Gat Tingting Daon Mo Letem Ol Man Blong Lukaot Long Sipsip Oli Lidim Yumi
Gat Tingting Daon Mo Letem Ol Man Blong Lukaot Long Sipsip Oli Lidim Yumi
“Yufala i mas obei long olgeta we oli stap lidim yufala, mo yufala i mas letem olgeta oli lidim yufala.”—HIBRUS 13:17, NW.
1, 2. ?Wanem vas blong Baebol i soem se Jeova mo Jisas tufala i Man blong Lukaot Sipsip we i gat lav?
JEOVA GOD mo Pikinini blong hem, Jisas Kraes, tufala i olsem ol Man blong Lukaot Sipsip we oli gat bigfala lav. Aesea i talem profet tok ya se: “[“Jeova,” NW ] God ya, hem i Masta blong yumi, mo hem i stap kam blong rul long paoa blong hem. . . . Hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Man olsem i stap holem ol pikinini blong sipsip, i stap karem olgeta i kam wanples, mo i stap wokbaot sloslo blong lidim ol mama blong olgeta oli biaen long hem.”—Aesea 40:10, 11.
2 Profet tok ya we i talemaot taem we trufala wosip i mas stanap bakegen, i kamtru fastaem long ol man Isrel. Hemia taem wan smol grup blong ol man Jiu oli kambak long Juda long yia 537 B.K.T. (2 Kronikel 36:22, 23) Profet tok ya i kamtru bakegen long 1919, taem Jisas Kraes, we Sirus i olsem pija blong hem, i karemaot smol grup blong ol tabu brata long ‘Bigfala Babilon’ i mekem oli fri. (Revelesen 18:2; Aesea 44:28) Hem i rul long “paoa” blong Jeova, i hivimap olgeta sipsip i kam wanples mo i lidim olgeta sloslo olsem man we i keagud long ol sipsip blong hem. Jisas hem wan i talem se: “Mi nao, gudfala man ya blong lukaot long sipsip. . . . Mi mi save ol sipsip blong mi mo ol sipsip blong mi oli save mi.”—Jon 10:14.
3. ?Olsem wanem Jeova i soem se hem i keagud long ol sipsip blong hem, i no wantem we man i spolem olgeta?
3 Profet tok long Aesea 40:10, 11 i makemgud fasin blong Jeova we i no save mekem i strong long ol man blong hem taem hem i stap lidim olgeta, olsem man we i lidim ol sipsip blong hem. (Ol Sam 23:1-6) Taem Jisas i stap long wol, hem tu i soem kaengud fasin long ol disaepol blong hem mo ol narafala man tu. (Matiu 11:28-30; Mak 6:34) Jeova mo Jisas tufala i no glad nating long ol lida blong Isrel, we oli mas mekem wok olsem man blong lukaot sipsip, be oli no kea nating mo oli mekem nogud long ol man we i stap long han blong olgeta. (Esikel 34:2-10; Matiu 23:3, 4, 15) Jeova i promes se: “Bambae mi sevem ol sipsip ya blong mi, mo bambae oli no moa save kasem trabol bakegen. Bambae mi jajem ol sipsip blong mi evriwan, blong seraot ol gudwan i gowe long ol rabiswan. Bambae mi givim wan king long olgeta olsem King Deved, we i man blong wok blong mi bifo. Hem bambae i olsem man blong lukaot long sipsip, mo bambae i stap lukaot gud long olgeta evriwan.” (Esikel 34:22, 23) Long taem ya blong en, Jisas Kraes, we Deved i olsem pija blong hem, hem i “man blong lukaot long sipsip” we Jeova i putumap blong i lukaot long ol man blong Hem long wol. Long ol man ya i gat ol Kristin we tabu spirit i makemaot olgeta, mo i gat ol “narafala sipsip” tu.—Jon 10:16.
Ol Presen We Jeova i Givim i Go Long Ol Kongregesen
4, 5. (a) ?Wanem sas presen we Jeova i givim long ol man blong hem long wol? (b) ?Wanem presen we Jisas i givim long kongregesen blong hem?
4 Taem Jeova i putumap Jisas Kraes olsem “man blong lukaot long sipsip” blong hem long wol ya, hem i givim wan presen we i sas tumas long Kristin kongregesen. Aesea 55:4 i bin tokbaot presen ya finis, hemia wan Lida long heven, long profet tok ya: “Mi mi putumap hem i kam king, mo i kam lida mo komanda blong ol man blong ol narafala kantri, mo mi yusum hem blong soemaot long olgeta we mi mi gat paoa.” Ol Kristin we tabu spirit i makemaot olgeta mo ol memba blong “bigfala kampani” we oli blong olgeta neson, laen, kantri, mo lanwis, oli kam tugeta. (Revelesen 5:9, 10; 7:9, NW ) Olgeta ya oli mekemap wan bigfala kongregesen nomo long fulwol, oli olsem “wan kampani nomo,” aninit long “wan man nomo blong lukaot long olgeta,” hemia Jisas Kraes.
5 Ale, Jisas tu i givim wan nambawan presen long kongregesen blong hem long wol. Hem i jusum sam man we oli wok aninit long hem blong lukaot long ol sipsip blong hem. Ol man ya oli holem wok blong olgeta long fasin we i stret, oli folem eksampol blong Jeova mo Jisas we tufala i keagud long ol sipsip. Aposol Pol i tokbaot presen ya we i soemaot lav blong Kraes, taem hem i raetem leta i go long ol Kristin long Efesas. Hem i raetem se: “ ‘Taem hem i go antap long ples we i hae we i hae, hem i tekem ol man we i winim olgeta long faet oli go kalabus long ples blong hem, mo i givim ol presen i go nomo long ol man [“ol man we oli olsem presen,” NW ].’ . . . Long sam man, hem i givim paoa blong oli aposol. Long sam narafala man, hem i givim paoa blong oli profet. Long sam narafala man, hem i givim paoa blong oli ivanjelis. Mo long sam narafala man bakegen, hem i givim paoa blong oli pasta [“man blong lukaot sipsip,” NW ] mo tija insaed long [“kongregesen,” NW ]. Kraes i mekem olsem blong olgeta man blong hem bambae oli rere blong mekem ol wok blong hem, blong bambae olgeta ya we oli olsem bodi blong hem, oli strong moa.”—Efesas 4:8, 11, 12.
6. ?Revelesen 1:16, 20 i tokbaot ol tabu brata we oli mekem wok blong elda se oli olsem wanem? ?Mo yumi save talem olsem wanem long saed blong ol elda we oli blong grup blong ol narafala sipsip?
6 Ol “presen” ya, no ol ‘man we oli olsem presen,’ hemia ol elda we Jeova mo Pikinini blong hem tufala i putumap olgeta long paoa blong tabu spirit blong oli lukaot long ol sipsip wetem kaen fasin. (Ol Wok 20:28, 29) Fastaem olgeta, ol elda ya oli ol Kristin we tabu spirit i makemaot olgeta blong go long heven. Revelesen 1:16, 20 i yusum pijatok blong talem se olgeta we oli mekem wok blong elda insaed long kongregesen blong ol tabu man, oli olsem ol “sta” no ol “enjel” long raethan blong Kraes, i min se hem i stap lidim olgeta. Be long taem blong en, namba blong ol tabu man we oli stap long wol mo we oli mekem wok blong elda i stap godaon. Ale, bighaf blong ol Kristin elda we oli stap long ol kongregesen tede, oli blong grup blong ol narafala sipsip. Hed Kampani nao i putumap ol elda ya wetem tabu spirit, taswe ol elda ya tu, i olsem we oli stap long raethan blong Gudfala Man blong Lukaot Sipsip, Jisas Kraes. Hemia i min se hem i stap lidim olgeta. (Aesea 61:5, 6) From we ol elda long ol kongregesen oli letem Kraes, we i Hed blong kongregesen, i lidim olgeta, i stret we yumi wokgud wetem olgeta.—Kolosi 1:18.
Obei Mo Letem Olgeta Oli Lidim Yumi
7. ?Wanem advaes we aposol Pol i givim long saed blong fasin we yumi mas gat long ol Kristin elda?
7 Tufala we i stap lukaot long yumi olsem we yumi sipsip blong tufala, hemia Jeova God mo Jisas Kraes, we tufala i stap long heven. Tufala i wantem we yumi obei mo letem olgeta we tufala i jusum blong oli holem wok insaed long kongregesen, oli lidim yumi. (1 Pita 5:5) Tabu spirit i pulum aposol Pol blong raetem se: “Bambae yufala i mas tingbaot ol man ya we oli stap lidim yufala, we oli stap talemaot Tok blong God long yufala. Yufala i mas stap lukluk fasin blong olgeta, we laef blong olgeta i olsem wanem, mo i karem wanem kaen frut. Nao yufala i mas biaenem olgeta, long fasin blong bilif blong olgeta. Yufala i mas obei long olgeta we oli stap lidim yufala, mo yufala i mas letem olgeta oli lidim yufala. Olgeta ya oli stap lukaotgud long laef blong yufala, from we oli mas talemaot long God se oli holem wok ya olsem wanem. I gud yufala i mekem we ol man ya oli glad blong mekem wok ya, i nogud yufala i mekem oli harem se wok ya i hevi, from we samting ya i save spolem yufala.”—Hibrus 13:7, 17, NW.
8. ?Pol i singaot yumi blong “lukluk” wanem, mo olsem wanem yumi soem se yumi “obei”?
8 Pol i talem long yumi se yumi mas stap “lukluk,” no tingtinggud, long fasin blong bilif blong ol elda mo folem eksampol blong olgeta. Antap long hemia, hem i givim advaes long yumi se yumi mas obei mo letem ol brata ya we oli putumap olgeta oli lidim yumi. Wan man we nem blong hem R. T. France i talem se long Grik lanwis, tok ya we long ples ya oli talem ‘obei’ i no “minim fasin we man i mekem nomo wanem we narafala i talem blong hem i mekem, be i minim se narafala i obei from we ‘yu pulum hem blong luksave samting,’ nao hem i rere mo i glad nomo blong yu lidim hem.” Yes, yumi obei long ol elda from we Baebol nao i talem se yumi mas mekem olsem mo from we yumi luksave se ol elda oli rili wantem leftemap ol wok blong Kingdom mo oli wantem mekem i gud long yumi. Bambae yumi rili glad sipos yumi agri we olgeta ya oli lidim yumi.
9. ?Nating sipos yumi obei long ol elda, from wanem yumi nidim yet blong “letem” olgeta oli lidim yumi?
9 ?Olsem wanem sipos yumi ting se wanem we ol elda oli talem i no beswan rod blong mekem samting? Long taem ya nao yumi nidim blong gat tingting ya se yumi letem nomo we oli lidim yumi, no yumi putum yumi stap aninit long olgeta. I isi blong obei taem evri samting i klia mo taem yumi agri wetem olgeta, be yumi soem se yumi letem olgeta oli lidim yumi taem yumi folem nomo wanem we oli talem, nating sipos maet yumi no kasem save gud from wanem i mas olsem. Pita, we biaen i kam wan aposol, hem i soem fasin ya blong stap aninit long narafala we i lidim hem.—Luk 5:4, 5.
Fo Risen Blong Wokgud Wetem Ol Elda
10, 11. ?Olsem wanem ol Kristin elda long taem bifo mo tede tu oli “talemaot tok blong God”?
10 Long Hibrus 13:7, 17 we yumi tokbaot antap, aposol Pol i givim fo risen from wanem yumi mas obei mo stap aninit long ol Kristin elda. Faswan risen hemia from we oli “talemaot tok blong God” long yumi. Tingbaot se “ol man we oli olsem presen” we Jisas i givim long kongregesen oli blong mekem we “bambae olgeta ya we oli olsem bodi blong hem, oli strong moa.” (Efesas 4:11, 12) Jisas i yusum ol man we oli strong long bilif blong oli wok aninit long hem olsem man blong lukaot sipsip. Hem i yusum olgeta ya blong stretem tingting mo fasin blong ol Kristin long faswan handred yia, mo i yusum sam long olgeta ya blong raetem ol leta i go long ol kongregesen. Hem i yusum ol elda ya we tabu spirit i putumap olgeta, blong lidim ol faswan Kristin mo mekem olgeta oli stanap strong.—1 Korin 16:15-18; 2 Timoti 2:2; Taetas 1:5.
11 Tede, Jisas i yusum ‘slef we i stret mo waes,’ we Hed Kampani mo ol elda oli wok long nem blong hem, blong lidim yumi. (Matiu 24:45, NW ) Sipos yumi gat respek long “Nambawan Man blong Lukaot long Sipsip,” hemia Jisas Kraes, bambae yumi folem advaes ya blong Pol: “Yufala i [mas] ona gud long olgeta ya we oli stap wok wetem yufala. Hemia olgeta ya we Masta blong yumi i jusumaot olgeta blong oli lidim yufala, mo blong oli tijim yufala.”—1 Pita 5:4; 1 Tesalonaeka 5:12; 1 Timoti 5:17.
12. ?Olsem wanem ol elda oli “stap lukaotgud long laef blong [yumi]”?
12 Namba tu risen from wanem yumi mas wokgud wetem ol Kristin elda hemia se oli “stap lukaotgud long laef blong [yumi].” Sipos oli luk eni samting long tingting no aksen blong yumi we oli save spolem yumi long saed blong spirit, kwiktaem nomo oli givim advaes we i save givhan blong stretem yumi. (Galesia 6:1) Grik tok ya we long vas ya i talem se “lukaotgud” i rili minim se man “i no save slip.” Wan man we i stadi ol tok blong Baebol i eksplenem tok ya se hem i ‘minim fasin blong man blong lukaot sipsip we i wekap oltaem blong wajgud.’ Yes, ol elda oli traehad blong stap wekapgud oltaem long saed blong spirit, be i tru se samtaem oli no slip tu from we oli stap wari tumas long sam long yumi we yumi stap long denja long saed blong spirit. ?Yu no ting se i stret we yumi rere oltaem blong wokgud wetem ol man ya we Jisas i putumap olgeta blong oli lukaot long yumi wetem lav? Si i stret. Olgeta ya oli givim bes blong olgeta blong folem ol gudfala fasin blong Jisas Kraes, “nambawan man blong lukaot long ol sipsip blong hem.”—Hibrus 13:20, 21.
13. ?Ol elda mo evri Kristin oli gat kaon long hu mo oli gat kaon from wanem?
13 Namba tri risen from wanem yumi glad blong wokgud wetem ol elda, hemia se bambae “oli mas talemaot long God se oli holem wok ya olsem wanem.” Ol elda oli rimemba se oli man blong lukaot long ol sipsip blong Jeova God mo Jisas Kraes, we tufala i stap long heven. (Esikel 34:22-24) Ol sipsip oli blong Jeova, hem i “pemaot ol man ya finis long blad blong Pikinini blong hem.” Mo olgeta elda we hem i putumap olgeta bambae oli gat kaon long hem sipos oli no mekem i gud long ol sipsip blong Hem. Oli no mas “ronem” ol sipsip ya. (Ol Wok 20:28, 29) From samting ya, yumi evriwan bambae yumi gat kaon tu long Jeova folem wanem fasin we yumi mekem taem ol elda ya oli traem lidim yumi. (Rom 14:10-12) Fasin blong yumi blong obei long ol elda ya i pruvum se yumi stap aninit long Kraes, we hem i Hed blong kongregesen.—Kolosi 2:19.
14. ?Wanem maet i mekem we ol Kristin elda oli “harem se oli taed” long wok blong olgeta, mo wanem i save kamaot from?
14 Pol i talem namba fo risen from wanem yumi mas gat tingting daon blong stap aninit long ol Kristin elda. Hem i raetem se: “I gud yufala i mekem we ol man ya oli [save talemaot long God se] oli glad blong mekem wok ya, i nogud oli harem se oli taed long wok ya, from we samting ya i save spolem yufala.” (Hibrus 13:17, NW ) Ol Kristin elda oli gat bigfala wok blong tijim ol man, givim advaes long olgeta, lidim wok blong prij, lukaot long prapa famle blong olgeta, mo stretem ol problem insaed long kongregesen. Hemia i olsem ol hevi wok we oli holem finis. (2 Korin 11:28, 29) Sipos nao yumi no glad blong wokgud wetem olgeta, yumi stap mekem wok blong olgeta i hevi moa. Samting ya i save mekem we tingting blong olgeta i hevi nao oli harem se oli taed from. Sipos tingting blong yumi i no rere blong wantem wok wetem olgeta, Jeova i no save glad long yumi, mo fasin ya i save spolem yumi. Defren olgeta, sipos yumi soem respek we i stret mo yumi wokgud wetem ol elda, olgeta ya bambae oli glad blong mekem ol wok blong olgeta. Mo tu, samting ya i leftemap fasin joengud mo i mekem yumi glad blong joen long wok blong talemaot Kingdom.—Rom 15:5, 6.
Yumi Soemaot Se Yumi Stap Aninit Long Olgeta
15. ?Olsem wanem yumi save soemaot se yumi obei mo yumi letem ol elda oli lidim yumi?
15 I gat plante rod blong wokgud wetem ol elda. Taem ol teritori blong yumi oli jenis, maet ol elda oli mekem plan blong holem sam miting blong prij long ol dei mo taem we i mekem se maet yumi mas jenisim ol plan blong yumi. ?Olsem wanem? ?Yumi glad long ol jenis ya? I gud yumi traem bes blong yumi blong sapotem ol niufala plan olsem. Maet samting ya i save karem sam blesing we yumi no bin tingbaot. ?Elda we i lukaot long wok blong prij bambae i kam visitim Buk Stadi blong yumi? I gud yumi traem bes blong yumi blong joen long wok blong prij long wik ya we hem i visitim grup blong yumi. ?Yumi kasem wan pepa blong mekem tok long Tiokratik Skul? I gud yumi traehad blong stap mo givim tok blong yumi. ?Brata we i lukaot long Buk Stadi blong yumi i talemaot se grup blong yumi nao i mas klinim Haos Kingdom? I gud yumi sapotem hem long saed ya, olsem we bodi mo paoa blong yumi i naf blong mekem. Long ol rod ya, mo plante narafala rod bakegen, yumi save soem se yumi letem ol man we Jeova mo Jisas tufala i putumap blong lukaot long ol sipsip, oli lidim yumi.
16. ?Sipos wan elda i no folem wanem we slef no Hed Kampani i talem, from wanem i no stret blong yumi mekem stronghed?
16 Samtaem, maet wan elda i no mekem ol samting folem wanem we slef we i stret mo waes mo Hed Kampani i talem. Sipos hem i gohed olsem, bambae hem i gat kaon long Jeova we i “man blong lukaot long sipsip, we hem i prapa man blong lukaot long laef blong [yumi].” (1 Pita 2:25) Be nating se sam elda oli mekem i rong no oli mestem, hemia i no min se yumi mas mekem stronghed mo no moa folem oda we i stap. Jeova i no blesem fasin blong no obei mo fasin rebel.—Namba 12:1, 2, 9-11.
Jeova i Blesem Man We i Glad Blong Wok
17. ?Wanem tingting mo fasin we yumi mas gat long saed blong ol elda?
17 Jeova God i save se ol man ya we hem i putumap oli no stretgud olgeta. Nating se i olsem, hem i stap yusum olgeta, mo tru long spirit blong hem, hem i lidim ol sipsip blong hem long wol ya. Long saed blong ol elda—mo long saed blong yumi evriwan—yumi save se “paoa ya we i bigwan tumas i blong God, i no blong [yumi].” (2 Korin 4:7) Taswe yumi mas tangkiu long Jeova from olgeta samting we hem i stap mekem tru long ol elda we oli strong long bilif, mo yumi mas glad blong wokgud wetem olgeta.
18. ?Taem yumi letem ol elda oli lidim yumi, i olsem we yumi stap mekem wanem?
18 Ol elda oli traem bes blong olgeta blong karem fasin olsem we Jeova i talem se ol man oli mas gat taem oli lukaot long ol sipsip blong hem long taem blong ol las dei. Hemia i stap long Jeremaea 3:1: “Bambae mi givim ol gudfala lida [“man blong lukaot sipsip,” NW ] long yufala, we oli save obei long mi. Bambae mi mekem olgeta oli waes gud, mo oli gat save blong lidim yufala.” I sua se ol elda long ples blong yumi oli mekem wan nambawan wok blong tijim mo protektem ol sipsip blong Jeova. I gud yumi gohed oltaem blong soem se yumi tangkiu long hadwok blong olgeta taem yumi rere blong wok wetem olgeta, yumi obei, mo yumi letem we oli lidim yumi. Taem yumi mekem olsem, yumi soemaot se yumi tangkiu long tufala Man blong Lukaot Sipsip, we tufala i stap long heven, hemia Jeova God mo Jisas Kraes.
Rod Blong Tingtingbak
• ?Olsem wanem Jeova mo Jisas Kraes tufala i pruvum se tufala i lukaot long ol sipsip wetem lav?
• ?I gud blong obei long ol elda, be from wanem i nidim tu we yumi gat fasin ya we yumi rere blong letem olgeta oli lidim yumi?
• ?Wanem sam gudfala rod blong soemaot se yumi letem ol elda oli lidim yumi?
[Kwestin]
[Tok blong pija long pej 27]
Ol Kristin elda oli letem Kraes i lidim olgeta
[Tok blong pija long pej 29]
I gat plante rod blong soemaot se yumi letem ol elda we Jeova i jusum oli lidim yumi