Kongregesen Bambae i Kam Strong Moa

“Kongregesen i gat pis, mo i kam strong moa.”—OL WOK 9:31, NW.

1. ?Wanem ol kwestin we yumi save askem long saed blong “kongregesen blong God”?

 LONG dei blong Pentekos long yia 33 K.T., Jeova i soemaot we hem i agri long wan grup blong ol disaepol blong Kraes, blong oli kam wan niufala neson, hemia “Isrel blong God.” (Galesia 6:16, NW ) Baebol i talem se ol Kristin ya we tabu spirit i makemaot olgeta oli kam “[“kongregesen,” NW ] blong God.” (1 Korin 11:22) ?Olsem wanem oli kam “kongregesen blong God”? ?Wanem plan mo oda bambae i stap insaed long “kongregesen blong God”? ?Bambae hem i wok olsem wanem long wol ya, nomata weples ol memba blong hem oli stap? ?Mo olsem wanem kongregesen i joen wetem laef mo glad blong yumi?

2, 3. ?Olsem wanem Jisas i soemaot se bambae i gat plan mo oda insaed long kongregesen?

² Olsem yumi luk long laswan stadi, Jisas i talemaot se bambae i gat wan kongregesen blong ol man blong hem we tabu spirit i makemaot olgeta. Hem i talem long aposol Pita se: “Bambae mi mi stanemap [“kongregesen,” NW ] blong mi long ston ya [Jisas Kraes], mo paoa blong ded bambae i no naf blong winim [kongregesen] ya.” (Matiu 16:18) Mo tu, taem Jisas i stap yet wetem ol aposol blong hem, hem i givim sam save long olgeta olsem wanem kongregesen ya we i stanap biaen bambae i wok, mo oda we bambae i stap insaed long hem.

³ Ol tok mo wok blong Jisas oli soemaot se bambae i gat samfala we oli mas lukaot long kongregesen. Bambae oli mas wok blong ol narafala mo givhan long ol narafala long grup blong olgeta. Kraes i talem se: “Yufala i save finis fasin blong ol man blong ol narafala kantri we oli talem se oli haeman. Olgeta ya oli stap mekem i strong tumas long ol man blong olgeta, mo ol bos blong olgeta oli stap mekem olgeta oli stap aninit long paoa blong olgeta. Be i no stret blong yufala i mekem olsem. Sipos wan long yufala i wantem kam haeman blong yufala, hem i mas kam olsem man blong wok blong yufala. Mo sipos wan long yufala i wantem kam bos blong yufala, hem i mas kam olsem slef nomo blong yufala evriwan.” (Mak 10:42-44) I klia se “kongregesen blong God” i no minim ol wanwan man we oli stap olbaot long ol defdefren ples, olsem wan kongregesen we i no gat plan mo oda. Nogat. Bambae i gat plan mo oda insaed long kongregesen, mo ol wanwan man bambae oli toktok mo wok tugeta.

4, 5. ?Olsem wanem yumi save se kongregesen bambae i nidim blong kasem tijing long saed blong Baebol?

⁴ Jisas, we i Hed blong “kongregesen blong God,” i soemaot se ol aposol mo sam narafala we hem i bin tijim olgeta, bambae oli gat ol spesel wok blong mekem long ol wanwan kongregesen. ?Wanem spesel wok? Wan bigfala wok hemia se oli mas tijim ol narafala long kongregesen long saed blong Jeova. Tingbaot tok we Jisas i talem afta we hem i laef bakegen, taem hem i stap wetem Pita mo sam narafala aposol. Hem i se: “Saemon, pikinini blong Jon. ?Yu yu lavem mi?” Pita i ansa se: “Yes Masta, yu save we mi mi lavem yu.” Jisas i talem long hem se: “Ale, yu givim kakae long ol smol sipsip blong mi. . . . Yu lukaot gud long ol sipsip blong mi. . . . Yu givim kakae long ol sipsip blong mi.” (Jon 21:15-17) !Hemia wan bigfala wok ya!

⁵ Ol tok blong Jisas i soemaot se olgeta we oli stap joen wetem kongregesen oli olsem ol sipsip long wan yad. Ol sipsip ya—hemia ol Kristin man, woman, mo pikinini—bambae oli nidim tijing blong Baebol we i olsem kakae blong olgeta, mo oli nidim man blong lukaotgud long olgeta. Mo tu, Jisas i talem long ol man blong hem se oli mas go tijim ol narafala mo pulum olgeta oli kam  disaepol. Taswe ol niufala sipsip bambae oli nidim trening blong mekem wok ya we God i putum long han blong olgeta.—Matiu 28:19, 20.

6. ?Niufala “kongregesen blong God” i folem wanem plan?

⁶ Taem “kongregesen blong God” i stanap finis, ol memba blong hem oli kam wanples oltaem blong kasem tijing mo ol tok blong leftemap tingting blong olgeta. Baebol i talem se: “Oli stap lesin long ol tok ya we ol aposol oli stap tijim olgeta long hem, mo oli stap joen blong kakae wanples . . . mo blong mekem prea, mo oltaem oli strong long ol fasin ya.” (Ol Wok 2:42, 46, 47) Wan moa samting we Baebol i soemaot, hemia se oli putumap sam man we oli naf blong oli mekem ol narafala wok blong kongregesen i save rongud. Oli no jusum ol man ya from we oli skulgud, no from we oli gat gudhan long sam wok, nogat. Oli ‘man we tabu spirit i fulap long olgeta, mo oli waes tu.’ Wan long olgeta hemia Steven. Baebol i talem se hem i ‘wan man we bilif blong hem i strong, mo tabu spirit i fulap long hem.’ Wan gudfala frut we i kamaot long plan ya blong kongregesen, hemia se “tok blong God i stap goaot moa long ol man. Mo grup blong ol man we oli bilif long Jisas i stap kam bigwan moa long Jerusalem.” —Ol Wok 6:1-7.

Ol Man We God i Yusum Olgeta

7, 8. (a) ?Ol aposol mo elda long Jerusalem oli mekem wanem wok long taem blong ol faswan Kristin? (b) ?Tijing we ol kongregesen oli kasem i mekem wanem long olgeta?

⁷ Ol aposol oli lukaot long faswan kongregesen, be i no olgeta nomo. Wan taem, Pol mo samfala we oli wokbaot wetem hem, oli gobak bakegen long Antiok long Siria. Ol Wok 14:27 i talem se: ‘Taem oli kamtru long ples ya bakegen, oli singaot olgeta man blong [kongregesen], blong oli kam wanples. Nao oli talemaot long ol man ya, olgeta samting ya we God i yusum olgeta blong mekem.’ Taem oli stap yet wetem kongregesen ya, wan kwestin i kamaot se: ?Ol Kristin we oli no laen blong Isrel oli mas sakomsaes no nogat? Blong kasem ansa blong kwestin ya, oli sanem Pol mo Banabas i go ‘long ol aposol mo ol elda long Jerusalem.’ I klia se olgeta ya oli wok olsem wan hed kampani. —Ol Wok 15:1-3.

⁸ Kristin elda ya Jemes we i wan brata blong Jisas be i no wan aposol, hem nao i presiden blong ‘miting we ol aposol mo ol elda oli mekem blong tokbaot bisnes ya.’ (Ol Wok 15:6) Afta we oli tingting dip mo toktok tugeta, mo wetem help blong tabu spirit, oli tekem wan desisen we i laenap wetem Baebol. Nao oli sanem wan leta i go long ol kongregesen blong talemaot desisen ya.  (Ol Wok 15:22-32) Taem oli kasem leta ya, oli agri long save ya mo oli obei long hem. ?Wanem i kamaot from? Save ya i leftemap tingting blong ol brata mo sista, mo oli kam strong moa. Baebol i talem se: “Olgeta [“kongregesen,” NW ] oli stap kam strong moa long bilif blong olgeta. Mo evri dei, namba blong olgeta i stap kam antap moa.” —Ol Wok 16:5.

9. ?Baebol i tokbaot wanem wok blong ol Kristin man we oli naf?

⁹ ?Ol wanwan kongregesen oli wok folem wanem plan? Traem tingbaot ol kongregesen we oli stap long aelan blong Krit. Plante man long ples ya oli gat nogud fasin, be samfala oli jenisim fasin blong olgeta mo oli kam ol trufala Kristin. (Taetas 1:10-12; 2:2, 3) Ol Kristin ya oli stap long ol defren taon, longwe long hed kampani long Jerusalem. Be hemia i no wan bigfala problem, from we oli putumap “ol olfala” (NW) long trutok, long ol wanwan kongregesen blong Krit, olsem oli mekem long ol narafala ples. Ol man ya oli kasem ol mak finis we Baebol i talem. Ale, oli putumap olgeta blong oli kam ol elda no ol man blong lukaot long kongregesen. Olgeta ya oli mas ‘tijim ol man long ol stret tok, mo soemaot we ol man we oli stap tok nogud long tok ya oli rong.’ (Taetas 1:5-9; 1 Timoti 3:1-7) Sam narafala oli kam naf blong mekem wok blong man blong givhan no dikon long kongregesen.—1 Timoti 3:8-10, 12, 13.

10. ?Folem Matiu 18:15-17, olsem wanem oli mas stretem ol bigfala problem insaed long kongregesen?

¹⁰ Jisas i soemaot se bambae i gat oda insaed long kongregesen. Tingbaot tok blong hem long Matiu 18:15-17, we i tokbaot problem we i save kamaot bitwin tu man blong God, we maet wan i mekem i no stret long narawan. Jisas i talem se hemia we i harem nogud i mas go luk narawan we i mekem rong long hem, nao taem tufala nomo i stap, hem i mas “talemaot long hem, samting nogud ya we hem i mekem.” Sipos samting ya i no stretem problem ya, hem i save askem wan no tu narafala we oli savegud long bisnes ya blong oli givhan. ?Olsem wanem sipos hemia i no stretem problem ya yet? Jisas i talem se: “Sipos hem i no save lesin long yu yet, yu mas talemaot trabol ya long [“kongregesen,” NW ]. Mo sipos hem i no save lesin long [kongregesen], yu mas mekem long hem olsem we hem i wan hiten man, no wan man blong tekem mane blong takis.” Taem Jisas i talem tok ya, ol man Isrel oli stap yet olsem “kongregesen blong God,” ale ol tok ya i go long olgeta fastaem. * Be taem Kristin kongregesen i stanap, tok ya blong Jisas i stret long kongregesen ya tu. Hemia i soemaot bakegen se i gat wan plan insaed long ol kongregesen blong ol man blong God, blong mekem ol wanwan Kristin oli strong moa, mo blong soemaot stret rod long olgeta.

11. ?Wanem wok blong ol elda taem i gat problem blong stretem?

¹¹ I stret nomo we ol elda no ol man blong lukaot long ol wanwan kongregesen, oli wok long nem blong kongregesen blong harem mo stretem ol problem mo blong lukluk long ol bigfala sin we oli kamaot. Hemia i laenap wetem ol wok we ol elda oli mas naf blong mekem we Taetas 1:9 i tokbaot. Tru ya, ol elda oli no stret olgeta. Taetas tu i no stret olgeta, be Pol i sanem hem i go long ol kongregesen blong i “stretem ol problem.” (Taetas 1:4, 5) Tede, man we oli skelem hem blong luk sipos hem i naf blong kam wan elda, i mas soemaot longtaem finis se hem i gat bilif mo i lavem God. Olsem nao, ol narafala long kongregesen oli save trastem hem se bambae i soemaot stret rod long olgeta mo givim gudfala advaes.

12. ?Wanem wok we ol elda oli mas mekem long kongregesen?

¹² Pol i talem long ol elda long kongregesen blong Efesas se: “Yufala i mas lukaot gud long yufala, mo long ol man ya we Tabu Spirit i putum olgeta oli stap finis long han blong yufala. Yufala i mas lukaot long ol man blong [“kongregesen,” NW ] blong God, olsem we man blong lukaot long sipsip i stap lukaot long ol sipsip blong hem. Yufala i mas mekem olsem, from we God i pemaot ol man ya finis long blad blong Pikinini blong hem.” (Ol Wok 20:28) Tede tu wok blong ol elda i blong “lukaot long ol man blong kongregesen blong God.” Oli mas mekem wok ya wetem lav, oli no mas mekem bigfala masta long ol sipsip. (1 Pita 5:2, 3) Ol man blong lukaot long  kongregesen oli mas traehad blong givhan long ‘ol sipsip’ mo mekem olgeta oli kam strong moa.

Stap Klosap Long Kongregesen

13. ?Sam samtaem, wanem i save hapen insaed long kongregesen, mo from wanem?

¹³ Ol elda mo ol narafala long kongregesen tu oli no stret olgeta, taswe sam samtaem i mas gat sam problem mo defdefren tingting oli kamaot, olsem i bin hapen long faswan handred yia taem sam long ol aposol oli laef yet. (Filipae 4:2, 3) Maet wan elda no wan memba blong kongregesen i talem samting we i spolem narafala, i no kaen, no maet i hafhaf tru nomo. No maet yumi ting se i gat wan samting i stap hapen insaed long kongregesen we i no laenap wetem Baebol, mo i luk olsem se ol elda oli save long hem be oli no stretem. Maet ol elda oli stap stretem bisnes ya no oli stretem finis folem ol tok blong Baebol mo ol stret save we oli gat long saed ya, we yumi no save long hem. Nating sipos tingting blong yumi i stret, be traem tingbaot: I gat wan bigfala nogud fasin i gohed insaed long kongregesen blong Korin bifo, wan kongregesen we Jeova i lavem. Jeova i meksua se long taem we hem i wantem, oli stretem bisnes ya long fasin we i klia mo i stret. (1 Korin 5:1, 5, 9-11) Maet yumi save tingbaot se: ‘?Sipos mi mi stap long Korin long taem ya, wanem tingting blong mi taem mi luk nogud fasin ya we i stap gohed?’

14, 15. ?From wanem samfala oli no moa biaen long Jisas, mo yumi lanem wanem samting from?

¹⁴ Tingbaot wan narafala samting we i save kamaot long kongregesen. Maet wan memba blong kongregesen i faenem i had blong kasem save long wan tijing blong Baebol mo blong agri long hem. Maet hem i bin lukaot plante save long Baebol mo long ol buk we kongregesen i gat, mo i bin askem sam strong Kristin mo sam elda tu blong oli givhan long hem. Be hem i faenem i had yet blong kasem save mo agri long poen ya. ?Hem i save mekem wanem? Samting olsem i bin hapen wan yia bifo we Jisas i ded. Jisas i bin talem se hem i “olsem kakae we i save givim laef,” mo se man we i wantem kasem laef blong olwe, i mas ‘kakae mit blong hem, mo dring blad blong hem.’ Tok ya i mekem sam disaepol blong hem oli sek. Oli no askem long hem blong eksplenem mining blong tok ya, mo oli no glad blong wet nomo wetem bilif gogo mining blong tok ya i kam klia. Plante long olgeta oli girap “oli gowe long [Jisas], oli no moa biaen long hem.” (Jon 6:35, 41-66) ?Bakegen, sipos yu bin stap long taem ya, bambae yu mekem wanem?

¹⁵ Long taem blong yumi tu, samfala oli bin  lego kongregesen, oli ting se oli save wosipim God olgeta nomo. Maet oli talem se wan narafala long kongregesen i mekem i no stret long olgeta, no oli ting se i gat wan nogud fasin i stap gohed we kongregesen i no stretem, no oli no save agri long wan tijing. ?Be, i stret we oli lego kongregesen from? I tru se evri Kristin i mas gat prapa fasin fren blong hem wetem God. Be yumi no save sakemaot trutok ya se Jeova i stap yusum wan kongregesen long fulwol olsem long taem blong ol aposol bifo. Mo tu, Jeova i yusum mo i blesem ol wanwan kongregesen long faswan handred yia, hem i mekem plan se ol elda mo ol man blong givhan oli wok insaed long olgeta. Samting ya i tru yet tede.

16. ?Sipos tingting blong yu i pulum yu blong wantem lego kongregesen, yu mas tingbaot wanem?

¹⁶ Sipos wan Kristin i ting se hem i save stanap long prapa fasin fren blong hem wetem God nomo, hem i stap tanem baksaed long plan we God i stanemap, hemia kongregesen long fulwol mo ol wanwan kongregesen blong ol man blong God. Maet hem i stap hem wan nomo no i stap joen wetem sam narafala. ?Be olsem wanem long plan ya se i mas gat ol elda mo ol man blong givhan? Plan ya i no gat. Wan narafala samting we i impoten, se long leta we Pol i raetem i go long kongregesen blong Kolosi mo we oli mas ridimaot long Laodisia tu, hem i tokbaot we oli mas ‘holem [Kraes] strong, olsem we rus blong tri i holem graon, mo laef blong olgeta i mas stanap long [Kraes].’ Olgeta we oli stap joen wetem tufala kongregesen ya olgeta nomo oli kasem ol gudfala save ya, be i no olgeta we oli seraot long kongregesen.—Kolosi 2:6, 7; 4:16.

Holem Trutok i Stap Gud, Mo Blokem Ol Enemi

17. ?Fas Timoti 3:15 i soemaot wanem long saed blong kongregesen?

¹⁷ Long fas leta we aposol Pol i raetem long Kristin elda ya Timoti, hem i talem ol fasin we ol man oli mas gat blong oli save kam elda no man blong givhan long kongregesen. Afta, Pol i tokbaot “[“kongregesen,” NW ] blong God ya we i laef, i stap we i stap,” mo i talem se kongregesen ya i ‘holem trutok i stap gud, mo i blokem ol enemi blong hem.’ (1 Timoti 3:15) Long faswan handred yia, fulwan kongregesen blong ol tabu Kristin oli holem trutok i stap gud olsem. Mo i no gat man i save agensem poen ya se bigfala rod blong ol wanwan Kristin oli kasem ol trutok ya, hem i tru long kongregesen blong olgeta. Long ples ya nao oli save kasem tijing long trutok mo harem ol tok blong blokem ol enemi blong trutok. Mo long ples ya oli save kasem ol tok we i mekem olgeta oli strong.

18. ?From wanem yumi nidim ol miting blong kongregesen?

¹⁸ Long sem fasin, Kristin kongregesen long fulwol i famle blong God we ‘i holem trutok i stap gud, mo i blokem ol enemi blong hem.’ Fasin blong go long ol miting long kongregesen blong yumi mo joen blong ansa long ol miting, hem i wan nambawan rod blong kam strong moa, fren moa wetem God, mo reregud blong mekem wok blong hem. Pol i raetem leta i go long kongregesen long Korin, long saed blong ol tok we i kamaot long ol miting. Hem i talem se ol tok ya i mas klia mo isi blong kasem save long hem, olsem nao i save mekem olgeta we oli stap long ol miting oli “strong moa.” (1 Korin 14:12, 17-19, NW ) Tede yumi save kam strong moa sipos yumi luksave plan blong Jeova God blong gat ol wanwan kongregesen mo sipos yumi sapotem plan ya.

19. ?From wanem yu mas talem bigfala tangkiu long kongregesen?

¹⁹ Tru ya, sipos yumi wantem kam strong moa long Kristin laef blong yumi, yumi mas stap oltaem insaed long kongregesen. Longtaem finis i kam, kongregesen i protektem ol Kristin long ol giaman tijing, mo God i yusum kongregesen blong talemaot gud nius blong Kingdom blong Mesaea long olgeta ples blong wol. Yes, i klia se God i yusum finis Kristin kongregesen blong mekem plante wok.—Efesas 3:9, 10.

[Futnot]

?Yu Yu Save Tingbaot?

• ?From wanem yumi save se God i stap yusum ol kongregesen long wol ya?

• ?Nating we ol elda oli no stret olgeta, be oli mekem wanem blong givhan long kongregesen?

• ?Olsem wanem kongregesen blong yu i stap mekem yu yu strong moa?

[Kwestin]

[Tok blong pija long pej 10]

Ol aposol mo elda long Jerusalem oli wok olsem wan hed kampani

[Tok blong pija long pej 12]

Ol elda mo ol man blong givhan oli kasem tijing blong oli save mekemgud wok blong olgeta long kongregesen