Wan Kwestin

?Noa i tekem hamas anamol we i klin long fes blong God i go insaed long sip? ?Hem i tekem seven anamol nomo, no fotin anamol we seven i man mo seven i woman?

Afta we Noa i bildim sip finis, Jeova i talem long hem se: “Yu go, yu tekem famle blong yu, yufala i go insaed long sip, from we long evri man we oli stap long wol ya, mi mi luk we yu nomo yu stret man. Long evri anamol we oli klin long fes blong mi, bambae yu mas tekem seven, man mo woman. Mo long evri anamol we oli no klin, bambae yu tekem tu nomo, wan we i man mo wan we i woman.” (Jenesis 7:1, 2, NW ) Sam Baebol, olsem Baebol long Bislama, The New English Bible, Tanakh—The Holy Scriptures, mo sam narafala Baebol bakegen, oli tanem Hibru tok blong vas ya se “seven we i man mo seven we i woman.”

Long lanwis Hibru, taem oli raetem vas ya oli raetem stret se “seven seven.” (Jenesis 7:2, futnot long NW ) Be nating se oli raetem sem namba tu taem, hemia i no minim se yu mas plasem namba ya tugeta. Nogat. Eksampol, 2 Samuel 21:20 i tokbaot “wan lariken man” we i gat “twelef fingga long han blong hem, sikis long wan, sikis long wan, mo twelef fingga long leg blong hem tu, sikis long wan, sikis long wan.” Long lanwis ya Hibru taem oli raetem vas ya oli no raetem “twelef” be oli raetem “sikis,” tu taem olsem “sikis sikis.” Be hemia i no min se lariken man ya i gat twelef fingga long wan han, twelef fingga long nara han, mo twelef fingga long wan leg ale twelef fingga long nara leg bakegen. Nogat. Oli raetem tok ya “sikis,” tu taem blong minim tufala han mo tufala leg blong hem se i gat sikis fingga long wanwan han mo wanwan leg.

?Ol rul blong lanwis ya Hibru oli talem wanem long saed blong fasin ya blong raetem sem namba, tu taem? Wan buk we man ya William R. Harper i raetem (Introductory Hebrew Method and Manual) i eksplenem Jenesis 7:2, 9, se, ‘plante taem, fasin ya blong raetem semfala tok tu taem i blong makem hamas samting i stap insaed long wanwan grup.’ Wan narafala buk (Hebrew Grammar [Second English Edition]) i talem se: “Ol tok we i blong makem hamas samting i stap insaed long wan grup . . . plante taem oli ripitim blong makemgud amaon blong hem.” Ale buk ya i yusum sam eksampol blong soemaot tok ya long Jenesis 7:9, 15 mo 2 Samuel 21:20, we long tufala vas ya oli ripitim ol namba ya “tu” mo “sikis” tu taem.

Taswe, tok ya “seven seven” long Jenesis 7:2 i no minim tu taem seven, olsem 14, nogat. Sem mak long tok ya “tu”, we oli raetem tu taem long Jenesis 7:9, 15, hem i no minim tu plas tu, olsem se i gat fo, nogat. Fasin we oli raetem ol namba ya tu taem long Hibru i minim nomo se i gat tu long wan grup, no seven long wan grup, be i no min se man i mas plasem tufala namba ya tugeta. Taswe, Noa i tekem “seven” anamol long evri anamol we oli klin long fes blong God, mo i tekem “tutu” nomo long ol anamol we oli no klin.

?Be olsem wanem long tok ya “man mo woman” we oli raetem afta we oli talem “seven” anamol, long Jenesis 7:2? Tok ya i mekem samfala oli ting se God i talem long Noa blong i tekem seven man mo seven woman long evri anamol we oli klin blong oli save karem plante moa pikinini. Be Noa i no tekem ol anamol ya blong oli mekem pikinini nomo. Jenesis 8:20 i talem se afta we Noa olgeta oli kamaot long sip, “Noa i wokem wan olta blong mekem wosip long Hae God, mo i tekem ol anamol wetem ol pijin we oli klin long fes blong Hae God, i mekem sakrefaes long olgeta.” From we hem i bin karem seven blong wanwan anamol we i klin, namba seven anamol ya nao we hem i kilim i ded olsem sakrefaes. Min se ol sikis anamol we oli stap, 3 man wetem 3 woman, oli save mekem pikinini.