Ol Yangfala—Traehad Blong Kasem Ol Mak We Oli Givim Ona Long God

“Yu mas traehad oltaem blong mekem ol fasin we God i wantem.”—1 TIMOTI 4:7.

1, 2. (a) ?From wanem Pol i talem ol gudfala toktok long Timoti? (b) ?Olsem wanem plante yangfala tede oli “traehad oltaem blong mekem ol fasin we God i wantem”?

 “I NO gat narafala man long ples ya we i gat sem tingting we [hem] i gat, we hem i stap tingbaot yufala tumas. . . . Hem i wok wetem mi long ol wok blong gud nius blong Kraes, olsem we pikinini i stap wok wetem papa blong hem.” (Filipae 2:20, 21) Aposol Pol i raetem ol gudfala tok ya long leta we hem i sanem long ol Kristin long Filipae long faswan handred yia. ?Hem i stap tokbaot hu? Timoti, wan yangfala we i stap wokbaot wetem hem. Gudfala tok ya i soemaot se Pol i lavem mo trastem Timoti. !Timoti i mas haremgud tumas long tok ya!

² Longtaem finis i kam, ol yangfala we oli onagud long God olsem Timoti oli ol sas samting long medel blong ol man blong Jeova. (Ol Sam 110:3) Tede, plante yangfala we oli mekem wok blong paenia, misinari, no oli wok olsem volontia blong bildim ol haos wosip, no oli wok long Betel, oli ol bigfala blesing long ogenaesesen blong God. Olgeta we oli stap lukaot long ol narafala wok blong olgeta be oli wok strong yet insaed long kongregesen, olgeta tu oli mekem nambawan wok. Ol yangfala ya oli kasem trufala glad from we oli traehad blong kasem ol mak we oli givim ona long Papa blong yumi long heven, Jeova. Oli “traehad oltaem blong mekem ol fasin we God i wantem.”—1 Timoti 4:7, 8.

3. ?Wanem ol kwestin we bambae yumi tokbaot long stadi ya?

³ ?Yu we yu yangfala, yu yu putum sam mak long saed blong wok blong God we yu stap traehad blong kasem? ?Weples yu save faenem help mo ol tok we i leftemap tingting blong yu blong kasem ol mak ya? ?Olsem wanem yu save blokem fasin blong wol ya blong ronem mane? ?Wanem ol blesing we yu save kasem sipos yu traehad from ol mak we oli givim ona long God? Blong faenem ansa long ol kwestin ya, bambae yumi tokbaot laef mo wok blong Timoti.

Ol Save Long Saed Blong Timoti

4. Storian smol long saed blong Kristin laef blong Timoti.

⁴ Timoti i gruap long taon ya Listra, wan smol taon long provins blong Galesia we ol man Rom oli rul long hem. Ating Timoti i wan yangfala nomo taem hem i harem Kristin bilif fastaem, hemia taem Pol i prij long Listra long yia 47 K.T. Kwiktaem nomo, Timoti i kasem gudnem wetem ol Kristin brata long ples blong hem. Tu yia biaen, Timoti i gobak bakegen long Listra. Pol i harem ol gudfala ripot long saed blong Timoti, ale hem i jusum Timoti blong mekem misinari wok wetem hem. (Ol Wok 14:5-20; 16:1-3) Taem Timoti i kam bigman, Pol i putum moa wok long han blong hem. Mo tu, Pol i sanem hem long sam ples blong i mekem impoten wok ya blong halpem ol brata blong kam strong. Raonabaot long yia 65 K.T., Pol i stap kalabus long Rom nao hem i raetem wan leta i go long Timoti we i stap mekem wok blong Kristin elda long Efesas.

5. ?Seken Timoti 3:14, 15 i talem wanem tufala samting we oli gat paoa long desisen blong Timoti blong kasem ol mak long wok blong God?

⁵ I klia se ol mak we Timoti i traehad blong kasem long laef blong hem, oli long saed blong wok blong God. ?From wanem i olsem? Long seken leta we Pol i raetem long Timoti, hem i talem tu risen. Hem i se: “Yu mas holemstrong ol samting ya we mifala i tijim yu long hem bifo, mo we yu bilif  gud long hem finis, from we yu savegud ol man we oli tijim yu. Mo yu save tu we taem yu pikinini yet, kam kasem naoia, be yu yu savegud ol tok blong Baebol.” (2 Timoti 3:14, 15) Fastaem, bambae yumi tokbaot olsem wanem sam narafala Kristin oli givhan long Timoti blong mekem ol gudfala jus.

Letem Ol Gudfala Samting Oli Gat Paoa Long Yu

6. ?Wanem tijing we Timoti i kasem, mo hem i tingting olsem wanem long tijing ya?

⁶ Papa mama blong Timoti tufala i no folem sem skul. Papa blong hem i wan man Gris. Mo mama blong hem, Yunis, wetem bubu woman blong hem, Loes, tufala i woman Isrel. (Ol Wok 16:1) Taem Timoti i smol nomo, Yunis mo Loes i tijim hem long ol trutok blong Baebol we oli faenem long ol Hibru hanraet. Taem tufala i kam Kristin, tufala i pulum Timoti blong i bilif long ol Kristin tijing. I klia se Timoti i tinghevi long nambawan tijing ya we tufala i givim. Pol i talem se: “Mi stap tingbaot fasin blong bilif blong yu, we i no blong giaman, we i sem fasin nomo blong bilif we bubu blong yu Loes, mo mama blong yu Yunis, tufala i stap holem. Mo mi savegud we yu tu yu stap holem fasin ya yet.”—2 Timoti 1:5.

7. ?Plante yangfala oli haremgud long wanem blesing, mo olsem wanem samting ya i save givhan long olgeta?

⁷ Tede, plante yangfala oli gat blesing ya blong stap wetem wan papa mama mo ol bubu we oli onagud long God. Olsem Loes mo Yunis, ol olfala ya oli luksave se i impoten blong traehad blong kasem ol mak long wok blong God. Wan yangfala, Samira, i tingbaot yet ol longfala storian blong papa mama blong hem taem hem i yangfala. Hem i se: “Mama mo Papa tufala i tijim mi blong kasem tingting blong Jeova long evri samting, mo blong putum wok blong prij long fasples long laef blong mi. Tufala i pulum mi oltaem blong traem kasem mak ya blong mekem wok blong God fultaem.” Samira i lesin long papa mama blong hem, mo naoia hem i haremgud long blesing ya blong wok long Betel long kantri blong hem. Sipos papa mama blong yu i pulum yu blong putum ol mak long wok blong God, tingting gud long advaes blong tufala. Tufala i wantem we yu yu gat wan hapi laef.—Ol Proveb 1:5.

8. ?Olsem wanem kampani blong ol gudfala Kristin i givhan long Timoti?

⁸ Narafala samting we i impoten, se yu mas kampani wetem ol gudfala Kristin. Ol Kristin elda long kongregesen blong Timoti mo long Ikoniam we i stap 30 kilometa longwe, oli savegud Timoti. (Ol Wok 16:1, 2) Pol i wan man blong aksen mo paoa mo Timoti i frengud wetem hem. (Filipae 3:14) Ol leta blong Pol oli soemaot se Timoti i rere oltaem blong harem advaes mo se hem i kwik blong folem fasin blong olgeta we oli gat bilif. (1 Korin 4:17; 1 Timoti 4:6, 12-16) Pol i raetem se: “Yu, Timoti, taem we yu stap biaen long mi, yu save finis ol toktok blong mi, mo ol fasin blong mi, mo ol samting we mi mi wantem mekem long laef blong mi. Yu luk finis fasin blong mi blong bilif, mo blong mekem tingting blong mi i longfala. Mo yu luk finis fasin blong mi blong lavem ol  man, mo blong holem wok gogo i finis.” (2 Timoti 3:10) Yes, Timoti i folemgud eksampol blong Pol. Long sem fasin, sipos yu yu kampani wetem olgeta long kongregesen we oli strong, bambae oli givhan long yu blong traehad from ol gudfala mak long wok blong God.—2 Timoti 2:20-22.

Stadi Long “Ol Tok Blong Baebol”

9. ?Antap long fasin ya blong kampani wetem ol gudfala fren, wanem bakegen we yu mas mekem blong ‘trenem yu blong mekem ol fasin we God i wantem’?

⁹ ?Sipos yu yu kampani wetem ol gudfala fren, hemia nomo bambae i mekem se yu kasem ol mak long wok blong God? Nogat. Olsem Timoti, yu mas stadi gud long “ol tok blong Baebol.” Maet i no isi long yu blong stadi. Be yu mas rimemba se Timoti i “traehad oltaem [“trenem hem,” NW ] blong mekem ol fasin we God i wantem.” Ol man blong spot oli traehad no oli tren blong plante manis blong kasem wan gudfala mak. Long sem fasin, blong kasem ol mak long wok blong God, yu mas rere blong lego sam samting we yu yu laekem, mo yu mas rili traehad. (1 Timoti 4:7, 8, 10) Maet yu askem se: ‘?Olsem wanem stadi blong Baebol i save givhan long mi blong kasem ol mak we mi mi putum?’ Bambae yumi tokbaot tri rod we stadi i save givhan long yu.

10, 11. ?Olsem wanem Baebol i save pusum yu blong kasem ol mak long wok blong God? Talem wan eksampol.

¹⁰ Fastaem, Baebol i save givim ol gudfala save we i pusum yu blong mekem gudfala wok. Baebol i soemaot ol nambawan fasin blong Papa blong yumi long heven, bigfala samting we hem i mekem long yumi from lav blong hem, mo ol blesing blong olwe we bambae hem i givim long ol man we oli holemstrong long hem. (Amos 3:7; Jon 3:16; Rom 15:4) Taem yu kasem save moa long Jeova, bambae yu lavem hem moa, mo bambae yu wantem yusum laef blong yu long wok blong hem.

¹¹ Plante yangfala Kristin oli talem se stadi blong Baebol we oli mekem oltaem, hemia bigfala samting we i givhan long olgeta blong mekem trutok i kam prapa bilif blong olgeta. Wan long olgeta ya, Adele, hem i gruap long wan Kristin famle be hem i no traehad blong kasem sam mak long wok blong God. Hem i talem se: “Papa mama blong mi tufala i tekem mi mi go long Haos Kingdom oltaem. Be mi mi no stadi mi wan mo mi no lesin long miting tu.” Taem sista blong Adele i tekem baptaes, Adele i stat blong tinghevi long trutok. Hem i se: “Mi putum mak blong ridim Baebol fulwan. Mi ridim wan smol haf, biaen mi raetemdaon wan tingting we mi kasem long haf ya. Mi gat ol not blong mi yet. Long wan yia, mi finisim Baebol.” Ol save we Adele i kasem i pusum hem blong givim laef blong hem i go long Jeova. Naoia hem i stap prij fultaem olsem wan paenia, nating se hem i handikap.

12, 13. (a) ?Wanem ol jenis we stadi blong Baebol bambae i givhan long ol yangfala blong mekem, mo olsem wanem i givhan? (b) Talem sam waes we i wokgud we yumi faenem long Tok blong God.

¹² Seken rod se, Baebol bambae i givhan long yu blong jenisim sam fasin blong yu. Pol i talem long Timoti se “ol tok blong God” i “stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man  blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:16, 17) Sipos yu tingting dip oltaem long ol samting long Tok blong God, mo yu folem ol rul blong Baebol long laef blong yu, bambae spirit blong God i jenisim fasin blong yu. Bambae hem i givhan long yu blong wokem ol fasin we yu yu nidim, olsem tingting daon, holemstrong long wok, wok had, mo trufala lav blong ol narafala Kristin. (1 Timoti 4:15) Timoti i gat ol fasin ya, mo oli mekem se hem i givhan gud long Pol mo long ol kongregesen we Timoti i visitim.—Filipae 2:20-22.

¹³ Namba tri samting se, Tok blong God i fulap long ol waes we i wokgud. (Ol Sam 1:1-3; 19:7; 2 Timoti 2:7; 3:15) Bambae hem i givim waes long yu blong jusum gud ol fren, jusum ol gudfala pleplei, mo winim plante narafala traem. (Jenesis 34:1, 2; Ol Sam 119:37; 1 Korin 7:36) Blong kasem ol gudfala mak long wok blong God, yu mas mekem ol waes desisen.

“Traehad Blong Gohed Gud Long Kristin Laef Blong Yu”

14. ?From wanem i no isi nating blong kasem ol mak we oli givim ona long Jeova?

¹⁴ Rod we i waes moa, hemia blong putum ol mak we oli givim ona long Jeova long fasples long laef blong yu. Be rod ya i no isi nating. Tingbaot taem yu mas jusum wan wok blong kasem mane. Sam famle, sam fren, mo sam tija we oli wantem halpem yu, bambae oli traem fosem yu blong kasem hae edukesen mo wan wok we i givim bigfala mane, from we oli ting se hemia nao rod blong faenem trufala glad mo blong win long laef. (Rom 12:2) Be yu mas mekem olsem Timoti, yu mas “traehad blong gohed gud long Kristin laef blong yu, olsem man we i traehad long resis blong hem i win.” Long rod ya, yu save “kasem laef ya we i no save finis” we Jeova i wantem givim.—1 Timoti 6:12; 2 Timoti 3:12.

15. ?Ating Timoti i kasem wanem fasin agens?

¹⁵ Sipos sam famle blong yu we oli no gat bilif oli no glad long jus blong yu, hemia i wan bigfala traem. Ating Timoti tu i kasem traem ya. Wan buk i talem se ating ol famle blong Timoti “oli skulgud mo oli gat mane.” Maet papa blong Timoti i ting se Timoti i mas kasem hae edukesen blong i save gohed blong lukaot long bisnes blong famle. * !Traem tingbaot wanem we papa blong Timoti i talem taem hem i faenemaot se Timoti i wantem mekem wok blong misinari wetem Pol, wan wok we i denja mo i no gat pei blong hem!

16. ?Wan yangfala i mekem wanem, taem papa blong hem i agensem hem?

¹⁶ Tede ol yangfala Kristin oli fesem traem ya tu. Matiu we i wok long wan branj ofis blong ol Witnes blong Jeova, i talem se: “Taem mi mi stat long wok blong paenia, papa blong mi i harem nogud tumas. Taem mi tekem wan wok blong klinim sam ples blong sapotem mi long wok blong prij, Papa i talem se mi mi ‘westem’ edukesen blong mi. Hem i jikim mi, mo i stap talem bigfala mane we mi save winim sipos mi wok fultaem.” ?Matiu i mekem wanem? Hem i se: “Mi neva fogetem Baebol riding blong mi evri dei mo mi prea oltaem, antap moa long taem we mi harem se mi wantem faerap long kros.” Matiu i kasem blesing from strong tingting blong hem. Sloslo, hem mo papa blong hem i kam gud fren. Matiu i kam klosap moa long Jeova tu. Hem i se: “Mi luk finis olsem wanem Jeova i givim ol samting we mi nidim, i leftemap tingting blong mi, mo i blokem mi blong mi no mekem ol nogud desisen. Sipos mi no bin traehad blong kasem ol mak long wok blong God, bambae mi no luk han blong Jeova long ol samting ya.”

Lukluk i Go Nomo Long Ol Mak We Oli Givim Ona Long God

17. ?Olsem wanem samfala oli mekem mastik ya blong daonem tingting blong ol yangfala we oli wantem paenia? (Matiu 16:22)

¹⁷ Samtaem, sam Kristin we oli no tingting gud long ol tok blong olgeta, oli save daonem tingting blong yu long saed blong ol mak we yu traehad blong kasem long wok blong God. Maet oli talem se: ‘?From wanem yu wantem paenia? Yu save gat wan laef olsem ol narafala mo joen yet long wok blong prij. Traem faenem wan gudfala wok mo  putum sam mane i stap blong givhan long laef blong yu.’ Maet yu ting se hemia i gudfala advaes. ?Be sipos yu folem advaes ya, yu yu rili stap traehad blong kasem mak ya blong mekem ol fasin we God i wantem?

18, 19. (a) ?Olsem wanem yu save putum tingting blong yu i stap nomo long ol mak we oli givim ona long God? (b) Eksplenem wanem samting we yu yangfala yu stap lego blong mekem wok blong Kingdom.

¹⁸ Sam Kristin long taem blong Timoti oli gat tingting ya tu. (1 Timoti 6:17) Blong givhan long Timoti blong lukluk i go nomo long ol mak long wok blong God, Pol i talem ol tok ya we i leftemap tingting blong hem, i se: “Long taem blong faet, man we i soldia, hem i no save mekem ol bisnes blong hem. Hem i mas traehad oltaem blong mekem kapten blong hem i harem gud long hem.” (2 Timoti 2:4) Wan soldia we i stap faet i no save tingbaot ol samting we hem i wantem ronem long laef blong hem. Oltaem hem i mas rere blong mekem samting we kapten blong hem i talem long hem. Sipos no, hem mo plante narafala oli save lusum laef blong olgeta. Yu tu yu wan soldia we Kraes i kapten blong yu. Taswe yu mas tingbaot wan samting nomo, hemia wok blong hem, mo yu no mas ronem ol samting we oli save mekem laef blong yu i fasfas mo blokem yu blong yu no joen fulwan long wok blong prij we i save sevem laef blong yu mo ol narafala.—Matiu 6:24; 1 Timoti 4:16; 2 Timoti 4:2, 5.

¹⁹ I nogud we yu traehad blong kasem mak ya blong gat wan isi laef nomo. I moagud we yu traem wokem tingting ya blong glad blong lego samting we yu yu wantem. “Yu yu olsem wan prapa soldia blong Jisas Kraes. Nao from samting ya, yu mas rere blong [“lego sam samting we oli save mekem laef blong yu i isi,” The English Bible in Basic English].” (2 Timoti 2:3) Taem Timoti i wokbaot wetem Pol, hem i lanem rod blong haremgud oltaem, nating se laef i had. (Filipae 4:11, 12; 1 Timoti 6:6-8) Yu yu save mekem olsem tu. ?Olsem wanem? ?Yu yu rere blong lego sam samting we yu nomo yu wantem, blong mekem wok blong Kingdom?

Ol Blesing Naoia Mo Long Fiuja

20, 21. (a) Tokbaot sam blesing we yu save kasem taem yu traehad from ol mak we oli givim ona long God. (b) ?Yu mas gat strong tingting blong mekem wanem?

²⁰ Timoti i wok wetem Pol blong 15 yia. Timoti i luk ol niufala kongregesen oli stanap taem gud nius i kasem klosap olgeta ples long not blong Mediterenian Si. Hem i bisi oltaem blong mekem ol gudfala samting long laef blong hem, mo hem i haremgud moa i bitim sipos hem i bin jusum blong laef olsem ol narafala man. Sipos yu ronem ol mak we oli givim ona long Jeova, yu tu bambae yu kasem ol blesing we oli bigwan tumas long wok blong hem. Bambae yu kam klosap long Jeova mo bambae ol narafala Kristin oli lavem mo respektem yu. Bambae yu no kasem ol trabol mo wari we oli kamaot taem man i ronem mane. Bambae yu kasem trufala glad we i kamaot taem man i no tingbaot hem wan be i givim samting long gladhat blong hem. Samting we i gud moa, se bambae yu “kasem laef ya we i prapa wan,” hemia laef we i no save finis long paradaes long wol.—1 Timoti 6:9, 10, 17-19; Ol Wok 20:35.

²¹ Taswe, mifala i wantem tumas blong leftemap tingting blong yu blong stat naoia blong traehad blong mekem ol fasin we God i wantem, sipos yu no stap yet long rod ya. Kam klosap long olgeta long kongregesen we oli save givhan long yu blong kasem ol mak long wok blong God, mo askem olgeta blong givhan long yu. Yu mas mekem se prapa stadi blong yu long Baebol i kam wan impoten samting long laef blong yu. Yu mas strong blong blokem tingting ya blong wol blong ronem mane. Mo oltaem yu mas rimemba se God we “i stap givim plante samting long yumi, blong yumi harem gud long hem,” i promes blong givim ol bigfala blesing naoia mo long fiuja sipos yu traehad blong kasem ol mak we oli givim ona long hem.—1 Timoti 6:17.

[Futnot]

?Yu Yu Rimemba?

• ?Wanem i save givhan long ol yangfala blong traehad blong kasem ol mak long wok blong God?

• ?From wanem i impoten tumas blong stadi gud long Baebol?

• ?Olsem wanem ol yangfala oli save blokem tingting blong wol blong ronem mane?

• ?Wanem ol blesing we yumi save kasem taem yumi traehad from ol mak we oli givim ona long God?

[Kwestin]

[Tok blong pija long pej 25]

?Wanem ol gudfala samting we oli gat paoa long Timoti?

[Tok blong pija long pej 26]

?Yu yu stap traehad blong kasem ol mak we oli givim ona long God?