Yumi Neva Mas Stop Blong Wokem Fasin Tangkiu
Yumi Neva Mas Stop Blong Wokem Fasin Tangkiu
“God, ol tingting blong yu oli olsem wan sas samting long mi. Olgeta oli plante we plante.”—OL SAM 139:17, NW.
1, 2. ?From wanem yumi mas gat tangkiu from Tok blong God? ?Wan man blong raetem Ol Sam i talem wanem blong soem tangkiu blong hem?
HAE pris Hilkia i faenem wan nambawan samting. Taem oli stap fiksimap haos blong Jeova long Jerusalem, hem i faenem “Buk blong Loa blong [“Jeova,” NW ], we i gat Loa i stap long hem we [Jeova] i bin givim long Moses bifo.” !I klia se hemia i no wan kopi blong buk ya, be hem i stret buk we oli bin raetem samwe long 800 yia bifo! Tingbaot filing blong King Josaea taem oli givim buk ya long hem. King ya we i onagud long God i tinghae long buk ya, i olsem wan sas samting we oli faenem. Wantaem nomo, hem i singaot sekretari blong hem, Sapan, blong i kam ridimaot ol tok blong buk ya long hem.—2 Kronikel 34:14-18.
2 Tede plante milian man oli gat ful Baebol no haf blong hem we oli save ridim. ?Olsem wanem? ?From we i gat plante Baebol tede, hemia i mekem se i no moa wan sas samting mo ol tok blong hem i no impoten tumas? !Nogat! Hem i karem ol tingting blong God ya we i gat Olgeta Paoa, we oli raetemdaon blong givhan long yumi tede. (2 Timoti 3:16) Deved i raetem wan Sam blong tokbaot filing blong hem long saed blong Tok blong God, i se: “God, ol tingting blong yu oli olsem wan sas samting long mi. Olgeta oli plante we plante.” —Ol Sam 139:17, NW.
3. ?Wanem i soemaot se fasin fren blong Deved wetem God i dip?
3 Deved i neva stop blong soem tangkiu long Jeova, mo blong tinghae long Tok blong Hem mo plan we Jeova i putumap long saed blong trufala wosip. Ol nambawan Sam we Deved i wokem, oli soemaot filing blong hem. Olsem Ol Sam 27:4, we i talem se: “Mi mi askem wan samting long [“Jeova,” NW ] . . . Mi wantem tumas blong mi save stap long haos blong hem oltaem long laef blong mi, blong mi stap lukluk ol gudgudfala fasin blong hem, . . . mo blong mi save [“lukluk haos blong hem mo gat tangkiu from,” NW ].” Long olfala lanwis Hibru, tok ya ‘lukluk mo gat tangkiu from’ i minim tingting gud long wan samting, lukluk gud long hem, luk hem wetem glad, haremgud mo tinghae long hem. I klia se fasin fren blong Deved wetem God i dip, mo hem i rili gat tangkiu from ol samting we Jeova i givim blong mekem bilif blong hem i strong. Hem i haremgud blong kasem evri smosmol trutok we God i soemaot long hem. Hem i givim wan nambawan eksampol we yumi save folem long saed blong fasin tangkiu.—Ol Sam 19:7-11.
Gat Tangkiu From Janis Blong Save Trutok Blong Baebol
4. ?“Tabu Spirit i mekem Jisas i harem gud tumas” long wanem samting?
4 Blong kasem save long ol trutok long Baebol, yumi no nid blong skulgud mo blong gat plante waes blong wol. Ol samting ya oli jes mekem man i praod nomo. Yumi nidim gladhat mo kaen fasin blong Jeova. Hem i soemaot fasin ya long olgeta we oli gat tingting daon, we hat blong olgeta i stret, mo we oli luksave se oli nidim ol save blong hem. (Matiu 5:3; 1 Jon 5:20) Sam man blong wol ya, God i raetemdaon nem blong olgeta i stap long heven finis, nating we oli no stretgud olgeta. Taem Jisas i tingting dip long save ya, “Tabu Spirit i mekem [hem] i harem gud tumas, nao hem i prea, i talem se, ‘Papa, yu yu Hae God yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo.’ ”—Luk 10:17-21.
5. ?From wanem ol disaepol blong Jisas oli no mas ting nating long ol trutok blong Kingdom we God i soemaot long olgeta?
5 Afta we Jisas i prea olsem wetem fulhat blong hem, hem i tanemraon i toktok long ol disaepol blong hem, se: “Yufala we i stap luk ol samting ya, yufala i save harem gud. Mi mi talem long yufala, bifo i gat plante profet mo plante king we oli wantem tumas blong luk ol samting ya we yufala i stap luk, be neva oli luk. Mo oli wantem tumas blong harem ol tok ya we yufala i stap harem, be neva oli harem.” Yes, Jisas i pulum ol man blong hem blong tinghae long ol sas trutok blong Kingdom we God i stap soemaot long olgeta. Jeova i neva soemaot ol trutok ya long ol man blong hem bifo long taem ya. !Mo long taem blong Jisas tu, Jeova i no soemaot ol trutok ya long “ol man we oli waes, mo ol man we oli skul gud”!—Luk 10:23, 24.
6, 7. (a) ?Wanem ol risen we yumi gat blong soemaot tangkiu from trutok blong God? (b) ?Tede, olsem wanem trufala skul i defren long giaman skul?
6 Long taem blong yumi, i gat plante moa risen blong soemaot tangkiu from trutok blong God. Tru long “slef ya we i stret mo waes,” Jeova i givim plante dip save long saed blong Baebol long ol man blong hem. (Matiu 24:45, NW; Daniel 12:10) Profet Daniel i tokbaot taem blong en, i se: “Bambae plante man oli wokbaot olbaot, mo tru save bambae i kam fulap.” (Daniel 12:4, NW ) ?Yu yu agri se save blong God “i kam fulap” tede, mo se ol man blong Jeova oli stap kasem plante kakae long saed blong spirit?
7 !Yumi luk se ol man blong God oli gat plante save long saed blong God mo plan blong hem! !Be long ol skul blong Bigfala Babilon, nogat! !Olgeta ya oli konfius nomo! From samting ya, plante man we oli harem nogud long ol giaman skul ya, oli stap kam joen long trufala wosip. Olgeta ya we oli gat fasin olsem sipsip, oli no wantem “joen wetem [Bigfala Babilon] long ol sin ya we hem i stap mekem” mo “kasem panis wetem hem.” Jeova mo ol man blong hem oli singaot olgeta man mo woman olsem, blong oli kam joen long trufala Kristin kongregesen.—Revelesen 18:2-4; 22:17.
Fulap Man We Oli Gat Tangkiu Oli Stap Kam Long God
8, 9. ?Olsem wanem tok blong Hagae 2:7 i stap kamtru tede?
8 Jeova i tokbaot haos wosip blong hem long saed blong spirit, i se: “Bambae mi seksekem olgeta neson, nao ol gudgudfala samting blong olgeta oli mas kam insaed. Mo bambae mi fulumap haos ya wetem glori.” (Hagae 2:7, NW ) Nambawan profet tok ya i kamtru finis long taem blong Hagae, taem wan smol grup blong ol man blong God oli gobak long Jerusalem mo oli bildim haos blong God bakegen. Tede, profet tok ya i stap kamtru bakegen long bigfala haos blong Jeova long saed blong spirit.
9 Plante milian man oli kam hivap finis long haos blong God long saed blong spirit, blong mekem wosip long hem “long spirit mo trutok.” Evri yia, plante handred taosen man we oli olsem ‘ol gudgudfala samting blong ol neson,’ oli stap kam insaed long haos ya. (Jon 4:23, 24, NW ) Olsem nao, ripot blong fulwol blong yia 2006 i soem se 248,327 man mo woman oli tekem baptaes long wota blong soemaot se oli givim laef blong olgeta i go long Jeova. !Hemia i olsem 680 man evri dei! Olgeta ya oli lavem trutok mo oli wantem mekem wok blong Jeova blong talemaot Kingdom. Samting ya i soemaot se God nao i pulum olgeta oli kam.—Jon 6:44, 65.
10, 11. Talem wan stori we i soemaot olsem wanem samfala oli stat blong gat tangkiu from ol trutok blong Baebol.
10 Plante long ol gudfala man ya oli luksave “wanem nao i stap mekem stret man i defren long rabis man, mo wanem nao i stap mekem man blong wok blong God i defren long man we i no wok blong God.” From samting ya, oli laekem trutok. (Malakae 3:18, NW ) Tingbaot Wayne mo woman blong hem, Virginia. Fastaem, tufala i stap go long Protestan skul, be tufala i gat plante kwestin we tufala i no save faenem ansa blong olgeta. Tufala i no laekem nating ol faet, ale taem tufala i luk we ol lida blong skul oli blesem ol soldia mo ol tul blong faet blong olgeta, tufala i konfius mo tufala i harem nogud. Taem tufala i kam olfala moa, tufala i harem se ol narafala long jos blong tufala oli no moa wantem tufala, nating se Virginia i bin tijim Sande skul blong plante yia. Tufala i talem se: “I no gat wan long olgeta i kam luk mitufala blong traem save sipos mitufala i haremgud long saed blong spirit no nogat. Jos i wantem mane nomo. Mitufala i bin harem nogud.” Tufala i harem nogud moa taem jos i agri long fasin blong man i slip wetem man mo woman wetem woman.
11 Long taem ya, smol bubu blong Wayne mo Virginia i kam wan Witnes blong Jeova, mo biaen, gel blong tufala tu i kam wan Witnes. Fastaem tufala i no glad nating, be afta, tufala i jenisim tingting blong tufala mo tufala i agri se wan Witnes bambae i mekem Baebol stadi long tufala. Wayne i talem se: “!Long tri manis, mitufala i lanem moa long saed blong Baebol i bitim wanem we mitufala i lanem long ol 70 yia bifo! Mitufala i neva save se nem blong God i Jeova, mo mitufala i no save wan samting long saed blong Kingdom mo Paradaes long wol.” Smoltaem biaen, tufala ya i stat blong kam long ol Kristin miting mo joen long wok blong prij. Virginia i talem se: “Mitufala i wantem talemaot trutok long evriwan.” Long yia 2005, taem tufala i gat bitim 80 yia, tufala i tekem baptaes. Tufala i talem se: “Mitufala i faenem wan grup blong ol trufala Kristin we oli olsem famle blong mitufala nomo.”
Tangkiu From We Yumi “Savegud Ol Rod Blong Mekem Ol Gudfala Wok”
12. ?Oltaem Jeova i givim wanem long ol man blong hem, mo yumi mas mekem wanem blong kasem blesing from?
12 Oltaem Jeova i stap givhan long ol man blong hem blong mekem wok blong hem. Hem i talem klia long Noa olsem wanem hem i mas mekem wok ya blong bildim sip, hemia wan wok we i mas stretgud, i no hafhaf. Mo i tru, Noa i mekem wok ya i stretgud nomo. ?From wanem i olsem? From we Noa i “mekem olgeta samting ya olsem we God i talem.” (Jenesis 6:14-22) Tede tu, Jeova i soemaot rod long ol man blong hem blong oli save mekemgud wok blong hem. Faswan wok blong yumi i blong talemaot gud nius blong Kingdom blong God we i stanap finis, mo blong givhan long ol man we hat blong olgeta i stret blong oli kam disaepol blong Jisas Kraes. Blong mekemgud wok ya, yumi mas obei long Jeova, olsem Noa i mekem. Yumi mas obei long ol advaes we Jeova i givim blong lidim yumi, tru long Tok blong hem mo ogenaesesen blong hem.—Matiu 24:14; 28:19, 20.
13. ?Olsem wanem Jeova i trenem yumi?
13 Blong mekemgud wok ya, yumi mas lanem blong yusum bigfala tul blong yumi “long fasin we i stretgud.” Bigfala tul ya, hemia Tok blong God we i “stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin . . . blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 2:15; 3:16, 17) Tede, Jeova i stap givim nambawan trening long ol man blong hem tru long Kristin kongregesen, olsem hem i bin mekem long faswan handred yia. Long ol 99,770 kongregesen long wol, evri wik i gat Tiokratik Skul mo Miting Blong Kingdom Wok blong givhan long yumi long wok blong prij. ?Olsem wanem? ?Yu yu soemaot tangkiu from ol impoten miting ya? Yu save mekem olsemia sipos yu go oltaem long ol miting mo yu mekem ol samting we yu lanem i wok.—Hibrus 10:24, 25.
14. ?Olsem wanem ol man blong Jeova oli soemaot tangkiu from blesing ya we oli gat blong mekem wok blong Hem? (Tokbaot sam samting long ripot long pej 27-30.)
14 Plante milian man blong God long wol oli stap wok strong blong talemaot gud nius. Olsem nao, oli stap soemaot tangkiu from trening we oli kasem. Long yia 2006, 6,741,444 pablisa blong Kingdom oli spenem 1,333,966,199 aoa long olgeta haf blong wok blong prij, mo oli mekem 6,286,618 Baebol stadi long haos blong ol man. Hemia sam gudfala samting long ripot blong fulwol, we oli leftemap tingting blong yumi. I gud yu lukluk moa long ripot ya blong faenem ol narafala samting bakegen we oli save leftemap tingting blong yu. Long faswan handred yia tu, ol ripot we oli soemaot se wok blong prij i stap kam bigwan moa, oli leftemap tingting blong ol faswan Kristin.—Ol Wok 1:15; 2:5-11, 41, 47; 4:4; 6:7.
15. ?From wanem wan man we i mekem wok blong Jeova wetem ful paoa blong hem i no mas harem nogud sipos hem i save mekem smol wok nomo?
15 Evri yia, i olsem we ol man blong Jeova oli singaot bigwan blong presem hem. Long rod ya oli soemaot bigfala tangkiu we oli gat from blesing ya blong save Jeova mo blong talemaot hem. (Aesea 43:10) I tru, sam Kristin brata sista we oli olfala, oli sik, no oli handikap, oli save givim smol sakrefaes nomo blong presem God. Hemia i sem mak long smol mane we wido i sakem long bokis long haos prea long taem blong Jisas. Be yumi no mas fogetem se Jeova mo Pikinini blong hem tufala i gat tangkiu long olgeta evriwan we oli mekem wok blong God wetem ful paoa blong olgeta, nating se oli naf blong mekem smol nomo.—Luk 21:1-4; Galesia 6:4.
16. ?Wanem ol tul blong tijim ol man we God i givim long yumi long ol yia we oli jes pas?
16 Antap long trening we yumi kasem blong mekem wok blong prij, Jeova i yusum ogenaesesen blong hem blong givim ol nambawan tul long yumi blong tijim ol man. Long ol yia we oli jes pas, oli wokem ol buk ya Trutok Blong Soemaot Rod Blong Itenel Laef, Yu Yu Save Laef Foreva Long Paradaes Long Wol, Save Blong Lidim Yu Long Laef We i No Save Finis, mo laswan we yumi kasem, ?Wanem Samting We Baebol i Rili Tijim? Olgeta we oli gat tangkiu from ol buk ya oli yusumgud olgeta long wok blong prij.
Yusumgud Buk Ya Baebol Tijim
17, 18. (a) ?Wanem ol haf blong buk ya Baebol Tijim we yu yu laekem blong tokbaot long wok blong prij? (b) ?Wan seket elda i talem wanem long saed blong buk ya?
17 Buk ya ?Wanem Samting We Baebol i Rili Tijim? i gat 19 japta blong hem, i gat wan Diksonari we i tokbaot plante dip trutok, mo ol tok long buk ya i klia mo i isi blong kasem save long hem. From samting ya, buk ya i rili wan nambawan tul long wok blong prij. Japta 12 i tokbaot “Wan Laef We God i Glad Long Hem.” Japta ya i givim save long man we i stadi long hem, olsem wanem hem i save kam fren blong God. Hemia wan samting we plante man oli ting se oli no save mekem. (Jemes 2:23) ?Wanem tingting blong olgeta we oli yusum buk ya?
18 Wan seket elda long Ostrelia i talem se buk ya Baebol Tijim i “stap pulum tingting blong ol man wantaem nomo, mo i mekem se oli glad blong storian.” Hem i talem tu se i isi blong yusum buk ya, mo samting ya i mekem se “plante pablisa blong Kingdom oli kasem niufala paoa mo glad long wok blong prij. !Yumi luksave from wanem samfala oli singaot buk ya se Wan Bigfala Pis Gol!”
19-21. Talem sam stori we oli soemaot se buk ya Baebol Tijim i nambawan.
19 Long kantri ya Guyana, wan paenia i prij long wan woman, nao woman ya i talem se: “Ating God i sanem yu.” Smoltaem bifo, man blong hem i ronwe, i livim hem wetem tu smol pikinini blong tufala. Ale paenia i openem buk ya Baebol Tijim i go long japta 1 mo i ridim haf 11, aninit long smol stamba tok ya “?Wanem Tingting Blong God Taem Hem i Luk We Gudfala Man i Safa?” Paenia i talem se: “Ol save long haf ya i tajem filing blong woman ya bigwan. Ale, hem i girap, i go afsaed long stoa blong hem, mo i krae we i krae.” Woman ya i agri blong stadi Baebol wetem wan sista, mo hem i stap gohed gud naoia.
20 José we i stap long Spen, woman blong hem i ded long wan aksiden long trak. Blong traem haremgud bakegen, José i stat yusum drag, mo i go luk wan dokta we i givim meresin from ol sik long tingting blong man. Be ol dokta oli no save ansarem kwestin we i mekem José i harem nogud tumas. Kwestin blong hem se: “?From wanem God i letem woman blong mi i ded?” Wan dei, José i mitim Francesc we i wok long sem kampani olsem hem. Francesc i talem se tufala i mas storian long japta 11 blong buk ya Baebol Tijim, nem blong japta ya, “?From Wanem God i Letem Man i Safa?” José i rili laekem ol tok blong Baebol long japta ya mo pijatok ya blong tija mo studen. Hem i stat blong stadi dip long Baebol, i go long wan seket asembli, mo naoia hem i stap kam long olgeta miting long Haos Kingdom.
21 Roman i wan bisnes man long Polan. Hem i gat 40 yia blong hem, mo i gat bigfala respek long Tok blong God. Be from we hem i wok oltaem, hem i no gohed gud long Baebol stadi blong hem. Nating se i olsem, hem i go long wan distrik asembli mo i kasem buk ya Baebol Tijim. Biaen, fasin blong hem i jenis. Hem i se: “Taem mi ridim buk ya, mi luk se olgeta stamba tijing blong Baebol oli joengud blong mekem wan klia pija.” Naoia, Roman i neva mestem Baebol stadi blong hem mo hem i stap gohed gud.
Gohed Blong Wokem Fasin Tangkiu
22, 23. ?Olsem wanem yumi save gohed blong soemaot tangkiu from nambawan janis we yumi gat long fiuja?
22 Long nambawan Distrik Asembli ya “!Klosap Nao Yumi Fri!” oli talemaot se ol trufala Kristin oli wantem tumas blong kam “fri gogo i no save finis,” olsem God i promes blong mekem tru long blad blong Jisas Kraes. Beswan rod blong soemaot tangkiu from nambawan janis ya long fiuja, i blong gohed blong kam klin “long ol samting we yumi mekem we i blong ded nomo, blong yumi save mekem ol wok blong God ya we i laef, i stap we i stap.”—Hibrus 9:12, 14.
23 Tede bitim olgeta taem bifo, plante samting i save pulum yumi blong tingbaot yumi nomo. Taswe i olsem wan merikel taem yumi luk we sikis milian man, oli gohed nomo blong mekem wok ya blong talemaot Kingdom blong God. Hemia i pruvum se ol man blong Jeova oli gat bigfala tangkiu from blesing we oli gat blong mekem wok blong God. Oli save se ‘taem oli wok blong Masta ya blong yumi, be wok ya bambae i mas gat frut blong hem.’ !Yumi neva mas stop blong wokem fasin tangkiu olsem!—1 Korin 15:58; Ol Sam 110:3.
?Bambae Yu Yu Ansa Olsem Wanem?
• ?Wan man blong raetem Ol Sam i tijim yumi long wanem samting long saed blong tangkiu long God mo tangkiu from ol samting long saed blong spirit we God i givim?
• ?Olsem wanem tok blong Hagae 2:7 i stap kamtru tede?
• ?Olsem wanem Jeova i givim evri samting we ol man blong hem oli nidim blong mekemgud wok blong hem?
• ?Yu save mekem wanem blong soemaot tangkiu from gudfala fasin blong Jeova?
[Kwestin]