Wan Kwestin

?Wanem ya “faet . . . blong God ya we i gat olgeta paoa,” we i kamaot long Amagedon? ?Mo, wanem bambae i kamaot from faet ya?—Revelesen 16:14, 16.

Amagedon i wan faet long fiuja we bambae i kasem ful wol. Long faet ya, Jisas Kraes we Jeova i putumap hem blong i King, bambae i spolem ol enemi blong God. Baebol i eksplenem se “[ol tok we ol devel i stamba blong olgeta, NW ]” bambae oli pulum ol enemi blong God, hemia “ol king blong evri ples long wol,” oli kam blong mekem “faet long bigfala Dei blong God ya we i gat olgeta paoa . . . long ples ya we long lanwis blong ol laen blong Isrel nem blong hem ‘Amagedon’.”—Revelesen 16:14, 16.

Ples ya we olgeta oli kam long hem blong faet i no wan prapa ples. Nem ya Amagedon i minim “Bigfala Hil long Megido.” (Revelesen 16:16) Neva i bin gat wan bigfala hil we i karem nem ya. Antap long hemia, i no gat wan prapa ples we i naf blong “ol king blong wol wetem ol soldia blong olgeta” oli kam long hem. (Revelesen 19:19) Be, “ples” ya i pija blong wan samting we i mas hapen we bambae i tekem olgeta lida blong politik wetem ol sapota blong olgeta oli go kasem wan mak—hemia se bambae oli agensem Jeova mo “ol kampani blong ol soldia blong heven.” Ol soldia ya oli stap aninit long komanda blong olgeta Jisas Kraes we i “King blong olgeta king, mo Masta blong olgeta masta.”—Revelesen 19:14, 16.

Tok ya “Amagedon” i joen wetem wan taon blong Isrel bifo we nem blong hem Megido. Ol man oli wokem Megido long is blong Hil ya Kamel, long ples we i isi blong plante man oli kam long hem. Samting ya i mekem se, long taem ya, rod blong plante tredaman mo ol ami i stap pastru long taon ya. Mo tu, long ples ya oli bin mekem ol bigfala faet we oltaem i mas gat wan ami i win mo narawan i lus. Wan eksampol hemia “long springwota blong Megido,” taem Jaj Barak blong Isrel i winim ol strong ami blong Kenan we Sisera i stap lidim. (Jages 4:12-24; 5:19, 20) Klosap long ples ya tu, Jaj Gideon i bin winim ol man Midian. (Jages 7:1-22) From we Baebol i joenem Megido wetem faet ya we i stap kam, yumi save sua fulwan se God, tru long Pikinini blong hem, bambae i winim mo i spolem olgeta evriwan we oli stap agensem hem.

?Wanem bambae i kamaot from faet ya? Bambae faet blong Amagedon i finisim olgeta kruked fasin mo rabis fasin long wol ya. Bambae hem i openem rod blong wan naesfala taem long histri blong ol man, we neva i bin gat olsem bifo. (Revelesen 21:1-4) Aninit long gudfala rul blong Kingdom blong God, bambae wol ya i kam wan paradaes we ol stret man bambae oli save stap long hem blong olwe. —Ol Sam 37:29.