Ol Olfala—Wan Blesing Long Ol Yangfala
Ol Olfala—Wan Blesing Long Ol Yangfala
“Naoia mi mi olfala, hea blong mi i waet. Mo sipos mi stap talemaot yu long ol man we oli bon biaen long mi, se yu yu strong, yu gat paoa, plis yu stap wetem mi, yu no lego mi.”—OL SAM 71:18.
1, 2. ?Ol olfala man blong God oli mas kasem save long wanem samting? ?Bambae yumi tokbaot wanem?
WAN Kristin elda long Wes Afrika i go luk wan olfala brata we tabu spirit i makemaot hem, mo i askem long hem se: “?Olsem wanem? ?I gud?” Olfala brata ya i ansa se: “Mi save ron, mi save jamjam long tu leg, mi save jamjam long wan leg.” Long semtaem hem i traehad blong mekem ol samting ya we hem i stap talem. Hem i gohed se: “Be mi no save flae.” Elda i kasem save se olfala ya i minim olsem: ‘Samting we mi mi naf blong mekem, mi glad blong mekem. Be samting we mi no naf blong mekem, mi no mekem.’ Naoia, elda ya i gat bitim 80 yia blong hem, be hem i haremgud yet blong tingbaot tok plei blong olfala brata ya mo fasin blong hem blong stap tru long Jeova.
2 Ol gudfala fasin we ol olfala oli gat, oli save gat paoa long ol narafala blong longtaem. Be i tru, i no ol yia we oli pas nomo we i mekem man i waes mo i givim ol fasin blong Kraes long hem, nogat. (Prija 4:13) Baebol i talem se: “Waet hea i olsem wan hat we i naes tumas long man we i mekem stret fasin.” (Ol Proveb 16:31, NW ) ?Sipos yu yu olfala finis, yu yu kasem save se ol gudfala tok mo fasin blong yu oli save gat bigfala paoa long ol narafala? Bambae yumi tokbaot sam olfala long Baebol we oli rili wan blesing long sam yangfala.
Bilif We i Givhan Long Plante Narafala
3. ?Olsem wanem Noa i mekem i gud long olgeta man we oli laef tede from we hem i holem bilif?
3 Bilif blong Noa mo fasin blong hem blong holemstrong long wok blong Jeova, i mekem i gud long ol man kam kasem tede. Taem Noa i wokem bigfala sip, mo i tekem ol anamol oli go insaed, mo i prij long ol man raonabaot long hem, hem i gat klosap 600 yia blong hem. (Jenesis 7:6; 2 Pita 2:5) From we Noa i onagud long God, hem wetem famle blong hem oli laef tru long Bigfala Wota we i ron, mo hem i kam bubu blong olgeta man we oli laef long wol tede. I tru, long taem blong Noa, laef blong ol man i longfala moa i bitim tede. Be nating we Noa i kam olfala we i olfala, hem i stap tru long God yet, mo samting ya i karem bigfala blesing i kam long hem. ?Wanem blesing?
4. ?Olsem wanem fasin blong Noa blong holemstrong long wok blong Jeova i mekem i gud long ol man blong God tede?
4 Noa i gat klosap 800 yia blong hem taem Nimrod i stat bildim wan bigfala haos we i hae we i hae long Babilon. Nimrod i mekem samting ya from we hem i no wantem folem tok blong Jeova se ol man oli mas mekem olgeta ples blong “wol ya i kam fulap” long ol pikinini blong olgeta. (Jenesis 9:1; 11:1-9) Be Noa i no joen wetem Nimrod blong mekem stronghed fasin ya. Taswe taem Jeova i mekem lanwis blong ol stronghed man ya i fasfas, ating lanwis blong Noa i no jenis. Long ful laef blong Noa mo taem hem i kam olfala tu, hem i gat strong bilif mo i holemstrong long Jeova. Hemia ol fasin we olgeta man blong God evriwan oli mas rili traehad blong folem, nating se oli olfala no oli yangfala.—Hibrus 11:7.
Gat Paoa Long Famle
5, 6. (a) ?Taem Ebraham i gat 75 yia blong hem, Jeova i talem wanem long hem? (b) ?Ebraham i mekem wanem?
5 Taem yumi luklukgud long laef blong olgeta we oli bon biaen long Noa, yumi luksave olsem wanem ol olfala oli save givhan long bilif blong ol famle blong olgeta. Ebraham i gat samwe long 75 yia blong hem taem God i talem se: “Yu mas aot long ples ya blong yu, mo long ol famle blong yu, mo long haos blong papa blong yu, nao bambae yu mas go long wan narafala kantri, we mi bambae mi soemaot long yu. Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we plante. Bambae oli kam wan strongfala laen. Mi bambae mi blesem yu.”—Jenesis 12:1, 2.
6 Tingbaot sipos yu yu mas lego ples blong yu, ol fren blong yu, kantri blong yu, mo ol famle blong yu we oli sapotem gud yu, blong go stap long wan kantri we yu yu no save long hem. Jeova i talem long Ebraham blong mekem olsemia. Ale Ebraham i “obei long God,” mo go kasem en blong laef blong hem, hem i stap long ol haos tapolen olsem wan strenja long kantri blong Kenan. (Jenesis 12:4; Hibrus 11:8, 9) Jeova i talem se Ebraham bambae i kam “wan strongfala laen,” be Ebraham i ded longtaem bifo we laen blong hem i kam plante. Ebraham i gat wan pikinini nomo wetem woman blong hem Sera, hemia Aesak. Mo hem i jes bon afta we Ebraham i stap 25 yia finis long Promes Lan. (Jenesis 21:2, 5) Be Ebraham i no kam taed, mo i no gobak long taon ya we hem i aot long hem fastaem. !Tru ya, hem i rili wan gudfala eksampol blong bilif mo fasin blong stanap strong longtaem!
7. ?Olsem wanem fasin blong Ebraham blong stanap strong longtaem i givhan long Aesak? ?Wanem blesing we ol man oli kasem from?
7 Fasin blong Ebraham blong stanap strong longtaem i gat bigfala paoa long pikinini blong hem Aesak. Long olgeta yia blong laef blong Aesak, hemia 180 yia, hem i stap olsem wan strenja long kantri blong Kenan. Aesak i stanap strong longtaem from we hem i bilif long promes blong God. Olfala papa mama blong hem tufala i tijim hem blong gat bilif olsem, mo biaen, taem Jeova i toktok long Aesak, bilif ya i kam strong moa. (Jenesis 26:2-5) Fasin blong Aesak blong holemstrong long God, hemia bigfala samting we i mekem se promes blong Jeova i save kamtru long “laen” blong Ebraham we bambae i karem blesing i kam long olgeta man. Plante handred yia biaen, Jisas Kraes we hem i impoten man long ‘laen ya,’ i openem rod long olgeta we oli bilif long hem blong oli save fren wetem God mo kasem laef we i no save finis.—Galesia 3:16, NW; Jon 3:16.
8. ?Olsem wanem Jekob i soemaot strong bilif, mo wanem i kamaot from?
8 Aesak i givhan long pikinini blong hem Jekob blong wokem strong bilif we i givim paoa long hem go kasem we hem i olfala. Jekob i gat 97 yia blong hem taem hem i resling fulnaet wetem wan enjel blong i save kasem wan blesing. (Jenesis 32:24-28) Jekob i ded taem i gat 147 yia blong hem, be jes bifo long taem ya, hem i faenem naf paoa blong blesem wanwan long ol 12 boe blong hem. (Jenesis 47:28) Profet tok we hem i talem mo we i stap long Jenesis 49:1-28 long Baebol, i kamaot tru mo i stap kamtru yet.
9. ?Yumi save talem wanem long saed blong paoa we ol olfala oli save gat long famle blong olgeta?
9 I klia se ol olfala we oli stap tru long God oli save givhan bigwan long ol famle blong olgeta. Ol tijing blong Baebol we ol olfala oli givim long ol yangfala wetem ol waes advaes mo gudfala eksampol blong olgeta blong stanap strong longtaem, i save givhan bigwan long ol yangfala ya blong oli gruap wetem strong bilif. (Ol Proveb 22:6) Ol olfala oli neva mas fogetem se oli save gat bigfala paoa long famle blong olgeta.
Gat Paoa Long Ol Narafala Kristin
10. ?Olsem wanem Josef i ‘tokrere se bambae oli mas mekem olsem wanem long ol bun blong hem’? ?Mo olsem wanem tok ya i gat paoa long plante narafala?
10 Ol olfala oli save gat bigfala paoa long ol narafala Kristin tu. Taem Josef, pikinini blong Jekob, i kam olfala, bilif blong hem i pulum hem blong mekem wan samting we i gat bigfala paoa long plante milian man we oli mekem trufala wosip afta long taem blong hem. Josef i gat 110 yia blong hem, nao hem i ‘tok rere se bambae oli mas mekem olsem wanem long ol bun blong hem.’ Hem i talem se taem ol laen blong Isrel oli aot long Ijip, oli mas tekem ol bun blong hem i go wetem olgeta. (Hibrus 11:22; Jenesis 50:25) Afta we Josef i ded, ol man Isrel oli wok slef blong plante yia. Be tok blong hem i mekem tingting blong olgeta i strong se wan dei bambae oli kamfri.
11. ?Ating olfala Moses i gat paoa olsem wanem long Josua?
11 Wan man we i kasem paoa from bilif blong Josef, hemia Moses. Taem Moses i gat 80 yia blong hem, hem i kasem blesing ya blong karem ol bun blong Josef i goaot long kantri blong Ijip. (Eksodas 13:19) Samwe long taem ya, hem i mitim Josua, we i yangfala moa long hem. Blong 40 yia, Josua i wok olsem man blong givhan long Moses. (Namba 11:28) Hem i folem Moses i go antap long Hil ya Sinae, mo i wet long Moses blong kamdaon long hil ya bakegen wetem tufala flat ston we Tenkomanmen i stap long tufala. (Eksodas 24:12-18; 32:15-17) !I sua se olfala Moses i givim fulap gudfala advaes mo waes long Josua!
12. ?Long ful laef blong Josua, olsem wanem hem i gat paoa blong pulum neson blong Isrel blong folem gudfala rod?
12 Josua tu i leftemap tingting blong neson blong Isrel long olgeta yia we hem i laef. Jajes 2:7-9 i talem se: “Long taem ya we [Josua] i stap laef, olgeta laen blong Isrel oli stap ona gud long Hae God. Mo biaen, long taem ya we hem i ded, olgeta oli stap holem fasin ya oltaem, gogo kasem taem we ol lida ya we oli bin luk ol bigbigfala wok ya we Hae God i mekem long fes blong olgeta, oli ded.” Afta we Josua mo ol narafala olfala blong Isrel oli ded, blong 300 yia neson ya i olbaot, samtaem i mekem trufala wosip, samtaem i mekem wosip long ol giaman god. Hem i olsem go kasem taem blong profet Samuel.
Samuel i “Mekem Ol Stret Fasin”
13. ?Olsem wanem Samuel i “mekem ol stret fasin”?
13 Baebol i no talem hamas yia we olfala Samuel i gat taem hem i ded. Be ol samting we buk blong Fas Samuel i tokbaot oli kavremap 102 yia, mo Samuel i luk bighaf blong ol samting ya. Hibrus 11:32, 33 i talem se ol gudfala jaj mo profet oli “mekem ol stret fasin.” Yes, Samuel i pulum samfala we oli laef long taem blong hem blong oli no foldaon long wosip blong ol giaman god, mo i pulum sam narafala blong sakemaot giaman wosip. (1 Samuel 7:2-4) ?Olsem wanem hem i mekem olsem? Hem i stap tru long Jeova long olgeta yia blong laef blong hem. (1 Samuel 12:2-5) Samuel i no fraet blong tok strong blong stretem narafala, nating se man we hem i mas stretem i wan king. (1 Samuel 15:16-29) Mo tu, go kasem we Samuel i ‘olfala mo hea blong hem i waet,’ hem i givim nambawan eksampol blong prea from ol narafala. Hem i talem long ol man Isrel se: “Oltaem bambae mi mi stap prea from yufala. Sipos mi lego fasin ya, hemia mi mekem sin agens long Hae God ya.”—1 Samuel 12:2, 23.
14, 15. ?Olsem wanem ol olfala tede oli save folem eksampol blong Samuel long saed blong prea?
14 Olgeta save ya i makemgud wan impoten rod we ol olfala oli save folem blong mekem i gud long ol narafala man blong Jeova. Nating se helt blong olgeta i nogud no wan narafala trabol i kasem olgeta, be oli save prea from ol narafala. ?Ol olfala, yu yu kasem save se ol prea blong yufala oli givhan bigwan long kongregesen? From we yufala i bilif strong long blad blong Jisas we i ron, yufala i olsem ol stret man long fes blong Jeova. Mo from we yufala i stanap strong longtaem mo ‘winim ol samting blong traem yufala,’ bilif blong yufala i strong gud. (Jemes 1:3; 1 Pita 1:7) Yufala i no mas fogetem se: “Taem we stret man i prea, prea blong hem i gat paoa, mo i save karem plante frut.”—Jemes 5:16.
15 Ol prea blong yufala long saed blong wok blong Kingdom mo kongregesen blong Jeova, oli impoten tumas. Sam Kristin brata blong yumi oli stap long presin from we oli no joen long faet mo politik. Sam narafala oli kasem bigfala trabol from ol disasta, wo, mo faet long ples blong olgeta. Sam narafala bakegen, maet long kongregesen blong yumi nomo, oli stap kasem ol traem mo fasin agens. (Matiu 10:35, 36) I impoten tu we yu prea oltaem from olgeta we oli wok strong long wok blong prij mo olgeta we oli lukaot long kongregesen. (Efesas 6:18, 19; Kolosi 4:2, 3) !I gud tumas we yu prea from ol Kristin brata sista blong yu, olsem Epafras i bin mekem!—Kolosi 4:12.
Tijim Olgeta We Oli Bon Biaen Long Yufala
16, 17. ?Ol Sam 71:18 i talemaot wanem, mo olsem wanem tok ya i kamtru?
16 “Ol narafala sipsip” we oli gat janis blong laef olwe long wol, oli kasem impoten trening taem oli wok wetem ol memba blong “smol kampani” we God i makemaot olgeta blong go long heven. (Luk 12:32, NW; Jon 10:16) Ol Sam 71:18 i talemaot samting ya, i se: “Naoia mi mi olfala, hea blong mi i waet. Mo sipos mi stap talemaot yu long ol man we oli bon biaen long mi, se yu yu strong, yu gat paoa, plis yu stap wetem mi, yu no lego mi.” Olgeta we tabu spirit i makemaot olgeta, oli glad tumas blong trenem ol narafala sipsip blong oli naf blong lukaot long ol impoten wok, bifo we oli lego olgeta blong go stap wetem Jisas Kraes long heven.
17 Tingting we i stap long Ol Sam 71:18 long saed blong tijing we olgeta “we oli bon biaen” oli kasem, i stret long ol narafala sipsip tu we oli kasem tijing long ol tabu man. Jeova i givim wok long ol olfala se oli mas talemaot hem long olgeta we oli stap joen long trufala wosip tede. (Joel 1:2, 3) Ol narafala sipsip oli harem se i wan bigfala blesing blong kasem tijing long ol tabu man, mo oli glad blong serem tijing ya blong Baebol wetem ol narafala we oli wantem mekem wok blong Jeova.—Revelesen 7:9, 10.
18, 19. (a) ?Wanem impoten save we plante olfala man blong Jeova oli save givim? (b) ?Ol olfala Kristin oli save sua long wanem samting?
18 Ol olfala we oli mekem wok blong Jeova, hemia ol tabu man mo ol olfala blong ol narafala sipsip tu, oli pasem save i kam long yumi long saed blong ol impoten samting we oli bin hapen long ol yia bifo. Sam long olgeta ya we oli laef yet tede, oli bin luk sinema ya “Foto Drama Blong Ol Samting We God i Wokem” taem i jes kamaot. Samfala oli bin save ol brata we oli stap long kalabus long yia 1918. Samfala oli bin toktok long radio stesen blong Wajtaoa we nem blong hem WBBR. Plante oli save tingbaot yet sam taem we ol Witnes blong Jeova oli bin pas long hae kot blong oli save winim raet blong mekem wosip. Samfala oli bin stanap strong long trufala wosip taem ol lida blong gavman oli mekem i strong tumas long olgeta. Ol olfala oli save tokbaot olsem wanem trutok i kam klia moa taem ol yia oli bin pas. Baebol i pulum yumi blong lesin long ol waes mo save blong olgeta mo kasem gudfala samting from.—Dutronome 32:7.
19 Baebol i leftemap tingting blong ol olfala Kristin blong oli givim gudfala eksampol long ol yangfala. (Taetas 2:2-4) Maet ol olfala oli no luksave olsem wanem fasin blong olgeta blong stanap strong, ol prea blong olgeta, mo ol advaes we oli givim, i halpem ol narafala. Noa, Ebraham, Josef, Moses, mo plante narafala bakegen, oli no luk bigfala paoa we fasin blong olgeta blong holemstrong long God i gat long olgeta we oli bon biaen long olgeta. Be stori blong laef blong ol man ya we oli bin soemaot strong bilif mo oli stap tru long God, i gat bigfala paoa. Long sem fasin, eksampol blong yu i save gat bigfala paoa long olgeta we oli bon biaen long yu.
20. ?Wanem ol blesing we oli stap fored long olgeta we oli putum tingting blong olgeta i stap strong oltaem long ol promes blong God?
20 !Nating se bambae yu laef tru long taem blong “bigfala trabol” no bambae yu laef bakegen biaen, be bambae yu haremgud tumas blong kasem “laef ya we i prapa wan”! (Matiu 24:21; 1 Timoti 6:19) Tingbaot Rul blong Kraes blong Wan Taosen Yia. Long taem ya, Jeova bambae i mekem ol olfala oli kam yangfala bakegen. Bambae yumi no moa harem se bodi blong yumi i stap kam slak moa evri dei. !Taem yumi wekap evri moning, bambae yumi harem se yumi stap kamgud moa—yumi gat moa paoa, ae blong yumi i moa klia, sora blong yumi i open moa, mo bodi blong yumi i naes moa! (Job 33:25; Aesea 35:5, 6) Olgeta we oli kasem blesing ya blong laef long niufala wol blong God, bambae oli yangfala oltaem, from we i gat laef we i no save finis i stap fored long olgeta. (Aesea 65:22) Taswe, i gud we yumi evriwan, yumi putum tingting blong yumi i stap strong oltaem long nambawan fiuja ya, mo yumi gohed blong mekem wok blong Jeova wetem olgeta laef blong yumi. Yumi save gat strong tingting se Jeova bambae i mekem olgeta promes blong hem oli kamtru. Samting we hem i mekem bambae i gud moa i bitim eni samting we yumi save tingbaot.—Ol Sam 37:4; 145:16.
?Bambae Yu Yu Ansa Olsem Wanem?
• ?Olsem wanem fasin blong olfala Noa blong holemstrong long Jeova i karem blesing i kam long ol man?
• ?Olsem wanem bilif blong ol olfala long taem bifo i gat paoa long olgeta we oli bon biaen long olgeta?
• ?Taem Josef, Moses, Josua, mo Samuel i kam olfala, olsem wanem oli mekem ol narafala man blong Jeova oli strong?
• ?Ol olfala oli save pasem wanem i go long ol yangfala?
[Kwestin]
[Tok blong pija long pej 28]
Fasin blong Ebraham blong stanap strong longtaem i gat bigfala paoa long Aesak
[Tok blong pija long pej 30]
Gudfala advaes blong Moses i leftemap tingting blong Josua
[Tok blong pija long pej 31]
Ol prea blong yu from ol narafala oli save karem gudfala frut