“?From Wanem Yumi Laef?”

ELIE WIESEL, we i bin winim Nobel Praes mo i bin laef tru long taem ya we ol Nasi oli bin kilim i ded plante man, i talem se: “I gat wan kwestin we i moa impoten i bitim ol narafala kwestin we man i save tingbaot.” ?Wanem kwestin ya? Hemia: “?From wanem yumi laef?”

?Yu yu bin tingbaot kwestin ya samtaem? Plante man oli bin tingbaot, be oli no save faenem ansa blong hem. Inglis man ya we i stadi long histri, Arnold Toynbee, i bin traehad blong talemaot from wanem yumi laef. Hem i raetem se: “Mak we ol man oli mas wantem kasem, hemia blong leftemap nem blong God mo blong kasem glad from fasin fren we oli gat wetem Hem, gogo i no save finis.”

Bitim tri taosen yia bifo, wan narafala man we i gat plante waes long saed blong laef, i bin talemaot from wanem yumi laef. Waes King Solomon i talem se: “Antap long ol samting ya, wan samting nomo mi wantem talem long yu, se yu mas tinghevi long God, yu mas ona long hem, mo yu mas obei long ol tok blong hem, from we hemia nao samting we hem i mekem yumi from.”​—Prija 12:13.

Pikinini blong God, Jisas Kraes, i sapotem tingting ya. Taem Jisas i stap long wol ya, hem i bin yusum ful paoa blong hem blong leftemap nem blong Papa blong hem we i stap long heven. From we Jisas i mekem wok blong God, hem i harem gud tumas long laef blong hem. Wok ya i givim paoa long hem, taswe hem i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem.”​—Jon 4:34.

?Ale, from wanem yumi laef? Olsem Jisas, Solomon, mo plante narafala man blong God, yumi save gat trufala mining mo glad long laef blong yumi blong olwe, sipos yumi mekem samting we God i wantem. ?Olsem wanem blong mekem wosip long God “long spirit mo trutok”? ?Yu yu wantem save moa long saed ya? (Jon 4:​24, NW ) Ol Witnes blong Jeova long ples blong yu oli glad blong givhan long yu blong ansarem kwestin ya, “?From wanem yumi laef?”