?From Wanem Fasin Safa i Mas Finis i No Longtaem?
?From Wanem Fasin Safa i Mas Finis i No Longtaem?
“Hem i Bigfala Ston ya, ol wok blong hem oli stret gud olgeta.”—DUTRONOME 32:4, NW.
1, 2. (a) ?From wanem yu yu tinghae long janis blong kasem laef we i no save finis? (b) ?From wanem plante man oli no bilif long God we i mekem nambawan promes ya long saed blong fiuja?
?YU YU laekem blong tingbaot Paradaes? Traem tingbaot wanem we bambae yu mekem sipos yu stap finis long Paradaes. Ating bambae yu stadi long ol nambawan samting long wol blong yumi, mo bambae yu kasem plante save long saed blong ol laef samting. Ating bambae yu haremgud tumas blong wok wetem ol narafala blong lukaot long wol ya mo blong mekem fulwol i kam wan naesfala garen. Ating bambae yu lanem blong dro ol pija, droem plan blong haos mo bildim haos, plei miusik, no mekem sam narafala samting we yu no gat taem blong mekem naoia. Nating se yu wantem mekem wanem long Paradaes, be i sua se yu stap tinghae long janis we yu yu gat blong kasem samting we Baebol i kolem “laef ya we i prapa wan,” hemia laef we i laenap wetem samting we Jeova i wantem, mo we i no save finis.—1 Timoti 6:19.
2 Ating yu harem se i wan bigfala ona mo glad blong serem tok blong Baebol wetem ol man long saed blong gudfala fiuja ya. Be plante man oli no wantem save. Oli talem se paradaes long fiuja i wan drim nomo, mo se ol man we oli bilif long samting ya, oli trastem enikaen promes nomo. Maet oli faenem i had blong bilif long God ya we i promes blong givim laef we i no save finis long Paradaes. ?From wanem? Samting we i blokem samfala blong bilif, hemia ol nogud samting we i stap hapen long wol. Oli ting se sipos wan God i stap we i gat olgeta paoa mo i lavem yumi, ol nogud samting ya i no mas hapen mo ol man oli no mas safa. Oli talem se, sipos God i stap, hem i no save letem ol nogud samting ya i hapen. No maet hem i stap, be hem i no gat olgeta paoa mo i no kea long yumi. Samfala oli faenem se i moa isi blong bilivim ol tingting olsem. Tru ya, Setan i savegud olsem wanem blong trikim ol man mo satem tingting blong olgeta.—2 Korin 4:4.
3. ?Yumi save givhan long ol man blong faenem ansa long wanem strong kwestin? ?From wanem yumi gat nambawan janis blong givhan long olgeta?
3 Yumi ol Witnes blong Jeova, yumi gat wan nambawan janis blong givhan long ol man we Setan i trikim olgeta mo we oli trastem ol giaman waes blong wol ya. (1 Korin 1:20; 3:19) Yumi kasem save from wanem plante man oli no bilif long ol promes blong Baebol. Oli no save Jeova. Ating oli no save nem blong hem mo mining blong nem ya. Ating oli save smol nomo no oli no save nating ol fasin blong hem mo ol promes we hem i mekem i kamtru finis. Yumi gat nambawan janis blong save ol samting ya. I gud blong tingting bakegen long samting we yumi save mekem blong givhan long ol man we “tingting blong olgeta ya i stap long tudak nomo.” Yumi save halpem olgeta blong faenem ansa long kwestin we i strong moa i bitim ol narafala kwestin: “?From wanem God i letem ol nogud samting oli hapen mo ol man oli safa?” (Efesas 4:18) Fastaem bambae yumi tokbaot wanem we yumi save mekem, blong man i glad blong lesin long ansa blong kwestin ya. Biaen, bambae yumi tokbaot olsem wanem ol fasin blong Jeova oli kamaot klia taem yumi luk rod we hem i folem blong stretem ol nogud samting long wol.
Stret Rod Blong Ansa Long Kwestin Ya
4, 5. ?Wanem samting we maet yumi mas mekem fastaem long wan man we i wantem save from wanem God i letem ol man oli safa? Eksplenem.
4 ?Taem wan man i askem long yu from wanem God i letem ol man oli safa, yu yu talem wanem? Maet yu go stret long wan longfala storian blong eksplenem evri samting, stat long sin we i kamaot long garen blong Iden. Long sam man ating i stret blong mekem olsem. Be i gud blong folem wan smol advaes. Maet yu nidim blong mekem sam samting fastaem blong man i glad blong lesin long ansa blong yu. (Ol Proveb 25:11; Kolosi 4:6) Bambae yumi tokbaot tri poen we oli save givhan long wan man bifo we yumi eksplenem ansa blong kwestin ya.
5 Faswan poen se, sipos wan man i harem nogud tumas long ol rabis samting we i stap hapen long wol, ating wan samting i bin hapen long hem stret no long wan famle blong hem. Taswe, i waes blong soemaot long hem fastaem se yu kasem save long filing blong hem. Aposol Pol i talem long ol Kristin se: “Taem ol man oli stap harem nogud, oli stap krae, be yufala tu i mas krae wetem olgeta.” (Rom 12:15) Fasin blong yu blong soemaot se yu kasem save long filing blong hem mo yu “gat sore,” i save tajem hat blong hem. (1 Pita 3:8) Sipos hem i luksave se yu rili kea, bambae hem i rere moa blong lesin long ol tok blong yu.
6, 7. ?From wanem i stret blong talem tangkiu long man taem i askem wan kwestin we i mekem tingting blong hem i trabol?
6 Namba tu poen se, yumi save talem tangkiu long man we i askem kwestin ya. Sam man oli ting se sipos oli askem ol kwestin olsem, hemia i soemaot se oli no gat bilif, no oli no gat respek long God. Maet wan lida blong skul i bin talem olsem long olgeta. Be tok ya i no tru long saed blong evri man. Plante man blong bilif long Baebol olgeta tu oli bin askem ol kwestin olsem. Tingbaot Deved we i raetem plante Sam. Hem i askem se: “Hae God. ?From wanem yu stap longwe tumas? ?From wanem yu stap haed taem we mifala i stap long trabol?” (Ol Sam 10:1) Profet Habakuk tu i askem kwestin, i se: “Hae God. Naoia, long ples blong mifala, ol man oli stap faet, oli stap kilkilim olgeta oli ded. Oltaem, mi stap krae i kam long yu blong yu givhan long mifala. ?Be wetaem bambae yu harem mi, yu tekemaot mifala long ol trabol ya? ?From wanem yu letem mi mi stap luk ol trabol ya olsem? ?Bambae yu yu stap lukluk ol trabol ya gogo kasem wetaem?”—Habakuk 1:2, 3.
7 Ol man ya oli gat bilif mo bigfala respek long God. ?Olsem wanem? ?Jeova i tok strong long olgeta from we oli askem ol kwestin ya we oli mekem tingting blong olgeta i trabol? Nogat. Jeova i mekem se ol kwestin blong olgeta oli stap long Tok blong hem, Baebol. Tede, wan man we i askem kwestin long saed blong ol nogud samting we i hapen long wol, maet hem i hanggri from save blong God. Ating hem i wantem tumas blong save ansa blong ol kwestin we Baebol nomo i save givim. Tingbaot we Jisas i talem gudfala tok long olgeta we oli hanggri from save blong God, mo we “oli stap lukaot God from we oli no gat paoa blong hem long laef blong olgeta.” (Matiu 5:3) !Yumi gat bigfala janis blong givhan long ol man ya mo blong kasem glad ya we Jisas i promes blong givim!
8. ?Wanem sam rong tijing we oli lidim ol man blong ting se God nao i mekem ol man oli safa? ?Olsem wanem yumi save halpem ol man we oli tingting olsemia?
8 Namba tri poen se, yumi mas halpem man blong kasem save se i no God we i stamba blong ol nogud samting. Tijing we plante man oli kasem, hemia se God i Rula blong wol ya, mo se longtaem bifo, God i makemaot evri samting we bambae i hapen long yumi, mo yumi no naf blong kasem save from wanem God i putum ol trabol long ol man. Ol tijing ya oli giaman. Oli no givim ona long God nating. Oli givim tingting long ol man se God nao i stamba blong ol nogud samting mo ol trabol we i mekem man i safa. Taswe, yumi mas yusum Tok blong God blong stretem ol rong tingting ya. (2 Timoti 3:16) Jeova i no Rula blong rabis wol ya, Setan nao hem i rula. (1 Jon 5:19) Jeova i no makemaot wanem samting bambae i hapen long ol man. Hem i letem evri man i jus blong mekem gudfala fasin no fasin nogud, blong mekem i stret no blong mekem i no stret. (Dutronome 30:19) Jeova i neva stamba blong fasin nogud. Hem i no laekem nating ol nogud fasin mo oltaem hem i stap tingbaot ol man we oli safa from ol fasin we oli no stret.—Job 34:10; Ol Proveb 6:16-19; 1 Pita 5:7.
9. ?Wanem sam buk blong ‘slef we i stret mo waes’ we oli save givhan long ol man blong faenem ansa long kwestin ya long saed blong fasin safa?
9 Sipos yu folem trifala poen ya, ating man ya i rere nao blong lesin long ol tok blong eksplenem from wanem God i letem ol man oli safa. I gat plante buk blong ‘slef we i stret mo waes’ we oli save givhan long yu blong eksplenem. (Matiu 24:45-47, NW ) Tingbaot niufala traket we i kamaot long Distrik Asembli ya “Obei Long God” long yia 2005, nem blong traket ya !Klosap Nao Fasin Safa Bambae i Finis! Sipos i gat traket ya long lanwis blong yu, i gud yu ridim. Mo tu, long buk ya ?Wanem Samting We Baebol i Rili Tijim? we oli wokem long 157 lanwis finis, i gat wan japta we i tokbaot impoten kwestin ya. Yusumgud ol save long ol buk ya. Oli tokbaot klia ol samting we Baebol i talem se i bin hapen blong mekem bigfala kwestin long saed blong rul blong heven mo wol i stanap long Iden, mo from wanem Jeova i jusum rod we hem i jusum blong stretem trabol ya. Yu no mas fogetem tu se taem yu tokbaot kwestin ya, yu stap soemaot ol save long man we i moa impoten i bitim ol narafala save long wol. Hemia save long saed blong Jeova mo ol nambawan fasin blong hem.
Tokbaot Ol Fasin Blong Jeova
10. ?Wanem samting we plante man oli faenem i had blong kasem save long hem? ?Wanem save we maet i givhan long olgeta?
10 Taem yu stap givhan long man blong kasem save from wanem Jeova i letem ol man oli rulum wol ya aninit long paoa blong Setan, traem makemgud ol nambawan fasin blong Jeova. Plante man oli save se God i gat paoa. Oltaem oli harem tok ya Hae God. Be ating oli faenem i had blong kasem save from wanem hem i no yusum bigfala paoa blong hem blong finisim ol fasin we oli no stret mo fasin safa. Ating oli no gat save long ol narafala fasin blong Jeova, olsem tabu fasin blong hem, stret fasin, waes mo lav blong hem. Ol fasin ya blong Jeova oli stretgud, wanwan long olgeta oli laenapgud wetem ol narawan. Taswe Baebol i talem se: “Ol wok blong hem oli stret gud olgeta.” (Dutronome 32:4, NW ) ?Olsem wanem yu save makemgud ol fasin ya taem yu ansa long ol kwestin we plante man oli askem long saed blong fasin safa? Bambae yumi luk olsem wanem yumi save mekem olsem.
11, 12. (a) ?From wanem Jeova i no save fogetem sin blong Adam mo Iv? (b) ?From wanem Jeova i no save letem sin i gohed blong olwe?
11 ?From wanem Jeova i no jes fogetem sin blong Adam mo Iv? Jeova i no save mekem olsem. Adam mo Iv, tufala i stretgud olgeta, tufala i save stret rod blong folem be tufala i jusum blong agensem rul blong Jeova mo letem Setan i lidim tufala. Tufala i no tanem tingting blong tufala nating. Be taem ol man oli askem from wanem Jeova i no jes fogetem sin blong Adam mo Iv, maet oli rili minim from wanem Jeova i no slakem loa blong hem mo letem sin ya mo fasin stronghed blong tufala i pas nomo. Ansa blong kwestin ya i joen wetem wan impoten fasin blong Jeova—tabu fasin blong hem.—Eksodas 28:36; 39:30.
12 Baebol i talem plante handred taem se Jeova i tabu. Be sore tumas, smol man nomo long rabis wol ya oli kasem save long fasin ya. Jeova i klin, hem i gud olgeta, hem i no gat sin nating long hem. (Aesea 6:3; 59:2) Long saed blong sin, hem i mekem wan rod blong tekemaot no finisim. Bambae hem i no save letem sin i gohed blong olwe. Sipos Jeova i letem sin i gohed blong olwe, bambae yumi no gat janis blong kasem wan gudfala laef long fiuja. (Ol Proveb 14:12) Long stret taem we Jeova i wantem, bambae hem i mekem olgeta samting we hem i wokem oli kam tabu bakegen. Samting ya i sua blong hapen from we Tabu God ya i wantem olsem.
13, 14. ?From wanem Jeova i no jusum blong spolem ol stronghed long Iden?
13 ?From wanem Jeova i no spolem ol stronghed long Iden mo wokem sam moa man? Tru ya, Jeova i gat paoa blong mekem olsem, mo i no longtaem bambae hem i yusum paoa ya blong spolem ol rabis man. Be samfala oli askem se: ‘?From wanem hem i no tekem aksen taem i gat tri stronghed nomo long heven mo wol? Sipos hem i bin mekem wan samting long taem ya, ating wol i no fulap long sin mo fasin safa tede.’ ?From wanem Jeova i no jusum rod ya? Dutronome 32:4 i talem se: “Hem i stret olwe nomo.” Jeova i strong oltaem long stret fasin. Yes, “Hae God i laekem ol fasin we i stret.” (Ol Sam 37:28) From we Jeova i laekem stret fasin, hem i no spolem ol stronghed long garen blong Iden. ?From wanem i stret we hem i no spolem olgeta?
14 Taem Setan i mekem stronghed, hem i putum wan tok agens long God, se God i rul long fasin we i no stret. From we Jeova i strong blong mekem stret fasin, hem i mas ansa long tok ya long rod we i stret. I tru se ol stronghed ya oli mekem samting we oli mas ded from. Be sipos God i spolem olgeta kwiktaem, bambae hem i no ansa long tok blong Setan long rod we i stret. Bambae hem i soemaot nomo se hem i gat paoa bitim olgeta. Be Setan i no stanemap kwestin long saed blong paoa blong God. Mo tu, Jeova i bin talemaot stamba tingting blong hem long Adam mo Iv se tufala i mas gat plante pikinini mo fulumap wol, lukaot gud long wol, mo mekem evri samting oli stap aninit long han blong tufala. (Jenesis 1:28) Sipos Jeova i spolem tufala, ol tok ya long saed blong stamba tingting blong hem oli giaman. Jeova i no save giaman olsem, from we hem i stret olwe. Oltaem ol plan blong hem oli kamtru.—Aesea 55:10, 11.
15, 16. ?Olsem wanem yumi save givhan long ol man we oli talem sam narafala “rod blong stretem” trabol long Iden?
15 ?I gat wan man long heven no wol we i save stretem trabol ya long fasin we i waes moa long Jeova? Maet samfala oli talem sam narafala “rod blong stretem” ol trabol we i kamaot long Iden. Be taem oli mekem olsem, oli stap talem se oli save stretem trabol ya long fasin we i moagud i winim Jeova. Maet oli no talem tok ya wetem wan tingting blong spolem God. Be i klia se oli no gat save nating long saed blong Jeova mo bigfala waes blong hem we i bitim tingting blong yumi. Taem aposol Pol i raetem leta long ol Kristin long Rom, hem i tokbaot waes fasin blong God. Mo tu, hem i tokbaot “wan trutok we God i haedem fastaem,” long saed blong plan blong hem blong yusum Kingdom blong Mesaea blong sevem ol man we oli holemstrong long hem, mo blong tekemaot doti we ol man oli sakem long tabu nem blong hem. ?Wanem tingting blong Pol long saed blong waes fasin blong God we i mekem plan ya? Lastok blong aposol ya se: “Yumi joen long Jisas Kraes blong leftemap nem blong God . . . we hem nomo i waes gud . . . gogo i no save finis. Amen.”—Rom 11:25; 16:25-27.
16 Pol i kasem save se Jeova “nomo i waes gud.” Yes, Hem i waes moa i bitim eni man long heven mo wol. ?Taswe, hu nao sinman we i save talem wan rod we i moagud i bitim rod we Jeova i jusum? Long saed blong enikaen trabol, sinman i no naf blong talem wan rod we i moagud i bitim rod blong Jeova blong winim. Samting ya i tru moa long saed blong bigfala trabol ya we i traem waes blong God i bitim olgeta narafala trabol. Taswe, yumi mas givhan long ol man blong kasem sem bigfala respek mo ona we yumi gat long God ya we “i waes we i waes.” (Job 9:4) Moa we yumi kasem save long waes fasin blong Jeova, moa we bambae yumi trastem hem se oltaem rod we hem i jusum i beswan.—Ol Proveb 3:5, 6.
Luksave Faswan Bigfala Fasin Blong Jeova
17. ?Olsem wanem moa save long saed blong lav blong Jeova i save halpem ol man we tingting blong olgeta i trabol from ol rabis fasin?
17 “God [hem] i lav.” (1 Jon 4:8, NW ) Sotfala tok ya long Baebol i makemaot faswan bigfala fasin blong Jeova. Fasin ya i pulum yumi moa i bitim ol narafala fasin blong hem, mo save long saed blong fasin ya i givhan moa bitim ol narafala save, long man we tingting blong hem i trabol from ol rabis fasin long wol. Long evri samting we Jeova i mekem blong stretem frut blong sin long wol, hem i soemaot lav. Lav nao i pulum Jeova blong mekem promes blong wan gudfala fiuja long ol pikinini blong Adam mo Iv. (Jenesis 3:15) Jeova i letem olgeta oli prea long hem mo i mekem rod blong oli save frengud wetem hem. Lav i pulum God blong givim wan ransom we i openem rod blong ol man oli save kasem fogif from ol sin blong olgeta, mo long fiuja, laef we i stretgud olgeta mo i no save finis. (Jon 3:16) Lav i pulum Jeova blong gat longfala tingting long ol man, nao oli gat janis blong tanem baksaed long Setan mo jusum Jeova olsem King blong olgeta.—2 Pita 3:9.
18. ?Yumi glad tumas we yumi gat wanem save? ?Bambae yumi tokbaot wanem long nekis stadi?
18 Wan pasta i toktok long ol man we oli hivap blong makem wan dei we ol teroris oli bin mekem nogud wok blong olgeta long wan ples. Pasta ya i talem se: “Yumi no save from wanem God i letem ol nogud samting i hapen mo from wanem fasin safa i gohed.” !Yumi sore long ol man olsem! Yumi glad tumas we yumi gat save long saed ya. (Dutronome 29:29) Yumi save se i no longtaem bambae Jeova i mas finisim fasin safa, from we hem i waes, i stret, mo i lavem yumi. Yes, hem i promes blong mekem olsem. (Revelesen 21:3, 4) ?Be olsem wanem long olgeta we oli ded long ol handred yia we oli pas? ?Rod we Jeova i yusum blong stretem trabol we i stat long Iden, i livim ol man ya oli stap we oli no gat janis long fiuja? Nogat. Lav i pulum Jeova blong mekem wan rod blong olgeta tu oli save kasem blesing, hemia tru long laef bakegen. Bambae yumi tokbaot samting ya long nekis stadi.
?Bambae Yu Yu Ansa Olsem Wanem?
• ?Yu save talem wanem long wan man we i askem from wanem God i letem ol man oli safa?
• ?Olsem wanem yumi luk tabu fasin mo stret fasin blong Jeova, long samting we hem i mekem long ol stronghed long Iden?
• ?From wanem yumi mas givhan long ol man blong oli kasem save moa long lav blong Jeova?
[Kwestin]
[Tok blong pija long pej 12]
Traehad blong givhan long olgeta we tingting blong olgeta i trabol from fasin safa long wol
[Tok blong pija long pej 14]
Tufala man ya blong bilif, Deved mo Habakuk, tufala i askem kwestin long God