Letem Tok Blong God i Lidim Yu
Letem Tok Blong God i Lidim Yu
“Tok blong yu i olsem wan tos we i tosem ples we mi mas putum leg blong mi long hem, mo i olsem wan laet we i saenem rod long fored blong mi.”—OL SAM 119:105, NW.
1, 2. ?From wanem bighaf blong ol man oli no save faenem trufala pis mo glad?
?YU SAVE tingbaot wan taem we yu bin askem long wan man blong i soemaot stret rod long yu? Ating yu stap klosap long ples we yu wantem go long hem, be yu no sua weswan rod stret nao we yu mas folem. No maet yu bin lusum rod olgeta nao yu mas tanemraon mo go long wan narafala rod. Nating se i olsem wanem, yu yu waes sipos yu folem advaes blong wan man we i savegud ples ya. Man olsem i save givhan long yu blong kasem ples we yu yu wantem go long hem.
2 Plante taosen yia finis, ol man oli traem blong faenem stret rod blong wokbaot long hem. Be oli no lukaot help blong God. Taem God i no lidim olgeta, oli lusum rod from we oli sinman. Oli no save faenem rod blong kasem trufala pis mo glad. ?From wanem oli no save kasem mak ya? Bitim 2,500 yia bifo, profet Jeremaea i talem se: “Man i no naf blong jusum wanem rod hem i mas wokbaot long hem.” (Jeremaea 10:23, NW ) Man we i wokbaot folem prapa tingting blong hem mo i no wantem lesin long advaes blong narafala we i gat moa save, hem i mas kasem trabol. !Tru ya, ol man oli nidim help blong oli save wokbaot stret!
3. ?From wanem Jeova God i save halpem yumi moa bitim ol narafala blong yumi wokbaot stret? ?Mo hem i mekem wanem promes long yumi?
3 Jeova God i beswan man blong halpem yumi blong wokbaot stret. ?From wanem? From we hem i kasem save gud long ol man, i no gat wan narafala we i save ol man olsem hem. Mo hem i savegud wanem i bin hapen we i mekem se ol man oli lusum rod. Hem i save tu, wanem we ol man oli nidim blong kambak long stret rod. Mo tu, Jeova i wokem yumi, taswe oltaem hem i save wanem samting we i moagud long yumi. (Aesea 48:17) From samting ya, yumi save trastem promes blong Jeova fulwan, long Ol Sam 32:8: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” Yumi save sua long samting ya. Jeova nao i beswan blong lidim yumi. ?Be hem i lidim yumi olsem wanem?
4, 5. ?Olsem wanem ol tok blong God i save lidim yumi?
4 Wan man blong raetem Ol Sam i prea long Jeova se: “Tok blong yu i olsem wan tos we i tosem ples we mi mas putum leg blong mi long hem, mo i olsem wan laet we i saenem rod long fored blong mi.” (Ol Sam 119:105, NW ) Ol tok blong God mo ol woning blong hem, yumi faenem long Baebol. Oli save halpem yumi blong winim ol trabol we oli blokem rod blong yumi. Tru ya, taem yumi ridim Baebol mo yumi letem ol tok blong hem i lidim yumi, Aesea 30:21 i kamtru long yumi: “Bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’ ”
5 Makemgud tufala wok ya we Ol Sam 119:105 i talem se Tok blong God i mekem. Faswan wok: Tok blong God i olsem wan tos we i tosem ples we yumi mas putum leg blong yumi long hem. Taem yumi fesem ol defren trabol evri dei, ol rul blong Baebol oli mas lidim yumi, nao yumi save mekem ol waes desisen mo yumi no foldaon long ol trap blong wol ya. Seken wok: Tok blong God i olsem wan laet we i saenem rod long fored blong yumi. Hem i givhan long yumi blong mekem ol gudfala jus long laef, ol jus we oli laenap wetem fiuja we yumi putum tingting blong yumi i stap strong long hem, hemia laef we i no save finis long Paradaes we God i promes blong mekem. Taem laet i saenem gud rod long fored blong yumi, yumi naf blong luksave gudfala frut no nogud frut we bambae yumi kasem long wan rod we yumi jusum. (Rom 14:21; 1 Timoti 6:9; Revelesen 22:12) Naoia, bambae yumi tokbaot moa, olsem wanem ol tok blong God long Baebol i save tosem ples we yumi mas putum leg blong yumi long hem mo saenem rod we i stap long fored blong yumi.
“Tos We i Tosem Ples We Mi Mas Putum Leg Blong Mi Long Hem”
6. ?Wetaem ol tok blong God i save tosem ples we yumi mas putum leg blong yumi long hem?
6 Evri dei yumi mekem plante desisen. Sam desisen oli smol, be maet wanwan taem yumi fesem wan traem we i save pulum yumi blong mekem rabis fasin long saed blong seks, giaman no stil, joen long faet no politik. Blong winim ol traem ya, yumi mas trenem tingting blong yumi ‘longtaem finis, nao bambae yumi naf blong jusumaot wanem fasin i gud mo wanem fasin i nogud.’ (Hibrus 5:14) Sipos yumi stap traehad blong kasem stret save blong Tok blong God mo blong gat klia tingting long ol rul blong hem, yumi stap trenem tingting blong yumi blong lidim yumi blong mekem ol gudfala desisen we Jeova i glad long olgeta.—Ol Proveb 3:21.
7. Tokbaot wan samting we i save hapen blong pulum wan Kristin blong kampani moa wetem ol man we hem i wok wetem olgeta we oli no gat bilif.
7 Tingbaot wan samting we i save hapen. Ating yu yu wan bigman finis mo yu stap traehad fulwan blong mekem Jeova i glad. (Ol Proveb 27:11) Hemia i gud tumas. ?Be olsem wanem nao sipos samfala we yu wok wetem olgeta oli wantem pem wan tiket blong yu, blong go wetem olgeta blong wajem spot? Oli laekem kampani blong yu long wok mo oli wantem kampani moa wetem yu afsaed long ples blong wok. Maet yu gat strong tingting se olgeta ya oli no ol rabis man. Ating oli gat sam gudfala fasin. ?Bambae yu mekem wanem? ?Sipos yu talem ‘yes’ long olgeta, bambae yu kasem trabol? ?Olsem wanem Tok blong God i save givhan long yu blong mekem wan gudfala desisen?
8. ?Wanem ol rul blong Baebol we oli givhan long yumi blong tingtinggud long bisnes ya blong ol man we yumi save kampani wetem olgeta?
8 Tingbaot sam rul blong Baebol. Ating faswan rul we yu tingbaot, hemia 1 Korin 15:33 we i talem se: “Ol stret man nomo, be ol fren blong olgeta we oli no stret, oli save spolem fasin blong olgeta.” ?Hemia i min se yumi neva mas joen wetem wan man we i no gat bilif? Baebol i no talem olsem. Aposol Pol i soemaot lav mo i tingbaot “ol man we oli gat ol defdefren kaen fasin,” wetem ol man we oli no gat bilif tu. (1 Korin 9:22) Blong folem Kristin skul, yumi mas soemaot intres long ol narafala—wetem olgeta ya tu we oli no gat sem bilif olsem yumi. (Rom 10:13-15) ?Sipos yumi stap longwe long ol man we maet oli nidim help blong yumi, olsem wanem yumi save folem advaes ya blong “mekem i gud long olgeta man”?—Galesia 6:10.
9. ?Wanem advaes blong Baebol i givhan long yumi blong no fren bitim mak wetem ol man we yumi wok wetem?
9 Soem fasin fren long wan man we yumi wok wetem hem, i defren olgeta long fasin blong kam bes fren blong hem. I gat wan narafala rul blong Baebol we i joen wetem bisnes ya. Aposol Pol i givim woning long ol Kristin se: “Bambae yufala i no go joen wetem ol man we oli no Kristin, blong mekem wan wok, olsem we man i putum yok long tufala buluk blong mekem tufala i wok wanples.” (2 Korin 6:14) ?Wanem mining blong tok ya “olsem we man i putum yok long tufala buluk blong mekem tufala i wok wanples”? Sam narafala Baebol oli talem se “no mekem wan tim,” “no wok tugeta olsem we yutufala i patna,” mo “no mekem fasin fren we i no stret.” ?Ale, yu save fren wetem wan man long wok go kasem wanem mak, bifo we fasin fren ya i no stret? ?Wetaem fasin fren ya i kam olsem we oli putum yok long tu buluk blong tufala i wok wanples? Tok blong God Baebol i save tosem ples we yumi mas putum leg blong yumi long hem.
10. (a) ?Wanem kaen man we Jisas i jusum blong kam gudfren blong olgeta? (b) ?Wanem ol kwestin we oli save givhan long yumi blong mekem gudfala desisen long saed blong ol fren?
10 Tingbaot fasin blong Jisas, we hem i laekem ol man stat long taem blong faswan man kam kasem tede. (Ol Proveb 8:31) Taem Jisas i stap long wol, hem i kam gud fren blong ol man we oli folem hem. (Jon 13:1) Wan man we skul blong hem i lidim hem i gorong, be hem tu, Jisas i filim se i “lavem” hem. (Mak 10:17-22) Nating se i olsem, Jisas i folem ol strong rul long saed blong ol man we hem i jusum blong kam gudfala fren blong olgeta. Hem i no frengud wetem ol man we oli no traehad blong mekem samting we Papa blong hem i wantem. Wan taem, Jisas i talem se: “Sipos yufala i stap mekem ol samting we mi mi talem long yufala, yufala i fren blong mi.” (Jon 15:14) I tru, ating yu stap joengud wetem wan man long wok. Be traem tingbaot: ‘?Man ya i wantem mekem samting we Jisas i talem? ?Hem i wantem kasem save long Jeova, God ya we Jisas i talem long yumi blong mekem wosip long hem? ?Man ya i folem ol rul long saed blong seks, olsem mi mo ol narafala Kristin?’ (Matiu 4:10) Taem yu stap storian wetem ol man we yu wok wetem olgeta mo yu holemstrong long ol rul blong Baebol, bambae yu luksave ansa blong ol kwestin ya.
11. Tokbaot sam traem we yumi mas letem Tok blong God i tosem ples we yumi putum leg blong yumi long hem.
11 I gat plante narafala desisen long laef blong yumi we Tok blong God i save tosem ples we yumi mas putum leg blong yumi long hem. Tingbaot wan Kristin we i no gat wok, nao wan man i talem long hem blong kam wok blong hem. Kristin ya i rili nidim wok ya. Be maet hem i mas wok plante aoa. Mo sipos hem i tekem wok ya, bambae hem i mestem sam Kristin miting mo sam narafala wok we i joen wetem trufala wosip. (Ol Sam 37:25) Wan narafala Kristin, ating tingting blong hem i pulum hem blong wantem wajem wan sinema we i klia se hem i agensem ol rul blong Baebol. (Efesas 4:17-19) Wan narafala Kristin bakegen, ating hem i harem nogud mo i kros kwiktaem from ol mastik mo slak fasin blong ol Kristin brata sista blong hem. (Kolosi 3:13) Long olgeta traem ya, yumi mas letem Tok blong God i tosem ples we yumi mas putum leg blong yumi long hem. Sipos yumi folem ol rul blong Baebol, yumi save winim evri traem long laef. Tok blong God “i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.”—2 Timoti 3:16.
“Laet We i Saenem Rod Long Fored Blong Mi”
12. ?Olsem wanem Tok blong God i olsem wan laet we i saenem rod long fored blong yumi?
12 Ol Sam 119:105 i talem tu se tok blong God i olsem wan laet we i saenem rod long fored blong yumi. Yumi no stap long tudak long saed blong ol samting we bambae i hapen long fiuja. Yumi gat save from we Baebol i eksplenem mining blong ol trabol long wol mo wanem bambae i kamaot from. Yes, yumi luksave se yumi stap long “ol las dei” blong rabis fasin blong wol ya. (2 Timoti 3:1-5, NW ) Save long saed blong fiuja i mas gat bigfala paoa long fasin blong laef blong yumi. Aposol Pita i raetem se: “From we olgeta samting ya bambae oli lus . . . yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik.”—2 Pita 3:11, 12.
13. ?Olsem wanem bilif ya se yumi stap klosap tumas long en i mas gat paoa long tingting mo fasin blong laef blong yumi?
13 Ol tingting blong yumi mo fasin blong laef blong yumi i mas soemaot we yumi bilif strong se “wol ya wetem ol samting we ol man blong hem oli wantem, oli stap lus.” (1 Jon 2:17) Advaes blong Baebol bambae i givhan long yumi blong mekem ol waes desisen long saed blong ol mak we yumi wantem kasem long fiuja. Olsem nao, Jisas i givim advaes ya se: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Matiu 6:33) !I gud tumas blong luk plante yangfala we oli mekem wok blong prij fultaem from we oli bilif long ol tok ya blong Jisas! Samfala wetem sam famle tu, oli muv i go long narafala kantri we i gat bigfala nid blong ol man blong talemaot Kingdom.
14. ?Olsem wanem wan Kristin famle i mekem moa long wok blong prij?
14 Wan Kristin famle we i gat fo memba blong hem, i aot long Yunaeted Stet i go long Dominikan Ripablik blong wok wetem wan kongregesen long wan taon we i gat 50,000 man long hem. I gat 130 pablisa blong Kingdom long kongregesen ya. !Be long Eprel 12, 2006, samwe long 1,300 man oli kam long Memoriol blong ded blong Kraes! Afta we famle ya i stap faef manis long ples ya, papa, mama, pikinini boe mo pikinini gel, oli gat 30 Baebol stadi evriwan. Tru ya, “ol kakae long garen” long ples ya, ‘lif blong olgeta i drae finis, i taem blong go tekem nao.’ (Jon 4:35) Papa blong famle ya i talem se: “I gat 30 Kristin brata mo sista we oli muv i kam blong givhan long kongregesen ya. Samwe long 20 blong olgeta, oli kam long Yunaeted Stet, mo ol narawan oli kam long Bahamas, Kanada, Itali, Niusilan, mo Spen. Oli kam wetem strong tingting blong mekem wok blong prij, mo oli pulum ol brata blong ples ya blong oli wok strong moa mo blong oli glad moa blong prij.”
15. ?Wanem ol blesing we yu yu kasem finis from we yu putum wok blong Kingdom long fasples long laef blong yu?
15 I tru, plante oli no save muv i go long narafala kantri we i gat bigfala nid. Be olgeta we oli save mekem olsem mo olgeta we oli stap jenisim sam samting long laef blong olgeta blong oli save mekem moa wok, bambae oli kasem plante blesing. Nomata weples yu stap mekem wok blong Kingdom, yu no mas mestem glad we i save kamaot taem yu mekem wok blong Jeova wetem olgeta paoa blong yu. Sipos yu putum wok blong Kingdom long fasples long laef blong yu, Jeova i mekem promes se bambae hem i ‘openem skae, i letem olgeta gudgudfala samting i kam long yu we i plante we i plante.’—Malakae 3:10.
Ol Blesing Taem Yumi Letem Jeova i Lidim Yumi
16. ?Sipos yumi letem Tok blong God i lidim yumi, olsem wanem samting ya bambae i givhan long yumi?
16 Olsem yumi luk finis, Tok blong Jeova i lidim yumi long tu fasin. Fastaem, hem i tosem ples we yumi mas putum leg blong yumi long hem, i min se hem i givhan long yumi blong gohed long stret rod mo i lidim yumi taem yumi mas mekem desisen. Mo tu, Tok blong God i saenem rod we i stap long fored blong yumi, i mekem se yumi lukluk klia wanem samting i stap long fiuja. Nao yumi save folem advaes blong Pita se: “Yufala i mas mekem tingting blong yufala i rere blong yufala i mekem wok. Tingting blong yufala i mas klia gud. Mo yufala i mas putum tingting blong yufala i stap oltaem long God ya we bambae i givhan long yufala long gladhat blong hem, long taem ya we Jisas Kraes bambae i kamtru.”—1 Pita 1:13.
17. ?Olsem wanem stadi blong Baebol bambae i givhan long yu blong letem God i lidim yu?
17 I klia se Jeova i save lidim yumi. Be kwestin i stap se: ?Bambae yu letem hem i lidim yu? Blong kasem save olsem wanem Jeova i save lidim yu, mekem tingting blong yu i strong blong ridim wan haf blong Baebol evri dei. Tingting dip long haf we yu ridim, traem luksave wanem samting we Jeova i wantem, mo tingbaot olsem wanem yu yu save folem save ya long laef blong yu. (1 Timoti 4:15) Nao yusum ‘tingting blong yu’ blong mekem ol desisen long laef blong yu.—Rom 12:1, NW.
18. ?Taem yumi letem Tok blong God i lidim yumi, wanem ol blesing we yumi kasem?
18 Sipos yumi wantem, bambae ol rul long Tok blong God oli givim save long yumi mo advaes we yumi nidim blong jusum rod we yumi mas folem. Yumi save bilif strong se Tok blong Jeova long Baebol bambae i “givim waes long olgeta we oli no waes.” (Ol Sam 19:7) Taem yumi letem Baebol i lidim yumi, tingting blong yumi i klin long fes blong God, mo yumi haremgud from we yumi mekem Jeova i glad. (1 Timoti 1:18, 19) Sipos yumi letem Tok blong God i soemaot rod long yumi evri dei, bambae Jeova i givim nambawan blesing ya long yumi, hemia laef we i no save finis.—Jon 17:3.
?Yu Yu Save Tingbaot?
• ?From wanem i impoten blong letem Jeova God i lidim yumi?
• ?Olsem wanem Tok blong God i save tosem ples we yu mas putum leg blong yu long hem?
• ?Olsem wanem Tok blong God i save saenem rod we i stap long fored blong yumi?
• ?Olsem wanem stadi blong Baebol i save givhan long yumi blong letem God i lidim yumi?
[Kwestin]
[Tok blong pija long pej 15]
?Fasin joen wetem wan man we i no gat bilif, i no moa waes taem i kasem wanem mak?
[Tok blong pija long pej 16]
Jisas i kampani oltaem wetem olgeta we oli mekem samting we Jeova i wantem
[Tok blong pija long pej 17]
?Laef blong yu i stap soemaot se yu yu putum wok blong Kingdom long fasples?