?Yu Yu Save Openem Hat Blong Yu Blong Soemaot Moa Lav?

JEN we i holem angka blong wan sip i mas strong blong sip i no drif. Jen i save strong nomo sipos ol wanwan haf blong hem oli strong mo oli joengud. Sipos no, hem i save brok.

Sem mak long Kristin kongregesen. Blong kongregesen i stap strong mo gud, ol wanwan memba blong hem oli mas joengud. ?Wanem samting i save mekem oli joengud? Lav nao i gat moa paoa blong joenem ol man i bitim ol narafala fasin. Taswe Jisas Kraes i talem long ol disaepol blong hem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala. Nao from we yufala i stap lavlavem yufala, bambae olgeta man oli luksave se yufala i man blong mi.” Yes, lav we ol trufala Kristin oli soemaot, i no fasin fren mo respek nomo. Oli gat kaen lav ya we oli rere blong lego samting we olgeta nomo oli wantem blong givhan long narafala.​—Jon 13:​34, 35.

Tinghae Long Ol Kristin Brata Sista Blong Yumi

Long plante kongregesen, i gat ol olfala, ol yangfala, ol man mo woman blong defdefren kantri, kala, lanwis, mo kalja, samfala oli skulgud samfala nogat, samfala oli rij samfala oli pua. Wanwan man mo woman i gat ol samting we oli laekem mo ol samting we oli no laekem, oli wantem ol defdefren samting, mo oli fraet long ol defdefren samting. Klosap olgeta evriwan oli gat wan traem blong olgeta, maet sik no trabol long saed blong mane. Ol samting ya we oli mekem ol man oli defdefren, oli save mekem i hadwok long ol Kristin blong oli joengud. ?Taswe, wanem i save givhan long yumi blong openem  hat blong yumi moa blong soemaot lav mo holem fasin ya blong joengud? Bambae yumi lavlavem yumi moa sipos yumi tinghae long ol narafala long kongregesen.

?I minim wanem blong tinghae long narafala? Wan diksonari (The New Shorter Oxford English Dictionary) i talem se sipos yumi “tinghae” long wan samting, hemia i min se yumi “tingbaot hem, leftemap hem, luksave se hem i sas mo i gud tumas, mo yumi gat tangkiu from.” Sipos yumi tinghae long ol Kristin brata sista blong yumi, bambae yumi tingbaot wanem samting oli nidim, yumi leftemap olgeta, yumi luksave se oli sas mo gud tumas, mo yumi gat tangkiu long olgeta from we oli joen wetem yumi blong mekem wosip. From samting ya, bambae yumi lavem olgeta tumas. I gud yumi tingbaot ol tok we aposol Pol i raetem long ol Kristin long Korin long faswan handred yia. Hemia bambae i givhan long yumi blong luksave olsem wanem yumi save soemaot Kristin lav fulwan.

Ol Kristin Long Korin Oli ‘Satem Filing Blong Olgeta’

Pol i raetem faswan leta blong hem i go long ol Kristin long Korin long yia 55 K.T., mo i no wan yia biaen, hem i raetem wan narafala leta bakegen. Ol tok blong hem oli soemaot se samfala long kongregesen ya oli no tinghae long ol Kristin brata sista blong olgeta. Pol i tokbaot trabol ya i se: “Ol brata sista long Korin. Mifala i talemaot ol tingting blong mifala long yufala, mifala i openem hat blong mifala. Mifala i no satem filing blong mifala long yufala, be yufala nomo i satem filing blong yufala.” (2 Korin 6:​11, 12, NW ) ?Wanem mining blong tok blong Pol se oli ‘satem filing blong olgeta’?

Pol i wantem talem se oli no stap openem hat blong olgeta, oli no glad blong givhan long narafala. Wan man we i stadi dip long ol tok blong Baebol i ting se ol Kristin long Korin oli gat “sam nogud tingting we i blokem olgeta [blong soem lav long Pol]. Oli no trastem [ol narafala Kristin] . . . mo samfala oli harem nogud from samting we narafala i mekem long olgeta.”

Makemgud advaes ya we Pol i givim: “Mi mi toktok long yufala naoia olsem we yufala i pikinini blong mi. Plis yufala i mekem long mifala olsem we mifala i mekem long yufala. Plis yufala i [“traem openem hat blong yufala moa,” NW ].” (2 Korin 6:13) Pol i leftemap tingting blong ol Kristin long Korin blong oli openem hat blong olgeta moa blong soemaot lav long ol brata sista blong olgeta. I nogud we oli no trastem narafala mo oli harem nogud long ol smosmol samting we narafala i mekem long olgeta. Blong openem hat blong olgeta moa, oli mas tingting gud long ol brata sista mo oli mas rili wantem givhan long olgeta.

Openem Hat Moa Tede Blong Soemaot Lav

I gud tumas blong luk olsem wanem ol man we oli mekem trufala wosip tede oli traehad blong openem hat blong olgeta moa blong soemaot lav. I tru, i hadwok blong openem hat blong yumi. Samting ya, yumi no mekem long tingting blong yumi nomo. Yumi mas gat fasin we i defren olgeta long ol narafala man, hemia ol man we oli no folem ol rul blong Baebol. Olgeta ya oli no tinghae long narafala. Oli no kea long narafala, oli no gat respek, mo oli tok jikim narafala. Ale, yumi neva mas letem ol fasin ya oli winim yumi. !I nogud sipos yumi blokem lav blong yumi from we yumi gat filing blong no trastem ol narafala Kristin, olsem ol Kristin long Korin oli gat! Samting ya i save hapen sipos yumi hareap blong faenem poen long ol Kristin brata sista blong yumi, be yumi slo blong lukaot ol gudfala fasin blong olgeta. Samting ya i save hapen tu sipos yumi no wantem openem filing blong yumi long narafala from we hem i kamaot long narafala kalja.

Wan man blong God we i openem hat blong hem moa blong soemaot lav, hem i rili tinghae long ol Kristin brata sista blong hem. Hem i leftemap olgeta, hem i soem respek long olgeta, mo hem i tingbaot ol nid blong olgeta. Nating se hem i gat risen blong harem nogud long wan brata no sista, be hem i glad blong fogivim hem mo i no stap kros longtaem long hem. Long defren fasin, hem i tingting gud long narafala ya se maet hem i no minim blong mekem samting we hem i mekem, ating hem i mestem nomo. Gladhat blong fogivim narafala i givhan long hem blong soemaot lav ya we Jisas i stap tokbaot, taem i talem se: “Nao from we yufala i stap lavlavem yufala, bambae olgeta man oli luksave se yufala i man blong mi.”​—Jon 13:35.

Openem Hat Mo Mekem Ol Niufala Fren

Lav we i fulap long hat blong yumi bambae i pulum yumi blong traehad blong mekem ol niufala fren mo kampani wetem olgeta long kongregesen we yumi no stap joen oltaem wetem olgeta. ?Hu ya olgeta ya? Sam Kristin brata sista blong yumi oli  sem, no from wan narafala risen oli no gat plante fren. Maet fastaem yumi ting se yumi defren tumas long olgeta, mo se wan samting nomo we yumi serem hemia wosip. Be long Baebol, samfala we oli frengud hemia olgeta we i luk olsem se oli defren tumas.

Tingbaot Rut mo Nomi. Rut i wan yangfala woman, Nomi hem i olfala, tufala i kamaot long tu defren kantri mo kalja, mo tufala i toktok tu defren lanwis. Be ol samting ya i no blokem fasin fren blong tufala. Jonatan i pikinini blong king, Deved i wan boe blong lukaot long sipsip. Jonatan i olfala moa long Deved, be nating, tufala i frengud bitim plante narafala man we Baebol i tokbaot. Rut mo Nomi wetem Deved mo Jonatan, oli haremgud tumas long gudfala fasin fren we oli gat, mo oli kasem paoa from.​—Rut 1:16; 4:15; 1 Samuel 18:3; 2 Samuel 1:26.

Tede tu, plante trufala Kristin we oli gat defdefren yia mo defren kaen laef, oli frengud tugeta. Tingbaot Regina, we hem i mama blong tu yangfala, be hem i no gat hasban. * Hem i bisi oltaem, ale hem i no gat taem blong joen plante wetem ol narafala. Harald mo waef blong hem Ute we tufala i ritae finis, tufala i no gat pikinini. I luk olsem we tufala i defren tumas long Regina, ating i had blong oli frengud. Be Harald mo Ute i folem advaes blong Baebol blong openem hat blong tufala moa. Tufala i singaot Regina mo tufala pikinini blong hem blong oli joen wetem tufala blong mekem plante samting, olsem wok blong prij, mo pleplei tu.

?Olsem wanem long yu? ?Yu yu save openem hat blong yu moa blong joen wetem sam narafala we yu no stap joen oltaem wetem olgeta? I gud yu traem joen moa wetem ol Kristin brata sista blong narafala kantri, kalja, mo yia.

Tingbaot Nid Blong Ol Narafala

Sipos yumi openem hat blong yumi, bambae yumi tingbaot nid blong ol narafala. ?Wanem kaen nid? Traem lukluk insaed long Kristin kongregesen. Ol yangfala oli nidim advaes blong lidim olgeta, ol olfala oli nidim narafala blong leftemap tingting blong olgeta, ol paenia we oli prij fultaem oli nidim narafala blong joen wetem olgeta mo talem ol gudfala tok from wok blong olgeta, mo ol Kristin we  tingting blong olgeta i foldaon oli nidim narafala blong lesin long ol trabol blong olgeta. Yumi evriwan i gat ol nid. Yumi mas tingbaot nid blong ol narafala mo mekem samting blong givhan long olgeta.

I gat samfala we oli gat spesel nid. Taem yumi openem hat blong yumi moa, yumi traem kasem save long olgeta tu. ?Ating yu save wan we hem i siksik oltaem no i fesem wan narafala traem long laef? Sipos yu openem hat blong yu moa blong soemaot lav mo yu wokem fasin ya we yu glad blong givhan long narafala, bambae i isi moa blong kasem save long olgeta mo givhan long olgeta.

Klosap nao bambae yumi luk ol bigfala profet tok blong Baebol oli kamtru. Taem oli kamtru, olting blong yumi, bigfala save, mo gudhan blong mekem ol strong wok, bambae oli no impoten. Samting we bambae i impoten tumas, hemia se yumi evriwan i joengud. (1 Pita 4:​7, 8) Wanwan long yumi i save givhan blong mekem kongregesen i joengud, sipos yumi openem hat blong yumi moa blong soemaot lav. Yumi save gat strong tingting se Jeova bambae i blesem yumi bigwan sipos yumi folem tok blong Pikinini blong hem, Jisas Kraes, se: “Loa blong mi i olsem, se yufala i mas lavlavem yufala, olsem we mi mi lavem yufala.”​—Jon 15:12.

[Futnot]

[Tok blong makem poen long pej 30]

Sipos yumi tinghae long ol Kristin brata sista blong yumi, bambae yumi leftemap olgeta, respektem olgeta, mo tingbaot ol nid blong olgeta