‘Yufala i Mas Askem Long God’

“I gud yufala i prea long God from evri samting. Yufala i mas askem long hem, [“yufala i mas plis long hem,” NW ] mo yufala i mas talem tangkiu tu long hem.”​—FILIPAE 4:6.

1. ?Yumi gat blesing ya blong toktok wetem hu? ?From wanem hemia i nambawan?

 ?SIPOS yu raetem wan leta blong askem blong toktok wetem lida blong kantri blong yu, yu ting se bambae yu kasem wan ansa? Maet ofis blong hem bambae i sanem wan leta i kambak long yu, be ating bambae oli no letem yu yu toktok stret wetem haeman ya. Samting ya i no sem mak long Jeova God. Hem i hae moa i bitim ol lida blong ol kantri, hem i King blong heven mo wol. Be yumi save toktok long hem enitaem we yumi wantem, mo long eniples we yumi stap long hem. Oltaem hem i rere blong harem prea blong ol gudfala man. (Ol Proveb 15:29) !Hemia i rili nambawan! Sipos yumi gat tangkiu from blesing ya, bambae yumi wantem prea oltaem long Jeova we hem i Man blong “harem prea.”​—Ol Sam 65:​2, NW.

2. ?Wanem samting we yumi nidim blong God i glad long ol prea blong yumi?

² Be maet yu askem se: ‘?Wanem kaen prea we God i glad blong harem?’ Baebol i talem wan samting we yumi nidim, blong God i glad long ol prea blong yumi. Hem i se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) Olsem yumi lanem long laswan stadi, wan bigfala samting we yumi nidim blong kam long God, hemia bilif. God i glad blong lesin long prea blong olgeta we oli kam long hem, sipos oli prea wetem bilif, oli gat gudfala fasin, oli prea wetem fulhat blong olgeta, mo oli gat stret tingting.

3. (a) ?Ol prea blong ol man blong God bifo oli soemaot se yumi save tokbaot wanem long prea? (b) ?Wanem ol defren kaen prea?

³ Aposol Pol i talem long ol Kristin long taem blong hem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, [“yufala i mas plis long hem,” NW ] mo yufala i mas talem tangkiu tu long hem.” (Filipae 4:​6, 7) Baebol i tokbaot plante man mo woman we oli prea blong talemaot ol wari blong olgeta long God. Long olgeta ya, i gat Hana, Elaeja, Hesekia, mo Daniel. (1 Samuel 2:​1-10; 1 King 18:​36, 37; 2 King 19:​15-19; Daniel 9:​3-21) Yumi mas folem eksampol blong olgeta. Makem tu ol tok blong Pol we i soem se i gat ol defren kaen prea. Hem i se yumi mas talem tangkiu, i min se yumi mas prea blong talem tangkiu long God from samting we hem i mekem blong yumi. Maet wan prea olsem i fulap long ol tok blong presem God. Wan defren kaen prea we i dip moa, hemia we yumi plis long God, no yumi prea wetem fulhat blong yumi mo wetem tingtingdaon. Wan defren kaen prea bakegen, hemia we yumi askem long God, maet wan spesel samting we yumi askem long hem. (Luk 11:​2, 3) Papa blong yumi long heven i glad blong letem yumi i kam long hem tru long ol defren kaen prea ya.

4. ?Nating se Jeova i save finis ol samting we yumi nidim, from wanem yumi mas askem ol samting ya long hem?

⁴ Maet samfala oli talem se: ‘Be Jeova i save finis wanem we yumi nidim.’ Yes, samting ya i tru. (Matiu 6:​8, 32) ?Sipos i olsem, from wanem hem i wantem we yumi kam long hem blong askem ol samting ya long hem? Tingbaot: Wan man we i gat wan stoa i talem se bambae hem i givim presen long ol kastoma blong hem. Be blong kasem presen ya, ol kastoma oli mas kam luk hem stret mo karem presen ya. Olgeta we oli no wantem traehad blong kam luk hem, oli soem se oli no rili gat tangkiu from kaen fasin blong hem. Sem mak long ol prea blong yumi. Sipos yumi no prea long Jeova blong askem ol samting long hem, yumi soem se yumi  no gat tangkiu from ol samting we hem i stap givim. Jisas i talem se: “Yufala i mas gohed blong askem ol samting long hem, mo bambae yufala i save kasem.” (Jon 16:24) Long rod ya, yumi soemaot se yumi trastem God.

?Yumi Mas Kam Long God Olsem Wanem?

5. ?From wanem yumi mas prea long nem blong Jisas?

⁵ Jeova i no putum plante strong rul long saed blong prea. Nating se i olsem, yumi mas lanem stret rod blong kam long God, olsem Baebol i talem. Jisas i tijim ol man blong hem se: “Sipos yufala i askem samting long Papa blong mi long nem blong mi, bambae hem i save givim long yufala.” (Jon 16:23) Taswe yumi mas prea long nem blong Jisas. Yumi mas luksave se Jisas nomo i rod we God i yusum blong givim ol blesing long ol man.

6. ?Taem yumi prea, yumi mas stanap no sidaon long wan spesel fasin?

⁶ ?Yumi mas stanap no sidaon olsem wanem taem yumi prea? Baebol i no talem se i gat wan spesel fasin blong sidaon no stanap we i mekem se God i harem ol prea blong yumi, nogat. (1 King 8:22; Nehemaea 8:6; Mak 11:25; Luk 22:41) Samting we i impoten, hemia se ol prea blong yumi oli mas kamaot long hat we i klin mo long tingting we i stret.​—Joel 2:​12, 13.

7. (a) ?Wanem mining blong tok ya “amen”? (b) ?Wanem stret rod blong yusum tok ya long ol prea?

⁷ ?Olsem wanem long tok ya “amen” we yumi talem long en blong prea? Baebol i soemaot se hemia wan gudfala rod blong finisim ol prea blong yumi, antap moa, taem yumi prea long fored blong ol man. (Ol Sam 72:19; 89:52) Hibru tok ya ʼa·menʹ i minim “i tru.” Wan buk (McClintok and Strong’s Cyclopedia) i talem se, taem man i talem “Amen” long en blong prea, hemia “blong mekem ol tok blong prea ya i strong moa, mo blong askem blong oli kamtru.” Taswe, taem man we i prea i talem “Amen” wetem fulhat blong hem, hem i soemaot se hem i gat strong tingting long saed blong samting we hem i talem long prea blong hem. Taem wan Kristin i talem “Amen” long en blong prea we hem i mekem long fored blong kongregesen, olgeta we oli stap lesin oli save talem “Amen” tu wetem voes blong olgeta no long hat blong olgeta. Long rod ya, oli soemaot se oli agri fulwan wetem ol tok we oli harem long prea ya.​—1 Korin 14:16.

8. ?Olsem wanem sam prea blong yumi maet oli sem mak long ol prea blong Jekob mo Ebraham? ?Sipos oli olsem, bambae oli soemaot wanem long saed blong yumi?

⁸ Sam samtaem God i save letem yumi soemaot sipos yumi rili minim samting we yumi talem long prea blong yumi. Maet yumi mas mekem olsem Jekob long taem bifo. Hem i stap resling wan fulnaet wetem wan enjel, blong hem i save kasem blesing. (Jenesis 32:​24-26) No maet yumi mas mekem olsem Ebraham, we hem i askem bakegen mo bakegen long Jeova long saed blong Lot mo eni narafala man Sodom we maet oli stret man. (Jenesis 18:​22-33) Long sem fasin, maet yumi askem bakegen mo bakegen long Jeova long saed blong samting we i impoten tumas long yumi, mo maet yumi askem long hem blong i tekem aksen we i laenap wetem stret fasin, lav, kaen fasin, mo sore blong hem.

?Wanem Samting We Yumi Save Prea From?

9. ?Wanem faswan samting we yumi mas tingbaot long ol prea blong yumi?

⁹ Tingbaot we Pol i talem se: “Prea long God from evri samting . . . askem long hem.” (Filipae 4:6) Taswe long ol prea blong yumi wanwan, yumi save tokbaot klosap evri samting long laef blong yumi. Be faswan samting we yumi mas tingbaot long ol prea blong yumi, hemia ol samting long saed blong Jeova. Daniel i givim gudfala eksampol long saed ya. Taem ol man Isrel oli kasem panis from ol sin blong olgeta, Daniel i plis long Jeova blong i sore long olgeta. Hem i se: “Plis yu no tektaem, yu mekem kwiktaem nomo, blong bambae olgeta man oli save we yu nomo yu God [“mo oli save tinghae long nem blong yu,” NW ].” (Daniel 9:​15-19) ?Olsem wanem? ?Ol prea blong yumi tu oli soemaot se faswan samting we yumi wantem, hemia se wil blong Jeova i kamtru mo nem blong hem i tabu?

10. ?Olsem wanem yumi save se i stret blong prea long saed blong yumi wan?

¹⁰ Be i stret tu blong askem sam samting blong yumi wan. Olsem nao, maet yumi askem Jeova blong halpem yumi blong kasem save long ol dip trutok blong hem, olsem man blong raetem Ol Sam i bin askem. Hem i prea olsem: “Yu talemaot mining blong Loa blong yu long mi, nao bambae mi obei long hem, mi holemgud long olgeta tingting blong mi.” (Ol Sam 119:​33, 34; Kolosi 1:​ 9, 10) Jisas “i stap prea long God, i stap askem ol samting long hem [“mo i stap plis long hem,” NW ]. . . . God i gat paoa blong sevem hem blong hem i no ded.” (Hibrus 5:7) Taem Jisas i mekem olsem, hem i soemaot se i stret blong askem long God blong i givim paoa long yumi, taem yumi fesem denja no yumi kasem traem. Taem Jisas i givim Lodsprea long ol disaepol blong hem olsem wan eksampol blong prea, hem i tokbaot sam samting long saed blong yumi wan, olsem fogif blong ol sin blong yumi, mo kakae blong evri dei.

11. ?Olsem wanem prea i save givhan long yumi blong yumi no foldaon long wan traem?

¹¹ Long Lodsprea, Jisas i askem long God se: “Yu no letem ol samting oli kam traem mifala tumas, mo yu blokem Setan i no kam spolem mifala.” (Matiu 6:​9-13) Samtaem biaen, Jisas i givim advaes ya: “Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon.” (Matiu 26:41) Taem wan samting i traem yumi, yumi nidim blong prea. Maet wan traem i kamaot long wok no long skul, nao i isi nomo blong yumi lego ol stret rul blong Baebol. Ating samfala we oli no Witnes, oli singaot yumi blong go joen wetem olgeta long samting we i no rili stret blong wan Kristin i mekem. Maet wan narafala i askem long yumi blong mekem samting we i agensem ol rul blong Baebol. Long taem olsem, i gud blong folem advaes blong Jisas se yumi mas prea. Yumi save prea bifo we yumi kasem traem mo taem yumi fesem wan traem tu, blong askem God blong givhan long yumi blong yumi no foldaon.

12. ?Wanem ol trabol mo wari we oli save pulum yumi blong prea? ?Yumi save se Jeova bambae i mekem wanem?

¹² Tede ol man blong God oli gat plante trabol mo wari long laef blong olgeta. Bigfala wari i kamaot from sik mo taem yumi harem nogud long filing blong yumi. Ol faet mo raf fasin raonabaot long yumi i save mekem se yumi fraet. Trabol long saed blong mane i save mekem i had blong pem ol samting we yumi nidim. !Be yumi haremgud tumas blong save se Jeova i stap lesin long ol man  blong hem taem oli kam long hem blong tokbaot ol samting ya! Ol Sam 102:17 i tokbaot Jeova i se: “Bambae hem i harem prea blong yumi [“ol man we oli no moa gat wan samting,” NW ], bambae hem i lesin long yumi.”

13. (a) ?I stret we yumi prea from wanem samting long saed blong yumi wan? (b) Talem stori long saed blong wan prea olsem.

¹³ I stret blong prea from eni samting we i gat paoa long wosip we yumi mekem i go long Jeova mo long fasin fren blong yumi wetem hem. (1 Jon 5:14) Sipos yu mas tekem desisen long saed blong mared, wok, no sipos yu wantem mekem moa long wok blong God, yu no mas fraet blong tokbaot ol samting ya long God mo askem long hem blong i lidim yu. Wan yangfala woman long Filipin i mekem samting ya. Hem i wantem mekem wok blong prij fultaem, be hem i no gat wan wok blong kasem smol vatu long hem. Hem i se: “Long wan Sarede, mi prea long Jeova speseli blong tokbaot wok blong paenia. Long sem dei, mi go prij mo mi soemaot wan buk long wan yangfala gel. Mi sek we gel ya i talem se: ‘Yu mas go long skul blong mi eli long Mande moning.’ Mi askem long hem se: ‘?From wanem?’ Hem i talem se oli nidim wan woman kwiktaem from wan wok longwe. Ale mi go long skul, mo wantaem nomo oli givim wok ya long mi. Ol samting ya i hapen kwik nomo.” Sem samting i stap hapen long plante narafala Witnes raon long wol tu. !Taswe yu no mas fraet blong prea wetem fulhat blong yu blong askem samting long God!

?Olsem Wanem Sipos Yumi Bin Mekem Wan Sin?

14, 15. (a) ?From wanem wan man i no mas fraet blong prea taem hem i bin mekem bigfala sin? (b) ?Antap long prea blong hem wan, wanem narafala samting tu we i save givhan long hem blong kam strong bakegen?

¹⁴ ?Olsem wanem prea i save givhan long wan man we i bin mekem sin? Samfala oli sem blong prea long saed blong sin blong olgeta. Be hemia i no waes. Tingbaot ol paelet blong plen. Ol paelet oli save se sipos oli lusum rod, oli save toktok i go long ol man we oli wok long epot, nao olgeta bambae oli givhan long olgeta. ?Be olsem wanem sipos wan paelet i fraet blong toktok i go long ol man long epot from we hem i sem se hem i bin lusum rod? !Hem i save mekem wan bigfala aksiden i kamaot! Long sem fasin, man we i mekem sin be i sem blong prea long God long saed ya, hem i save pulum moa trabol i kam long hem wan. Sipos man i sem from sin blong hem, samting ya i no mas blokem hem blong i no toktok wetem Jeova, nogat. Mo tu, Jeova i singaot olgeta we oli mekem bigfala sin blong oli prea long hem. Profet Aesea i talem long ol man we oli mekem sin long taem blong hem se oli mas singaot long Jeova, from we hem i save ‘fogivim olgeta, i tekemaot ol sin blong olgeta.’ (Aesea 55:​6, 7) I tru, fastaem yumi mas mekem tingting blong yumi i stap daon, lego rod blong sin we yumi stap folem, mo tanem tingting blong yumi. Nao biaen, yumi save ‘askem long Jeova blong i sore long yumi.’​—Ol Sam 119:58; Daniel 9:13.

¹⁵ I gat wan narafala risen from wanem prea i impoten taem man i mekem bigfala sin. Disaepol Jemes i tokbaot man we i nidim help blong kam strong bakegen long bilif blong hem, i se: ‘I gud hem i singaot ol elda blong [kongregesen] blong oli kam luk hem. Nao olgeta oli save prea long hem, mo [Jeova] bambae i mekem hem i strong bakegen.’ (Jemes 5:​14, 15) Yes, man ya i mas prea long Jeova blong talemaot sin blong hem, mo hem i save askem ol elda tu blong prea from hem. Samting ya bambae i givhan long hem blong frengud wetem God bakegen.

Ansa Long Prea

16, 17. (a) ?Olsem wanem Jeova i stap ansa long ol prea? (b) ?Wanem i hapen long samfala, we i soemaot se prea i joen bigwan wetem wok blong prij?

¹⁶ ?Olsem wanem Jeova i stap ansa long ol prea? Long sam prea, hem i ansa kwiktaem nomo mo long fasin we i klia. (2 King 20:​1-6) Long sam narafala prea, maet hem i tektaem blong ansa, mo maet  i no isi long yumi blong luksave ansa. Maet yumi nidim blong askem bakegen mo bakegen long God, olsem Jisas i soem long parabol blong wan wido we i askem bakegen mo bakegen long jaj blong i stretem trabol blong hem. (Luk 18:​1-8) Be yumi save gat strong tingting se taem prea blong yumi i laenap wetem samting we Jeova i wantem, hem i no save talem long yumi se: “Aa, yu gowe.”​—Luk 11:​5-9.

¹⁷ Ol man blong Jeova oli luk plante taem olsem wanem Jeova i ansa long prea. Samting ya i kamaot plante taem long wok blong prij. I gat tu Kristin woman long Filipin we tufala i stap long wan ples long bus, tufala i stap givimaot ol buk we oli tokbaot Baebol. Oli givim wan smol pepa long wan woman, nao wota i stat ron long ae blong woman ya. Hem i talem se: “Las naet mi mi prea long God blong askem hem blong i sanem wan man blong tijim mi long Baebol. Mi ting se hem i sanem yutufala nao blong ansa long prea blong mi.” Smoltaem biaen, woman ya i kam long miting long Haos Kingdom. Long wan narafala ples long Saotis Esia, wan Kristin man i stap prij, be hem i fraet blong go long wan bigfala stori haos we ol sekiuriti oli gad gud long hem. Ale hem i prea long Jeova, i mekem tingting blong hem i strong, mo i go insaed long stori haos ya. Hem i kilim doa blong wan rum, nao wan yangfala woman i kamaot. Brata ya i talem from wanem hem i kam, nao woman ya i stat krae. Woman ya i talem se hem i stap lukaot ol Witnes blong Jeova mo hem i bin prea blong askem God blong i givhan long hem blong faenem ol Witnes. Brata ya i glad blong givhan long woman ya blong faenem kongregesen blong ol Witnes blong Jeova long ples blong hem.

18. (a) ?Taem Jeova i ansa long prea blong yumi, yumi mas mekem wanem? (b) ?Sipos yumi tekem evri janis blong prea, yumi save sua long wanem samting?

¹⁸ Prea i rili wan nambawan blesing. Jeova i rere blong lesin long yumi mo blong ansa long prea blong yumi. (Aesea 30:​18, 19) Nating se i olsem, yumi mas traehad blong luksave ansa we Jeova i givim long prea blong yumi. Maet hem i no ansa long fasin we yumi ting se bambae hem i ansa. Nating se i olsem, taem yumi luksave se hem i stap lidim yumi, yumi no mas fogetem blong talem tangkiu long hem mo presem hem. (1 Tesalonaeka 5:18) Mo tu, yumi mas tingbaot oltaem advaes ya blong aposol Pol, se: “I gud yufala i prea long God from evri samting. Yufala i mas askem long hem, [“yufala i mas plis long hem,” NW ], mo yufala i mas talem tangkiu tu long hem.” Yes, yu mas tekem evri janis blong toktok long God. Long rod ya, bambae tok we Pol i talem long saed blong olgeta we God i ansa long prea blong olgeta, bambae i kamtru long yu. Hem i se: “Nao pis we [God] i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.”​—Filipae 4:​6, 7.

?Yu Yu Save Ansa?

• ?Wanem ol defren kaen prea we yumi save mekem?

• ?Yumi mas prea olsem wanem?

• ?Wanem ol samting we yumi save tokbaot long prea?

• ?From wanem man we i bin mekem sin i mas prea?

[Kwestin]

[Tok blong pija long pej 29]

Prea we yumi mekem wetem fulhat blong yumi bambae i halpem yumi blong no foldaon long ol traem

[Tok blong pija long pej 31]

Long prea, yumi talem tangkiu long God, yumi talemaot ol wari blong yumi long hem, mo yumi askem samting long hem