: “Nao long las haf blong laef blong Job, Hae God i stap blesem hem moa i winim we i stap blesem hem fastaem.” God i givimbak long Job fulap samting, we i tu taem antap long ol samting we hem i gat fastaem. Mo Job i gat wan longfala, hapi laef tu. (Job 42:16, 17) Long sem fasin, long niufala wol we God bambae i mekem, bambae yumi no moa tingbaot olsem wanem yumi bin harem nogud long bodi, tingting, mo filing blong yumi long olfala wol ya. Bambae yumi fogetem olgeta trabol ya. (Aesea 65:17; Revelesen 21:4) Yes, yumi harem finis tok blong fasin blong Job we hem i stanap strong longtaem, mo yumi gat strong tingting se sipos Jeova i givhan long yumi, bambae yumi mekem olsem Job. Baebol i mekem promes ya se: “Taem ol samting oli kam blong traem bilif blong man, be hem i stap stanap strong, hem i save harem gud, from we taem hem i winim ol samting ya we oli kam blong traem hem, God bambae i flasem hem olsem we oli flasem man we i win long faet. Mo praes we God bambae i givim long hem, hemia laef ya we hem i promes finis blong givim long olgeta we oli lavem hem.”—Jemes 1:12.
?Bambae Yu Yu Ansa Olsem Wanem?
• ?Olsem wanem yumi save mekem Jeova i glad?
• ?From wanem yumi no mas ting se ol trabol we yumi kasem oli soemaot se God i no glad long yumi?
• ?Wanem ol samting we oli givhan long Job blong stanap strong?
• ?Olsem wanem yumi save mekem olsem Elihu taem yumi wantem givhan long wan narafala Kristin blong i kam strong bakegen?
[Kwestin]
[Tok blong pija long pej 20]
Wan gudfala man blong givim advaes i kasem save long filing blong narafala, i gat respek, mo i kaengud
[Tok blong pija long pej 21]
Elsa mo Harald Abt