Ol Bigfala Poen Long Sing Blong Solomon
Tok Blong Jeova i Wan Samting We i Laef
Ol Bigfala Poen Long Sing Blong Solomon
“DALING, taem yu stap wetem ol narafala woman, yu yu olsem wan gudfala waelflaoa we i stap gru long medel blong rop we i gat nil.” “Man blong mi, mi mi laekem yu tumas, i winim olgeta narafala man. Taem yu stap wetem ol narafala man, yu yu olsem gudfala tri ya apol we i stap long medel blong ol narafala tri long bus.” “?Hu woman ya we taem i lukluk i kam, mifala i luk olsem we delaet i kamtru? Hem i naes we i naes, mo fes blong hem i saen we i saen, olsem san mo mun.” (Sing Blong Solomon 2:2, 3; 6:10) !Ol vas ya we oli kamaot long Sing Blong Solomon oli naes tumas! Ful buk ya i talemaot ol naesfala toktok we oli gat filing mo oli fulap long mining. Taswe Baebol i talem nem blong sing ya se, “Sing we i Gud Moa, i Winim Ol Narafala Sing.”—Sing Blong Solomon 1:1.
King Solomon blong Isrel bifo i raetem sing ya raonabaot long yia 1020 B.K.T. Hemia long fas haf blong rul blong hem blong 40 yia. Sing ya i tokbaot stori blong wan yangfala boe, we i lukaot long ol sipsip, mo wan gel Sulam we hem i kam long bus. Tufala i lavlavem tufala. Insaed long sing ya i gat mama blong gel ya mo ol brata blong hem, “ol woman Jerusalem [ol woman we oli stap long haos blong king]”, mo “ol dota blong Saeon [ol woman blong Jerusalem].” (Sing Blong Solomon 1:5; 3:11, NW ) I no isi long man we i stap ridim Baebol blong luksave ol defdefren man we oli toktok long Sing Blong Solomon. Be i gat rod blong luksave, hemia se yumi mas lukluk long ol tok we olgeta oli talem.
Sing Blong Solomon, we i wan buk blong Baebol, i save givhan bigwan long yumi from tu risen. (Hibrus 4:12) Faswan risen se, hem i tijim yumi blong save wanem ya trufala lav we man mo woman tufala i save gat long tufala. Seken risen se, singsing ya i olsem wan pijatok blong soemaot lav we Jisas Kraes i gat long kongregesen blong ol tabu Kristin.—2 Korin 11:2; Efesas 5:25-31.
“YUFALA I NO TRAEM WEKEMAP FILING BLONG LAV LONG MI”
“Mi wantem blong yu stap kisim mi we yu kisim mi. Yu yu laekem mi tumas. Ol fasin ya we yu stap mekem long mi, i swit moa i winim waen.” (Sing Blong Solomon 1:2) Ol vas blong Sing Blong Solomon i stat wetem toktok ya blong wan gel we i pua nomo mo i kam long bus. Ol man oli pulum hem i kam long haos tapolen blong King Solomon. ?Olsem wanem hem i kam stap long ples ya?
Hem i talem se: “Ol brata blong mi oli kros long mi, oli mekem mi mi stap wok long plantesen blong grep.” Gel ya i lavem wan boe we i stap lukaot long ol sipsip. Wan dei long gudfala taem ya blong yia we ol tri oli putum flaoa, boe ya i askem hem blong go wokbaot wetem hem. From samting ya ol brata blong gel ya oli kros long hem, oli wantem blokem hem blong go, nao oli givim wan wok long hem blong “ronem ol wael dog” we oli stap spolem plantesen blong grep. Wok ya i tekem hem i kam stap klosap long ples we Solomon i putum ol haos tapolen blong hem long hem. Taem gel ya i godaon long “plantesen blong tri ya amon,” ol man oli luk we hem i naes tumas, mo oli pulum hem i kam long kamp Blong Solomon.—Sing Blong Solomon 1:6; 2:10-15; 6:11.
Taem yangfala gel ya i wantem tumas blong luk boe ya we i stap lukaot long ol sipsip, ol woman we oli stap long haos blong king oli talem long hem blong “folem trak” blong ol sipsip mo lukaotem boe ya. Be Solomon i no letem hem i go. Hem i talem ol tok blong soem se hem i ting se gel ya i naes tumas. Solomon i promes se: “Bambae mifala i wokem wan jen blong yu long gol, mo . . . ol bidbid we mifala i wokem long silva.” Be Solomon i no save pulum gel ya nating. Boe we i stap lukaot long ol sipsip i go long kamp ya Blong Solomon mo hem i faenem gel ya, hem i talem long hem se: “Yu yu naes we yu naes, O gelfren blong mi. Yu yu naes we yu naes.” Yangfala gel ya i askem long ol woman we oli stap long haos blong king blong oli mekem wan promes: “Yufala i no traem wekemap filing blong lav [long mi] bifo we mi mi wantem.”—Sing Blong Solomon 1:8-11, 15; 2:7, NW; 3:5, NW.
Ansa Blong Sam Kwestin Long Saed Blong Baebol:
1:2, 3 (NW )—?From wanem gel blong Sulam i tingbaot ol naesfala toktok blong boe ya we i lukaot long ol sipsip se oli olsem waen, mo from wanem hem i tingbaot nem blong boe ya olsem oel? Waen i save mekem hat blong man i glad mo taem oli kafsaedem oel long hed blong wan man, oel ya i mekem hem i haremgud. Long sem fasin, yangfala gel ya i save stap strong mo haremgud taem hem i tingbaot lav we boe ya i gat long hem mo taem i tingbaot nem blong boe ya. (Ol Sam 23:5, NW; 104:15) Taem ol tabu Kristin mo ol narafala trufala Kristin, oli tingbaot lav we Jisas Kraes i soemaot long olgeta, oli kasem paoa mo i leftemap tingting blong olgeta tu.
1:5—?From wanem gel ya we i kam long bus i talem se skin blong hem i blak olsem “ol haos tapolen long draeples ya Kedara”? Ol man oli yusum hea blong nani, we oli mekem kaliko long hem, blong plante defdefren samting. (Namba 31:20) Olsem nao, oli bin yusum kaliko blong “hea blong nani” blong wokem ol “tapolen” long haos tapolen blong God. (Eksodas 26:7) Maet oli bin wokem ol haos tapolen blong Kedara long hea blong ol nani we i blak, sem mak olsem ol haos tapolen blong ol man blong Medel Is tede.
1:15 (NW )—?Boe we i lukaot long ol sipsip i minim wanem taem hem i talem se: “Tufala ae blong yu i olsem ae blong sotleg”? Boe ya i stap talem se taem hem i lukluk i go long ae blong gelfren blong hem, oli soemaot kaen mo kwaet fasin blong hem olsem ae blong sotleg i soem kaen mo kwaet fasin.
2:7; 3:5—?From wanem ol woman we oli stap long haos Blong Solomon oli mekem strong promes “long nem blong ol anamol ya dia mo gudfala anamol ya gasel”? Plante man i save ol dia mo gasel from fasin blong olgeta blong ron mo jamjam. I naes tumas blong wajem olgeta. Taswe, yangfala gel blong Sulam i stap askem ol woman ya blong oli mekem strong promes ya long nem blong ol samting we oli naes tumas, blong oli no traem wekemap filing blong lav long hem.
Ol Lesen Blong Yumi:
1:2; 2:6. Sipos wan man mo woman tufala i stap fren blong mared, maet i stret we tru long ol toktok mo aksen we oli klin mo gud, tufala i save soemaot we tufala i laeklaekem tufala. Be tufala i mas lukaot gud se ol toktok mo aksen ya i kamaot from we tufala i rili kea long tufala. Sipos tufala i wantem tufala tumas from wan nogud tingting, samting ya i save lidim tufala blong mekem rabis fasin long saed blong seks.—Galesia 5:19.
1:6; 2:10-15. Ol brata blong gel blong Sulam oli no letem sista blong olgeta i go stap long wan kwaet ples long ol hil, hem wan wetem boe ya. Hemia i no from we fasin blong gel ya i no stret no from we tingting blong hem i nogud. Nogat. Ol brata blong hem oli mekem olsem from we oli wantem protektem hem. Oli no wantem se hem i stap long wan ples we sin i save pulum hem blong foldaon isi nomo. Hemia i wan lesen blong tufala we i stap fren tugeta blong mared, se tufala i no mas go long ol kwaet ples tufala nomo.
2:1-3, 8, 9. Nating se gel blong Sulam i naes tumas, hem i gat tingting daon. Hem i ting se hem i olsem “waelflaoa ya nomo [i no spesel nating] we i stap gru long ples ya Saron.” From we hem i naes tumas mo from fasin blong hem blong stap tru long Jeova, boe we i stap lukaot long ol sipsip i ting se hem i olsem wan “gudfala waelflaoa we i stap gru long medel blong rop we i gat nil.” ?Mo olsem wanem long boe ya? From we hem i naes tumas, gel ya i tingbaot hem olsem “anamol ya gasel.” Hem tu i wan man blong bilif mo hem i holemstrong long Jeova. Gel ya i talem se: “Taem yu stap wetem ol narafala man, yu yu olsem gudfala tri ya apol [we i givim sed mo frut] we i stap long medel blong ol narafala tri long bus.” Taem yumi wantem mared, i gud tumas blong lukaot wan man no woman we i gat bilif mo i holemstrong long Jeova.
2:7; 3:5. Gel ya we i kam long bus hem i no gat filing nating se hem i laekem Solomon. Mo tu, hem i askem ol woman we oli stap long haos Blong Solomon blong oli promes se oli no traem wekemap filing blong hem, blong i laekem wan narafala man. Hem i laekem boe ya we i stap lukaot long ol sipsip nomo. Yumi no save gat filing blong lav long eniman nomo mo i no stret tu blong mekem olsem. Sipos wan Kristin i wantem mared, i gud we hem i lukaot olgeta nomo we oli stap tru long Jeova.—1 Korin 7:39.
“?FROM WANEM YUFALA I WANTEM LUKLUK MI OLSEM?”
Wan samting “i aot long draeples longwe, we i stap stanap stret olsem smok blong faea.” (Sing Blong Solomon 3:6) ?Ol woman blong Jerusalem oli luk wanem, taem oli go afsaed? !Oli luk Solomon mo ol man blong hem we oli stap kambak long taon! Mo king i stap karem yangfala gel ya blong Sulam i kam wetem hem.
Boe we i lukaot long ol sipsip i folem gel ya i kam, mo i no longtaem biaen, boe ya i faenem wan rod blong go luk hem. Taem boe ya i talemaot bakegen lav we hem i gat long gel ya, gel ya i talemaot tingting we hem i gat blong aot long taon ya. Hem i talem se: “Bambae mi go stap long hil ya we i gat fulap senta ya mir long hem, mo long hil ya we i olsem hip blong senta ya frangkinsens, gogo kasem we kol win blong moning i blu i kam, mo tudak i lus, delaet i kamtru.” Hem i askem long boe ya blong “kam long gudfala ples ya blong spel blong i kakae ol nambawan frut blong ples ya.” Boe i ansa long hem se: “Daling, yu yu woman blong mi. Mi mi kam insaed finis long gudfala ples ya blong mi.” Ol woman blong Jerusalem oli talem long tufala se: “Tufala, yutufala i gohed, yutufala i kakae, yutufala i dring, gogo yutufala i drong long [“ol naesfala toktok blong yutufala we i soemaot lav,” NW ].”—Sing Blong Solomon 4:6, 16; 5:1.
Afta we gel Sulam i talemaot wan drim blong hem long ol woman we oli stap long haos Blong Solomon, hem i talem long olgeta se: “Mi mi stap wantem hem tumas, gogo mi kam slak from.” Oli askem long hem se: “?Wanem i mekem boefren blong yu i defren long ol narafala man (NW )?” Hem i ansa se: “Man blong mi, hem i strong, mo i naes we i naes. Long ten taosen man, hem nomo i naes olsem.” (Sing Blong Solomon 5:2-10) Solomon i talem ol naesfala toktok blong presem gel ya, be gel ya i ansa wetem tingting daon, i se: “?From wanem yufala i wantem luk mi olsem?” (Sing Blong Solomon 6:4-13) King i ting se hem i gat janis nao blong winim lav blong gel ya, ale hem i gohed blong talemaot plante moa naesfala toktok long hem. Be, lav blong gel ya i stap strong long boe we i stap lukaot long ol sipsip. Long taem ya nao Solomon i letem gel ya i gobak long ples blong hem.
Ansa Blong Sam Kwestin Long Saed Blong Baebol:
4:1; 6:5—?From wanem hea blong yangfala gel ya i olsem “ol nani”? Hemia from we hea blong hem i saen mo i gru gud olsem hea blong ol blak nani.
4:11—?Tok ya se “maot blong yu i swit olsem hani, mo tang blong yu i swit olsem melek wetem hani,” i minim wanem? Hani we i stap long haos blong ol sugabag i gud moa mo i swit moa i bitim hani we man i karemaot finis long haos blong ol sugabag. Tok ya se maot blong gel Sulam i swit olsem hani mo tang blong hem i swit olsem melek wetem hani, i blong makem we ol toktok blong gel ya i gud mo i naes tumas.
5:12 (NW )—?Wanem tingting i stap biaen long tok ya “ae blong hem i olsem ol sotleg we oli stap klosap long wota, oli stap swim long melek”? Yangfala gel ya i stap tokbaot tufala ae blong boe ya we hem i lavem, se oli naes tumas. Maet hem i stap talem ol naesfala toktok olsem blong talem se mabol blong ae blong hem we i blak wetem waet we i goraon long hem, i luk olsem ol sotleg we oli blu mo grei mo oli stap swim long melek.
5:14, 15 (NW )—?From wanem gel ya i talem ol tok ya long saed blong tufala han mo leg blong boe we i lukaot long sipsip? Yangfala gel ya i stap tokbaot ol fingga blong boe ya se oli olsem gol mo ol sel fingga blong hem se oli olsem naesfala ston ya krisolaet. Hem i talem se tufala leg blong boe ya oli olsem “tufala pos we oli wokem long ston ya mabol.” Hemia from we oli strong mo oli naes tumas.
6:4—?From wanem yangfala gel ya i olsem Tijaha? Josua i bin winim taon ya we i blong ol man Kenan. Mo, afta long taem Blong Solomon, taon ya hem i kam faswan kaptel blong ol ten laen blong Isrel long not. (Josua 12:7. 24; 1 King 16:5, 6, 8, 15) Wan buk blong histri i talem se: “I luk olsem se taon ya i naes we i naes. Ating hemia nao from wanem oli tokbaot taon ya long vas ya.”
6:13, futnot (NW )—?Wanem ya “danis blong tufala kamp”? Tok ya oli save tanem i kam “danis blong Mahanaim” tu. Taon we i gat nem ya hem i stap long is saed blong Jodan Reva, klosap long Jabok Reva. (Jenesis 32:2, 22; 2 Samuel 2:29) Maet “danis ya blong tufala kamp” i stap tokbaot wan spesel kaen danis we oli mekem long taon ya long taem blong wan lafet.
7:4—?From wanem Solomon i talem se nek blong gel blong Sulam i olsem wan “wajhaos we oli flasem long tut blong elefen”? Bifo finis, Solomon i talem ol naesfala toktok long gel ya se: “Nek blong yu i naes tumas . . . olsem wajhaos blong papa blong mi.” (Sing Blong Solomon 4:4) Wan wajhaos i longfala mo i tintin nomo. Mo tut blong elefen hem i smut. Solomon i laekem nek blong gel ya from we i longfala mo i smut.
Ol Lesen Blong Yumi:
4:1-7. Nating se gel blong Sulam i no stretgud olgeta, hem i no letem Solomon i switim hem wetem ol naesfala toktok mo aksen. Samting ya i givim pruf se hem i gat klin fasin. Gudfala fasin blong hem blong holem ol rul mo stap klin i mekem hem i luk naes moa. I gud sipos olgeta Kristin woman oli traehad blong gat fasin olsem mo olgeta tu bambae oli luk naes moa.
4:12. Gel blong Sulam i olsem wan naesfala garen we i gat stonwol i goraon long hem. I gat wan rod nomo blong go insaed long hem, hemia tru long wan get we i lok. Yangfala gel blong Sulam i holem lav blong hem i stap blong boe ya nomo we bambae hem i mared wetem. !Hemia wan nambawan eksampol blong olgeta Kristin man mo woman we oli no mared yet!
“FAEA BLONG JEOVA”
“?Hu woman ya longwe long draeples i stap wokbaot i kam, we hem wetem man blong hem tufala i stap holeholem han blong tufala?” Hemia kwestin we ol brata blong gel blong Sulam i askem taem oli luk hem i stap kambak long haos. Samtaem bifo, wan long olgeta i bin talem se: “Sipos hem i strong olsem wan stonwol, bambae mifala i bildim wan wajhaos long silva, blong mekem stonwol ya i strong moa. Be sipos hem i olsem wan doa, bambae mifala i blokemgud hem long ol plang we oli wokem long wud ya sida.” Naoia we lav blong gel blong Sulam i winim ol traem finis mo hem i pruvum se lav blong hem i tru, hem i talem se: “Mi mi wan stonwol ya, mo tufala titi blong mi i olsem tufala wajhaos blong hem. Man blong mi i save we hem nomo i stap mekem mi mi harem gud, mi stap long pis.”—Sing Blong Solomon 8:5, 9, 10.
Trufala lav hem i olsem “faea” [“faea blong Jeova,” NW ]. ?From wanem? From we Jeova i stamba blong lav olsem. Hem nao i wokem yumi blong yumi naf blong lavem narafala. Trufala lav ya i wan faea we i bon olwe nomo, i no save ded samtaem. Sing Blong Solomon i soemaot long wan naesfala fasin se lav blong wan man mo woman “hem i gat paoa, man i no save blokem, olsem we ded i gat paoa, man i no save blokem.”—Sing Blong Solomon 8:6.
Naesfala singsing Blong Solomon i halpem yumi blong save fasin fren blong Jisas Kraes wetem olgeta we oli mekemap “woman we bambae i mared” long hem long heven. (Revelesen 21:2, 9) Lav we Jisas i gat long ol tabu Kristin i winim lav blong wan man mo woman. Olgeta we oli mekemap grup blong woman ya we bambae i mared, oli gat fasin ya blong holemstrong long Jisas oltaem nomo. Jisas i gat lav long “ol narafala sipsip” tu from we hem i givim laef blong hem blong sevem olgeta. (Jon 10:16) Taswe, olgeta trufala man blong wosip oli folem eksampol blong gel blong Sulam taem oli gat trufala lav we i stap olwe mo taem oli holemstrong long God.
[Tok blong pija long pej 14]
?Sing Blong Solomon i tijim yumi blong lukaotem wanem kaen man no woman blong mared wetem?