Ol Rabis Enjel—?Olsem Wanem Yumi Save Blokem Olgeta?

“Tingbaot ol enjel ya we oli no glad blong holem hae nem we God i givim long olgeta, nao oli livim prapa ples blong olgeta, oli gowe long hem. God i fasem olgeta long jen we i no save brok samtaem, mo i lokem olgeta long ples blong tudak. Nao oli stap wet long bigfala Dei ya we God bambae i jajem olgeta long hem.”—JUD 6.

1, 2. ?Wanem ol kwestin we oli stanap long saed blong Setan mo ol rabis enjel?

 APOSOL Pita i givim woning se: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.” (1 Pita 5:8) Long saed blong ol rabis enjel, aposol Pol i talem se: “Mi no wantem nating we bambae yufala i kam wan wetem ol devel. Yufala i no save dring long kap blong [“Jeova,” NW ], mo bakegen long kap blong ol devel. Mo yufala i no save sidaon blong kakae long tebol blong [Jeova], mo bakegen long tebol blong ol devel.”—1 Korin 10:20, 21.

² ?Hu ya Setan mo ol rabis enjel? ?Olsem wanem oli stat, mo wetaem? ?God i wokem olgeta no nogat? ?Oli gat bigfala paoa olsem wanem antap long ol man? ?I gat wan rod blong blokem olgeta? ?Sipos yes, wanem rod ya?

?Setan Mo Ol Rabis Enjel Oli Stat Olsem Wanem?

3. ?Olsem wanem wan enjel blong God i kam Devel Setan?

³ Afta we God i wokem faswan man mo woman mo putum tufala long garen blong Iden, wan enjel blong God i mekem stronghed. ?From wanem? From we hem i no glad long wok we Jeova i givim long hem long heven. Taem God i wokem Adam mo Iv, enjel ya i luk se hem i gat janis blong pulumaot tufala long trufala God, blong tufala i obei mo mekem wosip long hem. Taem enjel ya i agensem God mo i pulum faswan man mo  woman blong mekem sin, hem i kam Devel Setan. Biaen, sam narafala enjel oli joen wetem hem blong agensem God. ?Oli mekem wanem?—Jenesis 3:1-6; Rom 5:12; Revelesen 12:9.

4. ?Sam stronghed enjel oli mekem wanem bifo we Bigfala Wota i kavremap wol long taem blong Noa?

⁴ Baebol i talem se bifo we Bigfala Wota i kavremap wol long taem blong Noa, sam enjel oli stat blong lukluk ol woman long wol ya. Ol enjel ya oli gat nogud tingting. Baebol i talem se: “Ol enjel blong God oli luk we [ol woman] oli gudfala tumas, nao oli stap tekem olgeta olsem we oli wantem.” Ol mared ya oli no stret, ale ol pikinini blong olgeta oli haf enjel haf man, we nem blong olgeta Nefilim. (Jenesis 6:2-4) Taswe, ol enjel ya we oli no moa obei long God oli joen wetem Setan blong agensem Jeova.

5. ?Wanem i hapen long ol stronghed enjel taem Jeova i spolem ol rabis man long Bigfala Wota?

⁵ Taem Jeova i mekem Bigfala Wota i kavremap wol, ol Nefilim mo ol mama blong olgeta oli lus. Ol enjel we oli bin girap agensem Jeova oli lego bodi blong olgeta long wol ya mo oli gobak long ples blong ol spirit man antap. Be oli no save tekembak “hae nem we God i givim long olgeta” fastaem. Long defren fasin, God i mekem olgeta oli stap long “tudak [long saed blong ol plan blong Hem],” nem blong samting ya Tataros.—Jud 6; 2 Pita 2:4, NW.

6. ?Olsem wanem ol rabis enjel oli trikim ol man?

⁶ Stat long taem ya we ol rabis enjel oli lusum “hae nem we God i givim long olgeta” kam kasem tede, oli kampani wetem rabis enjel ya Setan mo oli mekem wok blong hem. Stat long taem ya tu, oli no moa gat paoa blong jenisim bodi blong olgeta i kam olsem bodi blong man. Nating se i olsem, oli naf blong pulum ol man mo woman yet blong oli mekem olkaen rabis fasin long saed blong seks we oli agensem stret rod we God i stanemap. Mo tu, ol rabis enjel oli wok strong blong trikim ol man blong oli wok wetem olgeta long plante defren rod, olsem majik, posen, mo wok blong kleva. (Dutronome 18:10-13; 2 Kronikel 33:6) Be ol rabis enjel bambae oli kasem sem panis olsem Setan—ded blong olwe. (Matiu 25:41; Revelesen 20:10) Go kasem taem ya, yumi mas stap strong blong blokem olgeta. Yumi waes sipos yumi tektaem blong tingbaot bigfala paoa we Setan i gat, mo olsem wanem yumi save blokem hem mo ol rabis enjel blong hem.

?Paoa Blong Setan i Bigwan Olsem Wanem?

7. ?Setan i gat paoa olsem wanem antap long wol ya?

⁷ Long olgeta yia we oli pas, Setan i talem ol giaman toktok blong spolem nem blong Jeova. (Ol Proveb 27:11) Mo hem i pulum bighaf blong ol man long wol blong oli joen wetem hem. Fas Jon 5:19 (NW) i talem se: “Ful wol i stap aninit long paoa blong hemia we i rabis nomo.” Taswe, taem Setan i traem Jisas, hem i talem long Jisas se bambae hem i putum “olgeta kantri long wol ya” long han blong hem, wetem ol gudgudfala samting  blong olgeta. (Luk 4:5-7) Aposol Pol i tokbaot Setan i se: “Maet gud nius ya we mifala i stap talemaot, i olsem samting we i haed, be i stap haed long olgeta ya nomo we oli stap lus. Oli no save bilif, from we Setan we i rabis god blong wol ya hem i satem tingting blong olgeta finis, nao oli stap long tudak. Hem i stap blokem olgeta, blong oli no luk laet ya we i stap saenaot i go long olgeta. Laet ya i kamaot long gud nius blong Jisas Kraes, we hem i . . . stret pija blong God.” (2 Korin 4:3, 4) Setan i “man blong giaman, we i stamba blong ol giaman toktok.” Be hem i stap mekem ol man oli luk hem olsem “wan enjel blong laet.” (Jon 8:44; 2 Korin 11:14) Hem i gat paoa mo i save rod blong satem tingting blong ol lida blong wol mo ol man we oli stap aninit long paoa blong olgeta. Hem i yusum ol giaman waes blong wol ya wetem ol kastom stori mo tok blong ol giaman skul, blong trikim ol man.

8. ?Baebol i soemaot wanem long saed blong paoa blong Setan?

⁸ Long taem blong profet Daniel, faef handred yia bifo long taem blong Jisas, Setan i soemaot paoa we hem i gat blong spolem ol man, i klia nomo. Jeova i sanem wan enjel blong hem i go long Daniel blong leftemap tingting blong hem. Be wan ‘rabis enjel we i stap lukaot long ol man Pesia’ i blokem rod. Afta 21 dei, “Mikael we hem i wan long olgeta [enjel] we oli hae moa long ol narafala enjel” i kam givhan long enjel blong Jeova. Ol semfala vas blong Baebol oli tokbaot wan narafala ‘[rabis] enjel bakegen we i stap lukaot long ol man Gris.’ (Daniel 10:12, 13, 20) Mo tu, Revelesen 13:1, 2 i kolem Setan se “bigfala algita” we i givim “paoa blong hem long anamol ya [we i minim ol politik paoa blong wol], i mekem hem i sidaon long bigfala jea blong hem, mo i givim paoa long hem blong i wokem plante samting.”

9. ?Ol Kristin oli stap faet agens long hu?

⁹ Yumi kasem save from wanem aposol Pol i raetem se: “Olgeta ya we yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya.” (Efesas 6:12) Tede tu, ol rabis enjel we oli stap wok blong Setan mo we yumi no save luk olgeta, oli stap pulum ol lida blong wol wetem ol man we oli stap aninit long olgeta, blong oli mekem ol fasin we oli rabis bitim mak, olsem, kilimaot wan ful laen blong man, mekem wok blong teroris, mo kilim plante narafala man i ded. Naoia bambae yumi luk olsem wanem yumi save blokem ol rabis enjel ya.

?Olsem Wanem Yumi Save Blokem Olgeta?

10, 11. ?Olsem wanem yumi save blokem Setan mo ol rabis enjel blong hem?

¹⁰ Yumi no naf blong blokem Setan mo ol rabis enjel blong hem long prapa paoa blong yumi, nating se yumi strong olsem wanem long bodi mo tingting blong yumi. Pol i givim advaes ya se: “Yufala i mas joen long Masta blong yumi, blong kasem paoa. Hem i gat olgeta paoa, mo yufala i mas kam strong long paoa blong hem.” Yes, yumi mas lukluk i go long God nomo blong i protektem yumi. Pol i gohed se: “Yufala i mas kasem paoa blong God, we i olsem olgeta [“klos,” NW ] blong faet we i blong blokem ara. Nao taem Setan i stap wokem ol giaman trik blong hem, be bambae yufala i save stanap strong . . . yufala i mas kasem paoa blong God we i olsem olgeta [klos] blong faet. Nao taem dei blong faet long Setan i kam, be bambae yufala i save stanap strong. Long fasin ya, bambae yufala i save faet long ol enemi gogo kasem en blong hem, nao biaen, bambae yufala i save stanap strong yet.”—Efesas 6:10, 11, 13.

¹¹ Tu taem Pol i talem long ol Kristin se oli mas putum ‘olgeta klos blong faet’ we God i givim. Tok ya “olgeta” i soemaot se yumi mas traehad fulwan sipos yumi wantem blokem ol rabis enjel. ?Taswe, wanem ol wanwan klos blong faet we God i givim, we ol Kristin tede oli nidim tumas blong oli save blokem ol rabis enjel?

“Stanap Strong”—?Olsem Wanem?

12. ?Olsem wanem ol Kristin oli save taetem strap blong trutok long bel blong olgeta?

¹² Pol i eksplenem se: “Yufala i mas stanap rere blong faet. Oltaem yufala i mas talem trutok. Fasin ya i olsem strap we yufala i taetem finis long  bel blong yufala. Mo yufala i mas holem stret fasin. Hemia i olsem klos blong faet we oli wokem long aean, blong ara i no save kasem yufala.” (Efesas 6:14) Tufala haf blong klos blong faet we vas ya i tokbaot, hemia strap we oli taetem long bel, mo aean klos blong blokem jes. Strap blong wan soldia i mas taet oltaem blong protektem ol hip blong hem, bel blong hem, ol leg blong hem antap, mo blong holemtaet naef blong faet blong hem. Long sem fasin, yumi mas folem trutok blong Baebol oltaem long laef blong yumi, olsem we yumi fasem trutok ya long bodi blong yumi. ?Olsem wanem? ?Yu yu gat wan program blong ridim Baebol evri dei? ?Evriwan long famle oli joen blong ridim Baebol tugeta? ?Yufala i folem wan plan long famle blong ridim vas blong dei evri dei? ?Antap long hemia, yu yu stap stadi gud long ol buk blong ‘slef we i stret mo waes’ we oli eksplenem Baebol? (Matiu 24:45, NW ) Sipos yes, ale yu yu stap traehad blong folem advaes blong Pol. I gat ol vidio kaset mo DVD tu we yumi save lukluk blong kasem advaes blong Baebol. Sipos yumi holemtaet trutok, samting ya i save givhan long yumi blong mekem ol waes desisen, mo i save blokem yumi blong yumi no folem wan rod we i nogud.

13. ?Olsem wanem yumi save protektem hat blong yumi?

¹³ Aean klos blong soldia i blokem jes, hat, mo ol narafala impoten haf insaed long bodi blong hem. Wan Kristin i save protektem hat blong hem we i minim ol tingting mo filing blong hem we oli haed, sipos hem i lanem blong lavem ol samting we Jeova i talem se i stret mo folemgud ol stret rul blong Hem. Ol aean klos ya we God i givim, oli save protektem yumi blong yumi no daonem Tok blong God olsem samting we i no impoten tumas. Taem yumi lanem blong ‘tanem baksaed long fasin we i no stret, mo blong glad long fasin we i stret,’ ale, yumi “no save folem ol fasin nogud.”—Amos 5:15; Ol Sam 119:101.

14. ?I minim wanem blong putum ‘but blong wokbaot blong talemaot gud nius blong pis’?

¹⁴ Ol soldia blong Rom bifo, oli werem ol gudfala but blong oli save wokbaot plante handred kilometa long ol kantri we Rom i rul long olgeta. ?‘But blong wokbaot blong talemaot gud nius blong pis,’ i minim wanem long saed blong ol Kristin? (Efesas 6:15) Hemia i min se yumi rere oltaem blong wok. Yumi rere blong talemaot gud nius blong Kingdom blong God long evri janis we yumi gat. (Rom 10:13-15) Taem yumi bisi long Kristin wok ya, samting ya i protektem yumi long “ol giaman trik” blong Setan.—Efesas 6:11.

15. (a) ?Wanem i soemaot se bigfala sil blong bilif i impoten tumas? (b) ?Wanem ‘ol ara we faet i laet long hem’ we oli save spolem bilif blong yumi?

¹⁵ Pol i gohed se: “[“Bigfala samting se,” NW ] yufala i mas bilif strong long God. Fasin ya i olsem sil, we yufala i save yusum blong blokem ol ara ya blong Setan, we faea i laet long hem.” (Efesas 6:16) Bifo we Pol i givim advaes ya se yumi mas holem strong bilif we i olsem wan bigfala sil, hem i talem tok ya “bigfala samting.” Hemia i soemaot se tul ya blong faet, bilif, i impoten tumas. Bilif blong yumi i no mas hafhaf. Hem i mas olsem wan bigfala sil we i save blokem ‘ol ara blong Setan, we faea i laet long hem.’ ?Wanem ol ara ya tede? Maet hemia ol tok we i stikim yumi olsem ara, ol giaman tok, mo ol rong save, we ol enemi mo ol man blong apostasi * oli talem blong traem spolem bilif blong yumi. “Ol ara ya” oli save minim tu ol samting we i pulum yumi blong ronem mane, mo blong tingting oltaem long samting we yumi wantem pem, mo blong traem blong winim olgeta we oli foldaon finis long fasin ya blong flas from ol rij samting  blong olgeta. Ating oli pem wan haos no trak we i bigwan mo i naes tumas, no maet oli laekem blong soem ol sas nekles mo ston we oli gat, mo ol niufala stael blong klos we oli jes pem. Nating se ol narafala ya oli mekem olsem wanem, be bilif blong yumi i mas strong, blong yumi naf blong blokem ‘ol ara ya we faea i laet long hem.’ ?Olsem wanem yumi save gat bilif, mo mekem bilif ya i stap strong oltaem?—1 Pita 3:3-5; 1 Jon 2:15-17.

16. ?Wanem i save givhan long yumi blong gat strong bilif?

¹⁶ Yumi save kam klosap long God sipos yumi wanwan yumi stadi Baebol mo prea oltaem wetem fulhat blong yumi. Yumi save plis long Jeova blong givhan long yumi blong gat strong bilif, mo biaen, yumi mas wok folem prea blong yumi. Traem tingbaot: ?Yu yu reregud long Wajtaoa Stadi evri wik, wetem tingting ya se bambae yu givim ansa? Bilif blong yumi bambae i strong sipos yumi stadi Baebol mo ol buk we oli eksplenem Baebol.—Hibrus 10:38, 39; 11:6.

17. ?Olsem wanem ‘save ya se God bambae i sevem yumi i olsem hat blong faet’?

¹⁷ Taem Pol i tokbaot laswan haf blong ol klos blong faet we God i givim, hem i givim advaes ya: “Yufala i mas savegud we God [bambae] i sevem yufala . . . Hemia i olsem hat blong faet blong yufala. Mo yufala i mas holem ol tok blong God. Tok ya i olsem naef blong faet we Tabu Spirit i givim finis long yufala.” (Efesas 6:17) Hat blong faet i protektem hed mo bren blong soldia, hemia stamba blong ol desisen blong hem. Long sem fasin, taem Kristin i tingting strong oltaem se God bambae i sevem hem, samting ya i protektem tingting blong hem. (1 Tesalonaeka 5:8) I moagud we yumi tingbaot samting we God bambae i mekem blong sevem yumi, olsem Jisas i bin tingbaot, i bitim we yumi fulumap tingting blong yumi wetem ol samting we yumi wantem kasem long wol ya, mo yumi drim long ol sas samting.—Hibrus 12:2.

18. ?From wanem yumi no mas mestem program blong yumi blong ridim Baebol oltaem?

¹⁸ Laswan samting we i save blokem Setan mo ol rabis enjel blong hem, hemia tok blong God we i stap long Baebol. Taswe yumi mas tinghae long program blong yumi blong ridim Baebol oltaem. Stret save long Tok blong God bambae i protektem yumi long ol giaman tok blong Setan mo ol waes blong ol rabis enjel, wetem ol tok agens we i kamaot long nogud tingting blong ol man blong apostasi.

“Oltaem Nomo Yufala i Mas Prea”

19, 20. (a) ?Klosap nao, wanem bambae i hapen long Setan mo ol rabis enjel blong hem? (b) ?Wanem i save mekem yumi strong long saed blong spirit?

¹⁹ Klosap nao, Setan, ol rabis enjel blong hem, mo ol rabis fasin blong wol ya, bambae oli lus. Setan i save se “i gat smol taem nomo blong hem i stap yet.” Taswe, hem i kros mo i stap faet agensem olgeta “we oli stap obei long ol tok blong God, mo we oli stap holem ol tok we Jisas i talemaot se i tru.” (Revelesen 12:12, 17) I impoten tumas we yumi blokem Setan mo ol rabis enjel blong hem.

²⁰ !Yumi talem tangkiu tumas from advaes ya blong putum olgeta klos blong faet we God i givim! Pol i finisim toktok blong hem wetem ol advaes ya: “Yufala i mas prea, yufala i mas askem long God blong i givhan long yufala. Oltaem nomo yufala i mas prea long paoa blong Tabu Spirit. Yufala i mas prea from ol Kristin man, we bambae yufala i no kam slak, mo we tingting blong yufala i klia gud.” (Efesas 6:18) Prea i save mekem yumi strong long saed blong spirit mo givhan blong mekem tingting blong yumi i kliagud oltaem. Yumi mas tinghevi long tok blong Pol mo prea oltaem, from we samting ya bambae i halpem yumi blong blokem Setan mo ol rabis enjel blong hem.

[Futnot]

?Yu Yu Lanem Wanem?

• ?Olsem wanem Setan mo ol rabis enjel oli stat?

• ?Paoa blong Setan i bigwan olsem wanem?

• ?Olsem wanem yumi save blokem Setan mo ol rabis enjel blong hem?

• ?Olsem wanem yumi save putum olgeta klos blong faet we God i givim?

[Kwestin]

[Tok blong pija long pej 12]

‘Ol enjel blong God oli luk we ol gel ya oli gudfala tumas’

[Tok blong pija long pej 14]

?Yu save tokbaot sikis haf blong ol klos blong faet we God i givim?