Fraet Long Jeova Mo Harem Gud Long Laef
Fraet Long Jeova Mo Harem Gud Long Laef
“Yufala ol man blong Hae God, yufala i ona long hem. Olgeta we oli stap [“fraet,” NW] long hem oli no save sot long wan samting.”—OL SAM 34:9.
1, 2. (a) ?Ol lida blong Krisendom oli gat wanem defdefren tingting long saed blong fraet long God? (b) ?Wanem ol kwestin we bambae yumi tokbaot naoia?
PLANTE lida blong Krisendom oli tijim ol man se oli mas fraet long God, from we God i save panisim olgeta long helfaea. Tijing ya i no stanap long Baebol. Baebol i tijim se Jeova God i gat lav mo stret fasin. (Jenesis 3:19; Dutronome 32:4; Rom 6:23; 1 Jon 4:8) Sam narafala lida blong Krisendom oli tijim defren samting. Oli no talem nating se yumi mas fraet long God. Be oli tijim se God i save agri long enikaen fasin nomo, mo se hem i glad long evri man nomata wanem kaen laef oli gat. Hemia tu i no laenap wetem ol tijing blong Baebol.—Galesia 5:19-21.
2 Baebol i pulum yumi blong fraet long God. (Revelesen 14:7, NW) Tijing ya i mekem sam kwestin oli stanap. ?Sipos God i lavem yumi, from wanem hem i wantem se yumi fraet long hem? ?God i wantem se yumi fraet long hem olsem wanem? ?Olsem wanem fraet long God i save givhan long yumi? Bambae yumi tokbaot ol kwestin ya taem yumi gohed blong lukluk ol vas long Sam 34.
?From Wanem Yumi Mas Fraet Long God?
3. (a) ?Wanem tingting blong yu long tok ya se yumi mas fraet long God? (b) ?From wanem olgeta we oli fraet long Jeova oli harem gud?
3 I stret nomo we yumi fraet long Jeova, from we hem i wokem evri samting, mo hem i Hae Rula blong heven mo wol. (1 Pita 2:17, NW) Be fraet ya i no min se yumi seksek from we God i save mekem i nogud long yumi, nogat. Fraet ya i min se yumi gat bigfala ona mo respek long Jeova from haenem mo posisen blong hem. Mo tu, yumi fraet blong mekem hem i kros. Fraet ya i wan nambawan fasin we i mekem i gud long yumi. Hem i no mekem tingting blong yumi i foldaon mo i no mekem yumi seksek. Jeova “i stap harem gud oltaem” mo i wantem se ol man we hem i wokem olgeta, oli harem gud long laef. (1 Timoti 1:11) Be blong harem gud, laef blong yumi i mas laenap wetem ol samting we God i wantem. Taswe, plante long yumi i mas jenisim sam samting long laef blong yumi. Olgeta we oli mekem ol jenis ya, oli luksave se Sam ya we Deved i wokem i kamtru long olgeta: “Hae God, hem i gud tumas. Yufala i traem trastem hem. Bambae yufala i faenemaot we hem i tru. Olgeta we oli go long hem blong faenem sefples, oli save harem gud. Yufala ol [“tabu,” NW] man blong Hae God, yufala i [“fraet,” NW] long hem. Olgeta we oli stap [fraet] long hem oli no save sot long wan samting.” (Ol Sam 34:8, 9) Olgeta we oli fraet long Jeova bambae oli no save sot long ol impoten samting, from we oli frengud wetem Hem.
4. ?Wanem promes we Deved mo Jisas tugeta i mekem?
4 Makemgud olsem wanem Deved i ona long ol man blong hem. Hem i kolem olgeta ‘ol tabu man.’ Tru ya, olgeta ya oli stap long wan tabu neson we i blong God. Antap long samting ya, oli stap putum laef blong olgeta long denja blong folem Deved. Nating se oli stap ronwe long King Sol, Deved i trastem Jeova se bambae hem i gohed blong givim ol samting we oli nidim. Deved i raetem se: “Maet ol pikinini blong laeon oli save hanggri, be olgeta we oli stap luk long Hae God oli no save sot long wan gudfala samting.” (Ol Sam 34:10) Jisas i mekem semfala promes bakegen long ol man blong hem.—Matiu 6:33.
5. (a) ?Plante man we oli folem Jisas oli wanem kaen man? (b) ?Jisas i givim wanem advaes long saed blong fasin fraet?
5 Plante man Jiu we oli laekem tok blong Jisas, oli puaman, oli man nating nomo. Taswe, Jisas “i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:36) ?Ol puaman ya bambae oli fraet blong folem Jisas no nogat? Blong folem Jisas, oli mas lanem blong fraet long Jeova, be i no long ol man. Jisas i talem se: “Bambae yufala i no fraet long olgeta ya we oli save kilim yufala i ded, be biaen oli no moa save mekem wan samting nogud long yufala bakegen. Be mi mi talemaot man ya long yufala, we i stret blong yufala i fraet long hem. Yufala i mas fraet long God, we taem hem i kilim man i ded, biaen, hem i gat paoa blong sakem hem i go long [“Gehena,” NW]. Yes, mi mi talem long yufala. Yufala i mas fraet long hem. Ol smosmol pijin ya we man i stap salem olgeta, wan handred twanti vatu long faef, be i no gat wan long olgeta we God i fogetem samtaem. Yufala i luk. Ol hea blong hed blong yufala, be hem i kaontem evriwan. Yufala i no fraet. Long fes blong hem, yufala i gud moa, i winim plante smosmol pijin ya.”—Luk 12:4-7.
6. (a) ?Wanem ol tok blong Baebol we i givim paoa long ol Kristin? (b) ?From wanem Jisas i beswan eksampol blong fasin ya blong fraet long God?
6 Sam samtaem ol enemi blong ol man we oli fraet long Jeova, oli traem fosem olgeta blong oli no moa mekem wok blong Hem. Long taem olsem, ol man blong Jeova oli tingbaot advaes ya blong Jisas se: “Man we i talemaot nem blong mi, mi Pikinini blong Man, long fes blong ol man, bambae mi tu mi talemaot nem blong hem long fes blong ol enjel blong God. Be man we i talemaot long fes blong ol man, se hem i no man blong mi, bambae mi tu mi talemaot long fes blong ol enjel blong God, se hem i no man blong mi.” (Luk 12:8, 9) Ol tok ya i givim paoa long ol trufala Kristin, antap moa, ol Kristin we oli stap long ol kantri we gavman i putum tabu long wok blong olgeta. Long ol ples olsem, ol Kristin oli gohed nomo blong presem Jeova long ol miting blong olgeta mo long wok blong prij, be oli lukaotgud. (Ol Wok 5:29) Jisas i givim beswan eksampol long yumi olsem wanem blong “fraetgud long God.” (Hibrus 5:7, NW) Profet tok blong Baebol i tokbaot Jisas se: “Spirit blong Hae God bambae i stap long hem, . . . i mekem hem i man blong [“fraet long Jeova,” NW]. Oltaem nomo, king ya bambae i glad tumas blong [“fraet long Jeova,” NW].” (Aesea 11:2, 3) Taswe, Jisas i nafgud blong tijim yumi olsem wanem fraet long God i save mekem i gud long yumi.
7. (a) ?Olsem wanem ol Kristin oli ansa long tok we i singaot olgeta olsem tok blong Deved? (b) ?Olsem wanem ol papa mama oli save folem gudfala eksampol blong Deved?
7 Olgeta man we oli folem eksampol blong Jisas mo we oli obei long ol tijing blong hem, oli rili stap ansa long ol tok we i singaot olgeta, olsem tok ya blong Deved: “Yufala ol [“pikinini boe,” NW] blong mi, yufala i kam, yufala i lesin long mi. Bambae mi tijim yufala blong yufala i [“fraet long Jeova,” NW].” (Ol Sam 34:11) I stret nomo we Deved i singaot ol man blong hem se “ol pikinini boe” blong hem, from we oli lukluk i go long hem olsem lida blong olgeta. Yes Deved i givhan long ol man blong hem blong oli fraet long God, olsem nao, oli save joengud mo God i glad long olgeta. !Hemia wan gudfala eksampol blong ol Kristin papa mama! Jeova i givim raet long olgeta blong “stretem [ol boe mo gel blong olgeta], mo blong trenem tingting blong olgeta olsem we Jeova i wantem.” (Efesas 6:4, NW) Ol papa mama oli givhan long ol pikinini blong olgeta blong fraet long Jeova mo harem gud long laef, taem oli tokbaot ol samting we Jeova i wantem evri dei long ol pikinini blong olgeta, mo taem oli mekem Baebol stadi oltaem long olgeta.—Dutronome 6:6, 7.
?Olsem Wanem Blong Fraet Long God?
8, 9. (a) ?Olsem wanem laef blong man i moagud taem hem i fraet long God? (b) ?Olsem wanem blong no tok nogud?
8 Olsem yumi luk finis, fasin ya blong fraet long Jeova i no tekemaot glad blong yumi, nogat. Deved i askem se: “?Olsem wanem? ?Yufala i wantem harem gud long laef blong yufala? ?Yufala i wantem laef blong yufala i longfala we yufala i hapi oltaem?” (Ol Sam 34:12) I klia se stamba samting we yumi nidim blong yumi save gat wan longfala laef we yumi harem gud long hem, hemia fraet long Jeova. Maet yu talem se, “Mi mi fraet long God.” I isi nomo blong talem samting ya be i no isi blong soemaot long laef blong yumi. Taswe, Deved i eksplenem wanem we yumi mas mekem blong fraet long God.
9 “Yufala i no moa tok nogud, yufala i no moa giaman.” (Ol Sam 34:13) Tabu spirit i pulum aposol Pita blong yusum smol haf ya blong Sam 34 long wan leta blong hem, jes afta we hem i givim advaes long ol Kristin se oli mas lavlavem olgeta olsem we oli wan brata nomo. (1 Pita 3:8-12) Yumi no moa tok nogud i min se yumi no tokbaot man mo yumi no talemaot ol storian olbaot we i save spolem narafala. Long defren fasin, bambae yumi traehad oltaem blong storian long samting we i leftemap tingting blong narafala. Mo tu, bambae yumi no fraet blong tok tru.—Efesas 4:25, 29, 31; Jemes 5:16.
10. (a) ?No moa mekem ol rabis fasin, tok ya i minim wanem? (b) ?Olsem wanem yumi mekem ol samting we i gud nomo?
10 “Yufala i no moa mekem ol rabis fasin, yufala i mekem ol samting nomo we i gud. Long olgeta tingting blong yufala, yufala i mas wok had blong mekem pis.” (Ol Sam 34:14) Yumi no mekem ol fasin we God i agensem, olsem rabis fasin long saed blong seks, lukluk ol doti pija blong seks, stil, wokem posen mo kleva, faet, drong, mo yusum drag. Yumi no joen long ol pleplei mo wajem ol kaset we oli soemaot ol rabis fasin ya tu. (Efesas 5:10-12) Defren olgeta, bambae yumi yusum taem blong yumi blong mekem ol samting we i gud nomo. Samting we i gud moa i bitim ol narafala samting, se yumi joen oltaem long wok blong talemaot Kingdom mo pulum ol man oli kam disaepol blong Kraes. Long rod ya, yumi givhan long olgeta blong kasem laef. (Matiu 24:14; 28:19, 20) Mekem samting we i gud i minim tu se yumi reregud from ol Kristin miting mo go long olgeta, yumi givim smol presen mane blong sapotem wok blong Jeova long fulwol, yumi lukaotgud long Haos Kingdom blong yumi, mo yumi givhan long ol Kristin we oli sot long sam samting.
11. (a) ?Olsem wanem Deved i folem advaes we hem i givim long saed blong pis wetem narafala? (b) ?Yu save mekem wanem blong “wokhad blong mekem pis” long kongregesen?
11 Deved i givim wan gudfala eksampol long saed blong fasin ya blong gat pis wetem narafala. Tu taem hem i gat janis blong kilim Sol i ded. Be hem i no kilim hem, mo biaen, hem i toktok wetem respek long king ya blong traem mekem pis wetem hem. (1 Samuel 24:8-11; 26:17-20) ?Olsem wanem sipos wan trabol i kamaot long kongregesen tede we i save spolem pis blong hem? ‘Long olgeta tingting blong yumi, yumi mas wok had blong mekem pis.’ Taswe sipos yumi luk we wan Kristin brata no sista i stap lukluk nogud long yumi, yumi mas folem advaes ya blong Jisas se: “Yu mas go stretem poen ya wetem brata blong yu blong yutufala i fren gud.” Biaen, yumi save gohed blong mekem ol narafala haf blong trufala wosip.—Matiu 5:23, 24; Efesas 4:26.
Fraet Long God i Karem Plante Blesing
12, 13. (a) ?Wanem blesing we ol man blong fraet long God oli kasem tede? (b) ?I no longtaem, ol man we oli holemstrong long wosip blong Jeova bambae oli kasem wanem blesing?
12 “Hae God i stap lukluk long ol stret man, i stap lesin blong harem krae blong olgeta.” (Ol Sam 34:15) Stori blong ol samting we God i mekem long Deved, i soemaot se tok ya i tru. Tede, yumi harem gud tumas mo tingting blong yumi i stap kwaet from we yumi save se Jeova i stap lukaotgud long yumi. Yumi gat strong tingting se bambae hem i givim samting we yumi nidim oltaem, mo long taem ya we yumi wari tumas tu. Yumi save se i no longtaem, bambae Gog blong Magog i girap agensem ol man blong wosipim trufala God, mo bambae yumi luk “bigfala dei [blong Jeova] we bambae ol man oli fraet gud long hem,” olsem ol profet tok blong Baebol oli talem. (Joel 2:11, 31; Esikel 38:14-18, 21-23) Nomata wanem trabol i kasem yumi long taem ya, ol tok blong Deved bambae oli kamtru long yumi, se: “Taem ol stret man oli krae i go long [“Jeova,” NW], hem i harem olgeta, i tekemaot olgeta long olgeta trabol blong olgeta.”—Ol Sam 34:17.
13 !Bambae yumi glad tumas blong luk taem ya we Jeova i leftemap hae nem blong hem! Hat blong yumi bambae i fulap moa long ona mo respek i bitim olgeta taem bifo, mo ol man we oli agensem Jeova bambae oli lus long fasin we i mekem bigfala sem long olgeta. “[Jeova] i stap agensem olgeta we oli stap mekem ol rabis fasin, nao taem olgeta ya oli lus long wol ya, be bambae i no longtaem, ol man oli no moa save tingbaot olgeta bakegen.’’ (Ol Sam 34:16) !Bambae i wan bigfala blesing blong stap long taem ya we Jeova bambae i sevem yumi i go long niufala wol we stret fasin nomo i stap long hem!
Ol Promes We Oli Givhan Long Yumi Blong Stanap Strong
14. ?Wanem bambae i givhan long yumi blong stanap strong, nating se yumi kasem plante trabol?
14 Go kasem taem ya, bambae yumi nidim fasin blong stanap strong blong yumi save gohed blong obei long Jeova, nating se wol ya i fulap long rabis fasin mo ol man oli agensem yumi. Fraet long God bambae i givhan bigwan long yumi blong obei long hem. Yumi stap laef long taem ya we laef i strong tumas mo sam man blong Jeova oli kasem bigfala hadtaem we i mekem olgeta oli harem nogud mo tingting i foldaon. Be oli save sua se sipos oli lukluk i go long Jeova, bambae hem i givhan long olgeta blong stanap strong. Ol tok blong Deved i leftemap tingting, hem i se: “[Jeova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.” (Ol Sam 34:18) Nekis tok blong Deved tu i mekem yumi harem gud, i se: “Man we i stret i save harem nogud long plante trabol, be Hae God i save tekemaot hem long olgeta trabol.” (Ol Sam 34:19) Nomata se trabol i kasem yumi hamas taem, be Jeova i naf blong tekemaot yumi long olgeta trabol ya.
15, 16. (a) ?Smoltaem afta we Deved i wokem Sam 34, hem i kasem nius long saed blong wanem bigfala trabol? (b) ?Wanem bambae i givhan long yumi blong stanap strong tru long ol trabol?
15 Smoltaem afta we Deved i wokem Sam 34, hem i harem nius long saed blong ol man long taon blong Nob. Sol i kilim olgeta i ded wetem bighaf blong ol pris tu. Hem i mekem olsem from we hem i kros we i kros taem hem i harem se Deved i stap long taon ya. !Deved i mas harem nogud tumas blong save se trabol ya i kamaot from we hem i bin go long taon ya! (1 Samuel 22:13, 18-21) Yumi save se long taem ya Deved i mas lukluk i go long Jeova blong i givhan long hem. Mo tu, hem i tingbaot se ol man ya bambae oli gat janis long fiuja blong laef bakegen wetem “ol man we oli stret.” Samting ya i mas leftemap tingting blong hem.—Ol Wok 24:15.
16 Tede tu, bilif long laef bakegen long fiuja i save givim paoa long yumi. Yumi save se nomata wanem trabol ol enemi oli mekem long yumi, oli no save spolem yumi blong olwe. (Matiu 10:28) Deved i soemaot strong bilif ya i se: “[“Jeova,” NW] i save lukaot gud long [stret man], we bambae i no gat wan bun blong hem nating i brok.” (Ol Sam 34:20) Vas ya i kamtru long Jisas fastaem. Nating se oli mekem Jisas i harem nogud long bodi blong hem gogo hem i ded, be oli no ‘brekem’ wan bun blong hem nating. (Jon 19:36) Ol Sam 34:20 i stret tu long ol Kristin we tabu spirit i makemaot olgeta mo “ol narafala sipsip” we oli joen wetem olgeta. Nomata wanem trabol i kasem olgeta, hem i no save spolem olgeta blong olwe. I olsem we ol man oli no save brekem wan bun blong olgeta nating.—Jon 10:16.
17. ?Wanem bigfala trabol bambae i kasem ol man we oli no wantem jenisim fasin blong olgeta agensem ol man blong Jeova?
17 Long saed blong ol rabis man, bambae ol samting ya i defren. Klosap nao, bambae oli kakae frut blong sid we oli planem. “Bigfala trabol bambae i kasem ol rabis man, bambae i kilim olgeta i ded. Mo ol man we oli no laekem nating ol stret man, bambae God i panisim olgeta.” (Ol Sam 34:21, NW) Olgeta we oli gohed blong agensem ol man blong God, bambae oli fesem wan trabol we i nogud olgeta. Long taem ya we Jisas Kraes bambae i soemaot paoa blong hem, ‘panis we olgeta bambae oli kasem, hemia ded we i no save finis.’—2 Tesalonaeka 1:9, Nyutesteman wetem Ol Sam long Bislama.
18. ?Long wanem rod Jeova i sevem finis “bigfala kampani”? ?Mo bambae oli kasem wanem long fiuja?
18 Lastok blong Sam ya blong Deved i mekem promes se: “Ol man blong [“Jeova,” NW], hem bambae i sevem olgeta. Olgeta we oli go blong haed long hem, bambae hem i no save panisim olgeta.” (Ol Sam 34:22) Klosap long en blong 40 yia ya we Deved i rul olsem King, hem i talem se, ‘Jeova i tekemaot [sevem] hem long olgeta trabol blong hem.’ (1 King 1:29-30) I no longtaem, ol man we oli fraet long Jeova bambae oli save talem olsem Deved. Bambae oli save tingting bak mo harem gud tumas se Jeova i bin tekemaot olgeta long ol trabol we i kasem olgeta from fasin blong sin we i stap long olgeta, mo i bin sevem olgeta oli aot long ol traem blong olgeta. Bighaf blong ol Kristin we tabu spirit i makemaot olgeta oli kasem praes blong olgeta finis long heven. “Wan bigfala kampani blong man” we oli kamaot long olgeta kantri oli stap joen naoia wetem ol brata blong Jisas we oli stap yet long wol, blong oli mekem wok blong Jeova tugeta. From samting ya, oli stanap olsem ol klin man long fored blong hem. Hemia from we oli bilif long paoa blong blad blong Jisas blong sevem olgeta. Long Wan Taosen Yia Rul blong Kraes we i stap kam, bambae oli kasem blesing fulwan from ransom sakrefaes blong Jisas, we bambae i mekem se oli kam stretgud olgeta.—Revelesen 7:9, 14, 17, NW; 21:3-5.
19. ?Ol wanwan memba blong “bigfala kampani” oli gat strong tingting blong mekem wanem?
19 ?From wanem “bigfala kampani” we oli wosipim God tede bambae oli kasem ol blesing ya? From we oli gat strong tingting blong gohed blong fraet long Jeova, mekem wok blong hem, mo obei long hem wetem bigfala ona mo respek. Tru ya, fraet long Jeova i mekem yumi harem gud long laef naoia, mo bambae i givhan long yumi blong “kasem laef ya we i prapa wan,” hemia laef we i no save finis long niufala wol.—1 Timoti 6:12, 18, 19; Revelesen 15:3, 4.
?Yu Yu Rimemba?
• ?From wanem yumi mas fraet long God? ?I minim wanem blong fraet long God?
• ?Fraet long God i mas mekem wanem long fasin blong yumi?
• ?Wanem ol blesing we yumi kasem taem yumi fraet long God?
• ?Wanem ol promes we oli givhan long yumi blong stanap strong?
[Kwestin]
[Tok blong pija long pej 24]
Ol man we oli fraet long Jeova oli lukaotgud taem gavman i putum tabu long wok blong olgeta