Lavem God Ya We i Lavem Yu
Lavem God Ya We i Lavem Yu
“Yu mas lavem Hae God ya [Jeova] we i God blong yu long olgeta hat blong yu, mo long olgeta laef blong yu, mo long olgeta tingting blong yu.”—MATIU 22:37.
1, 2. ?Maet wanem samting i pusum wan Farisi blong askem kwestin ya long saed blong loa we i hae moa long ol narafala loa?
LONG taem blong Jisas, ol Farisi oli stap raorao strong long kwestin ya se: ?Long bitim 600 loa we God i givim long Moses, weswan nao i moa impoten? ?Hemia wan long ol loa long saed blong ol sakrefaes we i moa impoten? I tru, ol sakrefaes oli impoten from we ol man Isrel oli mas mekem sakrefaes long God blong i fogivim ol sin blong olgeta, mo blong talem tangkiu long hem. ?Maet loa long saed blong sakomsaes i moa impoten? Loa ya tu i impoten, from we sakomsaes i wan saen blong soemaot promes we Jeova i bin mekem long Ebraham.—Jenesis 17:9-13.
2 Be sam man long taem bifo we oli holemstrong long tingting blong ol olfala blong olgeta, oli ting se olgeta loa we God i givim, evriwan oli impoten sem mak. Folem tingting blong olgeta, nating we i luk olsem se sam loa oli no impoten tumas, be i rong blong leftemap wan loa antap long ol narawan. Ale ol Farisi oli askem kwestin ya long Jisas. Maet oli wantem se Jisas i talem wan ansa we i mekem ol man oli no moa glad long hem. Wan long ol Farisi i kam luk Jisas, i askem long hem se: “?Wanem loa blong God we i hae moa long ol narafala loa?”—Matiu 22:34-36.
3. ?Wanem loa we Jisas i talem se i hae moa long ol narawan?
3 Ansa we Jisas i givim i impoten tumas long yumi tede. Long ansa blong hem, hem i talem bigfala fasin we trufala wosip i stanap long hem, long taem bifo, naoia, mo long fiuja. Jisas i talem tok blong Dutronome 6:5 se: “ ‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem.” Farisi ya i bin askem Jisas blong talem wan loa nomo, be Jisas i talem tu loa. Long namba tu loa, hem i yusum tok blong Levitikas 19:18 se: “Narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’ ” Afta, Jisas i soemaot se olgeta haf blong trufala wosip oli stanap long tufala loa ya. Bifo we Farisi i askem long Jisas blong talem wan narafala loa we i impoten moa, Jisas i talem se: “Tufala loa ya i stamba blong Loa we God i givim long Moses, wetem ol tok blong ol profet tu.” (Matiu 22:37-40) Long stadi ya, bambae yumi tokbaot faswan long tufala loa ya. Bambae yumi lukluk long ol kwestin ya: ?From wanem yumi mas lavem God? ?Olsem wanem yumi soemaot se yumi lavem God? ?Olsem wanem yumi save wokem fasin ya blong lavem God? I impoten blong save long ansa blong ol kwestin ya, from we, sipos yumi wantem mekem Jeova i glad, yumi mas lavem hem wetem olgeta hat, laef, mo tingting blong yumi.
?Lav i Impoten Olsem Wanem?
4, 5. (a) ?From wanem Farisi ya i no sapraes long ansa we Jisas i givim? (b) ?Wanem samting we God i laekem moa, i bitim ol sakrefaes mo presen?
4 I luk olsem se Farisi we i askem kwestin ya long Jisas, hem i no sapraes mo i no sek nating long ansa we Jisas i givim. Hem i save finis se man we i mekem trufala wosip i mas lavem God, nating se plante man oli no mekem olsem. Long ol haos prea blong ol man Jiu, oli folem kastom ya blong talem baehat wan prea blong talemaot bilif, we oli kolem Shema. Insaed long prea ya i gat ol tok blong Dutronome 6:4-9 we Jisas i bin talem. Folem gospel blong Mak, Farisi ya i gohed blong talem long Jisas se: “Tija. Tok blong yu i stret. Samting ya we yu talem i tru tumas. Hae God ya nomo hem i God, i no gat narafala God moa. Mo yumi mas lavem hem long olgeta hat blong yumi, mo long olgeta tingting blong yumi mo long olgeta paoa blong yumi. Mo yumi mas lavem ol man we oli stap raonabaot long yumi. . . . Taem yumi folem tufala loa ya, yumi mekem i gud moa, i winim we yumi tekem anamol, yumi kilim, yumi bonem blong mekem wosip long God.”—Mak 12:32, 33.
5 I tru, Loa i talem se oli mas bonem anamol blong mekem wosip mo oli mas givim ol narafala presen long God. Be samting we God i tinghae moa long hem, hemia we ol man blong hem oli lavem hem wetem ful hat blong olgeta. Sipos man i givim wan smol pijin nomo long God from we i lavem Hem mo i onagud long Hem, God i tinghae moa long hem i bitim man we i givim wan taosen man sipsip be tingting blong hem i no stret. (Maeka 6:6-8) Tingbaot wido ya we Jisas i luk hem long haos blong God long Jerusalem. Wido ya i putum tu smol mane long bokis blong presen mane, we i no naf nating blong pem wan smol pijin. Be Jeova i glad moa long presen ya i bitim bigfala mane we ol rijman oli givim, from we wido ya i givim presen ya wetem bigfala lav long hat blong hem. (Mak 12:41-44) !Yumi haremgud tumas blong save se Jeova i laekem moa blong kasem samting we yumi evriwan i naf blong givim, nating sipos yumi rij no yumi pua—hemia lav blong yumi!
6. ?Pol i raetem wanem tok blong soemaot se lav i impoten?
6 Aposol Pol i makemgud olsem wanem i impoten we lav i joen wetem trufala wosip, i se: “Sipos mi gat paoa blong tok long ol lanwis blong ol man mo blong ol enjel tu, be mi no lavem man, tok ya bambae i olsem noes nomo. Bambae mi olsem wan bigfala tamtam we i stap krae nomo, no mi olsem wan bel we i stap krae blong nating. Sipos mi gat paoa blong talemaot ol tok we God i givim, be mi no lavem man, bambae mi olsem nating. Mo sipos mi kasem olgeta save blong man, wetem mining blong olgeta tok ya tu we God i stap haedem, be mi no lavem man, bambae mi olsem samting nating. Mo sipos mi bilif strong long God we i naf blong mi save seftem ol bigbigfala hil, be mi no lavem man, bambae mi olsem nating nomo. Sipos mi givimaot olting blong mi i go nating nomo long ol puaman, mo mi letem ol enemi blong mi oli bonem mi long faea from we mi man blong Kraes, be mi no lavem man, bambae mi no winim wan samting nating.” (1 Korin 13:1-3) I klia se yumi mas gat lav, sipos yumi wantem se God i glad long wosip blong yumi. ?Be, olsem wanem yumi soemaot se yumi lavem Jeova?
?Olsem Wanem Yumi Soemaot Se Yumi Lavem Jeova?
7, 8. ?Olsem wanem yumi soemaot se yumi lavem Jeova?
7 Plante man oli ting se lav i wan filing we i kamaot hem wan nomo, olsem taem wan man i lavem wan woman. Be trufala lav i no wan filing nomo. Ol aksin mo wok blong man oli makemaot se hem i gat trufala lav, i no ol filing blong hem we i makemaot samting ya. Baebol i tokbaot lav se hem i “rod we i nambawan,” mo i wan fasin we yumi mas “traehad blong folem.” (1 Korin 12:31, NW; 14:1) Baebol i talem se i nogud we ol Kristin oli ‘lavem man long toktok blong olgeta nomo, be oli mas mekem samting blong givhan long hem, blong soemaot we oli lavem hem tru.’—1 Jon 3:18.
8 Taem yumi lavem God, bambae yumi talem mo mekem ol samting we God i glad long olgeta, mo bambae yumi leftemap hem olsem King, mo stanap strong long saed blong rul blong hem. Lav ya bambae i blokem yumi blong yumi no laekem wol ya mo ol nogud fasin blong hem. (1 Jon 2:15, 16) Ol man we oli lavem God, oli agensem ol rabis fasin. (Ol Sam 97:10) Mo tu, man we i lavem God, i lavem ol man raonabaot long hem. Bambae yumi tokbaot samting ya long nekis stadi. Sipos yumi lavem God, bambae yumi obei long hem tu. Baebol i talem se: “Sipos yumi lavem God, hemia i min se yumi stap folem ol tok blong hem.”—1 Jon 5:3.
9. ?Olsem wanem Jisas i soemaot se hem i lavem God?
9 Jisas i soemaot long fasin we i stretgud, olsem wanem blong lavem God. Lav i pulum Jisas blong lego ples blong hem long heven, mo blong kamdaon olsem wan man long wol ya. Lav i pulum hem blong leftemap nem blong Papa blong hem long evri samting we hem i tijim mo mekem. Lav i pulum hem blong “obei long God gogo i ded.” (Filipae 2:8) Fasin blong obei we Jisas i folem from we hem i lavem God, i openem rod long ol man we oli bilif, blong oli save kam stret man long fes blong God. Pol i raetem se: “From we wan man nomo [Adam] i no obei long God, olgeta man oli kam man nogud. Be long sem fasin, from we wan man nomo [Jisas Kraes] i obei long God, God i mekem we plante man oli kam stret man long fes blong hem.”—Rom 5:19.
10. ?From wanem man we i lavem God i obei long hem?
10 Yumi soemaot se yumi lavem God taem yumi obei long hem, olsem Jisas i bin mekem. Aposol Jon we Jisas i lavem hem tumas, i talem se: “Fasin [lav] ya . . . hem i min se yumi mas folem ol tok we God i talem.” (2 Jon 6) Olgeta we oli rili lavem Jeova, oli wantem tumas we hem i lidim olgeta. Oli luksave se olgeta nomo oli no naf blong save stret rod blong wokbaot long hem, taswe oli trastem waes blong God mo oli folem ol advaes we hem i givim wetem lav. (Jeremaea 10:23) Olgeta ya oli olsem ol man Berea we oli glad moa blong tingbaot ol tok blong God, mo “oli wantem tumas blong harem” tok blong hem, from we oli wantem mekem samting we God i glad long hem. (Ol Wok 17:11) Oltaem oli ridim gud ol tok blong Baebol blong kasem save moa long samting we God i wantem. Olsem nao, oli save soemaot moa se oli lavem God, taem oli mekem ol wok blong obei long hem.
11. ?I minim wanem blong lavem God wetem olgeta hat, tingting, laef, mo paoa blong yumi?
11 Olsem Jisas i talem, yumi mas lavem God wetem olgeta hat, tingting, laef, mo paoa blong yumi. (Mak 12:30) Lav ya i kamaot long hat, hem i joen wetem ol filing blong yumi, ol samting we yumi wantem, mo ol tingting blong yumi we oli haed, mo yumi wantem tumas blong mekem Jeova i glad. Yumi lavem Jeova wetem tingting blong yumi tu. Yumi no mekem wosip long fasin we yumi no yusum tingting blong yumi nating. Yumi kasem save finis long Jeova mo ol fasin, rul, mo plan blong hem. Yumi yusum olgeta laef blong yumi, hemia ful bodi mo laef we yumi gat, blong mekem wok blong hem mo presem hem. Mo yumi yusum paoa blong yumi long rod ya tu.
?From Wanem Yumi Mas Lavem Jeova?
12. ?From wanem God i wantem se yumi lavem hem?
12 Wan risen blong lavem Jeova, hemia from we hem i wantem se yumi soemaot ol fasin blong hem. God i stamba blong lav mo hem i nambawan eksampol blong lav tu. Tabu spirit i pulum aposol Jon blong raetem se: “God [hem] i lav.” (1 Jon 4:8, NW ) God i wokem ol man blong oli tekem fasin blong hem. Yes, hem i wokem yumi we yumi naf blong soemaot lav. Blong talem stret, rul blong Jeova i stanap long lav. Hem i wantem se ol man we hem i rul long olgeta, oli mekem wok blong hem from we oli lavem hem mo from we oli laekem stret fasin blong hem blong rul. Tru ya, i mas gat lav, blong olgeta samting we God i wokem oli save stap long pis mo joengud.
13. (a) ?From wanem Jisas i talem long ol man Isrel se: ‘Yufala i mas lavem Jeova we i God blong yufala’? (b) ?From wanem i stret we Jeova i wantem se yumi lavem hem?
13 Wan narafala risen blong lavem Jeova, hemia blong soemaot tangkiu from ol samting we hem i mekem long yumi. Tingbaot tok we Jisas i talem long ol man Jiu se: “Yufala i mas lavem Hae God ya [Jeova] we i God blong yufala.” Hem i no wan god we oli no save hem mo we i stap longwe long olgeta. God ya we oli mas lavem hem, i bin soemaot lav blong hem long olgeta finis. Jeova i God blong olgeta. Hem nao we i bin mekem rod blong oli kamaot long Ijip mo go long Promes Lan. Hem nao we i bin protektem olgeta, givim kakae long olgeta, lavem olgeta, mo stretem olgeta wetem lav. Tede, Jeova i God blong yumi. Hem i givim Pikinini blong hem olsem wan ransom, blong yumi save kasem laef we i no save finis. !From ol samting ya, i stret nomo we Jeova i wantem se yumi lavem hem! Yumi givimbak lav long God from ol samting we hem i mekem long yumi. Yumi lavem God ya we i lavem yumi. Yes, yumi lavem Jeova we hem i “lavem yumi fastaem.”—1 Jon 4:19.
14. ?Olsem wanem Jeova i lavem ol man olsem wan papa i lavem ol pikinini blong hem?
14 Jeova i lavem ol man olsem wan papa i lavem ol pikinini blong hem. Ol papa we oli gat lav, oli wok had blong plante yia blong lukaotgud long ol pikinini blong olgeta. Oli lusum bigfala mane mo lego plante narafala samting, blong oli save lukaotgud long ol pikinini blong olgeta. Ol papa ya oli no stretgud olgeta, be oli wantem se ol pikinini blong olgeta oli hapi mo oli gohed gud long laef. Taswe oli tijim ol pikinini blong olgeta, oli leftemap tingting blong olgeta, oli givhan long olgeta, mo oli stretem olgeta. ?Wanem samting we ol papa ya oli wantem se ol pikinini oli givimbak long olgeta? Oli wantem se ol pikinini oli lavem olgeta mo oli tinghevi long gudfala tijing we oli kasem. Taswe, i stret nomo we Papa blong yumi long heven i wantem se yumi soemaot lav mo tangkiu long hem from ol gudgudfala samting we hem i mekem long yumi.
Wokem Fasin Ya Blong Lavem God
15. ?Wanem faswan samting we yumi mas mekem blong wokem fasin ya blong lavem God?
15 Yumi no bin luk God samtaem mo yumi no bin harem voes blong hem. (Jon 1:18) Nating se i olsem, hem i singaot yumi blong lavem hem mo blong kam fren blong hem. (Jemes 4:8) ?Olsem wanem yumi save mekem olsem? Faswan samting we yumi mas mekem blong lavem eni man, i blong savegud hem. I had blong lavem wan man we yumi no save hem. Jeova i givim Tok blong hem, Baebol, blong yumi kasem save long hem. Taswe, Jeova i yusum ogenaesesen blong hem blong pulum yumi blong ridim Baebol evri dei. Baebol nao i givim save long yumi long saed blong God, ol fasin blong hem, mo ol samting we hem i mekem long ol man long ol taosen yia we oli pas finis. Taem yumi tingting dip long ol save ya, yumi save God moa, mo yumi lavem hem.—Rom 15:4.
16. ?Olsem wanem yumi lavem God moa taem we yumi tingting dip long wok we Jisas i mekem long wol?
16 Wan bigfala rod blong lavem Jeova moa, i blong tingbaot laef blong Jisas Kraes mo wok we hem i mekem long wol ya. Yes, Jisas i soemaot gud ol fasin blong Papa blong hem, taswe hem i talem se: “Man we i luk mi, hem i luk Papa blong mi.” (Jon 14:9) Jisas i soem sore long wan wido, i mekem boe blong hem i laef bakegen. ?Olsem wanem? ?Fasin ya we hem i mekem i tajem hat blong yu? (Luk 7:11-15) Pikinini ya blong God we i hae moa long ol narafala man, hem i mekem tingting blong hem i stap daon blong wasem leg blong ol disaepol blong hem. ?Yu yu laekem fasin ya blong hem? (Jon 13:3-5) Nating se hem i hae moa mo waes moa i bitim ol narafala man, i no gat wan man we i fraet blong toktok wetem hem, mo ol pikinini tu oli no fraet. ?Samting ya i no tajem filing blong yu? (Mak 10:13, 14) Taem yumi tingting dip long ol fasin ya, yumi kam olsem ol Kristin we Pita i raetem leta long olgeta se: “Nating we yufala i no luk Jisas Kraes samtaem, be yufala i lavem hem.” (1 Pita 1:8) Taem yumi lavem Jisas moa, yumi lavem Jeova moa tu.
17, 18. ?Wanem ol samting we Jeova i givim wetem lav we yumi mas tingting dip long olgeta, nao oli save pulum yumi blong lavem hem moa?
17 Wan narafala rod blong lavem God moa, i blong tingting dip long ol gudfala samting we hem i mekem mo i givim long yumi blong yumi save haremgud long laef—ol samting raonabaot long yumi we hem i wokem mo we oli naes tumas, fulap defren kaen gudfala kakae, kampani blong ol gudfala fren we oli laekem yumi, mo plante narafala samting we oli mekem yumi haremgud mo givim glad long yumi. (Ol Wok 14:17) Moa we yumi kasem save long God, moa we yumi save talem tangkiu long hem from gudfala fasin blong hem mo fulap presen we hem i givim wetem gladhat. Tingbaot ol samting we Jeova i mekem blong yu wan. ?Yu no ting se i stret we yu lavem hem from?
18 Wan long ol gudfala presen we God i givim, hemia janis blong prea long hem enitaem nomo, mo blong save se hem i “harem prea” blong yumi. (Ol Sam 65:2, NW ) Jeova i givim raet long Pikinini blong hem we i lavem hem tumas, blong i rul mo i jajem man. Be hem i no givim wok ya blong lesin long ol prea blong yumi, long Pikinini blong hem no long wan narafala man. Hem nao i stap lesin long ol prea. Lav ya blong Jeova mo fasin blong hem blong intres long yumi wanwan, i pulum yumi blong kam klosap long hem.
19. ?Wanem ol promes blong Jeova we oli pulum yumi blong kam klosap long hem?
19 Yumi kam klosap moa long Jeova, taem yumi tingbaot ol blesing we bambae hem i givim long ol man. Hem i mekem promes blong finisim sik, krae, mo ded. (Revelesen 21:3, 4) Taem ol man oli kam stret gud olgeta, bambae i no gat wan man we tingting blong hem i foldaon, i harem nogud, no i kasem wan bigfala trabol we i spolem hem. Hanggri, fasin pua, mo faet, bambae i no moa gat. (Ol Sam 46:9; 72:16) Wol ya bambae i kam wan paradaes. (Luk 23:43) Jeova i no nid blong givim ol blesing ya, be hem i givim from we hem i lavem yumi.
20. ?Moses i talem wanem blong soem blesing we man i kasem taem i lavem Jeova?
20 Taswe, i gat fulap samting we oli pulum yumi blong lavem God mo blong mekem lav ya i kam bigwan moa. ?Olsem wanem? ?Bambae yu traem lavem God moa, mo letem hem i lidim yu? Jus ya i stap long yu nomo. Moses i luksave ol blesing we man i kasem taem i wokem fasin ya blong lavem Jeova mo i holemtaet lav ya. Long taem bifo, Moses i talem long ol man Isrel se: “!Mi mi wantem tumas blong yufala i jusumaot laef! Hae God i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. Sipos yufala i mekem olsem, . . . bambae yufala evriwan i laef, mo bambae yufala i save stap longtaem.”—Dutronome 30:19, 20.
?Yu Yu Tingbaot?
• ?From wanem yumi mas lavem Jeova?
• ?Olsem wanem yumi save soemaot se yumi lavem God?
• ?Wanem ol samting we oli pulum yumi blong lavem Jeova?
• ?Olsem wanem blong wokem fasin ya blong lavem God?
[Kwestin]