Taem Jisas i Kam—?Wanem Bambae i Hapen?

“BIGFALA FRAET LONG SAO POLO.” Hemia toktok we i kamaot long wan niuspepa (Veja) taem i tokbaot bigfala trabol we i kasem rij taon ya blong Brasil. Long Mei 2006, long fo dei nomo, wan grup blong man i “spolemgud ol man long taon ya . . . Ol man oli fraet bitim mak. Long 100 aoa,” grup ya i kilim i ded samwe long 150 man we sam long olgeta oli polis, sam oli stap long kalabus, mo sam oli man blong taon nomo.

Long evri ples long wol, raf fasin i kamaot plante long nius. I luk olsem se ol lida blong wol oli no naf blong stopem ol raf fasin ya. Wol blong yumi i stap kam wan ples we i denja tumas. Maet tingting blong yu i foldaon from we long evri ples i gat plante rabis nius. Nating se i olsem, klosap nao bambae i gat ol bigfala jenis.

Jisas i tijim ol man blong hem blong oli prea se Kingdom blong God i kam mo blong ‘olgeta man long wol oli mekem ol samting we God i wantem, olsem we olgeta long heven oli stap mekem.’ (Matiu 6:9, 10) Kingdom ya i wan gavman mo God i makemaot Jisas Kraes blong i King long hem. Kingdom ya bambae i stretem olgeta trabol blong ol man. Be bifo we Kingdom blong God i jenisim ol samting long wol ya, fastaem rul blong ol man i mas finis mo Jisas i mas rul. Samting ya bambae i hapen taem Jisas i kam.

?Bambae i Gat Pis Taem Jenis Ya i Hapen?

?Olsem wanem? ?Ol neson bambae oli glad nomo blong letem Jisas i rul long olgeta? Ansa blong kwestin ya i kamaot long wan vison we aposol Jon i kasem. Jon i talem se: “Mi luk anamol ya we i nogud [ol politik paoa long wol ya], wetem ol king blong wol wetem ol soldia blong olgeta we oli kam wanples blong kilim man ya we i stap sidaon long hos [Jisas], mo blong kilim ol soldia blong hem.” (Revelesen 19:19) ?Long faet ya, wanem bambae i hapen long ol king blong wol? Baebol i talem se King ya we Jeova i makemaot bambae i ‘kilim ol man ya long wan aean, bambae i smasem olgeta long ol smosmol pis, olsem graonpot we i brobrok.’ (Ol Sam 2:9) King ya bambae i smasem gud olgeta politik paoa blong wol ya. Kingdom blong God ‘bambae i flatemgud paoa blong ol narafala king [blong wol], nao bambae hem i rul oltaem gogo i no save finis.’—Daniel 2:44.

?Olsem wanem long ol man we oli agensem Kingdom blong God? Baebol i soemaot se “Jisas, Masta blong yumi, bambae i aot long heven, i kamtru long yumi, wetem ol strong enjel blong hem mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nius.” (2 Tesalonaeka 1:7, 8) Ol Proveb 2:22 i talem se: “Ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.”

Baebol i tokbaot taem ya we bambae Jisas i kam, i se: “Yufala i luk. Naoia nomo, bambae Jisas i kam long klaod. Olgeta man bambae oli luk hem.” (Revelesen 1:7) Ol man bambae oli no luk hem wetem prapa ae blong olgeta. Stat long taem we Jisas i gobak long heven, hem i kam wan spirit man mo i “stap long delaet we i saen we i saen, we man i no save kam klosap long hem. I no gat man yet we i luk hem, mo i no gat man we bambae i save luk hem samtaem.”—1 Timoti 6:16.

Jisas i no nid blong kam wetem bodi blong man, blong ol man long wol oli save “luk” hem. Long taem blong Moses, Jeova i no kam wetem bodi blong man taem hem i mekem ol Ten Trabol i kam long ol man Ijip. Ol man long taem ya oli save se Jeova nao i mekem ol trabol ya, mo samting we i hapen i fosem olgeta blong luksave bigfala paoa blong hem. (Eksodas 12:31) Long sem fasin, taem Jisas i kam olsem Man Blong Givim Panis we God i jusumaot,  mo i tekem aksen, ol rabis man bambae oli mas “luk,” no luksave, se God i yusum hem blong jajem olgeta. Bambae olgeta man oli kasem save long samting ya from we oli bin kasem woning plante taem finis. Yes, ‘olgeta man bambae oli luk Jisas, mo olgeta man long evri ples long wol bambae oli sore tumas, bambae oli krae from we oli luk hem.’—Revelesen 1:7.

Ol rabis man mo rabis rul blong olgeta oli mas finis bifo we trufala pis i stap bakegen long wol mo wol ya i save kasembak ol gudgudfala samting blong hem. Jisas bambae i mekem olgeta samting ya. Biaen, bambae hem i kontrolem olgeta samting long wol ya, nao bambae i gat plante bigbigfala jenis.

Ol Samting We Oli Kam Niuwan Bakegen Oli Karem Blesing

Aposol Pita i tokbaot “taem we bambae olgeta samting oli kam niuwan bakegen, olsem we God i talemaot finis long ol tok blong ol tabu profet blong hem bifo.” (Ol Wok 3:21) Ol samting we bambae oli kam niuwan bakegen, hemia ol jenis we bambae i hapen long wol ya long taem blong rul blong Kraes. God i yusum ol profet blong tokbaot “taem we bambae olgeta samting oli kam niuwan bakegen” long wol ya, mo wan long ol profet ya hemia Aesea, we i bin laef long ol yia seven handred B.K.T. * Aesea i bin talem se Jisas Kraes, we i “Pikinini ya blong King, we Hem i Stamba blong Pis,” bambae i putum pis long wol ya bakegen. Profet tok blong Aesea i tokbaot rul blong Kraes i se: “Mo bambae bigfala rul blong hem olsem prins, mo pis, oli no save finis.” (Aesea 9:6, 7, NW ) Jisas bambae i tijim ol man long wol blong oli laef tugeta long pis. Ol man we oli laef long wol “bambae oli harem gud, from we oli stap gud, mo oli gat plante samting.” —Ol Sam 37:11.

?Taem Kraes i rul, wanem bambae i hapen long fasin pua mo hanggri? Aesea i talem se: “Hae God i gat olgeta paoa, mo long tabu hil ya Saeon, hem bambae i mekemrere wan bigfala lafet blong yumi, we bambae i singaot ol man blong ol narafala kantri long wol blong oli kam joen. Long lafet ya, bambae yumi kakae ol nambawan kakae, mo yumi dring ol waen we i beswan.” (Aesea 25:6) Man blong raetem Ol Sam i singsing se: “Yu mekem we bambae i gat plante kakae long ples ya, we bambae ol hil oli fulap gud long hem.” (Ol Sam 72:16) Mo tu, yumi ridim long saed blong ol man long wol ya se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. Ol man we bambae oli stap long ples ya, oli man blong mi we mi mi jusumaot olgeta finis, mo bambae oli save stap longtaem, olsem tri we i save stap longtaem. Ol samting we olgeta oli hadwok long hem, bambae oli save harem gud long hem longtaem.”—Aesea 65:21, 22.

Mo tu, Aesea i talem profet tok long saed blong sik mo ded se bambae oli finis. God i yusum Aesea blong talem se: “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.” (Aesea 35:5, 6) Biaen, “bambae i no moa gat man olbaot long kantri ya we i save talem se hem i sik.” (Aesea 33:24) God ‘bambae i mekem we ded bambae i go lus olgeta. Bambae hem i ravemaot wota blong ae blong ol man.’—Aesea 25:8.

?Olsem wanem long ol dedman we oli stap “long beregraon”? (Jon 5:28, 29) Profet tok blong Aesea i talem se: “Ol man blong yumi we oli ded, oli stap slip long beregraon, bambae oli laef bakegen. . . . Bambae oli girap, oli laef bakegen.” (Aesea 26:19) !Yes, olgeta we oli slip long beregraon bambae oli girap bakegen!

“God i Jea Blong King Blong Yu Blong Olwe”

Taem Jisas i kam, fulwol blong yumi bambae i kam niuwan bakegen. Wol ya bambae i jenis i kam wan naesfala paradaes, mo ol man bambae oli joengud blong wosipim trufala God. ?Olsem wanem? ?Yumi save sua se Jisas Kraes bambae i tekemaot rabis fasin long wol ya mo putum stret fasin long ples blong hem?

Tingbaot stamba blong paoa mo rul we Jisas i kasem. Baebol i tokbaot Pikinini blong God i se: “[“God i jea blong king blong yu blong olwe gogo i no save finis, mo wokingstik blong Kingdom blong yu hem i wokingstik blong stret fasin,” NW ]. Yu yu laekem ol fasin we i stret, be ol fasin we i nogud yu agens long olgeta.” (Hibrus 1:8, 9) Jea blong king  blong Jisas we i minim paoa blong hem blong rul, hem i kamaot long Jeova. God nao i wokem mo i givim jea blong king long hem. Taswe Jisas bambae i naf blong stretem olgeta trabol, nating se oli bigwan olsem wanem.

Afta we Jisas i girap bakegen, hem i talem long ol disaepol blong hem se: “God i givim olgeta paoa long mi, long olgeta samting long heven mo long wol.” (Matiu 28:18) Fas Pita 3:22 i talem se, “ol enjel, mo ol haeman, mo ol lida blong heven, oli stap ona long hem.” Sipos wan haeman no lida i agensem Jisas, bambae hem i no save win. Jisas bambae i mekem ol samting blong givhan long ol man blong olwe. I no gat wan samting we i save blokem hem long wok ya.

?Save Ya i Mekem Wanem Long Ol Man?

Aposol Pol i raetem leta i go long ol man Tesalonaeka, mo i talem se: “Oltaem, long fes blong God we i Papa blong yumi, mifala i stap tingbaot we fasin blong yufala i soemaotgud bilif blong yufala, mo hadwok blong yufala i soemaot we yufala i lavem God tumas. Mo mifala i stap tingbaot we yufala i stap stanap strong yet from we tingting blong yufala i stap strong long Jisas Kraes, Masta blong yumi.” (1 Tesalonaeka 1:3) Pol i talem se hadwok blong ol man Tesalonaeka mo fasin blong olgeta blong stanap strong i kamaot from we tingting blong olgeta i stap strong long Jisas Kraes. Hemia i minim tu se oli bilif strong long taem ya we Jisas bambae i kam mo bambae i mekem olgeta samting oli kam niuwan bakegen. Taem ol trufala Kristin oli putum tingting blong olgeta i stap strong long fiuja ya, hemia i givim paoa long olgeta mo i givhan long olgeta blong oli stanap strong long ol bigfala traem.

Tingbaot Carlos we i laef long Sao Polo, Brasil. Long Ogis 2003, Carlos i faenemaot se hem i gat kansa. Afta long taem ya, ol dokta oli katem hem eit taem, mo samting ya i mekem hem i safa bitim mak. Nating se i olsem, oltaem nomo Carlos i stap leftemap tingting blong ol narafala. Wan dei, taem hem i stap prij long rod long fored blong wan bigfala hospital, hem i faenem wan narafala Witnes blong Jeova we man blong hem tu i stap kasem tritmen from sik ya kansa. Carlos i savegud olsem wanem sik ya i mekem man i safa, ale hem i talem ol gudfala toktok long woman ya mo man blong hem, mo i mekem tufala i haremgud. Biaen, tufala i talem se storian ya i leftemap tingting blong tufala. Carlos i luk olsem wanem tok ya blong Pol i tru se: “[God] i stap givhan long mifala long olgeta trabol blong mifala, blong mekem mifala i harem gud. Nao taem ol narafala man oli gat trabol, mifala i save givhan long olgeta, blong mekem olgeta oli harem gud long sem fasin, from we God i givhan finis long mifala.”—2 Korin 1:4.

?Wanem i givhan long Carlos blong i gat paoa blong leftemap tingting blong ol narafala, nating we hem i sik? Carlos i putum tingting blong hem i stap strong long taem ya we Jisas bambae i kam, mo olgeta samting we bambae hem i mekem. Samting ya i pulum hem blong i “mekem ol gudfala fasin.”—Galesia 6:9.

Tingbaot Samuel. Samwe long 50 mita longwe long haos blong papa blong Samuel, sam man oli kilim brata blong hem i ded. Oli sutum brata blong hem long masket, mo ten bolet i kasem hem. Dedbodi blong hem i stap eit aoa long saed blong rod, from ol polis oli stap traem blong faenemaot se hu nao i kilim hem i ded. Samuel i no save fogetem samting we i hapen long dei ya. Be hem i putum tingting blong hem i stap strong se Jisas bambae i tekemaot olgeta rabis fasin long wol ya mo se stret rul blong hem bambae i karem blesing long ol man. Tingting ya i givim paoa long hem. Plante taem Samuel i tingting long taem ya we bambae hem i holemtaet brata blong hem, taem hem i girap bakegen long Paradaes long wol. —Ol Wok 24:15.

?Yu Yu Mas Mekem Wanem?

Sipos yu putum tingting blong yu i stap strong long taem ya we Jisas bambae i kam mo ol samting we bambae hem i mekem, hemia i save mekem yu yu haremgud. I sua se Jisas bambae i stretem stamba blong ol trabol mo rabis fasin we oli stap spolem ol man.

?Wanem samting we yu yu mas mekem blong yu save kasem ol blesing we bambae rul blong Kraes i karem long ol man? Yu mas stadigud long Tok blong God, Baebol. Jisas i prea long Papa blong hem, i se: “Mo laef ya, hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Yu mas traehad blong faenemaot wanem samting we Baebol i tijim. Bambae ol Witnes blong Jeova long ples blong yu oli glad blong givhan long yu long saed ya. Wetem lav, mifala i askem long yu blong yu toktok wetem olgeta no yu raet i kam long olgeta we oli wokem magasin ya.

[Futnot]