Wan Kwestin

?Wetaem bambae Jeova i stop blong jusumaot ol Kristin we oli gat hop blong go long heven?

Baebol i no givim wan stret ansa long kwestin ya. Yumi save se long 33 K.T., God i stat jusumaot ol disaepol blong Jisas blong go laef long heven. (Ol Wok 2:1-4) Yumi save tu se afta long ded blong ol aposol, ol “gudfala sid,” we hemia ol trufala Kristin we tabu spirit i makemaot olgeta, oli gru wanples wetem ol “rabis gras,” we hemia ol giaman Kristin. (Matiu 13:24-30) Stat long en blong ol yia 1800, ol Kristin we tabu spirit i makemaot olgeta oli stat mekem bigfala wok bakegen. Long 1919, oli stat blong ‘tekem ol kakae long garen,’ hemia taem oli stat blong hivimap ol laswan memba blong ol Kristin we tabu spirit i makemaot olgeta.—Revelesen 14:15, 16.

Stat long en blong ol yia 1800 kasem 1931, wok blong prij i blong hivimap ol laswan memba blong bodi blong Kraes. Long 1931, ol Baebol Studen oli karem nem ya we i kamaot long Baebol, se ol Witnes blong Jeova. Long Wajtaoa blong Novemba 15, 1933, oli talemaot long olgeta man se spesel nem ya i olsem “denarias” long parabol blong Jisas long Matiu 20:1-16. Oli ting se ol twelef aoa we parabol ya i tokbaot i minim ol twelef yia stat long 1919 kasem 1931. Plante yia afta we Wajtaoa ya i kamaot, oli bilif se 1931 i yia ya we Jeova i stop blong jusumaot olgeta we bambae oli go rul long Kingdom blong heven. Oli bilif tu se olgeta we God i jusumaot olgeta long 1930 mo 1931 oli ol “laswan” man we bambae oli go rul wetem Kraes. (Matiu 20:6-8, NW ) Be long 1966, oli kasem niufala mining blong parabol ya mo i klia se hem i no joen nating wetem en blong wok ya blong jusumaot ol tabu Kristin.

Long 1935, oli kasem save se “bigfala hip blong ol man,” no bigfala kampani, we Revelesen 7:9-15 i tokbaot, i minim ol “narafala sipsip.” Hemia ol Kristin we oli gat hop blong laef long wol. Olgeta ya bambae oli kamtru long taem blong “ol las dei” mo olgeta ya nao we bambae oli laef tru long Amagedon. (Jon 10:16; 2 Timoti 3:1, NW; Revelesen 21:3, 4) Afta long 1935, wok blong mekem disaepol i blong hivimap ol man blong bigfala kampani.  Taswe afta long 1966, oli bilif se long yia 1935, God i stop blong jusumaot ol Kristin we bambae oli go long heven. I luk olsem se oli sua gud long samting ya from we klosap evriwan we oli baptaes afta 1935, oli bilif se oli gat hop blong laef long wol. Afta long yia ya, olgeta we God i jusumaot olgeta blong go long heven, oli bilif se oli blong tekem ples blong ol tabu Kristin we oli no moa holemstrong long Jeova.

Yes, sipos wan tabu Kristin i lego trutok, Jeova bambae i jusum wan narawan blong i tekem ples blong hem. (Rom 11:17-22) Be, ol trufala Kristin ya we tabu spirit i makemaot olgeta, nao oli no moa stap tru long Jeova, oli no plante. Be taem ol yia oli pas, sam Kristin we oli baptaes afta 1935, tabu spirit i joen long tingting blong olgeta blong talem se oli gat hop blong go long heven. (Rom 8:16, 17) Taswe, i luk olsem se yumi no save talem wan stret taem we God i stop blong jusumaot ol Kristin we oli gat hop blong laef long heven.

?Wanem tingting we yumi mas gat long wan man we i talem wetem fulhat blong hem se naoia hem i wan long ol Kristin we tabu spirit i makemaot olgeta mo bambae hem i stat blong kakae bred mo dring waen long Memoriol? Yumi no mas jajem hem. Bisnes ya i bitwin hem mo Jeova. (Rom 14:12) Be, ol trufala Kristin we tabu spirit i makemaot olgeta oli no ting se oli spesel moa long narafala. Oli no gat tingting ya se from we tabu spirit i makemaot olgeta, oli gat wan spesel “save,” we i hae moa long save blong sam memba blong bigfala kampani we oli bigman long saed blong spirit. Oli no gat tingting ya tu se oli kasem moa tabu spirit i bitim ol fren blong olgeta hemia ol narafala sipsip. Oli no gat tingting ya se narafala bambae i mekem wok blong olgeta mo se oli hae moa long ol elda long kongregesen from we oli kakae bred mo dring waen long Memoriol. Wetem tingting daon, oli tingbaot se sam Kristin long faswan handred yia we tabu spirit i makemaot olgeta oli no naf blong mekem wok olsem ol elda no ol man blong givhan. (1 Timoti 3:1-10, 12, 13; Taetas 1:5-9; Jemes 3:1) Sam tabu Kristin oli slak long saed blong spirit. (1 Tesalonaeka 5:14) Mo ol sista we tabu spirit i makemaot olgeta oli no tij long kongregesen.—1 Timoti 2:11, 12.

Yes, ol tabu Kristin wetem ol narafala sipsip oli traehad blong stap strong long saed blong spirit, oli wokem ol frut blong spirit mo oli leftemap pis insaed long kongregesen. Olgeta Kristin, nating se oli stap long grup blong ol tabu man no blong ol narafala sipsip, oli wokhad long wok blong talemaot gud nius mo mekem disaepol aninit long Hed Kampani we i lukaot long olgeta. Ol tabu Kristin oli glad blong gohed nomo long wok ya nomata hamas yia we God i letem blong oli stap long wol.