Jeova Bambae i “Stretem Problem Blong Olgeta”
Jeova Bambae i “Stretem Problem Blong Olgeta”
“?Yufala i ting se ol man blong [God] we hem i jusumaot olgeta, oli save krae long hem long dei mo long naet, be hem i no save stretem problem blong olgeta?”—LUK 18:7.
1. ?Eksampol blong hu i leftemap tingting blong yu, mo from wanem?
LONG olgeta ples blong wol, ol Witnes blong Jeova oli haremgud long kampani blong ol olfala Kristin brata sista blong olgeta we oli bin mekem wok blong Jeova plante yia finis. ?Yu yu save sam long ol gudfala brata sista ya? Ating yu tingbaot wan olfala sista we i baptaes plante yia finis, mo klosap hem i neva mestem wan miting long Haos Kingdom. Ating yu tingbaot wan olfala brata we evri wik hem i joen long wok blong prij wetem kongregesen, mo hem i bin mekem olsem blong plante yia finis. I tru, plante long ol olfala ya we oli holemstrong long God longtaem, oli bin ting se Amagedon bambae i kam plante yia finis. Be nating se rabis wol ya i stap yet, oli no lusum bilif long ol promes blong Jeova. Tingting blong olgeta i stap strong yet blong “stanap strong gogo olgeta samting ya i finis.” (Matiu 24:13) Bigfala bilif we ol gudfala man ya blong Jeova oli soemaot, i rili leftemap tingting blong yumi evriwan long kongregesen.—Ol Sam 147:11.
2. ?Wanem samting i mekem yumi harem nogud?
2 Be samtaem i no olsem. Sam Witnes we oli bin mekem wok blong prij blong plante yia oli letem bilif blong olgeta long Jeova i kam slak, nao oli no moa joen wetem Kristin kongregesen. Yumi harem nogud taem sam fren blong yumi oli lego Jeova. Yumi wantem givhan wetem fulhat blong yumi long evri “sipsip we i lus,” blong oli kambak insaed long kongregesen. (Ol Sam 119:176; Rom 15:1) Nating we i olsem, sam kwestin oli stanap from tufala fasin ya we i defdefren—hemia se, samfala oli holem bilif mo samfala oli lusum bilif. ?Wanem i mekem se plante Witnes oli holem strong bilif long ol promes blong Jeova be samfala oli lusum bilif? ?Olsem wanem yumi wanwan i save mekem bilif blong yumi i stap strong se ‘Bigfala Dei blong Jeova’ i kam klosap finis? (Sefanaea 1:14) Bambae yumi tokbaot wan parabol we i stap long gospel blong Luk.
Woning Long Olgeta We Oli Stap Laef ‘Taem Pikinini Blong Man i Kambak’
3. ?Parabol blong wido mo jif i save givhan long hu moa? ?From wanem?
3 Long Luk japta 18, yumi faenem wan parabol we Jisas i talem long saed blong wan wido mo wan jif. Parabol ya i klosap sem mak long stori we yumi bin tokbaot long laswan stadi, long saed blong man we i askem plante taem long wan fren blong hem blong i givim sam kakae long hem. (Luk 11:5-13) Be ol vas raonabaot long parabol ya blong wido mo jif oli soemaot se stori ya i stret long olgeta we oli stap laef ‘taem Pikinini blong Man i kambak’ blong rul long Kingdom blong hem, hemia long ol yia afta long 1914.—Luk 18:8. *
4. ?Bifo we Jisas i talem parabol we i stap long Luk japta 18, hem i tokbaot wanem?
4 Bifo long parabol ya, Jisas i talem se ol pruf blong soemaot se hem i rul finis long Kingdom blong hem, olgeta man bambae oli luk klia nomo, olsem “taem laetning i laet, i finisim skae, i stat long wan saed, i go finis long narasaed.” (Luk 17:24; 21:10, 29-33) Be bighaf blong ol man we oli stap laef “klosap en blong wol ya” bambae oli no wantem save long ol pruf ya. (Daniel 12:4) ?From wanem? From semfala risen we ol man long taem blong Noa mo Lot oli no wantem lesin long woning we Jeova i givim. Long tufala taem ya, ol man ‘oli stap kakae, oli stap dring, oli stap pem ol samting, oli stap salem ol samting, oli stap wokem garen, mo oli stap wokem haos, go kasem dei ya we olgeta evriwan i lus.’ (Luk 17:26-29) Oli lusum laef blong olgeta from we oli stap bisi tumas long ol wok long laef blong olgeta evri dei, mo oli no tingbaot samting we God i wantem. (Matiu 24:39) Tede tu, ol man oli stap bisi tumas long ol wok blong olgeta evri dei, mo oli no luksave se en blong rabis wol ya i klosap finis.—Luk 17:30.
5. (a) ?Jisas i givim woning long hu, mo from wanem? (b) ?From wanem samfala oli lusum bilif?
5 I klia se Jisas i wari long ol man blong hem. Olgeta tu oli save letem wol blong Setan i pulum olgeta gogo, oli ‘gobak long ol samting we oli livim finis.’ (Luk 17:22, 31) Tru ya, samting ya i stap hapen long sam Kristin. Plante yia oli bin wet long dei blong Jeova blong finisim rabis fasin blong wol ya. Be taem oli luk we Amagedon i no kam kwik olsem oli wantem, oli harem nogud. Oli no moa gat strong tingting se dei blong Jeova blong jajem ol man i klosap. Oli kam slak long wok blong prij mo oli spenem moa taem long ol samting long saed blong laef blong olgeta long wol ya, nao i gat smoltaem nomo i stap blong oli mekem wok blong Jeova. (Luk 8:11, 13, 14) Sloslo, oli ‘gobak long ol samting we oli livim finis.’ !Sore tumas!
Yumi Mas “Prea Oltaem”
6-8. (a) Talem parabol blong wido mo jif. (b) ?Wanem mining blong parabol ya folem ol tok blong Jisas?
6 ?Olsem wanem yumi save meksua se strong bilif we yumi gat long ol promes blong Jeova we bambae oli kamtru, i no kam slak? (Hibrus 3:14) Jisas i ansa long kwestin ya jes afta we hem i givim woning long ol disaepol blong hem se oli no mas gobak long rabis wol blong Setan.
7 Folem ol save long buk blong Luk, Jisas i “talem wan parabol long olgeta blong tijim olgeta, se oli mas prea oltaem, we oli no letem tingting blong olgeta i foldaon.” Jisas i talem se: “Long wan vilej, i gat wan jif i stap we i no save fraet long God, mo i no save tingbaot ol man tu. Mo long sem vilej ya, i gat wan wido i stap, we oltaem hem i stap kam luk jif ya, i stap talem long hem se, ‘Plis yu stretem problem blong mi wetem enemi blong mi.’ Be jif ya i stap longtaem, we hem i no wantem stretem problem ya, gogo hem i tingbaot se, ‘Nating we mi no save fraet long God mo mi no save tingbaot ol man, be from we woman ya i stap mekem tumas trabol long mi olsem, mi mi mas stretem problem blong hem. Sipos no, bambae hem i stap kam luk mi gogo, hem i mekem mi mi slak olgeta.’ ”
8 Afta we Jisas i talem stori ya, hem i talem mining blong hem se: “Yufala i traem tingbaot tok ya we rabis jif ya i talem. ?Be olsem wanem long God? ?[“Nating we hem i gat longfala tingting,” NW ] yufala i ting se ol man blong hem we hem i jusumaot olgeta, oli save krae long hem long dei mo long naet, be hem i no save stretem problem blong olgeta? ?Yufala i ting se hem i no save mekem kwik? !Si, hem i mas! Mi mi talem long yufala. God bambae i kwik blong givhan long ol man blong hem blong stretem ol problem blong olgeta. ?Be taem mi, mi Pikinini blong Man, mi kambak long wol ya bakegen, bambae mi save faenem plante man we oli bilif long mi, no nogat?”—Luk 18:1-8.
“Plis Yu Stretem Problem Blong Mi”
9. ?Wanem bigfala tingting insaed long parabol blong wido mo jif?
9 Bigfala tingting insaed long parabol ya i klia. Wido, jif, mo Jisas tu i talem bigfala tingting ya. Wido i talem se: “Plis yu stretem problem blong mi.” Jif i talem se: “Mi mi mas stretem problem blong hem.” Jisas i askem se: “Yufala i ting se [God] i no save stretem problem blong [ol man blong hem]?” Mo long saed blong Jeova, Jisas i talem se: ‘God bambae i kwik blong stretem ol problem blong olgeta.’ (Luk 18:3, 5, 7, 8) ?Wetaem God bambae i “stretem ol problem blong olgeta”?
10. (a) ?Taem blong stretem ol problem long faswan handred yia, hem i wetaem? (b) ?Tede, wetaem mo olsem wanem bambae God i stretem ol problem blong ol man blong hem?
10 Long faswan handred yia, taem blong stretem ol problem no blong “panisim olgeta man nogud” (“taem blong givimbak,” Kingdom Interlinear) i kamtru long yia 70 K.T. Long yia ya, Jerusalem mo haos blong God i lus. (Luk 21:22) Tede, Jeova bambae i stretem ol problem blong ol man blong hem long ‘Bigfala Dei blong hem.’ (Sefanaea 1:14; Matiu 24:21) Long dei ya, Jeova bambae i ‘givimbak long olgeta we oli stap mekem [ol man blong hem] i harem nogud.’ ‘Long taem ya Jisas bambae i givim panis long olgeta we oli no save ona long God, mo long olgeta we oli no save obei long gud nius blong Jisas, Masta blong yumi.’—2 Tesalonaeka 1:6-8; Rom 12:19.
11. ?Olsem wanem Jeova bambae i “kwik” blong stretem ol problem?
11 ?Be wanem mining blong tok blong Jisas se Jeova bambae i “kwik” blong stretem ol problem? Tok blong God i soemaot se “nating we [Jeova] i gat longfala tingting,” be long stret taem blong hem, bambae hem i kwik blong givim panis blong stretem ol problem. (Luk 18:7, 8; 2 Pita 3:9, 10) Long taem blong Noa, ol rabis man oli ded wantaem nomo long Bigfala Wota we i ron. Long taem blong Lot, ol rabis man oli lus wantaem long faea we i kamdaon long heven. Jisas i talem se: “Long taem ya we mi, mi Pikinini blong Man mi kamtru, . . . bambae i sem mak nomo.” (Luk 17:27-30) Bakegen ol rabis man bambae oli lus “wantaem nomo.” (1 Tesalonaeka 5:2, 3) Tru ya, yumi save gat strong bilif se Jeova bambae i no letem rabis wol blong Setan i stap wan dei moa i bitim taem ya we hem i luk se i stret.
Bambae Hem i “Stretem Problem Blong Olgeta”
12, 13. (a) ?Parabol blong wido mo jif i tijim yumi long wanem samting? (b) ?From wanem yumi save bilif strong se Jeova bambae i harem ol prea blong yumi mo stretem ol problem blong yumi?
12 Parabol we Jisas i talem long saed blong wido mo jif i makem sam narafala impoten trutok tu. Taem Jisas i talem mining blong parabol ya, hem i se: “Yufala i traem tingbaot tok ya we rabis jif ya i talem. ?Be olsem wanem long God? ?Yufala i ting se ol man blong hem we hem i jusumaot olgeta, . . . be hem i no save stretem problem blong olgeta?” Jisas i no stap skelem Jeova wetem jif ya, olsem se Jeova bambae i mekem sem fasin long ol man blong hem olsem jif ya i mekem, nogat. Jisas i stap makemgud olsem wanem God i defren long jif ya. Hem i wantem tijim ol man blong hem long wan samting long saed blong Jeova. ?Olsem wanem Jeova i defren long jif ya?
13 Jif ya i wan “rabis” man. Be “God i wan stret jaj.” (Ol Sam 7:11; 33:5) Jif ya i no save tingbaot wido ya blong mekem i gud long hem. Be Jeova i tingbaot olgeta man evriwan. (2 Kronikel 6:29, 30) Jif ya i no glad blong givhan long wido ya. Be Jeova i glad mo i wantem givhan long olgeta we oli mekem wok blong Hem. (Aesea 30:18, 19) ?Oraet, yumi lanem wanem? !Yumi lanem se, sipos rabis jif ya i lesin long wido ya mo i stretem problem blong hem, Jeova bambae i glad moa blong harem prea blong ol man blong hem mo stretem ol problem blong olgeta!—Ol Proveb 15:29.
14. ?From wanem yumi no mas letem bilif blong yumi i kam slak long saed blong dei blong God blong jajem ol man?
14 Taswe, olgeta we oli letem bilif blong olgeta i kam slak long saed blong dei blong God blong jajem ol man, oli mekem wan bigfala mastik. ?From wanem? From we, taem oli no moa bilif strong se ‘bigfala dei blong Jeova’ i klosap, i olsem we oli no moa sua se oli save trastem Jeova blong mekem ol promes blong hem oli kamtru. ?Be hu i gat raet blong stanemap wan kwestin long saed blong fasin blong God blong holem promes blong hem? !I no gat wan man we i gat raet blong mekem olsem! (Job 9:12) Kwestin we i stret blong askem hemia: ?Bambae yumi wanwan i holem promes we yumi mekem long hem? Mo hemia nao kwestin we Jisas i stanemap long en blong parabol blong wido mo jif.
‘?Bambae Hem i Faenem Plante Man We Oli Bilif Olsem?’
15. (a) ?Jisas i stanemap wanem kwestin, mo from wanem? (b) ?Wanem kwestin we yumi wanwan i mas tingbaot?
15 Jisas i askem wan kwestin we i pulumgud tingting blong yumi, i se: “Taem Pikinini blong Man i kamtru, bambae hem i faenem plante man we oli bilif olsem, no nogat?” (Luk 18:8, futnot NW ) Tok ya “bilif olsem” i soemaot se Jisas i no stap tokbaot bilif nomo, be hem i minim wan spesel kaen bilif—bilif olsem wido ya i gat. Jisas i no ansarem kwestin ya. Hem i stanemap kwestin ya blong pulum ol disaepol blong hem blong skelem bilif blong olgeta, mo traem luk sipos oli gat spesel kaen bilif ya we hem i stap tokbaot. ?Olsem wanem? ?Bilif blong olgeta i stap kam slak? ?Oli stap long denja, we i isi nomo blong oli gobak long samting we oli livim finis? ?No oli gat sem kaen bilif olsem wido ya? Sem mak tede, yumi tu yumi mas tingbaot se: ‘?“Pikinini blong Man” bambae i faenem wanem kaen bilif long hat blong mi?’
16. ?Wanem kaen bilif we wido ya i gat?
16 Blong stap wetem ol man we Jeova bambae i stretem ol problem blong olgeta, yumi mas folem fasin blong wido ya. ?Wanem kaen bilif we hem i gat? Hem i soemaot bilif blong hem taem hem i ‘stap kam luk jif oltaem blong talem long hem se, “Plis yu stretem problem blong mi.” ’ Wido ya i gobak oltaem blong luk wan rabis man blong hem i stretem problem blong hem. Long sem fasin, ol man blong God tede oli save gat strong tingting se bambae Jeova i stretem ol problem blong olgeta, nating se i tekem moa taem i bitim wanem we oli tingbaot fastaem. Mo tu, taem oli gohed nomo blong prea—yes, ‘krae long Jeova long dei mo long naet’—oli soemaot se oli trastem ol promes blong hem. (Luk 18:7) Tru ya, sipos wan Kristin i no moa prea long Jeova blong i stretem ol problem blong hem, hem i no moa trastem promes blong Jeova se bambae i tekem aksin blong givhan long ol man blong hem.
17. ?Wanem ol risen we yumi gat blong prea oltaem mo holem strong bilif se dei blong Jeova blong jajem ol man bambae i kam?
17 Stori blong wido ya i soemaot se i gat sam narafala risen tu blong prea oltaem. Tingbaot sam samting long saed blong wido ya we oli defren long yumi. I no gat wan man i pulum wido ya blong go luk jif, be hem i go plante taem. Long saed blong yumi, i gat Tok blong God we i pulum yumi blong “prea oltaem.” (Rom 12:12) Wido ya i no save sipos jif ya bambae i stretem problem blong hem no nogat. Be Jeova i promes se bambae hem i stretem ol problem blong yumi. Jeova i yusum wan profet blong hem blong talem se: “Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.” (Hababuk 2:3; Ol Sam 97:10) I no gat wan man i givhan long wido ya, mo i go toktok long jif from hem blong mekem se tok blong hem i gat moa paoa. Be yumi, yumi gat wan man blong givhan long yumi we i gat bigfala paoa, hemia Jisas, we i “stap sidaon long raet saed blong God, i stap toktok long God oltaem from yumi.” (Rom 8:34; Hibrus 7:25) Nating se i had long wido ya blong gohed nomo blong askem jif, be hem i gohed from we hem i hop se jif ya bambae i stretem problem blong hem. !Be yumi, yumi gat plante risen blong holem strong bilif se dei blong Jeova blong jajem ol man bambae i kam!
18. ?Olsem wanem prea bambae i mekem bilif blong yumi i strong mo mekem se God bambae i stretem ol problem blong yumi?
18 Parabol blong wido ya i tijim yumi se prea i joen fulwan wetem bilif. Mo tu, yumi lanem se sipos yumi prea oltaem, yumi save blokem ol samting we oli save slakem bilif blong yumi. I no min se yumi prea oltaem blong soem yumi long fes blong ol man nomo. Hemia bambae i no mekem se yumi holem strong bilif, nogat. (Matiu 6:7, 8) Be sipos yumi wantem prea from we yumi luksave se yumi dipen fulwan long God, long taem ya nao prea i save pulum yumi i kam klosap long God mo mekem bilif blong yumi i strong. Blong God i sevem yumi, yumi mas gat bilif. Taswe Jisas i luk se hem i nidim blong leftemap tingting blong ol disaepol blong hem blong oli “prea oltaem, we oli no letem tingting blong olgeta i foldaon.” (Luk 18:1; 2 Tesalonaeka 3:13) I tru, ol prea blong yumi bambae oli no mekem ‘bigfala dei blong Jeova’ i kam. Dei ya bambae i kam, nating se yumi prea no nogat. Be sipos yumi wanwan i wantem we God i stretem ol problem blong yumi, mo yumi wantem blong laef tru long bigfala faet blong hem, yumi mas gat bilif mo yumi mas prea oltaem blong yumi save wokbaot long stret rod.
19. ?Olsem wanem yumi soemaot bilif blong yumi se God bambae i ‘stretem ol problem blong yumi’?
19 Tingting bakegen long kwestin we Jisas i askem se: “?Taem Pikinini blong Man i kamtru, bambae hem i faenem plante man we oli bilif olsem, no nogat?” ?Wanem stret ansa blong kwestin ya we yumi intres tumas long hem? !Yumi glad tumas se i gat plante milian man blong Jeova long wol tede, we oli soemaot tru long ol prea blong olgeta, longfala tingting, mo fasin blong gohed strong nomo, se oli gat bilif olsem! Taswe, ansa blong kwestin blong Jisas, hemia “yes.” Tru ya, nating se wol blong Setan i givim plante trabol long yumi naoia, be yumi bilif strong se God bambae i ‘stretem ol problem blong ol man blong hem.’
[Futnot]
^ par. 3 Blong kasem save fulwan long mining blong parabol ya, ridim Luk 17:22-33. Makemgud olsem wanem ol vas long Luk 17:22, 24, 30 we oli tokbaot “Pikinini blong Man,” oli joen wetem kwestin ya long Luk 18:8.
?Yu Yu Tingbaot?
• ?Wanem i mekem se sam Kristin oli lusum bilif?
• ?From wanem yumi save bilif strong se dei blong Jeova blong jajem ol man bambae i kam?
• ?Wanem ol risen we yumi gat blong prea oltaem?
• ?Olsem wanem fasin blong prea oltaem i save givhan long yumi blong no lusum bilif?
[Kwestin]
[Tok blong pija long pej 14]
?Parabol blong wido mo jif i makemgud wanem poen?
[Tok blong pija long pej 17]
Plante milian man tede oli bilif strong se God bambae i “stretem ol problem blong olgeta”