Yumi Joen Tugeta Blong Leftemap Nem Blong Jeova
Yumi Joen Tugeta Blong Leftemap Nem Blong Jeova
“Yufala i kam joen wetem mi, yumi talemaot we [“Jeova,” NW] i hae we i hae, yumi leftemap hae nem blong hem.”—OL SAM 34:3.
1. ?Wanem gudfala eksampol we Jisas i soemaot taem hem i stap long wol?
LONG naet blong Nisan 14 long yia 33, Jisas mo ol aposol blong hem oli joen wanples long wan rum antap long wan haos long Jerusalem. Long ples ya, oli singsing blong presem Jeova. (Matiu 26:30) Hemia laswan taem we Jisas i mekem samting ya wetem ol aposol blong hem. I stret nomo we hem i finisim miting ya wetem ol singsing blong presem Jeova. Long stat blong wok blong Jisas long wol ya go kasem en blong hem, hem i presem Papa blong hem mo i wok strong blong talemaot nem blong Hem. (Matiu 4:10; 6:9; 22:37, 38; Jon 12:28; 17:6) Yes, Jisas i singaot ol man blong joen wetem hem, long sem fasin olsem man blong raetem Ol Sam, we i talem se: “Yufala i kam joen wetem mi, yumi talemaot we [“Jeova,” NW] i hae we i hae, yumi leftemap hae nem blong hem.” (Ol Sam 34:3) !Hemia wan gudfala eksampol we yumi save folem!
2, 3. (a) ?Olsem wanem yumi save se Sam 34 i wan profet tok? (b) ?Bambae yumi tokbaot wanem long stadi ya mo long nekis stadi?
2 Sam aoa nomo afta we aposol Jon i singsing wetem Jisas, hem i luk wan samting we i nogud olgeta. Oli nilim Masta blong hem long pos blong i ded wetem tu man blong brekem loa. Ol soldia blong Rom oli kam brekem leg blong tufala man ya, blong tufala i ded kwik. Be Jon i talem se oli no brekem leg blong Jisas. Taem ol soldia oli kam kasem Jisas, Jisas i ded finis. Long Gospel we Jon i raetem, hem i talem se samting ya i mekem wan narafala vas blong Sam 34 i kamtru, se: “Bambae i no gat wan bun blong hem nating i brok.”—Jon 19:32-36; Ol Sam 34:20, Septuagint.
3 I gat plante narafala tok long Sam 34 we olgeta tu oli pulum tingting blong ol Kristin. Taswe, long stadi ya mo long nekis stadi, bambae yumi tokbaot ol samting we oli hapen long laef blong Deved we oli pulum hem blong wokem Sam ya. Biaen, bambae yumi tokbaot mining blong ol tok blong Sam ya we i leftemap tingting blong yumi.
Deved i Ronwe Long Sol
4. (a) ?From wanem oli kafsaedem oel long Deved blong i kam nekis king blong Isrel? (b) ?From wanem Sol i ‘laekem Deved tumas’?
4 Taem Deved i yangfala, Sol i king blong Isrel. Be biaen, Sol i no moa obei long Jeova, ale Jeova i no moa glad long hem. Taswe, profet Samuel i talem long Sol se: “Tede, Hae God i brekem paoa blong yu finis, i givim kingdom blong yu finis long narafala man we i moa gud, i winim yu.” (1 Samuel 15:28) Biaen, Jeova i talem long Samuel blong i go kafsaedem oel long Deved, lasbon boe blong Jese, nao Deved bambae i kam nekis king blong Isrel. From we God i tekemaot tabu spirit blong hem long King Sol, plante taem Sol i harem nogud. Ale oli singaot Deved blong i kam kasem Gibea blong plei miusik long Sol, from we Deved i save plei gud. Miusik blong Deved i mekem King Sol i harem gud, nao “[king] i laekem hem tumas.”—1 Samuel 16:11, 13, 21, 23.
5. ?From wanem tingting blong Sol i jenis long saed blong Deved, mo Deved i mas mekem wanem?
5 Long ol yia biaen, i kam klia se Jeova i stap wetem Deved. Jeova i givhan long Deved blong winim Golaeat, bigfala dabolbun blong Filistia. Hem i halpem Deved blong winim ol faet nao ol man Isrel oli onagud long Deved. Be taem Sol i luk we Jeova i blesem Deved, hem i jalus mo hem i no moa laekem Deved. Taem Deved i stap plei miusik, tu taem King Sol i sakem spia long hem. Gudsap se Deved i muv kwik i go long saed, ale spia i mestem hem. Namba tri taem we Sol i traem blong kilim i ded man ya we bambae i kam king blong Isrel long ples blong hem, Deved i luksave se hem i mas ronwe. Sipos no, bambae hem i ded. Be Sol i gohed nomo blong traem kasem hem mo kilim hem i ded. Taswe, Deved i ronwe i go bitim mak blong graon blong ol man Isrel, ale i lukaot ples blong haed long ples ya.—1 Samuel 18:11; 19:9, 10.
6. ?From wanem Sol i sanem ol soldia blong hem oli go kilim ol man blong taon ya Nob i ded?
6 Taem Deved i stap go from mak blong graon blong ol man Isrel, hem i stop long taon blong Nob, ples ya we Haos Tapolen blong Jeova i stap long hem. I luk olsem we wan grup blong ol yangfala man oli folem Deved. Ale Deved i askem smol kakae blong hem mo ol man blong hem. Sol i harem nius se hae pris i givim kakae long Deved mo ol man blong hem, mo i givim naef blong faet blong Golaeat tu we Deved i bin tekemaot taem hem i kilim Golaeat i ded. Sol i kros we i kros, nao i sanem ol soldia blong hem oli go kilim ol man blong taon ya i ded wetem 85 pris tu.—1 Samuel 21:1, 2; 22:12, 13, 18, 19; Matiu 12:3, 4.
Narafala Taem We Klosap Deved i Ded
7. ?From wanem taon ya Gat i no wan sefples blong Deved i haed?
7 Deved i aot long Nob, i ronwe i go 40 kilomita long wes, kasem graon blong ol man Filistia. Hem i go long taon ya Gat we hem i ples blong Golaeat, mo i haed long haos blong King Akis. Ating Deved i ting se Sol i no save kam lukaotem hem long taon ya. Be smoltaem i pas nao ol man blong king blong Gat oli luksave Deved. Taem Deved i harem olgeta oli stap tokbaot hem, hem “i fraet tumas long king.”—1 Samuel 21:10-12.
8. (a) ?Sam 56 i talem wanem long saed blong samting we i hapen long Deved long taon ya Gat? (b) ?Olsem wanem klosap nomo Deved i ded?
8 Nao ol man Filistia oli holem Deved. Maet long taem ya nao Deved i wokem Sam 56, we hem i askem long Jeova wetem fulhat blong hem se: “Plis, yu fulumap ol wota blong ae blong mi i go long botel blong yu we oli wokem long skin blong anamol.” (Ol Sam 56:8, NW, wetem smol stamba tok long stat blong Sam ya) Ol tok ya i soemaot strong tingting blong Deved se Jeova i no save fogetem we hem i harem nogud tumas, mo se bambae Jeova i protektem hem mo lukaotgud long hem wetem lav. Mo tu, Deved i tingbaot wan rod blong trikim king blong Filistia. Hem i mekem olsem we hem i krangke. King Akis i luk samting ya, nao i tok long ol man blong hem se from wanem oli karem wan “krangke” man i kam long hem. I klia se Jeova i blesem rod ya we Deved i yusum from we ol man oli girap oli ronemaot hem long taon ya. !Wan narafala taem we klosap nomo Deved i ded!—1 Samuel 21:13-15.
9, 10. ?From wanem Deved i raetem Sam 34? ?Maet Deved i stap tingbaot hu, taem hem i wokem Sam ya?
9 Baebol i no talem sipos ol man blong Deved oli go stap wetem hem long taon ya Gat no sipos oli stap long ol vilej afsaed long taon ya, blong oli save blokem ol enemi. Nating se i olsem wanem, oli mas glad blong luk Deved bakegen mo harem storian blong hem olsem wanem Jeova i sevem hem bakegen. Trabol we i kasem Deved long taon ya i pulum hem blong wokem Sam 34, olsem yumi luk long smol stamba tok long stat blong Sam ya. Long vas 1 kasem 7, Deved i presem God from we hem i sevem hem, mo i singaot ol man blong hem blong joen wetem hem blong leftemap nem blong Jeova olsem Bigfala Man blong Sevem ol man blong Hem.—Ol Sam 34:3, 4, 7.
10 Nao Deved mo ol man blong hem oli go haed long wan hol blong ston long Adulam. Ples ya i stap antap long ol hil long Isrel, samwe long 15 kilomita longwe long Gat, long saed i go long is. Plante man Isrel oli kam joen wetem hem long ples ya, from we oli no glad long fasin blong King Sol blong rul long olgeta. (1 Samuel 22:1, 2) Taem Deved i raetem Ol Sam 34:8-22, ating hem i stap tingbaot ol man ya. Ol tok long ol vas ya oli impoten long yumi tede tu. I gud yumi tokbaot ol wanwan vas blong naesfala Sam ya.
?Yu Yu Wantem Samting We Deved i Wantem?
11, 12. ?Wanem sam risen we yumi gat blong presem Jeova oltaem?
11 “Oltaem mi bambae mi talem tangkiu long Hae God, bambae mi presem hem oltaem nomo.” (Ol Sam 34:1) Taem Deved i stap ronwe i go long ol defren ples blong haed, ating hem i sot long plante samting long saed blong bodi. Be ol tok long vas ya oli soemaot se hem i no letem tingting ya blong kasem ol samting blong laef evri dei, i winim strong tingting we hem i gat blong presem Jeova. !Hemia wan gudfala eksampol we yumi save folem taem laef i had! Nating se yumi stap long skul, long wok, wetem ol narafala Kristin, no long wok blong prij, be bigfala samting we i mas stap long tingting blong yumi, i blong presem Jeova. !I gat plante risen blong presem hem! Tingbaot ol samting raonabaot long yumi we Jeova i wokem. I gat plante tumas save we yumi save kasem long saed blong ol samting ya, mo yumi save harem gud tumas long olgeta tu. !Antap long hemia, tingbaot wok we Jeova i stap mekem tru long ogenaesesen blong hem long wol ya! Long taem blong yumi, Jeova i yusum ol man we oli stap tru long hem blong mekem plante bigbigfala wok, nating se oli sinman. ?Olsem wanem long ol wok blong Jeova, taem yumi skelem wetem wok blong ol man we wol ya i leftemap olgeta? Deved i raetem se: “[“Jeova,” NW], i no gat narafala god we i olsem yu. I no gat wan i stap we i stap mekem ol gudgudfala wok olsem we yu yu bin mekem.” ?Olsem wanem? ?Yu yu agri wetem ol tok ya blong Deved?—Ol Sam 86:8.
12 Olsem Deved, yumi wantem presem Jeova oltaem from ol bigbigfala wok blong hem. Mo tu, yumi glad tumas blong save se Kingdom blong God i stap naoia long han blong Jisas Kraes, we i kamaot long laen blong Deved mo i stap olwe. (Revelesen 11:15) Samting ya i soemaot se en blong rabis fasin blong wol ya i klosap, mo se bitim sikis handred taosen milian man i stap long denja blong mestem laef we i no save finis. Naoia bitim olgeta taem bifo, i impoten we yumi talemaot Kingdom blong God mo wanem we klosap nao Kingdom ya bambae i mekem long ol man, mo i impoten we yumi givhan long olgeta blong joen wetem yumi blong presem Jeova. Samting we i mas impoten moa long laef blong yumi, i blong yusum evri janis blong pulum ol narafala blong bilif long “gud nius” bifo we i let tumas.—Matiu 24:14.
13. (a) ?Deved i tokflas from hu, mo tok blong hem i pulum wanem kaen man? (b) ?Tede, wanem i stap pulum ol man we oli gat tingting daon oli kam long Kristin kongregesen?
13 “Bambae mi mi tokflas from ol samting we Jeova i mekem. Ol man we oli gat tingting daon bambae oli harem, mo bambae oli glad tumas from.” (Ol Sam 34:2, NW) Deved i no tokflas from samting we hem i mekem. Taem hem i trikim king blong Gat, long taem ya tu hem i no tokflas. Hem i luksave se Jeova nao i protektem hem taem hem i stap long Gat, mo Jeova i halpem hem blong ronwe. (Ol Proveb 21:1) Taswe, Deved i tokflas from ol wok blong Jeova nomo, i no from ol prapa wok blong hem. Taem Deved i leftemap nem blong Jeova, ol man we oli gat tingting daon oli kam long Jeova. Jisas tu i leftemap nem blong Jeova, mo samting ya i pulum ol man we oli gat tingting daon mo oli glad blong kasem tijing, oli kam long Jeova. Tede, long olgeta ples blong wol, ol man we oli gat tingting daon oli stap joen wetem kongregesen blong ol Kristin we tabu spirit i makemaot olgeta mo we Jisas i Hed blong hem. (Kolosi 1:18) Taem ol man blong God we oli gat tingting daon oli leftemap nem blong God, tok blong olgeta i tajem hat blong ol narafala man we oli gat tingting daon. Ol tok blong Baebol we ol man ya oli harem mo we tabu spirit i givhan long olgeta blong kasem save long hem, olgeta tu oli tajem hat blong olgeta.—Jon 6:44; Ol Wok 16:14.
Ol Kristin Miting Oli Mekem Bilif Blong Yumi i Strong
14. (a) ?Deved i presem Jeova taem i stap hem wan nomo? (b) ?Wanem eksampol we Jisas i givim long saed blong ol miting blong mekem wosip?
14 “Yufala i kam joen wetem mi, yumi talemaot we [“Jeova,” NW] i hae we i hae, yumi leftemap hae nem blong hem.” (Ol Sam 34:3) Deved i presem Jeova taem hem i stap hem wan. Be i no long taem ya nomo. Long kaen fasin, hem i singaot ol man blong hem blong olgeta tu oli joen wetem hem blong leftemap nem blong God. Long sem fasin, Jisas Kraes we i Bigfala Deved, i haremgud tumas blong joen wetem ol narafala man blong presem Jeova—long haos prea blong ol man Jiu, long ol lafet long haos blong God long Jerusalem, mo taem hem i stap wetem ol man blong hem. (Luk 2:49; 4:16-19; 10:21; Jon 18:20) Yumi mas folem eksampol ya blong Jisas. !Wan blesing we i givim bigfala glad long yumi, hemia blong tekem evri janis blong joen wetem ol Kristin brata sista blong presem Jeova! !Samting ya i tru moa naoia, taem “Dei ya we Masta blong yumi bambae i jajem olgeta man long hem, hem i kam klosap finis”!—Hibrus 10:24, 25.
15. (a) ?Samting we Deved i gotru long hem i mekem wanem long ol man blong hem? (b) ?Olsem wanem ol miting oli givhan long yumi?
15 ‘Mi mi prea long Jeova, nao hem i ansa long mi, i tekemaot mi long ol man we oli stap mekem mi mi fraet.’ (Ol Sam 34:4) Hemia wan bigfala samting we Deved i no save fogetem. Taswe, hem i gohed i talem se: “Taem ol man oli stap spolem mi, mi singaot i go long [“Jeova,” NW], nao hem i harem mi, i tekemaot mi long olgeta trabol blong mi.” (Ol Sam 34:6) Taem yumi joen wetem ol Kristin brata sista blong yumi, yumi gat janis blong storian long ol samting we Jeova i bin mekem blong givhan long yumi blong stanap strong tru long ol trabol long laef blong yumi. Storian olsem i save mekem bilif blong ol narafala Kristin i strong, olsem we ol tok blong Deved i mekem bilif blong ol man blong hem i strong. Ol man we oli joen wetem Deved, ‘oli luk long Jeova, nao oli glad. Neva bambae tingting blong olgeta i foldaon.’ (Ol Sam 34:5) Nating se oli stap ronwe long King Sol, be tingting blong olgeta i no foldaon. Oli gat strong tingting se God i stap givhan long Deved, mo oli glad from. Long sem fasin, olgeta we oli jes save trutok wetem olgeta we oli trufala Kristin longtaem finis, oli lukluk i go long Jeova nomo blong givhan long olgeta. Oli luk we Jeova i bin givhan long olgeta wanwan, mo samting ya i mekem olgeta oli glad mo i givim strong tingting long olgeta blong oli stap tru long Hem.
Gat Tangkiu From Ol Enjel We Oli Givhan Long Yumi
16. ?Olsem wanem Jeova i stap yusum ol enjel blong hem blong halpem yumi?
16 ‘Oltaem enjel blong Jeova i stap lukaot gud long olgeta we oli [“fraet,” NW] long hem, mo i stap tekemaot olgeta long trabol.’ (Ol Sam 34:7) Deved i no ting se Jeova i stap sevem hem nomo. I tru se Deved hem i man we Jeova i jusumaot olsem nekis king blong Isrel, be hem i save se Jeova i stap yusum ol enjel blong hem blong lukaot gud long olgeta man we oli mekem trufala wosip, nating se oli gat hae posisen no nogat. Long taem blong yumi tu, Jeova i stap givhan long ol man blong mekem trufala wosip. Taem ol Nasi oli bin rul long Jemani, mo taem trabol i bin faerap long Angola, Malawi, Mosambik, mo long plante narafala kantri, ol gavman ya oli traehad blong waepemaot ol Witnes blong Jeova. Be oli traehad blong nating nomo. Ol man blong Jeova oli gohed blong kam plante moa long ol kantri ya, mo oli joen tugeta blong leftemap nem blong Hem. ?From wanem oli stap gohed gud? From we Jeova i stap yusum ol tabu enjel blong hem blong lidim mo lukaotgud long ol man blong hem.—Hibrus 1:14.
17. ?Olsem wanem ol enjel blong God oli halpem yumi?
17 Mo tu, ol enjel blong Jeova oli save lidim kongregesen blong i putumaot man we i mekem narafala i foldaon. (Matiu 13:41; 18:6, 10) Ol enjel oli save tekemaot samting we i stap blokem wok blong God, mo oli save protektem yumi long ol samting we i save spolem fasin fren blong yumi wetem Jeova, nating se maet yumi no luksave se oli stap mekem wok ya. Samting we i moa impoten, ol enjel oli lidim yumi long wok blong talemaot “gud nius ya we i blong stap oltaem nomo, gogo i no save finis.” Gud nius ya i mas goaot long olgeta ples blong wol, wetem ol ples we oli denja tu. (Revelesen 14:6) Long ol buk blong ol Witnes blong Jeova, i gat plante stori we oli pruvum se ol enjel oli stap halpem olgeta blong mekem wok ya. * Ol stori ya oli plante tumas, taswe i mas ol enjel nao we oli givhan long olgeta, ol samting ya i no save kamaot olsem nomo.
18. (a) ?Yumi mas mekem wanem blong ol enjel oli givhan long yumi? (b) ?Bambae yumi tokbaot wanem long nekis stadi?
18 Blong mekem se ol enjel oli gohed blong lidim mo protektem yumi, yumi mas gohed blong leftemap nem blong Jeova, nating se ol man oli agensem yumi. Yumi mas tingbaot se enjel blong God i givhan long olgeta ya nomo we ‘oli fraet long Jeova.’ ?Hemia i minim wanem? ?Wanem ya fraet long God, mo olsem wanem yumi save gat fraet ya? ?From wanem God we i lavem yumi i wantem se yumi fraet long hem? Bambae yumi tokbaot ol kwestin ya long nekis stadi.
[Futnot]
^ par. 17 Lukluk ol buk ya: Jehovah’s Witnesses—Proclaimers of God’s Kingdom, pej 550; 2005 Yearbook of Jehovah’s Witnesses, pej 53-54; Wajtaoa, Maj 1, 2000, pej 5-6; Wajtaoa blong Jenuware 1, 1991, pej 27, mo Februari 15, 1991, pej 26 (Franis mo Inglis).
?Bambae Yu Yu Ansa Olsem Wanem?
• ?Wanem ol traem we Deved i kasem taem hem i yangfala?
• ?Olsem Deved, wanem samting we yumi wantem moa?
• ?Wanem tingting blong yumi long ol Kristin miting?
• ?Olsem wanem Jeova i yusum ol enjel blong hem blong halpem yumi?
[Kwestin]
[Map blong pija long pej 19]
(Lukluk niuspepa)
Rama
Gat
Jiklag
Gibea
Jerusalem
Adulam
Kehila
Hebron
Sif
Hores
Maon
Nob
Betlehem
Enkedi
Kamel
Ded Si
[Credit Line]
Map: Based on maps copyrighted by Pictorial Archive (Near Eastern History) Est. and Survey of Israel
[Tok blong pija long pej 19]
Taem Deved i stap haed long ol defren ples, long taem ya tu hem i leftemap nem blong Jeova
[Tok blong pija long pej 21]
Taem ol Kristin oli joen long miting mo harem ol gudfala stori blong samting we i bin hapen long laef blong samfala, bilif blong olgeta i kam strong moa