Advaes Blong “Ol Man Blong Save” i Kam Antap Mo i Foldaon

TEDE, ol man we oli gat kompiuta oli save lukaotem advaes long Intenet, long saed blong fasin blong tijimgud pikinini. Kwiktaem nomo, oli save kasem bitim 26 milian save long saed ya. Sipos yu tekem wan minit nomo blong faenem mo ridim wanwan long ol save ya, bambae yu no ridim olgeta yet be pikinini blong yu bambae i gruap finis mo i mekem prapa laef blong hem.

Tede sipos yumi wantem kasem advaes long fasin blong tijimgud pikinini, yumi save go luk ol spesel dokta blong ol pikinini, ol man we oli stadi long tingting blong ol pikinini, mo lukluk long Intenet. ?Be longtaem bifo, ol papa mama oli go luk hu blong kasem advaes? Plante taem oli go luk ol famle blong olgeta, olsem ol mama, papa, anti, mo angkel. Olgeta ya oli rere mo oli naf blong givim advaes, givhan long saed blong mane, mo lukaot long ol pikinini. Be tede, long plante kantri, bighaf blong ol man oli aot long ol vilej blong go laef long taon, mo oli no moa luk ol famle blong olgeta. Plante taem ol papa mama oli stap olgeta nomo blong mekem bigfala wok ya blong tijim pikinini blong olgeta.

Hemia i wan risen from wanem plante man oli statem bisnes ya blong givim save long saed blong fasin blong tijim pikinini, mo bisnes ya i stap kam bigwan moa. Wan narafala risen from wanem oli statem bisnes ya, hemia se plante man oli bilivim ol save blong ol saentis. Klosap long yia 1900, ol man Amerika oli stat blong bilivim se save blong ol saentis i save mekem laef blong man i kam moagud. Oli bilif se save ya i save givhan tu blong tijimgud pikinini. Long 1899, grup blong Nasonal Kongres blong ol Mama long Amerika i komplen se “ol papa mama oli no save tijimgud pikinini blong olgeta.” Kwiktaem nomo plante “bigfala saentis” we oli talem se oli gat save long saed ya, oli girap mo oli promes se bambae oli givhan long ol mama mo papa blong oli tijimgud pikinini blong olgeta.

Ol Buk We Oli Givim Advaes Long Fasin Blong Tijimgud Pikinini

?Wok blong ol bigfala saentis ya i karem frut? ?Ol papa mama tede oli no moa wari tumas long saed blong pikinini blong olgeta? ?Oli savegud olsem wanem blong tijim olgeta i bitim ol papa mama we oli laef bifo? Nogat. I no longtaem i pas, oli mekem wan stadi long Briten, mo stadi ya i soemaot se samwe long 35 pesen blong ol papa mama we oli gat ol smosmol pikinini, oli stap traem yet blong faenem ol advaes we oli save trastem. Plante narafala papa mama oli harem se oli mas folem prapa tingting blong olgeta nomo.

Wan woman we nem blong hem Ann Hulbert, i raetem wan buk (Raising America: Experts, Parents, and a Century of Advice About Children), we i tokbaot ol buk we ol man oli bin wokem long saed blong fasin blong tijimgud pikinini. Misis Hulbert we i gat tu pikinini blong hem, i makem se smol nomo blong ol advaes we ol bigfala saentis oli givim oli stanap long saens. Advaes blong olgeta i stanap long ol samting we oli bin hapen long prapa laef blong olgeta, be i no long ol save we oli faenemaot long saed blong laef blong ol narafala man. Sipos yumi luklukbak, i luk olsem se bighaf blong ol save we ol haeman ya oli raetem, oli gud blong smoltaem nomo, sam save i agensem narafala save, mo sam save oli narakaen.

?Taswe, olsem wanem long ol papa mama tede? Blong talem stret, plante long olgeta oli konfius. Long fored blong olgeta i gat plante advaes, tingting, mo rao i bitim ol narafala taem bifo. Be i no evri papa mama we oli harem se oli no gat help. Plante papa mama long olgeta ples blong wol oli stap haremgud long waes we i kamaot longtaem bifo, mo we i stap yet olsem stamba blong advaes we oli rili save trastem. Bambae nekis haf i soemaot samting ya.