Kam Strong Moa Long Wok Blong Jeova Nating Se Yu Olfala
Kam Strong Moa Long Wok Blong Jeova Nating Se Yu Olfala
“Ol man we . . . oli stap oltaem long haos blong [“Jeova . . . nating we hea blong olgeta i waet, be,” NW ] oli stap kam strong moa olsem ol tri we man i planem long gudfala graon.”—OL SAM 92:13, 14.
1, 2. (a) ?Plante man oli tingbaot taem blong olfala olsem wanem? (b) ?Baebol i talem wanem promes long saed blong trabol we sin blong Adam i mekem long yumi?
OLFALA—?Tok ya i mekem yu yu tingbaot wanem? ?Wan man we skin blong hem i slak mo i gat plante laen long fes blong hem? ?Wan man we sora blong hem i fas? ?Wan man we han blong hem i seksek mo leg blong hem i no strong nating? Maet yu tingbaot wan narafala problem we i joen wetem ‘taem ya we ol trabol i kasem man evri dei’ olsem Prija 12:1-7 i talem. I gud blong rimemba se ol tok blong Prija japta 12 long saed blong ol problem blong olfala, i no soemaot tingting we Jeova God i gat fastaem long saed blong ol man, be i soemaot trabol we sin blong Adam i mekem long bodi blong man.—Rom 5:12.
2 I no wan nogud samting blong kam olfala, from we man we i olfala i laef longtaem. Nomata wanem kaen laef samting be sipos oli grugud mo oli karem frut, hemia wan gudfala samting. I no longtaem, bambae yumi no moa luk ol trabol we sin mo rabis fasin i mekem raonabaot long yumi long sikis taosen yia we i pas. Olgeta man we oli obei long God bambae oli haremgud long laef we God i wantem se man i mas gat, we i no gat ol trabol mo soa blong olfala wetem ded. (Jenesis 1:28; Revelesen 21:4, 5) Long taem ya “bambae i no moa gat man olbaot long kantri ya we i save talem se hem i sik.” (Aesea 33:24) Olfala bambae i “kam strong olsem we i yangfala nomo,” mo bambae ‘bodi blong hem i kam gud’ bitim yangtaem blong hem. (Job 33:25) Be go kasem taem ya, yumi evriwan i mas traehad blong winim ol trabol blong olfala we i kamaot long sin blong Adam. Nating se i olsem, ol man blong Jeova oli kasem sam spesel blesing taem oli stap kam olfala.
3. ?Olsem wanem ol Kristin oli save ‘kam strong moa nating we hea blong olgeta i waet’?
3 Tok blong God i promes se: “Ol man we . . . oli stap oltaem long haos blong [“Jeova . . . nating we hea blong olgeta i waet, be,” NW ] oli stap kam strong moa olsem ol tri we man i planem long gudfala graon.” (Ol Sam 92:13, 14) Man blong raetem Sam ya i yusum pijatok blong soemaot wan stamba trutok, hemia se ol man we oli holemstrong long God oli save kam strong moa mo karem plante frut long wok blong God, nating se bodi blong olgeta i stap kam slak. I gat plante eksampol long Baebol mo tede tu we oli soemaot samting ya.
“Oltaem Nomo”
4. ?Olsem wanem olfala woman profet ya Ana i soemaot se hem i onagud long God? ?Mo wanem blesing we hem i kasem from?
4 Tingbaot wan woman profet long faswan handred yia, nem blong hem Ana. Taem Ana i gat 84 yia blong hem, “oltaem nomo, hem i stap long haos blong God, nao long moning mo long sapa, hem i stap joen long ol man blong oli mekem wosip, mo i stap livim kakae mo i stap prea.” Papa blong Ana i no wan Livaet, hem i kamaot long “laen blong Asere.” Taswe Ana i no save laef long haos blong God. !Traem tingbaot bigfala traehad we hem i mas mekem blong kam wosip long haos blong God evri moning, mo stap kasem taem blong wosip long sapa! From we Ana i mekem wosip long God oltaem, hem i kasem wan bigfala blesing. Hem i stap long haos blong God taem Josef mo Meri i karem bebi Jisas i kam blong givim hem i go long God, olsem Loa i talem. Taem Ana i luk Jisas, hem i “talem tangkiu long God from, mo i stap tokbaot pikinini ya long olgeta we oli stap wet blong Mesaea i mekem Jerusalem i fri bakegen.”—Luk 2:22-24, 36-38; Namba 18:6, 7.
5, 6. ?Olsem wanem plante olfala tede oli soemaot sem fasin olsem Ana?
5 Plante olfala tede oli olsem Ana. Oli kam oltaem long miting, oli prea oltaem from trufala wosip, mo oli no save mestem wok blong talemaot gud nius. Wan Kristin brata we i gat 80 yia blong hem mo i kam oltaem long miting wetem woman blong hem, i talem se: “I olsem wan kastom blong mitufala blong go oltaem long miting. Mitufala i no wantem stap long wan narafala ples long taem blong miting. Mitufala i wantem stap long ples we ol man blong God oli stap. Long ples ya nao mitufala i haremgud.” !Hemia wan eksampol we i leftemap tingting blong yumi evriwan!—Hibrus 10:24, 25.
6 “Sipos i gat wan samting long saed blong trufala wosip, mi mi wantem joen long hem, mi no wantem mestem.” Hemia tingting blong Jean, wan Kristin wido we i gat bitim 80 yia blong hem. Hem i gohed se: “I tru, sam samtaem mi harem nogud. Be i no nid blong ol narafala raonabaot long mi oli harem nogud tu.” Ae blong hem i saen taem hem i tokbaot glad we hem i kasem long ol wokbaot blong hem long ol narafala kantri blong joen long ol spesel taem blong wosip. Long wan trip we hem i mekem i no longtaem, hem i talem long ol fren we oli wokbaot wetem hem se: “Mi no moa wantem luk ol haos blong bifo we ol turis oli stap lukluk. !Mi wantem go prij!” Jean i no save lanwis blong kantri ya we hem i go long hem, be nating, hem i faenem rod blong pulum tingting blong ol man i go long tok blong Baebol. Antap long hemia, hem i wok blong plante yia wetem wan kongregesen we i nidim moa man blong prij, nating se hem i mas lanem wan narafala lanwis mo i mas wokbaot wan aoa blong go long ol miting mo wan aoa bakegen blong kamhom.
Gohed Blong Yusum Tingting
7. ?Taem Moses i kam olfala, hem i talem wanem tok we i soemaot se hem i wantem kam strong moa blong fren wetem God?
7 Ol yia blong laef oli givim plante save long yumi. (Job 12:12) Be ol yia blong laef oli no mekem yumi kam strong moa long bilif mo wosip, nogat. Taswe ol gudfala man blong God oli no mas dipen nomo long save we oli bin kasem plante yia bifo. I moagud we oli traehad blong ‘gat moa save’ blong Baebol taem ol yia oli stap pas. (Ol Proveb 9:9) Taem Moses i gat 80 yia blong hem, Jeova i singaot hem blong mekem wan spesel wok. (Eksodas 7:7) Long taem blong Moses, i no gat plante man we oli kasem 80 yia. Taswe hem i raetem se: “Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti.” (Ol Sam 90:10) Be Moses i neva harem se hem i olfala tumas blong lanem samting. Hem i mekem wok blong God blong plante yia, mo i kasem plante blesing long wok ya, mo i mekem plante bigfala desisen, be biaen, hem i askem yet long Jeova se: “Plis yu tijim mi long ol fasin blong yu, blong mi save . . . yu.” (Eksodas 33:13) Yes, oltaem Moses i wantem kam strong moa blong fren wetem Jeova.
8. ?Taem Daniel i gat moa long 90 yia blong hem, hem i mekem wanem blong yusum tingting blong hem? ?Wanem i kamaot from?
8 Taem profet Daniel i gat moa long 90 yia blong hem, be hem i stap stadi dip yet long ol tabu hanraet. Ol save we hem i kasem taem hem i stadi long “ol tok blong Baebol”—ating ol buk olsem Levitikas, Aesea, Jeremaea, Hosea, mo Amos—i pulum hem blong prea wetem fulhat blong hem long Jeova. (Daniel 9:1, 2) Jeova i ansa long prea ya taem i givim save long Daniel long saed blong Mesaea we bambae i kamtru, mo long saed blong trufala wosip long fiuja.—Daniel 9:20-27.
9, 10. ?Samfala oli mekem wanem blong yusum tingting blong olgeta?
9 Yumi save mekem olsem Moses mo Daniel. Go kasem en blong laef blong yumi, yumi save stadi long Tok blong God. Olsem nao bambae yumi traehad oltaem blong yusum tingting blong yumi. Plante oli stap mekem olsemia. Wan Kristin elda we i gat moa long 80 yia blong hem, nem blong hem Worth, hem i traehad blong ridim olgeta save we ‘slef we i stret mo waes’ i givim. (Matiu 24:45, NW ) Hem i se: “Mi mi lavem trutok, mo mi haremgud tumas blong luk olsem wanem laet blong trutok i stap kam klia moa oltaem.” (Ol Proveb 4:18) Wan narafala Kristin we nem blong hem Fred, hem i prij fultaem blong bitim 60 yia. Hem i laekem blong statem ol storian long saed blong Baebol wetem ol narafala Kristin, hem i faenem se samting ya i stap wekemap tingting blong hem long ol save blong God. Hem i talem se: “Mi mas mekem ol tok blong Baebol i laef long tingting blong mi. I gud blong mekem tok blong Baebol i laef mo i gat mining, mo blong luksave olsem wanem ‘tok ya we i stret gud mo i soemaot rod’ i joen wetem ol save we yumi gat finis. Olsemia, bambae yumi no gat ol smosmol save long ol defren samting nomo. Bambae yumi luksave olsem wanem ol wanwan save ya i joen tugeta mo i saenaot olsem ol sas ston.”—2 Timoti 1:13.
10 Nating se yu yu olfala finis, yu save lanem plante niufala samting we i no isi blong lanem. Samfala we oli gat 60, 70, no 80 yia blong olgeta oli lanem blong rid mo raet, no oli lanem wan narafala lanwis. Sam Witnes blong Jeova oli mekem olsem from we oli wantem talemaot gud nius long ol man we oli kamaot long narafala kantri. (Mak 13:10) Kristin brata ya Harry mo woman blong hem, tufala i gat klosap 70 yia blong tufala taem tufala i tekem desisen blong prij long ol man we oli toktok lanwis blong Potugal. Harry i talem se: “I tru, taem yu kam olfala, evri samting we yu mekem i had moa.” Nating se i olsem, tufala i traehad gogo tufala i kam naf blong mekem Baebol stadi long ol man long lanwis blong Potugal. Blong plante yia nao, Harry i stap givim ol tok long ol distrik asembli long lanwis blong Potugal.
11. ?From wanem yumi tokbaot ol wok we sam gudfala olfala oli stap mekem?
11 I tru, samfala we oli sik no oli gat wan narafala trabol long laef blong olgeta, oli no naf blong mekem samting we i strong olsem. ?Taswe, from wanem yumi stap tokbaot ol wok we sam olfala oli stap mekem? I no blong talem se olgeta olfala oli mas mekem olsem olgeta ya, nogat. Be i blong yumi kasem tingting we aposol Pol i tokbaot long leta we hem i raetem long ol Hibru Kristin. Long saed blong ol gudfala elda long kongregesen, hem i se: “Oltaem yufala i mas tingbaot fasin blong olgeta, we laef blong olgeta i olsem wanem, . . . nao yufala i mas biaen long olgeta, long fasin blong bilif blong olgeta.” (Hibrus 13:7) Taem yumi tingbaot ol olfala we oli wok strong long wok blong God, yumi wantem se bilif blong yumi i strong olsem bilif we i pusum olgeta blong mekem wok ya. Harry, we naoia i gat 87 yia blong hem, i tokbaot tingting we i pusum hem i se: “Mi wantem yusum ol laswan yia blong laef blong mi long waes fasin, mo letem Jeova i yusum mi fulwan long wok blong hem.” Fred we yumi tokbaot finis, hem i haremgud long wok we hem i mekem long Betel. Hem i talem se: “Yu mas faenem wanem rod we yu save mekem wok blong Jeova fulwan long hem, mo yu mas gohed nomo long rod ya.”
Ona Long Jeova Nating Se Laef i Jenis
12, 13. ?Nating se laef blong Basilae i jenis taem i kam olfala, be olsem wanem hem i ona long God yet?
12 I no isi blong haremgud long ol jenis we oli kamaot long bodi blong yumi taem yumi stap kam olfala. Be yumi save ona long Jeova nating se laef blong yumi i jenis. Wan man Gilead long taem bifo, nem blong hem Basilae, i givim wan gudfala eksampol long yumi. Taem hem i gat 80 yia blong hem, hem i mekem i gud tumas long Deved mo ol soldia blong hem. Hem i givim kakae mo ples blong slip long olgeta, taem Absalom i girap agensem rul blong Deved. Taem Deved i stap wokbaot i kam long Jerusalem bakegen, Basilae i tekem hem wetem ol man blong hem oli go kasem Jodan Reva. Deved i wantem se Basilae i kam stap long haos blong king. ?Basilae i talem wanem? “Mi mi olfala, mi kasem eiti yia finis, mo i no moa gat wan samting we i save mekem mi mi glad. Mi no moa save harem tes blong ol samting we mi stap kakae mo we mi stap dring, mo mi no moa save harem voes blong olgeta we oli stap singsing. . . . Be hemia Kimam, pikinini blong mi. Yu save tekem hem i go wetem yu blong i wok blong yu, mo yu save mekem long hem olsem we yu ting se i gud long yu.”—2 Samuel 17:27-29; 19:31-40.
13 Nating se laef blong Basilae i jenis taem i kam olfala, be hem i mekem wanem we hem i naf blong mekem blong givhan long king ya we Jeova i putumap. Hem i no moa save harem tes blong ol kakae mo sora blong hem i no moa opengud, be hem i no kros from. Hem i no tingbaot hem wan be hem i givim janis long Kimam blong kasem blesing we hem i mas kasem. Taem Basilae i mekem olsem, hem i soemaot se hem i rili wan gudfala man. Plante olfala tede oli soemaot sem fasin olsem Basilae, oli no tingbaot olgeta nomo mo oli givim presen long narafala wetem gladhat. Oli mekem wanem we oli naf blong mekem blong givhan long trufala wosip. Oli save se ‘God i glad tumas long sakrefaes ya we oli mekem i go long hem.’ !Ol olfala we oli holemstrong long God, oli wan bigfala blesing long yumi!—Hibrus 13:16.
14. ?Olsem wanem tok ya se Deved i olfala i givim moa mining long Ol Sam 37:23-25?
14 I gat plante jenis i kamaot long laef blong Deved. Be long olgeta yia ya, hem i luksave se Jeova i stap lukaot gud long ol man blong hem. Samting ya i neva jenis. Klosap long en blong laef blong Deved, hem i wokem wan singsing, hemia Sam 37 long Baebol blong yumi. Traem tingbaot Deved we i stap tingting dip, i plei long hap blong hem, mo i singim ol tok ya: “Hae God i stap lidim ol man long rod we i stret blong olgeta i folem, mo i stap lukaot gud long ol man we hem i glad long fasin blong olgeta. Sipos oli foldaon be bambae oli no save stap daon longtaem, from we Hae God bambae i holem olgeta, i leftemap olgeta bakegen. Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” (Ol Sam 37:23-25) Jeova i luk se i stret blong pulum Deved blong talem long Sam ya se hem i olfala. !Samting ya i ademap bigfala filing long ol tok ya we i kamaot long hat blong Deved!
15. ?Olsem wanem aposol Jon i givim wan gudfala eksampol blong fasin blong holemstrong long God, nating se i gat plante jenis i kamaot long laef blong hem taem i kam olfala?
15 Aposol Jon i wan narafala gudfala eksampol blong fasin blong holemstrong long God nating se i gat plante jenis long laef blong hem taem i kam olfala. Jon i mekem wok blong God klosap 70 yia, nao biaen oli putum hem i stap kalabus long aelan blong Patmos ‘from we hem i stap talemaot God mo i stap givim witnes long saed blong Jisas.’ (Revelesen 1:9, NW ) Be wok blong Jon i no finis long taem ya. Olgeta buk blong Baebol we Jon i raetem, hem i raetem long ol laswan yia blong laef blong hem. Taem hem i stap long aelan blong Patmos, hem i luk nambawan vison ya blong Revelesen, mo i raetemdaon evri samting we hem i luk. (Revelesen 1:1, 2) Ating hem i kamfri long kalabus taem Hedgavman ya Nerva blong Rom i stap rul. Afta, long yia 98, Jon i raetem Gospel blong hem mo trifala leta blong hem. Ating Jon i gat 90 no 100 yia long taem ya.
Gudnem Blong Olgeta We Oli Stanap Strong Bambae i Stap Olwe
16. ?Olsem wanem olgeta we oli no moa save toktok klia oli save ona long Jeova yet?
16 I gat plante defren trabol we i save mekem laef blong ol olfala i had, sam long ol trabol ya oli bigwan, sam oli smol. Maet sam olfala oli no moa save toktok klia. Nating se i olsem, oli holem ol gudfala memori blong lav mo kaengud fasin we God i bin soemaot long olgeta. Ating maot blong olgeta i no moa save toktok klia, be long hat blong olgeta oli stap talem long Jeova se: “Mi mi laekem Loa blong yu tumas, mi stap tingting long hem i stat long moning, gogo kasem sapa.” (Ol Sam 119:97) Jeova i save olgeta we oli stap “tingbaot nem blong hem,” mo hem i luksave se oli defren long ol narafala man we oli no tinghevi nating long hem. (Malakae 3:16, NW; Ol Sam 10:4) !I leftemap tingting blong yumi bigwan blong save se samting we yumi tingting dip long hem i save givim glad long Jeova!—1 Kronikel 28:9; Ol Sam 19:14.
17. ?Olgeta we oli mekem wok blong Jeova longtaem finis, oli gat wanem samting we i rili spesel?
17 Wan bigfala samting we yumi no mas fogetem, hemia se ol olfala we oli bin mekem wok blong Jeova blong plante yia, oli gat wan samting we i rili spesel mo we oli no save kasem long wan narafala rod—hemia gudnem from we oli stanap strong longtaem. Nem ya bambae i stap olwe. Jisas i talem se: “Bambae yufala i save sevem laef blong yufala, from we yufala i stap stanap strong.” (Luk 21:19) Blong kasem laef we i no save finis, yumi mas stanap strong longtaem. Yufala we i “mekem ol samting we God i wantem” mo we yufala i bin stap tru long Jeova longtaem, yufala i save gat strong tingting se bambae yufala i “kasem ol samting we hem i promes blong givim long yufala.”—Hibrus 10:36.
18. (a) ?Wanem samting we Jeova i laekem tumas long saed blong ol olfala? (b) ?Bambae yumi tokbaot wanem long nekis stadi?
18 Jeova i tinghae long yu taem yu mekem wok blong hem wetem olgeta laef blong yu, nomata se yu mekem plante wok no yu mekem smol nomo. Taem yumi kam olfala, plante trabol i save kasem ‘bodi blong yumi.’ Nating se i olsem, ‘tingting blong yumi’ i save kam niuwan evri dei. (2 Korin 4:16) I klia se Jeova i gat bigfala tangkiu from ol wok we yu mekem long ol yia we oli pas. Mo i klia tu se hem i gat tangkiu from evri samting we yu stap mekem naoia blong leftemap nem blong hem. (Hibrus 6:10) Long nekis stadi, bambae yumi tokbaot olsem wanem eksampol blong yu blong stap tru long God i givhan long plante narafala.
?Bambae Yu Yu Ansa Olsem Wanem?
• ?Ana i givim wanem gudfala eksampol long ol olfala Kristin tede?
• ?From wanem ol trabol blong olfala i no nid blong blokem yumi long wok blong God?
• ?Olsem wanem ol olfala oli save gohed nomo blong ona long God?
• ?Wanem tingting blong Jeova long saed blong wok we ol olfala oli mekem i go long hem?
[Kwestin]
[Tok blong pija long pej 25]
Olfala Daniel i ridim “ol tok blong Baebol” blong faenemaot hamas yia laen blong Juda bambae i stap kalabus
[Tok blong pija long pej 27]
Plante olfala oli givim gudfala eksampol, oli kam oltaem long miting, oli wok strong long wok blong prij, mo oli wantem lanem ol niufala samting