Kongregesen Bambae i Presem Jeova

“God. Mi bambae mi talemaot long ol brata mo sista blong mi ol samting ya we yu bin mekem. Bambae mi mi presem yu long [“medel blong kongregesen,” NW ].”—HIBRUS 2:12.

1, 2. ?From wanem kongregesen i gud tumas, mo wanem bigfala risen blong hem?

 LONG olgeta yia we i pas, ol wanwan man mo woman oli faenem fasin fren mo sefples insaed long famle. Be Baebol i tokbaot wan narafala grup we fulap man mo woman long olgeta ples blong wol oli stap haremgud long hem, oli stap faenem ol trufala fren mo sefples insaed long hem. Grup ya hemia Kristin kongregesen. Nomata sipos yu stap long wan famle we i lavem yu mo i givhan gud long yu no nogat, yu save gat tangkiu mo yu mas gat tangkiu from kongregesen mo from ol samting we God i givim long yu tru long kongregesen. Sipos yu stap joen wetem wan kongregesen blong ol Witnes blong Jeova, ating yu save finis nambawan kampani blong ol Kristin brata sista mo filing blong stap sefgud we yu kasem long hem.

² Kongregesen i no wan ples blong joen wetem ol fren nomo. Hem i no wan klab we ol man we oli gat semkaen laef no semkaen intres long saed blong spot no narafala samting, oli kam joen wanples, nogat. Bigfala risen blong kongregesen i blong presem Jeova God. Hemia i olsem longtaem finis i kam, olsem buk blong Ol Sam i soemaot. Long Ol Sam 35:18 yumi ridim se: “Bambae mi talem tangkiu long yu long [“bigfala kongregesen,” NW ], bambae mi presem yu long fes blong olgeta evriwan.” Long sem fasin, Ol Sam 107:31, 32 i pulum yumi se: “I gud [ol man] oli talem tangkiu long Hae God from fasin blong hem we oltaem hem i lavem olgeta tumas, mo from ol bigbigfala samting we hem i stap mekem blong givhan long olgeta. I gud olgeta oli leftemap hae nem blong hem long medel blong [“kongregesen,” NW ].”

3. ?Folem tok blong Pol, wanem wok blong kongregesen?

³ Kristin aposol Pol i tokbaot wan narafala impoten wok blong kongregesen taem i talem se kongregesen i ‘famle blong God, kongregesen blong God ya we i laef, bigfala pos blong mekem trutok i stap strong, mo blong sapotem trutok.’ (1 Timoti 3:15, NW ) ?Pol i stap tokbaot wanem kongregesen? ?Wanem mining blong tok ya “kongregesen” long Baebol? ?Mo olsem wanem kongregesen i gat paoa long laef mo fiuja blong yumi? Blong faenem ansa blong ol kwestin ya, bambae yumi luk olsem wanem Baebol i yusum tok ya “kongregesen.”

4. ?Klosap oltaem Hibru haf blong Baebol i yusum tok ya “kongregesen” olsem wanem?

⁴ Hibru tok we plante taem oli tanem i kam “kongregesen” i rili minim “tekem ol man oli kam wanples” no “hivap wanples.” (Dutronome 4:10; 9:10) Wan man we i raetem Ol Sam i yusum tok ya “kongregesen” blong tokbaot kampani blong ol enjel long heven, mo oli save yusum tok ya blong tokbaot wan grup blong rabis man tu. (Ol Sam 26: 5, NW; 89:5-7, NW ) Be, klosap oltaem Hibru haf blong Baebol i yusum tok ya blong tokbaot ol man Isrel. God i talem se Jekob bambae i “kam wan kongregesen,” mo samting ya i hapen. (Jenesis 28:3, NW; 35:11, NW; 48:4, NW ) Jeova i singaot ol man Isrel no i jusumaot olgeta blong oli kam ‘kongregesen blong hem,’ “kongregesen blong trufala God.”—Namba 20:4, NW; Nehemaea 13:1, NW; Josua 8:35, NW; 1 Samuel 17:47, NW; Maeka 5:2, NW.

5. ?Wanem Grik tok we klosap oltaem oli tanem i kam “kongregesen,” mo tok ya i save minim wanem?

⁵ Grik tok we oli tanem i kam “kongregesen” hemia ek·kle·siʹa, mo tok ya i kamaot long tufala Grik tok we tufala i minim “aot” mo “singaot.” Tok ya i save minim wan grup we i joen wanples from enikaen risen, olsem olgeta we oli joen long “miting ya” we Demetrius i mekem long Efesas blong girap agensem Pol. (Ol Wok 19:32, 39, 41) Be klosap oltaem Baebol i yusum tok ya blong minim Kristin kongregesen. Long sam Baebol oli tanem tok ya i kam “jos.” Be wan diksonari blong Baebol (The Imperial Bible-Dictionary) i talem se tok ya “i neva . . . minim haos we ol Kristin oli joen long hem blong mekem wosip.” Nating se i olsem, long Kristin Grik haf blong Baebol yumi faenem se tok ya “kongregesen” i gat fo mining.

Kongregesen Blong God We Tabu Spirit i Makemaot

6. ?Deved mo Jisas tufala i mekem wanem long kongregesen?

⁶ Taem aposol Pol i stap tokbaot Jisas, hem i talem bakegen ol tok blong Deved long Ol Sam 22:22. Pol i talem se: “God. Mi bambae mi talemaot long ol brata mo sista blong mi ol samting ya we yu bin mekem. Bambae mi mi presem yu long [“medel blong kongregesen,” NW ]. . . . Fastaem [Jisas] i kam stret olsem ol brata ya mo ol sista ya blong hem, blong hem bambae i save gat sore long olgeta, mo blong olgeta bambae oli save trastem hem. Taswe hem i save mekem ol wok blong hem, we hem i Hae Pris blong olgeta.” (Hibrus 2:12, 17) Deved i presem God long medel blong kongregesen blong Isrel bifo. (Ol Sam 40:9, NW ) ?Be Pol i stap tokbaot wanem, taem i talem se Jisas i presem God “long medel blong kongregesen”? ?Wanem kongregesen?

7. ?Wanem faswan mining blong tok ya “kongregesen” long Kristin Grik haf blong Baebol?

⁷ Tok blong Hibrus 2:12, 17 i gat bigfala mining. Tok ya i soemaot se Kraes i talemaot nem blong God long kongregesen blong ol brata mo sista blong hem, mo se hem i wan memba blong kongregesen ya tu. ?Hu ya ol brata mo sista ya? Hemia “laen blong Ebraham” no ol brata blong Kraes we tabu spirit i makemaot olgeta mo ‘God i singaot olgeta’ blong oli kasem gudfala laef long heven. (Hibrus 2:16–3:1; Matiu 25:40) Yes, faswan mining blong tok ya “kongregesen” long Kristin Grik haf blong Baebol, hemia fulwan grup blong ol man blong Kraes we tabu spirit i makemaot olgeta. Ol 144,000 tabu man ya oli mekemap “[“kongregesen,” NW ] blong God, we oli olsem ol fasbon blong hem, we nem blong olgeta i stap long heven finis.”—Hibrus 12:23.

8. ?Jisas i talem wanem blong soemaot se wan Kristin kongregesen bambae i stanap?

⁸ Jisas i soemaot se wan Kristin “kongregesen” bambae i stanap. Wan yia bifo we hem i ded, hem i talem long wan aposol blong hem se: “Mi mi talem long yu, se yu Pita . . . mo bambae mi mi stanemap [“kongregesen,” NW ] blong mi long ston ya, mo paoa blong ded bambae i no naf blong winim.” (Matiu 16:18) Pita mo Pol tugeta i kasem save se Jisas nao i ston ya. Long leta blong Pita, hem i tokbaot “ol ston we oli laef” long wan haos long saed blong spirit we i stanap long bigfala ston ya Kraes. Hem i talem se ol ston ya oli ‘ol man we oli blong God nomo, blong oli save talemaot ol gudgudfala wok ‘ or ’ ? blong Hemia we i singaot olgeta.—1 Pita 2:4-9, NW; Ol Sam 118:22, NW; Aesea 8:14; 1 Korin 10:1-4.

9. ?Wetaem kongregesen blong God i stanap?

⁹ ?Wetaem ‘ol man ya we oli blong God nomo’ oli hivap i kam Kristin kongregesen? Hemia long lafet blong Pentekos long yia 33 K.T., * taem God i kafsaedem tabu spirit i go long ol disaepol we oli joen wanples long Jerusalem. Long sem dei ya, Pita i givim wan nambawan tok long wan grup blong ol man Jiu mo ol proselaet. Taem hem i tokbaot ded blong Jisas, tok ya i stikim hat blong plante, mo i pulum olgeta blong tanem tingting blong olgeta mo tekem baptaes. Baebol i talem se tri taosen man i tekem baptaes. Taem oli mekem  olsem, oli joen long niufala kongregesen blong God we i stap gru. (Ol Wok 2:1-4, 14, 37-47) Kongregesen ya i stap kam bigwan from we plante moa Jiu mo proselaet oli no moa ting se ol prapa man Isrel oli kongregesen blong God. Ol Kristin we tabu spirit i makemaot olgeta no “Isrel blong God,” olgeta nao oli kam trufala kongregesen blong God.—Galesia 6:16, NW; Ol Wok 20:28.

10. ?Jisas i mekem wanem wok long kongregesen blong God?

¹⁰ Plante taem Baebol i no joenem Jisas insaed long grup blong ol tabu man. Wan eksampol blong samting ya, hemia vas ya we i tokbaot ‘fasin blong Kraes wetem [“kongregesen,” NW ].’ Jisas i Hed blong kongregesen blong ol Kristin we tabu spirit i makemaot. Pol i talem se God i “putumap Kraes blong i hed blong [“kongregesen,” NW ], . . . [we] i bodi blong Kraes.” (Efesas 1:22, 23; 5:23, 32; Kolosi 1:18, 24) Tede, i gat wan smol grup blong ol tabu memba blong kongregesen nomo we oli stap yet long wol. Be yumi save se Hed blong olgeta, Jisas Kraes, i lavem olgeta. Efesas 5:25 i soemaot filing blong hem long olgeta, i se: “Kraes i lavem [“kongregesen,” NW ] ya. Taswe hem i letem laef blong hem, blong sevem” olgeta. Hem i lavem ol memba blong kongregesen ya from we oli bisi oltaem blong mekem samting we Jisas i bin mekem taem hem i stap long wol. Olsem nao, oli ‘leftemap nem blong God olsem we oli mekem sakrefaes blong givim long hem, mo oli talemaot nem blong Jisas long fes blong ol man, olsem we oli givim presen i go long God.’—Hibrus 13:15.

Ol Narafala Mining Blong Tok Ya “Kongregesen”

11. ?Wanem narafala mining blong tok ya “kongregesen” we yumi faenem long Kristin Grik haf blong Baebol?

¹¹ Sam samtaem, Baebol i yusum tok ya “kongregesen” blong minim samting we i smol moa, i no fulnamba blong 144,000 tabu man long “kongregesen blong God.” Olsem nao, Pol i raet i go long wan grup blong ol Kristin se: “Yufala i no mas mekem we bambae ol laen blong Isrel, no olgeta we oli no laen blong Isrel, no ol man blong [“kongregesen,” NW ] blong God oli save trabol long fasin blong yufala.” (1 Korin 10:32) I klia se, sipos wan Kristin long Korin bifo i mekem samting we i no stret, tingting blong samfala i save trabol from. ?Be ol man Gris, ol man Isrel, mo ol tabu man long taem bifo kam kasem tede, bambae oli harem nogud from? Nogat. Taswe, i luk olsem se long vas ya, tok ya “kongregesen blong God,” i minim ol Kristin we oli laef long ol semfala yia. Olsem nao, sipos yumi talem se God i lidim, halpem, mo blesem kongregesen, yumi save minim se God i mekem olsemia long ol Kristin we oli laef long ol semfala yia, nomata weples oli stap long hem. Mo  sipos yumi tokbaot glad mo pis we i stap long kongregesen blong God tede, yumi save minim kampani blong ol Kristin long fulwol.

12. ?Wanem namba tri mining blong tok ya “kongregesen” long Baebol?

¹² Namba tri mining blong tok ya “kongregesen” long Baebol, hemia olgeta Kristin we oli stap long semfala eria. Baebol i talem se: “Ol man blong [“kongregesen,” NW ] olbaot long evri ples long Judia, mo long Galili, mo long Sameria oli stap gud we i no moa gat man i spolem olgeta.” (Ol Wok 9:31) I gat bitim wan grup blong ol Kristin long bigfala eria ya. Be vas ya i kolem ol Kristin long Judia, Galili, mo Sameria, olgeta evriwan se “kongregesen.” From we plante oli tekem baptaes long Pentekos long yia 33 K.T. mo smoltaem biaen, maet i gat plante grup blong ol Kristin we oli stap joen long ol defren ples long Jerusalem tu. (Ol Wok 2:41, 46, 47; 4:4; 6:1, 7) Ol tok blong 1 Tesalonaeka 2:14 (NW) i soemaot se long yia 50 K.T., i gat bitim wan kongregesen long Judia. Taswe taem Baebol i tokbaot Herod Agripa I we i rul long Judia gogo kasem ded blong hem long yia 44 K.T., se hem i “mekem i strong tumas long sam man blong [“kongregesen,” NW ],” maet i no minim nomo wan grup long Jerusalem be maet i minim plante grup we oli stap olbaot long Jerusalem. —Ol Wok 12:1.

13. ?Wanem namba fo mining blong “kongregesen” long Baebol we yumi yusum plante taem?

¹³ Namba fo mining blong tok ya “kongregesen” i smol moa bakegen mo yumi stap yusum mining ya plante taem. Hemia ol Kristin long lokol kongregesen, we maet oli miting long haos blong wan man nomo. Pol i tokbaot “[“ol kongregesen,” NW ] long Galesia.” I gat bitim wan kongregesen long Galesia, bigfala provins ya blong ol man Rom. Tu taem Pol i tokbaot “ol kongregesen” long Galesia, hemia i minim ol kongregesen blong Antiok, Debe, Listra, mo Ikoniam tu. Long ol wanwan kongregesen ya, oli putumap ol man we ol fasin blong olgeta oli laenap wetem ol fasin we Baebol i talem, blong oli kam ol elda no man blong lukaot long kongregesen. (1 Korin 16:1; Galesia 1:2; Ol Wok 14:19-23) Folem ol tok blong Baebol, ol grup ya oli “ol kongregesen blong God.”—1 Korin 11:16, NW; 2 Tesalonaeka 1:4, NW.

14. ?Yumi lanem wanem from tok ya “kongregesen” long sam vas blong Baebol?

¹⁴ Long sam ples, ating grup we i joen long Kristin miting i smol, i naf blong joen long haos blong wan man nomo. Nating se i olsem, oli singaotem sam grup olsem se “ol kongregesen.” Baebol i tokbaot kongregesen long haos blong Akwila mo Prisila, Nimfa, mo Filimon. (Rom 16:3-5, NW; Kolosi 4:15, NW; Filimon 2, NW ) Ol tok ya blong Baebol i mas leftemap tingting blong ol kongregesen tede we oli smol mo we oli stap mekem miting long  haos blong wan man nomo. Long faswan handred yia, Jeova i luksave ol smol kongregesen olsem, mo hem i luksave olgeta tede tu. Hem i givim spirit blong hem long olgeta blong blesem olgeta.

Ol Kongregesen Oli Presem Jeova

15. ?Tabu spirit i mekem wanem samting i kamaot long sam kongregesen bifo?

¹⁵ Yumi tokbaot finis se Jisas i mekem Ol Sam 22:22 i kamtru taem hem i presem God long medel blong kongregesen. (Hibrus 2:12, NW ) Ol man we oli folem hem oli mas mekem sem samting ya. Long faswan handred yia, taem tabu spirit i makemaot ol trufala Kristin blong oli kam ol pikinini blong God mo ol brata blong Kraes, sam long olgeta oli kasem spesel paoa we i kamaot long tabu spirit. Spirit i givim wan presen no wan spesel paoa long olgeta, olsem tok blong waes mo tok blong save, paoa blong oli mekem sikman i gud bakegen, paoa blong talemaot ol tok we God i givim, mo paoa blong tok long ol narafala lanwis.—1 Korin 12:4-11.

16. ?Wanem wan bigfala risen blong ol presen we tabu spirit i givim long sam man?

¹⁶ Long saed blong paoa ya blong tok long narafala lanwis, Pol i talem se: “Bambae mi singsing blong presem God wetem presen ya we tabu spirit i givim, be bambae mi singsing tu blong presem God wetem tingting blong mi.” (1 Korin 14:15, NW ) Pol i luksave se i impoten we ol narafala oli kasem save long tok blong hem mo lanem samting from. Bigfala tingting blong Pol i blong presem Jeova insaed long kongregesen. Hem i talem long ol narafala we oli kasem ol presen blong tabu spirit i se: “Nao from we yufala i wantem tumas ol paoa ya we Tabu Spirit i save givim, yufala i mas gohed moa blong yusum ol paoa ya we oli save mekem ol man blong [“kongregesen,” NW ] oli strong.” Hem i stap tokbaot lokol kongregesen we oli stap long hem mo we oli yusum spesel paoa ya long hem. (1 Korin 14:4, 5, 12, 23) I klia se Pol i intres long ol wanwan kongregesen long ples blong hem. Hem i save se long ol wanwan kongregesen ya, ol Kristin oli gat plante janis blong presem God.

17. ?Yumi save sua long wanem samting long saed blong ol wanwan kongregesen tede?

¹⁷ Tede Jeova i stap gohed blong yusum mo givhan long kongregesen blong hem. Hem i blesem fulwan grup blong ol tabu Kristin long wol tede. Yumi luksave samting ya, taem yumi luk olsem wanem hem i givim fulap gudfala kakae long saed blong spirit, blong ol man blong hem tede oli haremgud long hem. (Luk 12:42) Hem i blesem ful kampani blong ol Kristin long wol. Mo hem i blesem ol wanwan kongregesen blong yumi, we yumi presem hem long olgeta taem yumi mekem ol gudfala fasin mo taem yumi givim ol gudfala ansa long miting we oli mekem bilif blong ol narafala i strong. Long kongregesen yumi kasem tijing mo trening, nao yumi save presem God oltaem long laef blong yumi, taem yumi no stap long medel blong ol Kristin long kongregesen blong yumi tu.

18, 19. ?Ol gudfala Kristin long ol wanwan kongregesen oli wantem mekem wanem?

¹⁸ Tingbaot we aposol Pol i talem long ol Kristin long kongregesen blong Filipae long Masedonia se: “Mi mi stap prea we oltaem . . . long laef blong yufala, bambae yufala i gat ol stret fasin ya we Jisas Kraes i save mekem i kamtru long laef blong yumi, blong yumi save presem God, mo blong yumi save leftemap nem blong hem i go antap oltaem.” Hemia i minim tu se oli mas toktok long ol narafala afsaed long kongregesen long saed blong bilif blong olgeta long Jisas Kraes mo gudfala fiuja we oli putum tingting blong olgeta i stap strong long hem. (Filipae 1:9-11; 3:8-11) Taswe, Pol i talem long ol Kristin brata sista blong hem se: “Oltaem yumi mas joen long Jisas, mo yumi mas leftemap nem blong God. Fasin ya i olsem we oltaem yumi stap mekem sakrefaes blong givim long hem. Evritaem, taem yumi talemaot nem blong Jisas long fes blong ol man, i olsem we yumi givim presen i go long God.”—Hibrus 13:15.

¹⁹ ?Olsem wanem? ?Yu yu haremgud tumas blong presem God “long medel blong kongregesen” olsem Jisas i mekem, mo blong yusum maot blong yu blong presem Jeova long fes blong ol man we oli no save hem yet mo oli no presem hem yet? (Hibrus 2:12, NW; Rom 15:9-11) Maet ansa blong yumi i dipen long tingting blong yumi long saed blong wok we ol wanwan kongregesen oli mekem long plan blong God. Long nekis stadi, bambae yumi tokbaot olsem wanem Jeova i stap lidim mo yusum ol wanwan kongregesen ya, mo olsem wanem kongregesen i joen wetem laef blong yumi tede.

[Futnot]

?Yu Yu Tingbaot?

• ?Olsem wanem “kongregesen blong God” we i minim ol tabu Kristin, i stat?

• ?Wanem tri narafala mining blong tok ya “kongregesen” long Baebol?

• ?Deved, Jisas, mo ol Kristin long faswan handred yia, oli wantem mekem wanem insaed long kongregesen, mo samting ya i mas mekem wanem long yumi?

[Kwestin]

[Tok blong pija long pej 3]

?Jisas i fandesen blong wanem kongregesen?

[Tok blong pija long pej 5]

Ol lokol grup blong ol Kristin oli joen wanples olsem “ol kongregesen blong God”

[Tok blong pija long pej 6]

Olsem ol Kristin long Benin, yumi save presem Jeova long medel blong kongregesen