Tok Blong Jeova i Wan Samting We i Laef

Ol Bigfala Poen Long Buk Blong Ol Krae

PROFET Jeremaea i luk mesej blong jajmen we hem i talemaot blong 40 yia, i kamtru. ?Taem profet ya i luk wetem prapa ae blong hem we taon blong hem i lus, hem i harem olsem wanem? Long fastok blong Ol Krae long Grik Baebol ya Septuagint oli raetem se: “Jeremaea i sidaon we hem i harem nogud tumas i stap krae, hemia toktok blong ol krae blong hem long saed blong Jerusalem.” Jeremaea i raetemdaon buk blong Ol Krae long yia 607 B.K.T. * i no longtaem tumas afta we ol ami oli spolem Jerusalem. Ol ami ya oli bin raonem Jerusalem blong 18 manis mo biaen oli bin bonem taon ya. Taswe ol samting ya i stap klia yet long tingting blong Jeremaea mo buk ya i talemaot bigfala soa we Jeremaea i harem long hat blong hem. (Jeremaea 52:3-5, 12-14) I no gat wan narafala taon long histri we man i talemaot ol krae long saed blong hem olsem we Jeremaea i mekem long Jerusalem. Ol krae ya oli tajem hat mo oli pulum man blong sore tu.

I gat faef haf we oli olsem ol singsing we i mekemap buk blong Ol Krae. Ol fofala faswan haf oli ol singsing blong krae, namba faef haf hem i wan prea blong askem samting long God. Ol fofala singsing ya oli wan stael blong singsing we faswan wod blong vas i stat wetem faswan leta blong alfabet long Hibru, ale ol vas we oli kam biaen oli folfolem ol 22 leta blong alfabet ya. I tru se namba faef haf, no prea, i gat 22 vas sem mak olsem namba blong ol leta blong alfabet long Hibru lanwis, be ol vas ya oli no folfolem stret oda blong alfabet ya.

“WOTA BLONG AE BLONG MI I RON GOGO MI NO MOA SAVE LUKLUK SAMTING”

(Ol Krae 1:1–2:22)

“Taon ya Jerusalem we fastaem i fulap gud long ol man, naoia i no gat man nating long hem, mo hem i harem nogud tumas from. Fastaem olgeta man long wol oli stap ona long hem, be naoia hem i stap hem wan, olsem wan woman we man blong hem i ded. Taon ya we fastaem i gud moa i winim ol narafala taon, naoia hem i kam slef finis.” Ol krae blong profet Jeremaea long saed blong Jerusalem oli stat olsem nao. Hem i talemaot from wanem trabol ya i kasem Jerusalem, i se: “Hae God nao i mekem hem i harem nogud from we sin blong hem i plante we plante.”—Ol Krae 1:1, 5.

Jerusalem i olsem wan wido we i stap sore from man blong hem mo ol pikinini blong hem, hem i talem se: “I no gat narafala man i harem nogud olsem mi.” Long saed blong ol enemi blong hem, hem i prea long God i se: “Plis yu luk sin blong olgeta, mo yu panisim olgeta olsem we yu panisim mi from ol sin blong mi. Mi mi harem nogud tumas, nao mi krae we mi krae.”—Ol Krae 1:12, 22.

Jeremaea i trabol tumas, hem i talem se: “Yumi ol laen blong Isrel, be hem i kros tumas long yumi, nao i flatemgud paoa blong yumi. Taem ol enemi oli kam, hem i no wantem givhan long yumi. Hem i faerap long yumi, i spolemgud yumi olsem faea we i kakae evri samting.” Profet ya i givhan long yumi blong pijarem bigfala sore blong hem, hem i krae i se: “Wota blong ae blong mi i ron gogo mi no moa save lukluk samting. Gat blong mi i no save stap kwaet. Leva blong mi i kafsaed i go long graon nomo (NW).” Olgeta we oli stap pas long rod oli sapraes tumas, oli talem se: “?Olsem wanem? !Hemia nao ples ya we olgeta man long wol oli stap talem se i beswan olgeta!”—Ol Krae 2:3, 11, 15.

Ansa Blong Sam Kwestin Long Saed Blong Baebol:

1:15—?Olsem wanem Jeova i “purumpurumbut long ol grep blong wokem waen” we i blong yangfala gel blong Juda? Jeremaea i tokbaot Jerusalem olsem wan gel we i no save man yet. Taem ol man Babilon oli spolem Jerusalem oli mekem fulap blad i ron, i olsem we oli skwisim ol grep long ples we oli wokem waen long hem. Jeova i talemaot samting ya olsem wan profet tok mo hem i  letem tok ya i kamtru, taswe i olsem we Jeova nao i ‘purumpurumbut long ol grep blong waen.’

2:1 (NW)—‘Isrel i naes we i naes’ be Jeova i ‘sakemaot hem long heven i kamdaon long wol.’ ?Tok ya i minim wanem? ‘Skae i antap we i antap olgeta long graon,’ taswe samtaem Baebol i yusum toktok ya “sakemaot long heven i kamdaon long wol” blong soem se wan samting we fastaem i hae we i hae be naoia i lusum paoa blong hem. “Isrel i naes we i naes”—hemia i min se hem i gat haenem mo paoa taem Jeova i stap blesem hem—be hem i foldaon taem Jerusalem i lus mo ol ami oli spolem Juda.—Aesea 55:9.

2:1, 6 (NW)—?Wanem ya ‘stul blong putum leg’ mo “wansaed haos” blong Jeova? Man we i raetem Ol Sam i singsing se: “Yumi go long haos tapolen blong Hae God. Yumi mekem wosip long fes blong hem, [“yumi bodaon long hem, fored long stul we hem i putum leg blong hem long hem,” NW ].” (Ol Sam 132:7) Taswe, ‘stul blong putum leg’ we Ol Krae 2:1 i stap tokbaot, i minim haos wosip blong Jeova, no tempol blong hem. Ol man Babilon oli “bonemdaon haos blong Hae God” olsem we hem i wan wansaed haos nomo, no wan haos natanggura long garen.—Jeremaea 52:12, 13.

2:16, 17—?From wanem vas 16 i no stat wetem Hibru leta ya ayin mo vas 17 wetem leta ya pe blong folem oda blong alfabet long Hibru lanwis? I tru se, taem ol man oli raetemdaon ol kaen singsing olsem long Baebol, oli traehad blong folem oda blong alfabet long lanwis Hibru. Be, ol man ya oli no folemgud alfabet sipos oli luk se samting ya bambae i spolem mining blong tok we oli wantem raetem. Alfabet i jes wan rod nomo blong halpem ol man blong tingbaot ol tok blong singsing ya, be samting we i moa impoten hemia se man i kasem save long mining blong ol toktok we oli singim. Long namba 3 mo 4 singsing blong Ol Krae oli mekem sem samting bakegen, oli no putum tufala leta ya stret olsem we i stap long alfabet.—Ol Krae 3:46, 49; 4:16, 17.

2:17—?Wanem “tok” ya we Jeova i mekem i kamtru long saed blong Jerusalem? Long ples ya hem i stap tokbaot Levitikas 26:17 we i talem se: “Bambae mi tanem baksaed long yufala, nao ol enemi blong yufala bambae oli kam winim yufala, mo olgeta we oli no laekem yufala nating bambae oli kam rulum yufala. Nating we i no gat man i stap ronem yufala, be bambae yufala i stap ronwe, from we bambae yufala i fraet we i fraet tumas.”

Ol Lesen Blong Yumi:

1:1-9. Long naet, Jerusalem i stap krae gogo kasem delaet, wota blong ae blong hem i ron bigwan i foldaon long fes blong hem. I no moa gat man long ol get blong taon ya, mo ol hae pris oli harem nogud oli stap sore from hem. Ol gel oli stap harem nogud, mo Jerusalem tu i stap harem nogud tumas. ?From wanem? From we Jerusalem nomo i mekem hem i kam doti, hem i minim nomo blong mekem sin. Ol enemi oli stap luk sin blong hem. Frut we i kamaot from sin i no karem glad nating, be i mekem wota blong ae i ron, i mekem tingting blong man i hevi, man i krae, mo i harem nogud.

1:18. Taem Jeova i panisim ol man nogud, oltaem hem i mekem long stret fasin.

2:20. Ol man Isrel oli kasem woning finis se sipos oli no lesin long tok blong Jeova, bambae oli kasem trabol, wan long ol trabol ya se bambae oli kakae ‘ol pikinini  blong olgeta.’ (Dutronome 28:15, 45, 53) !I no waes nating blong jus blong no obei long God!

“LESIN LONG KRAE BLONG MI”

(Ol Krae 3:1–5:22)

Ol Krae japta 3 i tokbaot neson blong Isrel olsem “wan man Jerusalem.” Nating se man ya i stap kasem trabol, hem i singsing se: “Hae God i gud tumas long olgeta we oli stap trastem hem, mo we oli wantem tumas blong savegud hem.” Man ya i prea long trufala God i askem se: “Mi prea long yu blong yu lesin long krae blong mi, nao yu yu harem mi.” Man ya i askem Jeova blong tingbaot se ol enemi oli tok nogud long ol man blong Hem, i se: “Hae God, plis yu panisim olgeta from ol samting ya we oli mekem.”—Ol Krae 3:1, 25, 56, 64.

Jeremaea i talemaot filing blong hem long saed blong ol nogud samting we i kamaot long 18 manis ya we ol ami oli kamp raon long Jerusalem, mo hem i krae i se: “God i panisimgud ol man blong mi, i winim we hem i panisim ol man Sodom bifo, ples ya we hem i flatemgud wantaem nomo long paoa blong hem.” Jeremaea i gohed i talem se: “Olgeta we oli no gat kakae nao oli hanggri gogo oli ded, oli harem nogud moa i winim olgeta we oli ded wantaem nomo long naef blong faet.”—Ol Krae 4:6, 9.

Jeremaea i raetemdaon namba faef singsing, no prea, olsem we ol man blong Jerusalem oli stap toktok. Oli talem se: “Hae God, plis yu tingbaot trabol ya we i kasem mifala. Yu luk, mifala i sem tumas.” Taem oli stap talemaot ol trabol we i kasem olgeta, oli askem long Jeova se: “Hae God, yu yu King we yu stap oltaem nomo. Yu bambae yu stap rul gogo i no save finis. Plis yu tekem mifala i kambak long yu. Plis yu leftemap mifala bakegen, blong mifala i save harem gud bakegen olsem bifo.”—Ol Krae 5:1, 19, 21.

Ansa Blong Sam Kwestin Long Saed Blong Baebol:

3:16—?Toktok ya i minim wanem se: “Ol tut blong mi oli brobrok long ston”? Wan buk i talem se: “Taem ol man Jiu oli stap wokbaot blong go kalabus long Babilon, oli stap kukum bred blong olgeta long hol long graon, ale bred blong olgeta i gat ol smosmol ston long hem.” Taem man i kakae bred olsem, tut blong hem i save brok.

4:3, 10—?From wanem Jeremaea i talem se “ol man ya blong [hem]” oli olsem “pijin ya ostrij” we i stap long draeples? Job 39:16 i talem se pijin ya ostrij “i stap mekem olsem we ol eg ya i no blong hem.” Taem ol smolsmol ostrij i kamaot long eg blong olgeta, mama ostrij i lego olgeta, hem i go wokbaot wetem ol narafala mama ostrij mo i livim man ostrij i mekem wok ya blong lukaot long ol bebi. ?Olsem wanem nao taem oli fesem denja? Papa mo mama pijin tufala tugeta i ronwe long nes blong tufala, oli livim ol bebi i stap. Long taem ya we Babilon i faet agensem Jerusalem, kakae i sot, mekem se ol mama we oli bin keagud long ol pikinini blong olgeta, naoia oli mekem i nogud long pikinini blong olgeta, olsem ol ostrij we oli stap long draeples. Hemia i defren olgeta long fasin blong ol wael dog we oli stap lukaotgud long ol pikinini blong olgeta.

5:7—?Ol man oli gat kaon long Jeova from sin blong ol bubu blong olgeta bifo? Nogat. Jeova i no panisim wan man from sin blong ol bubu blong hem bifo. Baebol i talem se: “Bambae yumi evriwan i mas talemaot  olgeta fasin blong yumi long fes blong God.” (Rom 14:12) Nating se i olsem, frut blong sin we wan man i mekem i save stap longtaem mo maet i save kasem ol pikinini we oli kam biaen long hem. Tingbaot ol man Isrel bifo. From we oli joen long wosip blong ol aedol, ol pikinini blong olgeta we oli wantem wosipim trufala God, oli faenem i had blong traem folem stret fasin.—Eksodas 20:5.

Ol Lesen Blong Yumi:

3:8, 43, 44. Long taem ya we trabol i kasem Jerusalem, ol man blong taon ya oli krae long Jeova blong hem i givhan long olgeta, be Jeova i no lesin nating long krae blong olgeta. ?From wanem? From we ol man ya oli no obei long Jeova, mo oli no tanem tingting blong olgeta nating. Sipos yumi wantem we Jeova i ansarem ol prea blong yumi, yumi mas obei long hem.—Ol Proveb 28:9.

3:20. Jeova we hem i “hae King blong olgeta ples long wol” hem i hae we i hae, taswe taem hem i “lukluk i kamdaon long skae mo graon” hem i mekem hem wan i stap daon. (Ol Sam 83:18; 113:6) Jeremaea i save gud se God we i gat Olgeta Paoa i wantem stap klosap long ol man blong hem. Hemia i min se Jeova i no tingbaot haefala posisen blong hem, hem i rere blong putum hem wan i stap daon blong i save leftemap tingting blong ol man. !Yumi glad bigwan se trufala God i gat olgeta paoa mo olgeta waes, be hem i gat tingting daon tu!

3:21-26, 28-33. ?Olsem wanem yumi save stanap strong taem yumi stap safa bigwan? Jeremaea i givim ansa long yumi. Yumi no mas fogetem fasin blong Jeova we oltaem hem i gat lav we i kaengud mo hem i gat bigfala sore long man. Yumi mas tingbaot tu se yumi laef yet, hemia wan nambawan risen blong no lusum strong tingting blong yumi. Mo taem yumi stap wet long Jeova blong i sevem yumi, yumi mas gat longfala tingting, stap kwaet, mo no komplen. Yes i gud we yumi ‘putum maot blong yumi i stap long asis blong graon,’ hemia i min se yumi gat tingting daon taem yumi fesem ol traem, from we yumi luksave se sipos God i letem wan samting i hapen hem i from wan gudfala risen.

3:27 (NW). Ol samting we oli traem bilif blong ol yangfala maet oli mekem we oli mas stanap strong tru long sam hadtaem mo tok jik. Be ‘i gud blong wan strong man i karem yok taem we hem i yangfala yet.’ ?From wanem? From we taem wan yangfala i lan blong karem yok, i min se hem i lan blong fesem hadtaem, samting ya i rerem hem blong hem i naf blong fesem ol hadtaem we bambae hem i kasem taem hem i bigman.

3:39-42. I no waes blong “toktok tumas” taem yumi stap safa from ol sin blong yumi. Bitim we yumi toktok from we yumi kasem frut blong nogud fasin blong yumi, “i gud we yumi lukluk gud long ol fasin blong yumi, nao yumi kambak long Hae God.” Yumi waes sipos yumi tanem tingting blong yumi mo jenisim ol fasin blong yumi.

Putum Tingting Blong Yu i Stap Strong Long Jeova

Buk ya Ol Krae long Baebol i soemaot olsem wanem Jeova i tingbaot Jerusalem mo kantri blong Juda afta we ol man Babilon oli bonem taon ya mo kantri ya i stap olsem ples nating nomo. Ol toktok we i talemaot sin blong olgeta long buk ya i soemaot klia se, long lukluk blong Jeova, trabol i kasem Jerusalem from sin blong ol man blong hem. Ol singsing long buk ya, oli kamaot long God mo oli tokbaot fasin ya blong putum tras long Jeova mo blong wantem jenisim fasin blong laef i go long rod we i stret. I tru se bighaf blong ol man long taem blong Jeremaea oli no gat tingting olsem, be hemia nao tingting blong Jeremaea mo wan smol grup blong man we oli tanem tingting blong olgeta.

Ol toktok blong Jeova long saed blong Jerusalem we yumi faenem long buk blong Ol Krae, i tijim yumi long tu impoten lesen. Faswan se, eksampol blong Jerusalem we i bin lus mo Juda we i stap olsem ples nating, i pulum yumi blong obei long Jeova mo i wan woning se yumi no mas ting nating long samting we God i askem yumi blong mekem. (1 Korin 10:11) Yumi lanem seken lesen long eksampol blong Jeremaea. (Rom 15:4) Nating se Jeremaea i stap long wan trabol taem we i bin luk olsem se i no gat rod blong kamaot long hem, mo hem i stap harem nogud tumas, Jeremaea i lukluk i go long Jeova blong Jeova i sevem hem. !I impoten tumas we yumi putum tras blong yumi i stap fulwan long Jeova mo Tok blong hem, mo yumi putum tingting blong yumi i stap strong long hem nomo!—Hibrus 4:12.

[Futnot]

[Tok blong pija long pej 9]

Profet Jeremaea i luk jajmen mesej blong hem i kamtru

[Tok blong pija long pej 10]

Ol Witnes ya blong Koria oli fesem traem long bilif blong olgeta from oli holem Kristin fasin ya blong no joen nating long faet mo politik