Ol Enjel—?Oli Gat Wanem Paoa Long Laef Blong Yumi?

“Biaen long samting ya mi luk wan narafala enjel i aot long heven i kamdaon. Hem i gat bigfala paoa, . . . hem i singaot bigwan, i talem se, ‘[“Bigfala Babilon,” NW ], hem i foldaon finis, we i foldaon olgeta.’ ”—REVELESEN 18:1, 2.

1, 2. ?Wanem i soemaot se Jeova i stap yusum ol enjel blong mekem wok blong hem?

 TAEM olfala aposol Jon i stap kalabus long aelan blong Patmos, hem i luk sam vison long saed blong fiuja. ‘Tabu spirit i kam long hem,’ nao hem i luk ol nambawan samting we bambae oli kamaot long ‘dei blong Masta.’ Dei ya i stat long 1914 taem Jisas Kraes i kam king, mo i gohed kasem en blong Wan Taosen Yia Rul blong hem.—Revelesen 1:10.

² Jeova God i no toktok stret long Jon blong talemaot ol samting ya long hem. Hem i yusum wan narafala rod. Revelesen 1:1 i talem se: “Long buk ya, mi Jon mi raetem ol samting we Jisas Kraes i soemaot long mi. Hemia ol samting we God i givim long hem, blong hem i soemaot long ol man blong hem. Ol samting ya, bambae i no longtaem, oli kamtru. Mo Jisas i sanem enjel blong hem i kam, blong i soemaot ol samting ya long mi, we mi mi man blong wok blong hem.” Jeova i yusum Jisas blong sanem wan enjel i kam blong talemaot long Jon ol nambawan samting we bambae oli kamaot long ‘dei blong Masta.’ Long wan vison, Jon i luk ‘wan narafala enjel we i gat bigfala paoa i aot long heven i kamdaon.’ ?Wanem wok blong enjel ya? “Hem i singaot bigwan, i talem se, ‘[“Bigfala Babilon,” NW ], hem i foldaon finis, we i foldaon olgeta.’ ” (Revelesen 18:1, 2) Enjel ya we i gat bigfala paoa i kasem blesing ya blong talemaot se Bigfala Babilon, hemia olgeta giaman skul blong wol, i foldaon. Taswe, yumi luksave klia se Jeova i stap yusum ol enjel blong mekem ol impoten wok blong hem. Bambae yumi tokbaot wok we ol enjel oli mekem folem plan blong God, mo wanem paoa oli gat long laef blong yumi. Be fastaem, bambae yumi tokbaot olsem wanem ol enjel oli stat.

?Olsem Wanem Ol Enjel Oli Stat?

3. ?Wanem rong tingting we plante man oli gat long saed blong ol enjel?

³ Plante milian man tede oli bilif long ol enjel. Be plante long olgeta oli gat rong tingting long saed blong ol enjel mo olsem wanem oli bin stat. Samfala we oli gat wan skul blong olgeta, oli ting se taem wan famle no fren blong olgeta i ded, God i stap singaot hem blong i kam wan enjel long heven. ?Olsem wanem? ?Hemia i laenap wetem ol tok blong Baebol long saed blong stat blong ol enjel, laef blong olgeta, mo wok we oli mas mekem?

4. ?Baebol i talem wanem long saed blong stat blong ol enjel?

⁴ Enjel we i gat bigfala paoa bitim ol narawan, hemia Mikael, jif blong ol enjel. (Jud 9) Mikael i Jisas Kraes nomo. (1 Tesalonaeka 4:16, NW ) Longtaem bifo, Jeova i mekem plan blong wokem ol samting, mo faswan samting we hem i wokem, hemia wan enjel we i Pikinini blong hem. (Revelesen 3:14, NW) Biaen, Jeova i yusum faswan Pikinini ya blong hem blong wokem ol narafala enjel. (Kolosi 1:15-17, NW ) Jeova i tokbaot ol enjel olsem ol pikinini blong hem. Hem i askem long Job long taem bifo se: “?Taem we mi mi mekem wol ya, yu yu stap wea? Sipos yu save, yu talem long mi. Long moning blong dei ya we mi mi stanemap ol pos we oli holem wol ya, mo mi putum fandesen blong hem, ol sta oli harem gud tumas, oli stap singsing wanples, mo ol [“pikinini blong mi,” NW ] long heven oli glad tumas, oli stap singsingaot, be mi no luk yu long taem ya.” (Job 38:4, 6, 7) I klia se God nao i wokem ol enjel, longtaem bifo we hem i wokem ol man.

5. ?Wanem trifala grup blong ol enjel?

 ⁵ Fas Korin 14:33 i talem se: “God i no stamba blong fasin ya we olgeta samting oli paspas, hem i stamba blong pis.” Taswe, i gat oda long medel blong ol enjel tu. God i mekem tri grup blong olgeta: (1) ol seraf we oli mekem wok blong God raon long jea blong hem, oli talemaot tabu fasin blong hem, mo oli meksua se kampani blong ol man blong God i stap klin, (2) ol jerubim we oli leftemap haenem mo rul blong Jeova, (3) ol narafala enjel we oli mekem wok blong hem. (Ol Sam 103:20; Aesea 6:1-3; Esikel 10:3-5; Daniel 7:10) ?Ol enjel ya oli gat wanem paoa long laef blong ol man?—Revelesen 5:11.

?Ol Enjel Oli Mekem Wanem Wok?

6. ?Olsem wanem Jeova i yusum ol jerubim long garen blong Iden?

⁶ Faswan vas long Baebol we i tokbaot ol enjel, hemia Jenesis 3:24 we i talem se: “[Jeova] i putum ol jerubim oli stap gad long gudfala ples ya long Iden, long saed i go long is. Mo hem i putum wan longfala naef blong faet i stap long ples ya tu, blong i gad long hem. Naef ya, faea i stap laet long hem, mo hem nomo i stap saksakem hem i go olbaot. Hae God i mekem olsem blong blokem rod, blong ol man bambae oli no save go klosap long tri ya we frut blong hem i save givim laef.” Ol jerubim ya oli blokem rod blong Adam mo Iv, blong tufala i no save gobak insaed long garen we i hom blong tufala fastaem. Samting ya i hapen longlongtaem bifo, long stat blong histri blong man. ?Be olsem wanem long ol yia afta long samting ya? ?Ol enjel oli mekem wanem wok?

7. ?Mining blong tok ya “enjel” long lanwis blong bifo i soemaot wanem wok blong ol enjel?

⁷ Klosap 400 taem Baebol i yusum tok ya “enjel.” Hibru tok mo Grik tok blong talem “enjel,” tugeta i minim “man blong karem mesej.” Taswe, ol enjel oli bin mekem wok ya blong talemaot tok blong God long ol man. Olsem haf 1 mo 2 blong stadi ya i talem, Jeova i yusum wan enjel blong talemaot tok blong hem i go long aposol Jon.

8, 9. (a) ?From wanem enjel i go luk Manoa mo woman blong hem? (b) ?Ol papa mama oli lanem wanem long stori blong Manoa mo enjel blong God?

⁸ Jeova i yusum ol enjel blong leftemap tingting mo givhan long ol man blong hem long wol. Long taem blong ol jaj long Isrel, Manoa mo woman blong hem tufala i wantem tumas blong gat wan pikinini. Ale, Jeova i sanem wan enjel blong talem long woman blong Manoa se hem bambae i karem wan pikinini boe. Baebol i talem se: “Bambae yu yu gat bel, mo bambae yu bonem wan pikinini boe blong yu. . . . Mo taem pikinini ya blong yu i bon, bambae yu no mas katem hea blong hem, from we i stat long taem ya, bambae hem i wan Nasiraet. Bambae hem i tabu, i man blong God. Hem nao bambae i statem wok ya blong tekemaot yufala long han blong ol man Filistia, blong sevem yufala.”—Jajes 13:1-5.

⁹ Woman blong Manoa i bonem pikinini ya Samson, mo Baebol i tokbaot bigfala wok we Samson i mekem biaen. (Jajes 13:24) Bifo we pikinini ya i bon, Manoa i askem long enjel blong i kam luk tufala bakegen, blong tijim tufala olsem wanem blong lukaotgud long boe ya. Manoa i askem se: “?Boe ya bambae i mas mekem wanem samting? ?Laef blong hem bambae i mas olsem wanem?” Nao enjel blong Jeova i talem bakegen ol tok we hem i bin talem long woman blong Manoa. (Jajes 13:6-14) !Yumi save se Manoa i mas harem gud long tok blong enjel ya! I tru, tede ol enjel oli no kamtru long wanwan man long fasin ya. Be ol papa mama oli save mekem olsem Manoa, oli save lukaot tingting blong Jeova taem oli stap tijim pikinini blong olgeta.—Efesas 6:4.

10, 11. (a) ?Wanem tingting blong Elisa mo man blong wok blong hem long saed blong ol soldia blong Siria we oli raonem tufala? (b) ?From wanem i gud we yumi tingting dip long stori ya?

¹⁰ Wan samting we i hapen long taem blong profet Elisa i soemaot klia olsem wanem ol enjel oli givhan long ol man blong Jeova. Elisa i stap long wan taon long Isrel, nem blong hem Dotan. Wan dei, man blong wok blong Elisa i girap long eli moning, i lukluk i go afsaed, nao i luk we ol hos mo ol kat blong faet oli fulap raon long taon ya. Hemia ol soldia blong Siria we king i sanem olgeta blong holem Elisa. ?Man blong wok blong Elisa i mekem wanem? Hem i fraet, i singaot bigwan se: “!Naoia yumi lus finis! ?Bambae yumi mekem olsem wanem?” Long tingting blong hem, i no gat rod blong kamaot long trabol ya. Be Elisa i ansa se: “Yu no fraet. Olgeta long saed  blong yumi oli plante moa, i winim olgeta ya.” ?Tok ya i minim wanem?—2 King 6:11-16.

¹¹ Elisa i save se ol enjel oli stap blong givhan long hem. Be man blong wok blong hem i no save luk olgeta. Taswe Elisa i prea long Jeova se: “Plis yu openem ae blong man ya, blong hem i luk paoa blong yu.” Wantaem nomo, Jeova i “openem ae blong man ya, mo hem i luk we hil ya we taon i stap long hem i fulap gud long faea we i olsem ol hos wetem ol kat blong faet we oli stap hivap raon long profet ya.” (2 King 6:17) Yes, man ya i luk ol enjel ya. Sipos yumi gat fasin luksave, yumi tu yumi save se ol enjel oli stap, mo oli stap wok blong Jeova mo Kraes blong givhan mo lukaotgud long ol man blong tufala.

Ol Enjel Oli Givhan Long Taem Blong Kraes

12. ?Enjel Gabriel i givhan olsem wanem long Meri?

¹² Tingbaot olsem wanem ol enjel oli givhan long gel Jiu ya Meri, taem hem i kasem nius ya se: “Bambae yu yu gat bel, mo bambae yu save bonem wan pikinini boe blong yu, mo bambae yu putum nem blong hem, se Jisas.” Jes bifo we enjel Gabriel i talemaot mesej ya blong God we i mekem Meri i sek, hem i talem se: “Meri, yu no fraet. God i mekem i gud tumas long yu.” (Luk 1:26, 27, 30, 31) !Ating Meri i kasem paoa from ol tok ya mo i harem gud tumas blong save se God i glad long hem!

13. ?Olsem wanem ol enjel oli bin givhan long Jisas?

¹³ Wan narafala taem we ol enjel oli givhan, hemia afta we Setan i traem Jisas tri taem long draeples. Baebol i talem se: “Setan i gowe long Jisas, mo ol enjel oli kam, oli stap lukaot long hem.” (Matiu 4:1-11) Klosap sem samting i hapen long naet bifo we Jisas i ded. Jisas i harem nogud, ale, hem i nildaon i prea se: “Papa, sipos i stret long tingting blong yu, plis yu tekemaot ol samting ya we i stap mekem mi mi harem nogud. Be yu no mekem olsem we mi mi wantem, yu mekem olsem we yu nomo yu wantem. Nao wan enjel i aot long heven i kam, nao i kamtru long Jisas, i mekem hem i strong bakegen.” (Luk 22:42, 43) ?Be tede, ol enjel oli givhan long yumi olsem wanem?

Ol Enjel Oli Givhan Long Yumi Tede

14. ?Ol Witnes blong Jeova long taem blong yumi oli stanap strong tru long wanem trabol? ?Wanem i kamaot from?

¹⁴ Taem yumi tingbaot wok blong prij we ol Witnes blong Jeova oli mekem tede, yumi luk se ol enjel oli rili givhan long olgeta. Bifo Wol Wo Tu mo long taem we faet ya i stap gohed (1939-1945), ol man blong Jeova long Jemani mo Wes Yurop oli stanap strong tru long ol bigfala trabol we ol Nasi oli mekem long olgeta. Ol Witnes long Itali, Spen, mo Potugal, oli mas stanap strong longtaem moa tru long hadtaem we ol Katolik Fasis rula oli mekem long olgeta. Mo long ples we  bifo oli kolem Soviet Yunion mo long ol kantri we oli kam aninit long rul blong gavman ya, ol Witnes oli stanap strong plante yia tru long trabol we gavman ya i mekem long olgeta. Mo yumi no fogetem bigfala hadtaem we ol Witnes oli bin kasem long sam kantri blong Afrika. * Long ol yia we oli jes pas, ol man blong Jeova oli kasem bigfala trabol long kantri blong Jojia. Yes, Setan i stap mekem evri samting we hem i naf blong mekem, blong traem finisim wok blong ol Witnes blong Jeova. Be kampani blong ol Witnes i winim ol trabol ya mo i stap kam bigwan moa. Wan risen blong samting ya, hemia from we ol enjel oli lukaotgud long olgeta. —Ol Sam 34:7; Daniel 3:28; 6:22.

15, 16. ?Olsem wanem ol enjel oli givhan long ol Witnes blong Jeova long wok blong prij long olgeta ples blong wol?

¹⁵ Ol Witnes blong Jeova oli tinghevi long wok blong talemaot gud nius blong Kingdom blong God long olgeta ples blong wol, mo blong tijim ol man long evri ples long saed blong Baebol blong oli save kam disaepol blong Kraes. (Matiu 28:19, 20) Be oli savegud se blong mekem wok ya oli nidim ol enjel blong givhan long olgeta. Taswe, tok blong Revelesen 14:6, 7 i stap leftemap tingting blong olgeta oltaem. Tufala vas ya i talem se: “[Mi aposol Jon] mi luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis. Hem i stap singaot bigwan, i talem se, ‘Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwota mo springwota, mo yufala i mas bodaon long fes blong hem blong mekem wosip long hem.’ ”

¹⁶ Ol tok ya oli soemaot klia se ol enjel oli stap givhan mo lidim bigfala wok blong prij we ol Witnes blong Jeova oli mekem long fulwol. Jeova i stap yusum ol enjel blong lidim ol man we oli rili wantem save trutok oli go long ol Witnes. Mo ol enjel oli lidim ol Witnes tu, oli go long olgeta we hat blong olgeta i stret. Hemia nao from wanem plante taem wan Witnes blong Jeova i mitim wan man long stret taem we man ya i nidim tok blong God blong givhan long hem long wan bigfala trabol. Samting ya i hapen plante taem tumas, taswe i mas ol enjel we oli mekem samting ya, i no save kamaot olsem nomo.

Klosap Nao Ol Enjel Oli Mekem Wan Bigfala Wok

17. ?Wan enjel nomo i mekem wanem long ol soldia blong Asiria?

¹⁷ Yes, ol enjel oli karem tok blong God i go long man mo oli mekem ol man blong Jeova oli strong. Be oli gat wan narafala wok tu. Long taem bifo, oli mekem ol jajmen blong God oli kamtru long ol man. Long ol yia 700 B.K.T., fulap soldia blong Asiria oli kam blong spolem Jerusalem. ?Jeova i mekem wanem? Hem i se: “[King ya] bambae i no save kam insaed long taon ya nating. Nem blong mi i stap long taon ya, mo mi mi bin mekem promes long King Deved, man blong wok blong mi bifo.” Baebol i gohed blong talem wanem i hapen, i se: “Long naet ya, wan enjel blong Hae God i kam long ples ya we ol soldia blong Asiria oli stap long hem, i kilim wan handred eite faef taosen soldia oli ded. Nao long moning, King Senakerib wetem ol narafala soldia blong hem oli luk we olgeta ya oli ded finis.” (2 King 19:34, 35) !Tru ya, wan enjel nomo i gat moa paoa i bitim olgeta ami blong man!

18, 19. ?Wanem bigfala wok we ol enjel bambae oli mekem i no longtaem? ?Wok ya bambae i mekem wanem long ol man?

¹⁸ Klosap nao, ol enjel bambae oli kilim i ded ol man we God i jajem olgeta. I no longtaem nating, bambae Jisas i kamtru “wetem ol strong enjel blong hem, mo faea we i laet.” Bambae oli “givim panis long olgeta we oli no save . . . God, mo long olgeta we oli no save obei long gud nius blong Jisas, Masta blong yumi.” (2 Tesalonaeka 1:7, 8) !Wok ya bambae i joen wetem laef blong evri man! Olgeta we oli no wantem obei long gud  nius blong Kingdom blong God we i stap goaot naoia long olgeta ples blong wol, bambae ol enjel oli kilim olgeta i ded. Olgeta we oli lukaot Jeova, lukaot stret fasin mo tingting daon, olgeta ya nomo we Jeova ‘i no save givim panis long olgeta taem dei blong kros blong hem i kamtru.’ Olgeta bambae oli stap sef.—Sefanaea 2:3.

¹⁹ Yumi glad tumas se Jeova i stap yusum ol strong enjel blong hem blong givhan long ol man blong hem long wol ya mo blong mekem olgeta oli strong. Save blong yumi long saed blong wok blong God we ol enjel oli mekem, i rili mekem yumi harem gud. Be i gat sam enjel we oli mekem stronghed agensem Jeova mo oli folem Setan olsem lida blong olgeta. Nekis stadi bambae i tokbaot samting we ol trufala Kristin oli save mekem blong blokem Setan mo ol rabis enjel blong hem.

[Futnot]

?Yu Yu Lanem Wanem?

• ?Ol enjel oli stat olsem wanem?

• ?Long taem bifo, Jeova i yusum ol enjel blong mekem wanem?

• ?Revelesen 14:6, 7 i tokbaot wanem wok blong ol enjel tede?

• ?Wanem bigfala wok we klosap nao ol enjel bambae oli mekem?

[Kwestin]

[Tok blong pija long pej 9]

“Olgeta long saed blong yumi oli plante moa, i winim olgeta ya”