Taem Bambae Jisas i Kam—?I Stret Blong Yumi Fraet?

?LONG tingting blong yu, taem ya we Jisas i kam bambae i olsem wanem? ?Yu ting se taem ya i wan taem blong trabol? ?Yu ting se bambae hem i kam blong panisim ol man, mo blong spolem ol samting? ?No yu ting se taem Jisas i kam, bambae hem i finisim olgeta trabol blong yumi? ?Bambae yumi mas fraet long taem ya, no yumi mas wantem blong taem ya i kamtru?

Baebol i tokbaot taem we Jisas bambae i kam, i se: “Yufala i luk. . . . Bambae Jisas i kam long klaod. Olgeta man bambae oli luk hem . . . Mo olgeta man long evri ples long wol bambae oli sore tumas, bambae oli krae from we oli luk hem.” (Revelesen 1:7) Vas ya i tokbaot taem we Jisas bambae i kam long fiuja blong givim pei long ol stret man mo panisim ol rabis man.

Aposol Jon i no fraet long taem we bambae Jisas i kam, be hem i wantem tumas se taem ya i kamtru. Tru long tabu spirit, Jeova i soemaot taem ya long Jon mo i soemaot samting we bambae i hapen long wol. Mo Jon i prea wetem fulhat blong hem se: “Jisas, Masta, plis yu kam.” (Revelesen 22:20) ?From wanem “olgeta man long evri ples long wol . . . bambae oli krae from we oli luk hem”? ?Mo olsem wanem “olgeta man bambae oli luk hem”? ?Taem we Jisas i kam, wanem samting bambae i hapen? ?Sipos yumi putum bilif blong yumi i stap strong long taem ya, olsem wanem samting ya i save givhan long yumi naoia? Haf we i kam biaen bambae i ansa long ol kwestin ya.