?Laef Bakegen i Wan Trufala Samting Long Tingting Blong Yu?
?Laef Bakegen i Wan Trufala Samting Long Tingting Blong Yu?
“God bambae i mekem olgeta man we oli ded oli laef bakegen.”—OL WOK 24:15.
1. ?From wanem ded i wan samting we yumi sua se bambae i mas kasem yumi?
“LONG wol ya, yumi sua long tu samting nomo, hemia ded mo takis.” Wan haeman blong Amerika, Benjamin Franklin, i raetem tok ya long yia 1789. Samfala oli ting se tok ya i waes. Long saed blong takis, plante man oli giaman blong oli pem smol nomo no oli no pem nating. Be ded i defren. Yumi no save ronwe long ded. Long paoa blong yumi, yumi no naf blong winim ded. Olgeta man oli save se oli mas ded. Seol, no beregraon, i gohed nomo blong pulum fulap man, i spolem plante we yumi lavem olgeta. (Ol Proveb 27:20) Be tingbaot wan samting we i mekem yumi haremgud.
2, 3. (a) ?From wanem ded bambae i no kasem evri man? (b) ?Bambae yumi tokbaot wanem long stadi ya?
2 Tok blong Jeova i mekem promes blong laef bakegen, mo promes ya i sua blong kamtru. Hem i no wan drim. I no gat wan paoa long heven mo wol we i save blokem Jeova blong mekem promes ya i kamtru. Be plante man tede oli no kasem save se i gat sam man we bambae oli no ded. ?From wanem yumi talem olsem? From we wan “bigfala kampani” we yumi no save namba blong olgeta bambae oli laef tru long taem blong “bigfala trabol” we i klosap. (Revelesen 7:9, 10, 14) Bambae oli gohed blong laef, wetem janis blong laef olwe nomo. Taswe, long saed blong olgeta, ded i no wan samting we i sua blong kasem olgeta. Mo tu, ‘God bambae i winim ded.’—1 Korin 15:26.
3 Yumi mas suagud long laef bakegen, olsem aposol Pol we i talem se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Bambae yumi tokbaot tri kwestin long saed blong laef bakegen. Faswan: ?Wanem i mekem se promes ya i sua blong kamtru? Sekenwan: ?Olsem wanem promes ya blong laef bakegen i save mekem yu wan yu haremgud? Namba tri: ?Olsem wanem promes ya i save gat paoa long laef blong yu naoia?
Laef Bakegen i Sua Blong Kamtru
4. ?From wanem i mas gat laef bakegen blong mekem stamba tingting blong Jeova i kamtru?
4 I gat plante samting we oli soem se laef bakegen i sua blong kamtru. Bigwan blong olgeta hemia: I mas gat laef bakegen blong mekem stamba tingting blong Jeova i kamtru. Tingbaot se Setan i lidim ol man blong oli mekem sin, mo ded i kamaot long sin. Taswe, Jisas i talem long saed blong Setan se: “Fasin blong hem we i stat bifo olgeta, hem i man blong kilim man.” (Jon 8:44) Be Jeova i promes se “woman” blong hem, no ogenaesesen blong hem long heven, bambae i karem “ol pikinini” we bambae oli smasem hed blong “snek ya blong bifo,” i min se bambae oli finisim Setan. (Jenesis 3:1-6, 15; Revelesen 12:9, 10; 20:10) Sloslo Jeova i soemaot plan blong hem long saed blong Pikinini ya we i Mesaea. Nao i kam klia se Pikinini ya bambae i no spolem Setan nomo, be bambae i mekem moa. Tok blong God i talem se: “From samting ya nao Pikinini blong God i kamtru, blong hem i brekemdaon ol wok we Setan i mekem.” (1 Jon 3:8) Bigfala wok blong Setan we Jeova i gat plan blong finisim no brekemdaon tru long Jisas, hemia ded we yumi kasem long Adam. Long saed ya, ransom sakrefaes blong Jisas mo laef bakegen i impoten tumas.—Ol Wok 2:22-24; Rom 6:23.
5. ?Olsem wanem laef bakegen bambae i leftemap nem blong Jeova?
5 Jeova i gat strong tingting blong leftemap tabu nem blong hem. Setan i sakem doti long nem blong God mo i mekem plante giaman toktok. Hem i giaman se Adam mo Iv “i no save ded” sipos tufala i kakae frut we God i putum tabu long hem. (Jenesis 2:16, 17; 3:4) Stat long taem ya kasem tede, Setan i pulum ol man blong oli bilif long plante giaman tijing, olsem tijing ya se spirit blong dedman i gohed blong laef afta we bodi i ded. Be Jeova bambae i soemaot klia se ol bilif ya oli giaman taem hem i mekem ol man oli laef bakegen. Bambae hem i pruvum blong olwe se Hem nomo i save sevem man, mo Hem nomo i save mekem dedman i laef bakegen.
6, 7. ?Wanem filing blong Jeova long saed blong wok ya blong mekem ol man oli laef bakegen? ?Olsem wanem yumi save se hem i gat filing olsem?
6 Jeova i wantem tumas blong mekem ol man oli laef bakegen. Baebol i soemaot filing blong Jeova long saed ya. Tingbaot tok blong gudfala man ya Job long Baebol: “?Sipos wan man we i strong gud i ded, hem i save laef bakegen? Evri dei long kalabus ya, bambae mi mi wet gogo kasem taem we bambae mi mi fri bakegen. Yu bambae yu singaot long mi, nao mi bambae mi ansa long yu. Bambae yu yu wantem tumas we wok blong ol han blong yu i kambak.” (Job 14:14, 15, NW ) ?Wanem mining blong ol tok ya?
7 Job i save se afta we hem i ded, hem i mas wet no i mas slip long beregraon. Hem i tokbaot taem ya olsem we hem i stap “kalabus” mo i stap wet blong kamfri. Job i sua se bambae hem i kamfri. Hem i save se bambae hem i laef bakegen. ?Olsem wanem hem i save samting ya? Hem i savegud ol filing blong Jeova. Bambae Jeova i “wantem tumas” blong luk gudfala man ya blong hem bakegen. Yes, God i wantem tumas blong mekem ol stret man oli laef bakegen. Mo Jeova bambae i givim janis long plante narafala man tu blong oli save laef olwe long Paradaes long wol. (Luk 23:43; Jon 5:28, 29) Plan ya hem i samting we God i wantem. Taswe i no gat man i save blokem.
8. ?Olsem wanem Jeova i ‘soemaot we hem bambae i mekem ol man oli laef bakegen’?
8 Taem Jisas i laef bakegen, hemia i soemaot se promes blong laef bakegen i sua blong kamtru. Pol i givim wan tok long Atens, i se: “[God] i putum dei finis we bambae hem i save jajem olgeta man long wol, mo bambae hem i mekem long fasin we i stret nomo. God i jusumaot finis man ya we bambae hem i yusum blong jajem olgeta man. Mo hem i soemaot finis long olgeta man we hem bambae i mekem olsem, from we hem i mekem man ya i laef bakegen finis.” (Ol Wok 17:31) Samfala oli laf long Pol taem oli harem tok blong hem long saed blong laef bakegen. Be wanwan man i bilif long tok blong hem. Maet Pol i pulum tingting blong samfala taem hem i talem se God i soemaot finis we bambae hem i mekem man i laef bakegen. Taem Jeova i mekem Jisas i laef bakegen, Hem i mekem wan merikel we i bigwan moa i bitim ol narafala merikel. Hem i mekem Pikinini blong hem we i ded i laef bakegen olsem wan spirit man we i gat paoa. (1 Pita 3:18) Afta we Jisas i laef bakegen, hem i gat moa paoa i bitim bifo we hem i kamdaon long wol. Jisas i kasem laef ya we i no save kam nogud samtaem mo hem i gat moa paoa i bitim ol narafala, Jeova nomo i gat paoa bitim hem. Taswe, Jisas i rere nao blong mekem sam bigbigfala wok we Papa blong hem i givim long hem. Bambae Jeova i yusum Jisas blong mekem ol narafala oli laef bakegen, samfala long heven mo ol narafala long wol. Jisas hem wan i talem se: “Mi nao, mi stamba blong laef bakegen long ded. Mi nao mi stamba blong laef.” (Jon 5:25; 11:25) Taem Jeova i mekem Pikinini blong hem i laef bakegen, hem i soemaot se promes blong laef bakegen i sua blong kamtru long ol man we oli holemstrong long hem.
9. ?Olsem wanem plante stori blong Baebol oli soemaot se laef bakegen i wan samting we i sua blong kamtru?
9 Samfala oli luk long prapa ae blong olgeta se God i mekem man i laef bakegen, mo oli raetemdaon stori ya long Baebol. Baebol i storian long saed blong eit man we oli laef bakegen long wol ya. Ol merikel ya oli no kamaot long ples haed, oli hapen long open ples we ol man oli save luk. Lasaros i ded fo dei finis, nao Jisas i mekem hem i laef bakegen. Jisas i mekem merikel ya long fored blong wan bigfala grup blong man we oli stap krae, ating ol famle, ol fren, mo ol man we Lasaros i save olgeta. Merikel ya i soemaotgud se God nao i sanem Jisas. Ol lida blong skul we oli enemi blong Jisas, be olgeta tu oli no save agensem merikel ya. !Taswe, oli mekem plan blong kilim Jisas i ded, wetem Lasaros tu! (Jon 11:17-44, 53; 12:9-11) Yes yumi save bilif strong se laef bakegen i sua blong kamtru. God i raetemdaon plante stori blong ol man we oli laef bakegen finis, blong leftemap tingting blong yumi mo blong mekem bilif blong yumi i strong.
Promes Blong Laef Bakegen i Mekem Yumi Haremgud
10. ?Ol stori blong laef bakegen long Baebol oli save mekem yumi haremgud sipos yumi mekem wanem?
10 ?Taem yu stap tingbaot ded no taem wan famle no fren blong yu i lus, yu yu wantem tumas blong kasem ol tok we i mekem yu yu haremgud? Yu save faenem ol tok ya long Baebol, long ol stori blong ol man we oli laef bakegen. I gud yu ridim ol stori ya, yu tingting dip long olgeta, mo yu traem mekem olsem we yu tu yu stap long taem bifo ya mo yu luk olgeta ya we oli laef bakegen. Samting ya bambae i mekem se promes blong laef bakegen i kam sua moa long tingting blong yu. (Rom 15:4) Ol stori ya oli no ol giaman stori. Oli rili bin hapen. Ol man ya we oli laef bakegen, oli ol trufala man olsem yumi, we oli bin laef long wan stret taem mo long wan prapa ples. Bambae yumi tokbaot wan man we i laef bakegen—faswan stori long Baebol long saed blong laef bakegen.
11, 12. (a) ?Wanem nogud samting i kasem wido blong Jarefat? ?Mo hem i blemem hu fastaem? (b) Tokbaot samting we profet Elaeja i mekem long paoa blong Jeova.
11 Traem tingbaot: Profet Elaeja i stap plante wik long haos blong wan wido long Jarefat, hem i slip long wan rum antap long ruf blong haos ya. Taem ya i wan trabol taem. Longtaem finis i no gat ren nao kakae i sot. Plante man oli stap ded from. Nao Jeova i givim paoa long Elaeja blong mekem wan merikel, blong mekem i gud long wido ya we i gat tingting daon mo bilif. Woman ya wetem smol boe blong hem i no moa gat kakae, tufala i gat naf blong wan moa kakae nomo. Ale God i givim paoa long Elaeja blong mekem wan merikel, nao evri dei wido ya i gat naf flaoa mo oel. Be biaen, wan narafala nogud samting i hapen. Wantaem nomo pikinini blong woman ya i sik, mo smoltaem biaen, win blong hem i finis. !Wido ya i harem nogud bitim mak! Hem i lusum hasban blong hem finis, we i bin sapotem hem mo mekem ol strong wok, nao antap long samting ya, hem i lusum pikinini blong hem, wan nomo we hem i gat. !From we hem i harem nogud tumas, hem i blemem Elaeja wetem God blong hem, Jeova! ?Profet Elaeja i mekem wanem?
12 Elaeja i no tok strong long wido ya from we hem i blemem hem mo Jeova. Elaeja i talem nomo se: “Yu givim boe ya long mi.” Nao hem i karem boe ya i go antap long rum blong hem mo i prea bakegen mo bakegen long Jeova blong i givimbak laef long boe ya. !Ale Jeova i yusum paoa blong hem! Traem tingbaot bigfala glad we i stap long fes blong Elaeja taem i luk we jes blong boe ya i solap mo i pulum win bakegen. Nao boe ya i openem ae blong hem mo tufala ae ya i saen we i saen. Ale Elaeja i tekem boe ya i godaon long mama blong hem nao i talem se: “Hemia pikinini blong yu. Hem i laef bakegen finis.” Woman ya i glad bitim mak. Hem i se: “Naoia, mi mi savegud we yu yu man blong Hae God, mo i tru we hem i stap givim tok blong hem long yu blong yu talemaot.” (1 King 17:8-24) Bilif blong woman ya long Jeova mo long man blong Hem i kam strong moa.
13. ?From wanem stori blong Elaeja we i mekem boe blong wido i laef bakegen i mekem yumi haremgud tede?
13 Taem yumi tingting dip long ol stori olsem, yumi haremgud tumas. !I klia nomo se Jeova i naf blong winim enemi blong yumi, ded! !Traem tingbaot taem ya we plante taosen man mo woman bambae oli gat semfala glad olsem wido ya, taem ol man oli laef bakegen! Bambae i gat bigfala glad long heven tu, taem Jeova i talem long Pikinini blong hem blong i mekem ol man oli laef bakegen long wol. (Jon 5:28, 29) ?Olsem wanem? ?Yu lusum finis wan fren no famle we yu lavem hem tumas? !Ating yu glad tumas blong save se Jeova i gat paoa blong mekem hem i laef bakegen mo se bambae hem i mekem olsem!
Janis Blong Yu Long Fiuja Mo Laef Blong Yu Naoia
14. ?Olsem wanem promes blong laef bakegen i save gat paoa long laef blong yu?
14 ?Olsem wanem promes ya blong laef bakegen i save gat paoa long laef blong yu naoia? Yu save kasem paoa from promes ya taem yu fesem trabol, hadtaem, fasin agens, mo denja. Setan i wantem se yu fraet we yu fraet long ded, olsem nao, bambae yu rere blong lego bilif blong yu from enikaen giaman promes blong sevem laef blong yu. Tingbaot we Setan i bin talem long Jeova se: “[Man] i save lego olgeta samting we hem i gat blong i sevem laef blong hem.” (Job 2:4) Taem Setan i talem tok ya, hem i daonem yumi evriwan. Hem i daonem yu tu. ?Olsem wanem? ?Sipos laef blong yu i stap long denja, bambae yu lego wok blong God? Sipos yu tingting gud long promes blong laef bakegen, yu save mekem tingting blong yu i strong blong gohed oltaem blong mekem samting we Papa blong yu long heven i wantem.
15. ?Taem laef blong yumi i stap long denja, olsem wanem tok blong Jisas long Matiu 10:28 i save mekem yumi haremgud?
15 Jisas i talem se: “Bambae yufala i no fraet long olgeta ya we oli save kilim yufala i ded, be oli no save kilim [“sol,” NW ] blong yufala. Yufala i mas fraet long God, we hem nomo i gat raet blong mekem bodi mo [sol] blong yufala, tufala i lus wantaem long [“Gehena,” NW ].” (Matiu 10:28) Yumi no mas fraet long Setan mo ol man blong hem long wol. I tru, sam long olgeta oli gat paoa blong mekem nogud long yumi, mo blong kilim yumi i ded tu. Be nomata sipos oli kilim yumi i ded, hemia i blong smoltaem nomo. Jeova i gat naf paoa mo i gat strong tingting blong fiksimap olgeta trabol we i kasem ol gudfala man blong hem, mo hem i save mekem olgeta oli laef bakegen tu. Yumi mas fraet long Jeova nomo, yumi mas gat bigfala ona mo respek long hem. Hem nomo i gat paoa blong tekemaot laef blong yumi wetem janis blong laef bakegen tu, i min se hem i save kilim bodi mo sol tugeta, tufala i lus wantaem long Gehena. Be Jeova i no wantem we samting ya i hapen long yu. (2 Pita 3:9) Promes ya blong laef bakegen i mekem se yumi ol man blong God, oltaem yumi save sua se yumi stap sefgud. Sipos yumi stap tru long God, laef we i no save finis i stap long fored blong yumi. Mo i no gat wan samting we Setan mo ol man blong hem oli save mekem blong blokem samting ya.—Ol Sam 118:6; Hibrus 13:6.
16. ?Olsem wanem laef bakegen i save gat paoa long samting we yumi jusum blong putum long fasples long laef?
16 Sipos promes ya blong laef bakegen i rili tru long tingting blong yumi, hem i save jenisim tingting we yumi gat long saed blong laef. Bambae yumi holem tingting ya se “nating we yumi laef, no yumi ded, be yumi man blong [“Jeova,” NW ].” (Rom 14:7, 8) Taswe, taem yumi jusum wanem samting we yumi putum long fasples long laef blong yumi, bambae yumi folem advaes ya blong Pol: “Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rom 12:2) Plante man oli bisi oltaem blong mekem evri samting we oli wantem mekem, oli traem kasem evri mak we oli wantem kasem, mo oli folem evri filing blong olgeta. Oli luk se laef i sot, ale oli hareap blong mekem evri samting we oli save haremgud long hem. Mo sipos oli gat wan fasin blong wosip, fasin ya i no laenap nating wetem wanem ‘we God i wantem mo we i stretgud blong mekem.’
17, 18. (a) ?Olsem wanem Tok blong Jeova i soemaot se laef i sot? ?Be God i wantem givim wanem long yumi? (b) ?From wanem yumi wantem presem Jeova evri dei?
17 I tru se laef i sot. ‘Hem i save finis kwiktaem nomo, nao yumi go lus olgeta,’ maet afta 70 no 80 yia. (Ol Sam 90:10) Laef blong man i pas hareap, olsem gras we i kam drae, wan sado we i pas, wan win we i blu smoltaem nao i finis. (Ol Sam 103:15; 144:3, 4) Be plan blong God i no se, long fashaf blong laef blong yumi, yumi kam bigwan mo yumi kasem waes mo save, ale smoltaem biaen bodi blong yumi i kam slak, yumi sik mo yumi ded. Nogat. Jeova i mekem se yumi bon wetem tingting ya we yumi wantem blong laef olwe. Baebol i talem se: “Laef we i no save finis, hem i putum long hat blong [yumi].” (Prija 3:11, NW ) ?Olsem wanem? ?God i putum tingting long yumi se yumi wantem laef olwe be biaen hem i mekem se yumi no naf blong kasem samting ya? ?God i nogud olsem? Nogat. “God [hem] i lav.” (1 Jon 4:8, NW ) Bambae hem i mekem ol dedman oli laef bakegen blong oli save gat janis blong kasem laef ya we i no save finis.
18 Promes blong laef bakegen i mekem se yumi save sua long wan gudfala fiuja. Yumi no nid blong resis krangke blong traem mekem evri samting we yumi wantem mekem, naoia nomo. Yumi no nid blong “yusum tumas” wol ya we i stap lus. (1 Korin 7:29-31, NW; 1 Jon 2:17) Yumi gat wan nambawan samting we olgeta we oli no bilif long promes blong laef bakegen oli no gat. Yumi save se sipos yumi holemstrong long Jeova God, bambae yumi save gohed olwe blong presem hem mo haremgud long laef gogo i no save finis. !Taswe, yumi mas presem Jeova evri dei from we hem nao i mekem se promes ya blong laef bakegen i sua blong kamtru!
?Bambae Yu Yu Ansa Olsem Wanem?
• ?Yumi mas harem olsem wanem long saed blong laef bakegen?
• ?Wanem i mekem se laef bakegen i sua blong kamtru?
• ?Olsem wanem promes blong laef bakegen i save leftemap tingting blong yu?
• ?Olsem wanem promes blong laef bakegen i save gat paoa long laef blong yu?
[Kwestin]
[Tok blong pija long pej 20]
“Hemia pikinini blong yu. Hem i laef bakegen finis”