Wan Kwestin
Wan Kwestin
?Wanem mining blong tok blong Pol se wan wido we i wantem kasem help blong Kristin kongregesen i mas wan “woman we bifo, hem i gat wan man blong hem nomo”?—1 Timoti 5:9.
From we long vas ya, Pol i stap tokbaot wan wido, i klia se tok ya se “woman we bifo, hem i gat wan man blong hem nomo” i blong tokbaot laef blong woman ya bifo we hem i kam wan wido. ?Olsem wanem? ?Hemia i minim se wido woman ya i mas mared wan taem nomo? ?Pol i minim wan narafala samting taem hem i talem tok ya? *
Samfala oli talem se Pol i stap tokbaot ol wido we oli bin mared wan taem nomo. I tru se long plante kantri, ol man oli ting se taem wan wido i stap olsem nomo we i no mared, hem i mekem wan gudfala fasin. Be, tingting ya i no laenap nating wetem ol tok blong Pol. Pol i talemaot klia long ol Kristin blong Korin se, long tingting blong hem, wan wido i save hapi moa sipos hem i stap olsem nomo we i no moa mared, be “hem i fri blong i mared long wanem man we hem i wantem. Be wan samting nomo, man ya i mas man blong Masta blong yumi.” (1 Korin 7:39, 40; Rom 7:2, 3) Mo tu, long leta we Pol i raetem long Timoti, hem i talem se: “Mi mi ting se i moa gud sipos ol yangfala wido oli mared bakegen.” (1 Timoti 5:14) Taswe, wan wido i no mas sem sipos hem i wantem mared bakegen.
?Ale, wanem mining blong tok ya we Pol i talem long Timoti? Tok ya se “woman we bifo, hem i gat wan man blong hem nomo” i kamaot long vas ya nomo. Long Grik lanwis, tok ya i minim “woman blong wan man.” I gud blong makem se, tok ya i sem mak long wan narafala tok we Pol i yusum plante taem long ol leta blong hem. Tok ya hemia se, “[man] i mas gat wan woman blong hem nomo” no olsem long Grik lanwis se, “man blong wan woman.” (1 Timoti 3:2, 12; Taetas 1:6) Pol i yusum tok ya “[man] i mas gat wan woman blong hem nomo” taem hem i stap mekem lis blong ol fasin we wan Kristin man i mas gat blong i save kam wan elda no wan man blong givhan. Long haf ya, tok ya i min se, sipos wan mared man i wantem kasem wan wok insaed long Kristin kongregesen, hem i mas wan man we i stap tru long woman blong hem mo i mas wan man we i no gat poen blong hem nating. * Olsem nao, tok ya long 1 Timoti 5:9 i minim sem samting nomo, hemia se: Blong wan wido i save kasem help blong kongregesen, hem i mas wan woman we i onagud long God mo we i bin stap tru long man blong hem taem man ya i laef yet mo ol man oli savegud hem se hem i gat ol gudfala fasin. Long vas we i kam biaen, Pol i mekem lis blong ol fasin we wan wido i mas soemaot.—1 Timoti 5:10.
[Ol Futnot]
^ Long taem blong aposol Pol, olgeta man we oli stap aninit long gavman blong Rom oli no agri long fasin ya we wan woman i mared wetem plante man wantaem (polyandry). Taswe, i sua se Pol i no raet long Timoti blong tokbaot fasin ya no blong toktok nogud long saed blong wan woman we i mekem fasin ya.
^ Blong kasem save moa long poen ya, lukluk Wajtaoa blong Oktoba 15, 1996, pej 17, mo haf ya “Wan Kwestin” long Wajtaoa blong Septemba 15, 1980, pej 31 (Franis mo Inglis).