?Yu Yu Gat Tingting Blong Jeova Long Ol Samting We Oli Tabu?
?Yu Yu Gat Tingting Blong Jeova Long Ol Samting We Oli Tabu?
“Yufala i mas lukaotgud se i no gat wan long yufala i kam . . . man we i slip olbaot, no i ting nating long ol samting we oli tabu.”—HIBRUS 12:15, 16, NW.
1. ?Wanem fasin blong wol ya we ol man blong Jeova oli no folem?
EVRI dei, ol man blong wol oli lusum intres moa long ol samting we oli tabu. Wan Franisman, Edgar Morin, we i stadi long fasin blong ol man, i talem se: “Olgeta samting we oli fandesen blong ol gudfala fasin—God, ol samting we God i wokem, kantri blong yumi, histri, mo stret tingting—ol man oli no moa bilif long olgeta. . . . Naoia ol man nomo oli jusum wanem samting i gudfala fasin.” Hemia nao “spirit we i kamaot long wol,” no ‘spirit we i stap wok naoia long ol man we oli no obei long God.’ (1 Korin 2:12; Efesas 2:2, NW ) Spirit ya we i pulum man blong i no gat respek long ol samting we oli tabu, i no gat paoa long ol man we oli givim laef blong olgeta i go long Jeova, mo we oli wantem obei long hem olsem king blong olgeta. (Rom 12:1, 2) Ol man blong God oli luksave se long wosip we oli mekem i go long Jeova, i impoten tumas we oli tinghae long ol samting we oli tabu. ?Wanem ol samting long laef blong yumi we oli tabu? Stadi ya bambae i tokbaot faef samting we olgeta man blong God oli luk olgeta olsem ol tabu samting. Nekis stadi bambae i tokbaot olsem wanem ol Kristin miting blong yumi oli tabu. ?Be fastaem, wanem mining blong tok ya “tabu”?
2, 3. (a) ?Olsem wanem Baebol i makemgud se Jeova i tabu? (b) ?Olsem wanem yumi soem se yumi tingbaot nem blong Jeova olsem samting we i tabu?
2 Long lanwis Hibru we oli raetem Baebol long hem fastaem, tok ya “tabu” i givim tingting blong samting we i spesel, i defren long ol narafala samting. Long saed blong wosip, “tabu” i minim ol samting we oli joen wetem God, we oli spesel mo yumi tinghae long olgeta. Jeova hem wan i tabu olgeta. Baebol i talem se: “God i tabu we i tabu.” (Ol Proveb 9:10; 30:3) Long Isrel bifo, oli wokem wan smol braslet long gol, mo oli fasem long hat blong hae pris. Long braslet ya oli katem tok ya se: “Jeova i tabu, hemia fasin blong Hem.” (Eksodas 28:36, 37, NW ) Baebol i tokbaot ol jerubim mo seraf we oli stanap raon long jea blong Jeova long heven. Olgeta ya oli stap talemaot se: “!Hae God, hem i tabu, we i tabu, we i tabu!” (Aesea 6:2, 3; Revelesen 4:6-8) Fasin blong olgeta blong talem tok ya bakegen mo bakegen i makemgud se i no gat wan we i tabu mo i klin olsem Jeova. Yes, Jeova i Stamba blong tabu fasin.
3 Nem blong Jeova tu i tabu. Man we i raetem Ol Sam i talem se: “Olgeta man bambae oli presem [nem blong] hem, from we hem i tabu we i tabu.” (Ol Sam 99:3) Jisas i tijim yumi blong prea olsem: “Papa blong mifala. Yu yu stap long heven. Nem blong yu i tabu.” (Matiu 6:9) Meri we i mama blong Jisas long wol ya, i talem se: “Mi mi stap leftemap nem blong Hae God, from we God ya we i gat olgeta paoa, hem i mekem i gud tumas long mi. Nem blong hem i tabu.” (Luk 1:46, 49) Yumi ol man blong Jeova, yumi tinghae long nem blong hem olsem samting we i tabu, mo yumi no mekem enikaen samting we i save sakem doti long tabu nem ya. Yumi gat sem tingting olsem Jeova long ol samting we oli tabu. Hemia i min se, ol samting we hem i luk olgeta se oli tabu, yumi tu yumi luk olgeta se oli tabu.—Amos 5:14, 15.
?From Wanem Yumi Onagud Long Jisas?
4. ?From wanem Baebol i singaot Jisas se “Tabu Man blong God”?
4 Jisas i ‘stret Pikinini blong Jeova,’ God ya we i tabu. Taswe, Jisas tu i tabu. (Jon 1:14; Kolosi 1:15; Hibrus 1:1-3) From samting ya, Baebol i singaot hem se “Tabu Man blong God.” (Jon 6:69) Hem i no lusum tabu fasin ya taem hem i aot long heven i kamdaon long wol, from we tabu spirit nao i mekem se Meri i bonem Jisas. Enjel i talem long Meri se: “Tabu Spirit bambae i kam long yu, . . . pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.” (Luk 1:35) Taem ol Kristin long Jerusalem oli stap prea long Jeova, tu taem oli talem se Pikinini ya blong God, hem i “Jisas, we i Tabu Man blong wok blong [God].”—Ol Wok 4:27, 30.
5. ?Wanem tabu wok we Jisas i mekem long wol? ?From wanem blad blong hem i gud tumas?
5 Jisas i mekem wan tabu wok long wol ya. Taem hem i baptaes long yia 29 K.T., tabu spirit i makemaot hem i kam Hae Pris blong bigfala haos blong Jeova long saed blong spirit. (Luk 3:21, 22; Hibrus 7:26; 8:1, 2) Mo tu, Jisas i givim laef blong hem olsem wan sakrefaes. Blad blong hem i pemaot olgeta sinman, mo i givim janis long olgeta blong oli kasem laef. (Matiu 20:28; Hibrus 9:14) Taswe, long tingting blong yumi, blad blong Jisas i tabu, “i gud tumas.”—1 Pita 1:19.
6. ?Wanem tingting blong yumi long Jisas Kraes, mo from wanem?
6 Aposol Pol i soem se yumi mas onagud long King mo Hae Pris blong yumi, Jisas Kraes. Hem i raetem se: “God i leftemap nem blong [Pikinini blong] hem i go antap olgeta, i givim nem long hem we i hae moa long ol narafala nem. Nao olgeta long heven, mo long wol mo [“aninit long graon,” NW ], bambae oli bodaon oli ona long nem blong hem, mo olgeta man bambae oli talemaot we Jisas Kraes, . . . i Masta blong olgeta, blong leftemap nem blong God, Papa blong yumi.” (Filipae 2:9-11) Taem yumi glad blong obei long Lida blong yumi mo King we i stap rul, Jisas Kraes, we i Hed blong Kristin kongregesen, yumi soemaot se yumi gat tingting blong Jeova long ol samting we oli tabu.—Matiu 23:10, NW; Kolosi 1:18.
7. ?Olsem wanem yumi soem se yumi ona long Kraes?
7 Yumi mas soem bigfala respek long ol man we Kraes i yusum blong lukaot long wok we hem i stap lidim. Long rod ya, yumi soem ona long Kraes hem wan. Ol memba blong Hed Kampani we tabu spirit i makemaot olgeta, mo ol elda we Hed Kampani i putumap olgeta long ol branj, distrik, seket, mo kongregesen, oli mekem ol wok we i tabu. From samting ya, yumi mas ona mo obei long olgeta.—Hibrus 13:7, 17.
Wan Tabu Neson
8, 9. (a) ?Wanem i mekem se Isrel i wan tabu neson? (b) ?Olsem wanem Jeova i makemgud long ol man Isrel se oli mas tinghae long ol samting we oli tabu?
8 Jeova i mekem wan kontrak wetem neson blong Isrel bifo. Hemia i mekem se niufala neson ya i spesel. Hem i defren long ol narafala neson, hem i blong God. Jeova i talem long ol man Isrel se: “Mi mi Hae God, mi tabu we mi tabu, . . . mi mi makemaot yufala, mo mi tekemaot yufala long ol narafala man, blong yufala i man blong mi, nao yufala i mas mekem yufala i tabu, yufala i mas man blong mi nomo.”—Levitikas 19:2; 20:26.
9 Taem Jeova i jusumaot neson blong Isrel, hem i makemgud long olgeta se oli mas tinghae long ol samting we oli tabu. Sipos wan long olgeta i tajem hil ya we Moses i go antap long hem blong kasem ol Tenkomanmen, bambae oli mas kilim hem i ded. Hil ya Sinae i tabu. (Eksodas 19:12, 23) Ol pris, Haos Tapolen blong God, mo ol samting insaed long hem, olgeta tu oli tabu. (Eksodas 30:26-30) ?Olsem wanem long Kristin kongregesen?
10, 11. ?From wanem ol memba blong Kristin kongregesen we tabu spirit i makemaot olgeta, oli tabu? ?From samting ya, wanem tingting blong “ol narafala sipsip”?
10 Long Kristin kongregesen, ol man we tabu spirit i makemaot olgeta, Jeova i luk olgeta olsem ol tabu man. (1 Korin 1:2) Baebol i kolem smol grup blong ol tabu Kristin ya we oli stap yet long wol se wan tabu haos blong God. Hemia i no sem mak long bigfala haos blong Jeova long saed blong spirit. Olgeta ya oli olsem wan tabu haos we Jeova i stap long hem, tru long tabu spirit blong hem. Aposol Pol i raetem se: “From we oli joen long [Jisas Kraes], oli stap stanap strong, nao haos ya i stap kam gud moa, olsem wan haos blong Hae God we i tabu, i klin gud. Yufala i joen long Kraes, nao hem i stap wokem yufala tu, wetem ol narafala man, blong yufala i kam olsem wan haos we Hae God i save stap oltaem long hem, long Spirit blong hem.”—Efesas 2:21, 22; 1 Pita 2:5, 9.
11 Bakegen, Pol i raet long ol tabu Kristin i se: “Ating yufala i save finis we yufala i olsem haos blong God, mo we Spirit blong God i stap finis long yufala. . . . Haos ya i tabu, mo i tru we yufala i olsem haos ya.” (1 Korin 3:16, 17) Tru long tabu spirit, Jeova i ‘mekem ples blong hem’ wetem ol tabu Kristin ya, mo ‘hem i stap oltaem long medel blong olgeta.’ (2 Korin 6:16) Oltaem hem i stap lidim ‘slef blong hem we i stret mo waes.’ (Matiu 24:45, 47, NW ) “Ol narafala sipsip” oli tinghae long blesing we oli gat blong joen wetem grup ya we i olsem “haos blong God.”—Jon 10:16; Matiu 25:37-40.
Ol Samting We Oli Tabu Long Laef Blong Ol Kristin
12. ?Wanem sam samting we oli tabu long laef blong yumi, mo from wanem?
12 Yumi no sapraes se i gat plante samting we oli tabu long laef blong ol Kristin we tabu spirit i makemaot olgeta mo ol fren blong olgeta. Fasin fren wetem Jeova i wan samting we i tabu. (1 Kronikel 28:9; Ol Sam 36:7) Yumi tinghae long fasin fren ya, hem i gud tumas, ale yumi no letem wan samting no wan man i seraotem yumi long God blong yumi, Jeova. (2 Kronikel 15:2; Jemes 4:7, 8) Prea i impoten tumas blong givhan long yumi blong frengud wetem Jeova. Long tingting blong profet Daniel, prea i tabu we i tabu. Taswe, Daniel i putum laef blong hem long denja, blong gohed blong prea oltaem long Jeova. (Daniel 6:7-11) Baebol i talem se “ol prea blong ol man blong God” we tabu spirit i makemaot olgeta, oli olsem insens we oli bonem long haos blong God long taem bifo blong mekem wosip. (Revelesen 5:8; 8:3, 4; Levitikas 16:12, 13) Pijatok ya i makemgud long tingting blong yumi se prea i wan samting we i tabu. !I wan bigfala blesing blong toktok wetem King blong heven mo wol! !Yumi luksave from wanem prea i wan samting we i mas tabu long laef blong yumi!
13. ?Wanem paoa ya we i tabu, mo olsem wanem yumi letem paoa ya i wok long laef blong yumi?
13 I gat wan paoa long laef blong ol tabu Kristin mo ol fren blong olgeta, we oli mas luksave se i tabu—hemia tabu spirit. Spirit ya hemia paoa blong Jeova, mo oltaem hem i stap wok folem samting we tabu God ya i wantem. Taswe, i stret nomo we Baebol i singaot hem se “Tabu Spirit” no ‘bigfala paoa we i tabu.’ (Jon 14:26; Rom 1:4) Jeova i givim tabu spirit long ol man blong hem, blong oli gat paoa blong go talemaot gud nius. (Ol Wok 1:8; 4:31) Jeova i stap givim spirit blong hem long “ol man we oli obei long hem” olsem rula blong olgeta. Oli ‘letem Spirit ya i lidim olgeta long laef blong olgeta,’ oli no mekem samting we tingting blong olgeta nomo i wantem. (Ol Wok 5:32; Galesia 5:16, 25; Rom 8:5-8) Strong paoa ya i givhan long ol Kristin blong oli wokem ol gudfala fasin we oli “frut blong spirit,” mo blong ‘oli tabu, oli man blong God, mo oli mekem ol fasin we hem i wantem.’ (Galesia 5:22, 23, NW; 2 Pita 3:11) Sipos yumi tingbaot tabu spirit olsem wan samting we i tabu, bambae yumi no mekem samting we i agensem spirit ya, no i blokem spirit ya long laef blong yumi.—Efesas 4:30.
14. ?Wanem janis we ol tabu Kristin oli tingbaot olsem samting we i tabu, mo olsem wanem ol narafala sipsip oli gat janis ya tu?
14 Wan narafala samting we yumi tinghae long hem olsem samting we i tabu, hemia janis we yumi gat blong karem nem blong tabu God ya Jeova, mo blong stap olsem ol Witnes blong hem. (Aesea 43:10-12, 15) Jeova i mekem ol Kristin we tabu spirit i makemaot olgeta oli naf blong “mekem ol wok blong niufala promes” no kontrak. (2 Korin 3:5, 6) Insaed long wok ya, i gat wok blong talemaot ‘gud nius blong Kingdom’ mo ‘pulum ol man oli kam man blong Kraes.’ (Matiu 24:14, NW; 28:19, 20) Olgeta ya oli stap gohed strong long wok ya, mo plante milian man oli stap bilif long gud nius. I olsem we oli stap talem long ol Kristin ya we tabu spirit i makemaot olgeta, se: “Mifala i wantem kam fren blong yufala, from we mifala i harem nius se God i stap givhan long yufala.” (Sekaraea 8:23) Ol gudfala man ya oli glad blong givhan long ol tabu ‘man blong wok blong God.’ I olsem we oli ‘wok long garen blong olgeta,’ no ‘lukaot long plantesen blong grep blong olgeta’ long saed blong spirit. Ol narafala sipsip ya oli stap givhan bigwan long ol tabu man, blong oli mekem wok blong prij i go long olgeta ples blong wol.—Aesea 61:5, 6.
15. ?Wanem wok we aposol Pol i luk se i tabu, mo from wanem yumi mas gat sem tingting?
15 Plante man long taem bifo oli tingbaot wok blong prij olsem samting we i tabu. Wan long olgeta ya, hemia aposol Pol. Hem i talem se hem i ‘mekem wok blong Jisas Kraes long olgeta we oli no laen blong Isrel. Hem i stap [“mekem tabu wok ya blong,” NW ] talemaot gud nius blong God.’ (Rom 15:16) Taem Pol i raetem leta i go long ol Kristin long Korin, hem i talem se wok blong prij i wan ‘gudfala samting we God i givim.’ (2 Korin 4:1, 7) Long wok blong prij, yumi stap talemaot “ol [“tabu,” NW ] tok we God i givim.” (1 Pita 4:11) Taswe, nating se yumi stap long grup blong ol tabu Kristin no grup blong ol narafala sipsip, be yumi tingbaot wok blong prij olsem wan wok we i tabu.
‘Mekem Fasin Blong Yumi i Tabu, From We Yumi Ona Gud Long God’
16. ?Wanem bambae i givhan long yumi blong blokem fasin blong “ting nating long ol samting we oli tabu”?
16 Aposol Pol i givim woning long ol Kristin brata sista blong hem se oli no mas “ting nating long ol samting we oli tabu.” (NW ) Hem i givim advaes long olgeta se oli mas ‘traehad oltaem blong mekem we laef blong olgeta i tabu.’ Oli mas ‘lukaot gud blong bambae i no gat wan long olgeta i kam olsem wan tri we lif blong hem i posen, mo i save spolem plante man.’ (Hibrus 12:14-16) Tok ya “tri we lif blong hem i posen” i stap tokbaot sam man long Kristin kongregesen we oli komplen from sam fasin we kongregesen i folem. Maet oli no agri wetem tingting blong Jeova se mared i wan samting we i tabu, mo se yumi mas stap klin long ol fasin blong yumi. (1 Tesalonaeka 4:3-7; Hibrus 13:4) Maet samfala oli tok olsem ol man blong apostasi, “[“oli stap tok agens long ol samting we oli tabu,” NW ], oli stap toktok krangke nomo.” Ol man we oli tok olsem oli “lusum rod blong trutok finis.”—2 Timoti 2:16-18.
17. ?From wanem i nidim we ol tabu Kristin oli mas hadwok oltaem, blong oli save holem tingting blong Jeova long ol samting we oli tabu?
17 Pol i raet long ol tabu brata blong hem i se: “Ol fren. . . . Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God.” (2 Korin 7:1) Vas ya i soemaot se ol tabu Kristin ‘we God i singaot olgeta’ blong bambae oli go long heven, oli mas hadwok oltaem blong pruvum long evri haf blong laef blong olgeta se oli gat tingting blong Jeova long ol samting we oli tabu. (Hibrus 3:1) Aposol Pita tu i talem long ol tabu brata blong hem se: “Yufala i mas obei long God. Yufala i no letem ol samting ya we yufala i wantem bifo, taem we yufala i no save hem yet, oli pulum tingting blong yufala bakegen. God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala i mas klin gud long olgeta samting we yufala i mekem.”—1 Pita 1:14, 15.
18, 19. (a) ?Olsem wanem “bigfala kampani blong man” i soemaot se i gat tingting blong Jeova long ol samting we oli tabu? (b) ?Long nekis stadi, bambae yumi tokbaot wanem haf blong laef blong yumi we i tabu?
18 ?Olsem wanem long “bigfala kampani blong man,” we bambae oli laef tru long taem blong “bigfala trabol”? Olgeta tu oli mas soemaot se oli gat tingting blong Jeova long ol samting we oli tabu. Buk blong Revelesen i talem se ol man ya oli stap mekem “tabu wok” blong Jeova long wol ya, hemia long yad blong haos blong God long saed blong spirit. Oli bilif finis long ransom sakrefaes blong Kraes, mo i olsem we oli “wasem klos blong olgeta finis blong mekem oli waet long blad blong Smol Sipsip ya.” (Revelesen 7:9, 14, 15, NW ) Samting ya i mekem se oli save stanap long fes blong Jeova olsem ol klin man. Oli mas ‘sakemaot olgeta samting long bodi mo tingting blong olgeta we oli stap mekem olgeta oli doti long fes blong God, mo oli mas traehad blong mekem fasin blong olgeta i klin, i tabu, from we oli stap ona gud long God.’
19 Wan impoten haf blong laef blong ol tabu Kristin mo ol fren blong olgeta, hemia ol miting we oli mekem blong wosipim Jeova mo blong stadi long Tok blong hem. Jeova i tingbaot ol miting blong ol man blong hem olsem ol samting we oli tabu. ?Olsem wanem yumi save gat tingting blong Jeova long ol miting? ?From wanem yumi mas gat tingting blong hem long saed ya? Bambae yumi tokbaot ansa blong tufala kwestin ya long nekis stadi.
Tingtingbak
• ?Wanem tingting blong wol we ol man blong Jeova oli no gat?
• ?From wanem Jeova i Stamba blong olgeta samting we oli tabu?
• ?Olsem wanem yumi soemaot se yumi tinghae long tabu fasin blong Kraes?
• ?Wanem ol samting long laef blong yumi we yumi mas tingbaot olgeta olsem ol tabu samting?
[Kwestin]
[Tok blong pija long pej 23]
Long Isrel bifo, ol pris, Haos Tapolen blong God, mo ol samting insaed long hem, oli tabu
[Tok blong pija long pej 24]
Smol grup blong ol tabu Kristin long wol i olsem tabu haos blong God
[Tok blong pija long pej 25]
Prea mo wok blong prij, hemia sam blesing we oli tabu