Stap Tru Long Kraes Mo Slef Blong Hem
Stap Tru Long Kraes Mo Slef Blong Hem
“Masta blong hem . . . bambae i putumap hem blong lukaot long olgeta samting blong hem.”—MATIU 24:45-47, NW.
1, 2. (a) ?Hu we Baebol i talem se i Lida blong yumi? (b) ?Wanem i soem se Kraes i stap lidim Kristin kongregesen?
“MO YUFALA i no mas letem man i singaot yufala se ‘Lida’ from we yufala i gat wan lida nomo blong yufala, hemia Mesaea.” (Matiu 23:10, Good News Bible) Ol tok ya blong Jisas oli soemaot klia long ol man blong hem se i no gat wan man long wol we i save kam lida blong olgeta. Oli gat wan Lida nomo blong olgeta we i stap long heven, hemia Jisas Kraes. God nao i putumap Jisas blong hem i Lida. Yes, Jeova i “mekem Jisas i laef bakegen long ded, mo . . . i putumap Kraes i hed blong olgeta samting long kongregesen, we i olsem bodi blong hem.”—Efesas 1:20-23, NW.
2 From we Kraes i “hed blong olgeta samting” insaed long Kristin kongregesen, hem i yusum paoa blong hem antap long evri samting we oli stap hapen insaed long kongregesen. Hem i save luk evri samting we i hapen insaed long kongregesen. Hem i wajemgud evri kongregesen, we oli ol grup blong ol Kristin, blong luk sipos oli stap folemgud ol Kristin rul mo sipos oli holemtaet fasin fren blong olgeta wetem God. Ol tok blong Revelesen we aposol Jon i raetem long faswan handred yia oli soemaot gud samting ya. Jisas i toktok long seven kongregesen mo i talem faef taem se hem i save gud ol fasin blong olgeta, hem i save wanem gudfala wok blong olgeta mo ol samting we oli slak blong mekem, mo hem i givim advaes we i stret long olgeta mo i leftemap tingting blong olgeta olsem we oli nidim. (Revelesen 2:2, 9, 13, 19; 3:1, 8, 15) I stret nomo blong ting se Kraes i savegud tu wanem i stap hapen long ol kongregesen blong Esia Maena, Palestaen, Siria, Babilon, Gris, Itali, mo long evri narafala ples. (Ol Wok 1:8) ?Olsem wanem tede?
Wan Slef We Wok Blong Hem i Stret
3. ?From wanem i stret blong talem se Kraes i olsem hed mo kongregesen i olsem bodi?
3 Afta we Jisas i laef bakegen long ded, smoltaem bifo we hem i go long Papa blong hem long heven, hem i talem long ol disaepol blong hem se: “God i givim olgeta paoa long mi, long olgeta samting long heven mo long wol.” Mo hem i talem tu se: “Yufala i mas save se mi bambae mi stap wetem yufala oltaem, gogo wol ya i finis.” (Matiu 28:18-20) Kraes bambae i gohed blong stap lidim olgeta, bambae hem i stap oltaem olsem Hed blong olgeta. Taem aposol Pol i raetem ol leta i go long ol Kristin long Efesas mo Kolosi, hem i tokbaot Kristin kongregesen se i olsem wan “bodi,” we Kraes nao i Hed blong hem. (Efesas 1:22, 23; Kolosi 1:18) Wan buk (The Cambridge Bible for Schools and Colleges) i talem se pijatok ya se kongregesen hem i wan bodi, ‘i blong makem gud poen ya se neva bodi i save wok hem wan we i no nidim Hed, mo i soemaot tu se olgeta samting we Hed i wantem, be bodi i stap mekem. Ol haf blong bodi oli olsem ol tul blong Hem.’ ?Taem Kraes i kam King long Kingdom long 1914, hu ya grup ya we hem i yusum olsem tul blong hem?—Daniel 7:13, 14.
4. ?Folem profet tok blong Malakae, Jeova mo Jisas Kraes tufala i faenem wanem, taem tufala i kam jekemap tempol long saed blong spirit?
4 Profet tok blong Malakae i talemaot se Jeova, “Masta” ya, bambae i kam wetem “man blong karem tok,” hemia Pikinini blong hem, Jisas Kraes, we hem i putumap olsem King. Bambae tufala i kam blong jajem mo blong jekemap “tabu haos” blong Hem, hemia tempol blong God long saed blong spirit. “Taem” ya ‘blong God i jajem ol famle blong hem’ no haos blong hem, hem i kamtru finis long 1918. * (Malakae 3:1; 1 Pita 4:17) Olgeta man long wol ya we oli talem se oli wok long nem blong God mo we oli talem se olgeta nao oli stap mekem trufala wosip long wol ya, be God i jekemap wok blong evriwan. Ol skul blong Krisendom * we oli bin tijim ol giaman tijing blong plante handred yia finis, oli sakem doti long nem blong God, mo oli joen long faet blong Wol Wo Wan. Taswe, God i sakemaot olgeta ya. Wan smol grup blong ol Kristin we tabu spirit i makemaot olgeta, oli holem wok long fasin we i stret, ale oli kasem traem we i mekem oli kam klingud long fes blong God, olsem gol we man i bonem long faea blong mekem i kam klin. Jeova i glad long olgeta from we hem i luk se olgeta nao oli “save tekem ol presen we oli stret i kam” long Hem.—Malakae 3:3.
5. ?Folem profet tok blong Jisas long saed blong taem ya we hem i “stap,” hu olgeta we oli soemaot se oli “slef” ya we i stret?
5 Jisas i tokbaot ol defdefren samting we bambae oli olsem saen we i laenap wetem profet tok ya blong Malakae. Ol saen ya we Jisas i talem long ol disaepol blong hem i blong halpem olgeta blong luksave wetaem bambae hem i ‘stap mo en blong fasin blong laef blong wol ya i kam’ mo olsem wanem tu blong luksave grup ya we i olsem “slef.” Jisas i talem se: “?Hu ya i rili slef ya we i stret mo waes, we masta blong hem i putumap hem blong lukaot long ol man blong hem, mo blong givim kakae long olgeta long stret taem blong hem? Sipos masta blong hem i kamtru i faenem se hem i stap mekem wok ya, slef ya i save harem gud. Tru ya, Masta bambae i putumap hem blong lukaot long olgeta samting blong hem.” (Matiu 24:3, 45-47, NW ) Taem Kraes i “kamtru” long 1918 blong jekem wok blong “slef,” hem i luk smol grup blong ol man we tabu spirit i makemaot olgeta we oli stap holem wok blong hem long fasin we i stret. Stat long 1879 i kam, smol grup ya i stap yusum ol Wajtaoa mo narafala buk, blong givim ‘kakae long saed blong spirit long stret taem blong hem.’ Ale, Jisas i tekem ol man ya oli kam olsem tul blong hem, no “slef” blong hem, mo long 1919 hem i givim wok long olgeta blong oli lukaot long olgeta samting blong hem long wol ya.
Wok Blong Lukaot Long Olgeta Samting Blong Kraes Long Wol Ya
6, 7. (a) ?Wanem narafala tok we Jisas i yusum blong tokbaot “slef” we i holemgud ol wok blong hem? (b) ?Jisas i yusum tok ya “bosman” blong soemaot wanem?
6 Sam manis bifo we Jisas i talem profet tok long saed blong ol saen we bambae oli soemaot se hem i stap finis, mo se bambae i gat wan “slef” i mekem wok long nem blong hem long wol ya, hem i tokbaot “slef” ya wetem ol toktok we oli defren lelebet. Ol tok ya oli givim moa save long yumi long saed blong ol wok we slef ya i mas mekem. Jisas i talem se: “Man blong wok [bosman] we i gat hed, we i save lukaot gud long ol wok blong masta blong hem, masta blong hem i save putumap hem i bos blong ol narafala man blong hem, blong i seraot kakae long olgeta long stret taem blong hem. Tru mi talem long yufala, masta ya i save putumap hem blong i lukaot long olgeta samting blong hem.”—Luk 12:42, 44.
7 Tok we vas ya i talem man blong wok long lanwis Grik oli talem bosman. Taem oli yusum tok ya long lanwis Grik i blong minim “man we i lukaot ol wok long wan haos no graon.” Bosman ya i no minim wan grup blong man we oli skulgud, we oli stap eksplenem nomo ol save we oli stap long Baebol. Nogat. ‘Bosman ya we i lukaotgud long ol wok blong masta’ i mas givim kakae long saed blong spirit “long stret taem blong hem.” Be hem i mas lukaot tu long olgeta wokman blong Kraes we oli olsem bodi blong hem, mo i mas lukaot long ol wok blong Kraes long wol ya, hemia nao ‘olgeta samting blong Masta.’ ?Wanem olgeta samting ya blong Kraes we i stap long wol?
8, 9. ?Kraes i putumap slef ya blong i lukaot long wanem “samting”?
8 Ol wok we oli stap long han blong slef ya hemia olsem wok blong lukaot olgeta samting we ol man blong Kraes oli stap yusum blong mekem olgeta Kristin wok blong olgeta. Long ol samting ya i gat hedkwota we i lukaot wok blong ful wol, i gat ol branj ofis blong ol Witnes blong Jeova, mo ol ples blong wosip olsem ol Haos Kingdom mo ol Haos Asembli we oli stap long evri ples long wol. Be samting we i moa impoten se slef ya i lukaot long wok blong givim kakae long saed blong spirit taem hem i wokem ol program blong Baebol stadi long ol miting blong evri wik, mo ol program blong ol asembli tu. Long ol miting ya, oli givimaot ol impoten save long saed blong ol profet tok blong Baebol we oli stap kamtru, mo oli givim advaes we i stret blong halpem ol man blong God blong oli folem tok blong Baebol long laef blong olgeta evri dei.
9 Mo tu, bosman i lidim impoten wok ya blong talemaot “gud nius blong Kingdom” mo blong “pulum [ol man long olgeta ples long wol] oli kam man blong” Kraes. Blong mekem olsem oli mas tijim ol man blong folem olgeta samting we Kraes, Hed blong kongregesen, i talem blong oli mekem long taem ya blong en. (Matiu 24:14, NW; 28:19, 20; Revelesen 12:17) Wok blong prij mo tijim man i karem wan “bigfala kampani” blong man i kam we oli ol trufala fren blong ol tabu brata. Ol ‘gudgudfala samting blong narafala kantri’ hemia nao olgeta sas “samting” blong Kraes we slef blong hem i stap lukaot long olgeta.—Revelesen 7:9, NW; Hagae 2:7.
Hed Kampani—Wan Haf Blong Slef Ya
10. ?Long faswan handred yia hu i stap tekem ol disisen mo samting ya i mekem wanem long ol kongregesen?
10 Bigfala wok we i stap long han blong slef blong Kraes i minim se hem i gat plante bigfala disisen blong mekem. Taem Kristin kongregesen i jes stat, ol aposol mo ol elda long Jerusalem nao oli mekem wok long nem blong ful grup blong slef ya, taem oli tekem ol disisen blong evri Kristin kongregesen. (Ol Wok 15:1, 2) Taem hed kampani long faswan handred yia i tekem wan disisen, oli raetem wan leta no oli sanem wan man blong i talemaot disisen ya long evri kongregesen. Ol Kristin long taem ya oli glad blong kasem ol tok ya we i blong lidim olgeta. Mo from we oli rere blong wokgud wetem hed kampani, oli no lusum pis mo fasin joengud bitwin long olgeta. —Ol Wok 15:22-31; 16:4, 5; Filipae 2:2.
11. ?Kraes i yusum hu tede blong lidim kongregesen blong hem, mo yumi mas tingbaot grup ya blong ol tabu Kristin olsem wanem?
11 Tede tu i gat wan Hed Kampani olsem long taem blong ol faswan Kristin. Olgeta we oli stap long Hed Kampani blong ol man blong Kraes tede, hemia ol brata we oli elda mo we oli blong grup ya we tabu spirit i makemaot olgeta. Kraes, we i Hed blong kongregesen, i yusum paoa we i stap long “raethan” blong hem blong lidim ol man ya we wok blong olgeta i stret, taem oli stap lukaot long ol wok blong Kingdom long wol. (Revelesen 1:16, 20) Brata Albert Schroeder i bin wan memba blong Hed Kampani ya blong longtaem, laef blong hem long wol ya i finis long las yia. Brata ya i bin talem stori blong laef blong hem, mo long stori ya hem i se: “Hed Kampani i mit wanples evri Wenesde, oli statem miting wetem prea mo oli askem Jeova blong lidim olgeta wetem tabu spirit. Olgeta ya oli traehad bigwan blong meksua se evri samting we oli tingbaot mo evri disisen we oli mekem i mas laenap wetem Tok blong God Baebol.” * Yumi save trastem wok blong ol Kristin ya we tabu spirit i makemaot olgeta, we oli mekem wok blong olgeta long fasin we i stret. Long saed blong olgeta ya, yumi mas folem advaes ya blong aposol Pol se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel.”—Hibrus 13:17, Nyutesteman wetem Ol Sam.
Givim Respek We i Stret Long Slef Blong Kraes
12, 13. ?Wanem ol risen we i stap long Baebol we i soem se yumi mas soem respek long slef?
12 Wan stamba risen from wanem yumi soem respek we i stret long slef blong Kraes, hemia se taem yumi mekem olsem, yumi stap soem respek long Masta blong olgeta, Jisas Kraes. Pol i tokbaot ol tabu Kristin mo i talem se: “Sipos Masta blong yumi i singaot . . . wan man we i friman, man ya i kam olsem slef blong hem. God i pemaot yumi finis long bigfala praes.” (1 Korin 7:22, 23; Efesas 6:6) Taswe, taem yumi stap tru mo letem slef blong Kraes mo Hed Kampani blong hem i lidim yumi, i olsem we yumi stap obei long Kraes, we hem i Masta blong slef ya. Taem yumi soem respek long tul ya we Kraes i stap yusum blong lukaot long ol samting blong hem long wol ya, i olsem we yumi stap “talemaot klia we Jisas Kraes i Masta, blong leftemap nem blong God, we i Papa blong yumi.”—Filipae 2:11, NW.
13 Baebol i givim wan narafala risen from wanem yumi mas soem respek long slef blong Kraes, hemia se taem ol tabu Kristin ya oli stap long wol oli olsem “haos blong God,” no tempol, we spirit blong Jeova i stap long hem. From samting ya, olgeta ya oli “tabu.” (1 Korin 3:16, 17; Efesas 2:19-22) Jisas i putum olgeta samting blong hem long wol ya long han blong grup ya nao we i olsem tempol ya we i tabu. Hemia i min se Kraes i givim raet mo wok insaed long Kristin kongregesen i go long slef ya nomo, i no long narafala. From risen ya, evri man insaed long kongregesen oli luksave se i wok blong olgeta blong folem mo sapotem samting we slef blong Kraes mo Hed Kampani blong hem i mekem no talem. Tru ya, ol “narafala sipsip” oli tingbaot se hemia wan nambawan janis ya long olgeta blong wok wetem grup blong slef ya we i stap lukaot long olting blong Masta.—Jon 10:16.
Stap Tru Mo Wokgud Wetem Slef Ya
14. ?Olsem profet tok blong Aesea i talem, olsem wanem ol narafala sipsip oli wokbaot biaen long slef mo oli wok olsem “ol man blong wok we oli no kasem pei”?
14 Profet tok blong Aesea i bin talemaot finis fasin blong ol narafala sipsip blong stap daon long ol tabu brata we oli memba blong Isrel long saed blong spirit. “Hemia tok we Jeova i talem: ‘Ol man blong wok long Ijip we oli no stap kasem pei, mo ol bisnesman blong Itiopia wetem ol man Seba we oli longlongfala man, olgeta ya bambae oli kam long yu, mo bambae oli kam man blong yu. Bambae oli wokbaot biaenem yu, bambae oli kam wetem ol jen we i fasemtaet han blong olgeta, mo bambae oli bodaon long yu. Bambae oli prea long yu se, “Tru, God i stap wetem yu, mo i no gat narawan olsem hem, hem nomo i trufala God.” ’ ” (Aesea 45:14, NW ) Tok ya i olsem pijatok blong soemaot olsem wanem ol narafala sipsip oli stap biaen long grup blong slef mo Hed Kampani, taem oli stap letem grup ya i lidim olgeta. Ol narafala sipsip ya oli olsem ‘ol man blong wok we oli no kasem pei.’ Oli glad nomo blong spenem paoa blong olgeta mo mane blong olgeta tu blong sapotem wok blong prij raon long wol, wok ya nao we Kraes i putum long han blong ol tabu brata blong hem long wol. —Ol Wok 1:8; Revelesen 12:17.
15. ?Olsem wanem profet tok blong Aesea 61:5, 6 i tokbaot finis fasin ya se ol narafala sipsip oli wok wetem Isrel long saed blong spirit?
15 Ol narafala sipsip oli glad mo oli gat bigfala tangkiu se oli save mekem wok blong Jeova aninit long slef ya wetem Hed Kampani blong hem. Oli luksave se ol tabu Kristin ya oli memba blong “Isrel blong God.” (Galesia 6:16, NW ) Oli olsem “ol strenja” mo ol “man blong narafala kantri” we oli joen wetem Isrel ya long saed blong spirit. Oli glad tumas blong “wokem garen” mo blong “lukaot long ol garen blong grep,” folem wanem we ol tabu brata, ol “pris blong Jeova” mo ol “minista blong God” oli stap talem blong oli mekem. (Aesea 61:5, 6, NW ) Oli wok strong blong talemaot gud nius blong Kingdom mo pulum ol man blong evri kantri oli kam disaepol. Oli givhan long slef ya wetem fulhat blong olgeta taem oli mekem wok blong lukaot sipsip mo kea long ol niuwan.
16. ?Wanem i pulum ol narafala sipsip blong stap tru mo wokgud wetem slef we i stret mo waes?
16 Ol narafala sipsip oli luksave se oli save kasem plante blesing from bigfala wok we slef blong Kraes i stap mekem blong givim kakae long saed blong spirit long stret taem. Oli gat tingting daon from we oli luksave se sipos i no gat slef we i stret mo waes bambae oli gat smol save nomo no maet oli no gat save long ol sas trutok blong Baebol. Ol sas trutok ya olsem save long saed blong hae rul blong Jeova, wok we Hem i stap mekem blong nem blong hem i tabu, save long saed blong Kingdom, niufala heven mo niufala wol, sol, ded, mo hu ya Jeova, Pikinini mo tabu spirit. Ol narafala sipsip ya oli gat bigfala tangkiu tumas mo oli stap tru long ol “brata” blong Kraes long wol, oli wokgud wetem olgeta ya long taem blong en.—Matiu 25:40.
17. ?Wanem samting we Hed Kampani i luk se hem i mas mekem, mo bambae yumi tokbaot wanem long nekis stadi?
17 From we namba blong ol tabu brata i stap godaon, oli no save stap long evri kongregesen blong lukluk long olting blong Kraes. Taswe, Hed Kampani i putumap sam man we oli blong narafala sipsip blong lukaot ol wok long branj ofis, distrik, mo seket, mo long wanwan kongregesen blong ol Witnes blong Jeova. ?Fasin mo tingting we yumi gat long saed blong ol brata ya we oli holem wok aninit long Kraes, i gat paoa long fasin blong yumi blong stap tru long Kraes mo slef blong hem? Bambae yumi tokbaot samting ya long nekis stadi.
[Ol Futnot]
^ Blong save moa long saed ya, lukluk Wajtaoa Maj 1, 2004, pej 13-18, mo Disemba 1, 1992, pej 13.
^ Ol skul we oli giaman se oli Kristin.
^ Stori blong hem i stap long Wajtaoa blong Maj 1, 1988, pej 10-17 (Franis/Inglis).
Rod Blong Tingtingbak
• ?Hu i Lida blong yumi, mo wanem i soem se hem i save luk evri samting we oli stap hapen insaed long ol kongregesen?
• ?Taem God i kam blong jekemap wok insaed long “tabu haos” blong hem, hem i faenem hu nomo i stap olsem slef we wok blong hem i stret, mo wanem olgeta samting we hem i putum long han blong slef ya?
• ?Wanem ol risen we oli stap long Baebol blong pruvum se i stret blong stap tru mo wok wetem slef we wok blong hem i stret?
[Kwestin]
[Tok blong pija long pej 23]
“Olgeta samting” we “bosman” i lukaot long olgeta hemia ol samting we oli blong yusum long wok blong Kingdom, ol program long saed blong spirit, mo wok blong prij
[Tok blong pija long pej 25]
Ol narafala sipsip oli glad blong wok wetem slef blong Kraes taem oli strong blong mekem wok blong prij