!Stamba Blong Rabis Fasin i Kam Long Klia Ples!

LONG faswan handred yia, plante man Jiu oli stap wet long Mesaea ya we God i promes blong sanem i kam. (Jon 6:14) Taem Jisas i kam long wol, hem i mekem ol man oli haremgud mo hem i givim moa save long ol man. Hem i mekem ol sikman oli kamgud, i givim kakae long olgeta we oli hanggri, hem i mekem bigfala win mo solwota i kam kwaet, mo hem i mekem dedman i laef bakegen. (Matiu 8:26; 14:14-21; 15:30, 31; Mak 5:38-43) Hem i talemaot ol toktok blong Jeova mo i givim janis long ol man blong kasem promes ya blong laef we i no save finis. (Jon 3:34) Tru long toktok mo samting we Jisas i mekem, hem i soemaot fulwan se hem i Mesaea, man ya we bambae i mekem ol man oli fri long sin mo olgeta rabis frut blong sin ya.

From samting ya, yumi ting se ol lida blong skul blong ol man Jiu bambae oli faswan blong welkamem Jisas, blong lesin long hem, mo bambae oli mas glad blong folem ol tok blong hem. Be nogat. Oli mekem defren samting olgeta. !Oli no laekem hem nating, oli agensem hem, mo oli mekem plan blong kilim hem i ded!—Mak 14:1; 15:1-3, 10-15.

Jisas i tok strong agens long ol man ya we oli gat rabis fasin. (Matiu 23:33-35) Be, hem i luksave se i gat wan narafala man we i gat fol tu from rabis fasin we i stap long hat blong ol lida ya. Hem i talem long olgeta se: “Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting we hem i wantem. Fasin blong hem we i stat bifo olgeta, hem i man blong kilim man. Neva hem i stap wetem olgeta we oli tok tru [“hem i no stap long trutok,” NW ], from we i no gat trutok nating long hem. Taem we hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.” (Jon 8:44) Tru, Jisas i luksave se ol man oli save mekem ol rabis samting, be hem i makem stamba blong rabis fasin—hemia Devel Setan.

Taem Jisas i talem se Setan i “no stap long trutok,” hem i soemaot se, fastaem, Setan i bin stap olsem wan gudfala spirit man blong God, be afta hem i no moa wokbaot long stret rod. ?From wanem Setan i rebel agens long Jeova? From we hem i tinghae long hem wan nao i letem filing ya i gru gogo hem i wantem wosip we i mas go long Jeova nomo. *—Matiu 4:8, 9.

Fasin rebel blong Setan i kam long klia ples taem hem i trikim Iv blong kakae frut we God i putum tabu long hem, long garen blong Iden. Setan i faswan man blong talem wan giaman tok mo hem i talem giaman toktok ya blong spolem Jeova, taswe hem i mekem hem wan i kam “stamba blong ol giaman toktok,” no papa blong fasin giaman. Antap long hemia, taem Setan i pulum Adam mo Iv blong no obei, hem i mekem sin i bos long tufala, mo i lidim tufala wetem olgeta man we i kam biaen long tufala oli go long ded. Taswe, Setan i mekem hem wan i kam wan “man blong  kilim man”—!tru ya rabis fasin blong hem blong kilim man i ded i bitim eni narafala man long histri!—Jenesis 3:1-16; Rom 5:12.

Rabis fasin blong Setan i gat paoa long ol enjel long heven tu. Hem i pulum sam long olgeta blong joen wetem hem blong rebel agensem God. (2 Pita 2:4) Olsem Setan, ol rabis enjel ya oli intres long ol man from samting we i no stret. Tingting blong olgeta i stap long rabis fasin long saed blong seks. From samting ya, bigfala trabol i kamaot mo plante rabis samting i hapen.

Rabis Fasin i Fulumap Wol

Baebol i talem long yumi se: “Taem ol man oli stat kam plante long wol ya, i gat plante gel tu oli stap bon. Mo taem ol gel ya oli stap kam bigbigwan, ol enjel blong God [“ol pikinini blong tru God,” NW ] oli luk we oli gudfala tumas, nao oli stap tekem olgeta olsem we oli wantem.” (Jenesis 6:1,2) ?Hu ya ol “pikinini blong tru God”? Oli no ol man blong wol ya, be oli ol spirit man. (Job 1:6, NW; 2:1, NW ) ?Olsem wanem yumi save samting ya? Tingbaot. Ol man oli stap mekem mared 1,500 yia finis, taswe sipos vas ya i stap tokbaot ol man nomo, i no wan bigfala samting. Be vas ya i tokbaot wan samting we i narakaen, hem i se “ol pikinini blong tru God” we oli jenisim bodi blong olgeta i kam olsem man, oli tekem “ol gel” blong ol man long wol blong oli slip wetem olgeta, hemia wan samting we neva i bin hapen bifo.

Yumi luksave se ol mared ya oli narakaen from ol pikinini we ol enjel ya oli givim long ol woman. Oli singaot ol pikinini ya se Nefilim. Oli haf man, haf enjel, mo oli dabolbun. Mo tu, oli ol raf man blong faet. Tok ya “Nefilim” i minim “Ol Man Blong Katemdaon,” no “olgeta we oli kilimdaon narafala.” Baebol i tokbaot ol raf man ya se oli “ol strostrong man blong bifo, ol man we oli gat nem.”—Jenesis 6:4, futnot long NW.

Taem ol Nefilim wetem ol papa blong olgeta, oli stap yet long wol, rabis fasin i kam antap bigwan we neva i olsem bifo. Jenesis 6:11 i talem se: “[Ol] man oli stap mekem ol rabis fasin long fes blong God. Olbaot long evri ples, oli stap faet mo oli stap kilim man i ded.” Yes, ol man blong wol ya oli tekem raf fasin blong ol enjel mo ol Nefilim, mo oli folem rabis fasin blong olgeta.

?Olsem wanem ol Nefilim wetem ol papa blong olgeta oli gat paoa blong pulum ol man blong mekem rabis fasin? Oli pulum ol man tru long sin we man i bon wetem mo ol rabis samting we man i wantem from sin ya. ?Wanem i kamaot from? “Wol i kam nogud tumas from ol rabis fasin blong ol man ya.” Taswe, Jeova i spolem wol ya taem hem i mekem bigfala wota i kam kavremap ful wol. Hem i sevem stret man ya Noa mo famle blong hem nomo. (Jenesis 6:5, 12-22) Be, ol enjel ya we oli bin jenisim bodi blong olgeta i kam man, oli tekem spirit bodi bakegen blong go long heven. Long taem ya oli sem bigwan. Oli lusum ples blong olgeta long famle blong God, nao oli gohed blong agensem God mo famle blong ol enjel we oli stap tru long God. Stat long taem ya, God i putum tabu long ol rabis enjel ya blong oli no save jenisim bodi blong olgeta i kam man bakegen. (Jud 6) Nating se i olsem, ol rabis enjel ya oli gohed blong gat bigfala paoa long laef blong ol man long wol ya.

!I Kam Klia Fulwan Se Hu i Rabis Man Ya!

Fas Jon 5:19 i talemaot paoa we Setan i gat blong pulum man blong mekem rabis fasin, i se: “Olgeta man blong wol ya oli stap long paoa blong Setan.” Devel Setan i stap lidim ol man oli go long trabol we i stap kam bigwan moa oltaem. Tingting blong hem blong spolem ol man i strong moa naoia bitim ol yia we i pas. ?From wanem? From we long  1914 taem Kingdom blong God i stanap, Jisas i sakemaot Setan mo ol rabis enjel blong hem long heven. Profet tok blong Baebol long saed ya i talem se: “Sore tumas long yu, graon . . . , from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.” (Revelesen 12:7-12) ?Olsem wanem Setan i yusum paoa blong hem antap long ol man tede?

Setan i stanemap wan fasin blong tingting we hem i yusum blong kontrolem ol tingting mo fasin blong man. Taswe, Efesas 2:2 (NW), i singaot Devel Setan se “jif ya blong paoa blong win, hemia spirit [no, bigfala tingting] we i stap mekem wok naoia long ol pikinini we oli no obei long God.” “Win” ya, we i kamaot long Setan, i no pulum ol man blong oli fraet long God mo blong oli gat gud fasin. Defren olgeta, “win” ya i mekem fasin rebel agens long God mo ol loa blong hem, i kam antap moa. From samting ya, Setan mo ol rabis enjel blong hem oli pulum man blong mekem rabis fasin long wol ya mo oli mekem rabis fasin blong man i kam moa nogud.

“Yu Mas Blokem Ol Samting We Oli Save Kam Spolem Hat Blong Yu”

Wan samting we i soemaot “win” ya, hemia ol doti pija blong seks we i stap kam antap bigwan long plante ples. Ol pija ya oli mekem ol filing long saed blong seks, we oli no stret, oli kam moa strong, mo ol pija ya oli mekem ol man oli tingbaot sam doti mo rabis fasin blong seks olsem se oli gudfala samting nomo. (1 Tesalonaeka 4:3-5) Sam samting we ol doti pija ya oli soem olsem wan pleplei, hemia man we i repem woman, man we i mekem i nogud wetem woman mo spolem bodi blong woman, ol grup blong man we oli repem wan woman, man we i mekem seks wetem ol anamol, mo man we i mekem i nogud wetem ol pikinini. Maet sam long ol doti pija blong seks oli no strong tumas, be yet oli gat paoa long man we i lukluk olgeta, from we taem wan man i stat blong lukluk ol pija olsem hem i wantem lukluk olgeta bakegen mo bakegen. Samting ya i save kam bos long man, nao hem i kam wan man we, long fasin haed, hem i laekem blong lukluk man we i neked mo man we i mekem fasin long saed blong seks. * Rabis fasin ya i spolem fasin fren we man i gat wetem narafala man mo tu i spolem fasin fren we man i gat wetem God. Ol doti pija blong seks oli soemaot doti tingting blong ol rabis enjel we oli stamba blong fasin ya—yes, ol stronghed enjel ya, olgeta nao oli laekem rabis fasin long saed blong seks stat long taem we bigfala wota i ron long taem blong Noa.

From samting ya, waes man ya Solomon i talem se: “Samting we yu mas lukaot moa long hem i bitim ol narafala samting, hemia hat blong yu. Yu mas blokem ol samting we oli save kam spolem  hat blong yu, from we hat hem i stamba blong laef.” (Ol Proveb 4:23, NW ) Blong talem stret, sipos yu wantem blokem ol samting we i save kam spolem hat blong yu, maet yu mas jenisim samting we yu stap wajem long televisin no maet yu mas ofem kompiuta sipos ol doti pija blong seks i kamaot long hem. !I impoten tumas we yu tekem aksen kwiktaem mo wetem wan strong tingting! Tingbaot yu olsem wan soldia we yu stap traehad blong blokem wan ara we i stap sut i kam stret long hat blong yu. Setan i stap traehad blong sutum hat blong yu—ples we ol filing mo samting we yu wantem oli kamaot long hem—mo hem i wantem putum samting we i nogud long hat blong yu.

Yu nidim tu blong blokem hat blong yu blong i no lavem raf fasin, from Devel Setan i save se “[Jeova] i no laekem nating olgeta we oli laekem tumas blong mekem faet.” (Ol Sam 11:5) Setan i no nidim blong pulum yu blong faet blong mekem we yu yu kam wan enemi blong God, hem i nidim nomo blong pulum yu blong lavem raf fasin. Taswe yumi no sapraes we televisin, radio, mo ol defren samting olsem, oli fulap long raf fasin mo plante taem i gat wok blong ol rabis spirit we i joen wetem. !Ol Nefilim oli ded finis, be ol fasin blong olgeta i stap gohed strong yet long wol ya! ?Ol pleplei we yu yu jusum oli soemaot se yu stap faet agensem ol rabis plan blong Setan?—2 Korin 2:11.

?Olsem Wanem Yu Save Blokem Rabis Paoa We Setan i Gat Long Ol Man?

Maet yumi luk se i had we i had blong faet agensem ol rabis samting we oli gat paoa long yumi. Baebol i talem se olgeta we oli stap traehad blong mekem samting we God i glad long hem, oli no stap faet nomo agens long sin we oli bon wetem, be oli “faet agens long ol devel” tu. Blong winim faet ya mo mekem God i glad, yumi nidim blong yusumgud ol samting we God i givim blong halpem yumi.—Efesas 6:12; Rom 7:21-25.

Wan long ol samting ya we God i givim long yumi, hemia tabu spirit blong hem. Long heven mo wol i no gat wan paoa we i moa strong bitim tabu spirit. Aposol Pol i raet long ol Kristin long faswan handred yia, i se: “Spirit ya we yumi kasem finis, hem i no wan spirit we i kamaot long wol. Hem i Spirit blong God ya, we hem nomo i sanem i kam long yumi.” (1 Korin 2:12) Olgeta we spirit blong God i lidim olgeta, oli lavem samting we God i lavem mo oli no laekem nating samting we God i no laekem. (Amos 5:15) ?Olsem wanem wan man i save kasem tabu spirit? Hemia tru long prea, fasin blong stadi Baebol we tabu spirit i pusum ol man blong raetem, mo fasin blong joen wetem olgeta we oli gat trufala lav long God.—Luk 11:13; 2 Timoti 3:16; Hibrus 10:24, 25.

Taem yu yusumgud ol samting ya we God i givim, yu stat blong putum olgeta klos “blong faet we i blong blokem ara,” hemia nomo bambae i protektem yu long ol “giaman trik blong” Setan. (Efesas 6:11-18) I no gat wan narafala taem bifo we i impoten olsem naoia blong yusum fulwan ol samting ya we God i givim. ?From wanem?

!Bambae Rabis Fasin i Lus i No Longtaem!

Man blong raetem Sam i talem se: “Hae God, ol man nogud oli save gru kwik olsem rabis gras, olgeta evriwan we oli stap mekem ol fasin nogud oli save win long plante samting, be bambae yu yu spolemgud olgeta.” (Ol Sam 92:7) Yes, rabis fasin long taem blong yumi i stap kam antap kwiktaem nomo, olsem long taem blong Noa, mo hemia i wan pruf se jajmen blong God i klosap nomo. Be jajmen ya i no agens long ol rabis man nomo, hem i agens long Setan mo ol rabis enjel blong hem tu. Olgeta ya bambae oli go kalabus long bigfala hol ya, we oli no save mekem wan samting nating, mo biaen bambae oli lus blong olwe. (2 Timoti 3:1-5; Revelesen 20:1-3, 7-10) ?Hu bambae i mekem jajmen ya i kamtru? I stret nomo we Jisas Kraes i mekem samting ya, taswe Baebol i tokbaot hem se: “From samting ya nao Pikinini blong God i kamtru, blong hem i brekemdaon ol wok we Setan i mekem.”—1 Jon 3:8.

?Yu yu wantem tumas se rabis fasin i finis? Sipos yes, yu save harem gud long ol promes long Baebol. I no gat narafala buk we i talemaot klia se Setan i stamba blong rabis fasin, mo i no gat narafala buk we i soemaot olsem wanem bambae Setan mo ol rabis wok blong hem oli lus. Mifala i leftemap tingting blong yu blong kasem stret save long saed blong Baebol, olsem nao bambae yu save blokem Setan blong hem i no save gat paoa long yu mo bambae yu save kasem laef we i no save finis long wan wol we i no gat rabis fasin.—Ol Sam 37:9, 10.

[Ol Futnot]

[Bokis/Foto blong pija long pej 6]

Ol Kastom Stori We Oli Kamaot Long Samting We i Tru

Long plante kantri raon long wol, yumi save faenem ol kastom stori long saed blong ol man we oli haf man haf god, oli dabolbun, mo wan bigfala wota we i kavremap wol. Wan eksampol hemia wan kastom stori long lanwis Akkadia, long saed blong wan man we nem blong hem Gilgamesh. Stori ya i tokbaot wan bigfala wota we i ron, wan sip, mo sam man we oli laef tru long taem ya. Hem i talem se Gilgamesh i haf man haf god, hem i raf tumas mo i laekem rabis fasin long saed blong seks. Wan kastom stori blong ol man Aztec i tokbaot wan wol bifo we i fulap wetem ol man we oli dabolbun mo i tokbaot wan bigbigfala ren we i foldaon mo i kavremap ples. Wan kastom stori blong ol man long Not Yurop i tokbaot wan laen blong man we oli dabolbun mo wan waes man we nem blong hem Bergelmir. Man ya i wokem wan bigfala sip mo hem i sevem hem wetem waef blong hem. Ol kastom stori ya oli givim pruf we tok ya blong Baebol i tru, se olgeta man long wol tede oli kamaot long olgeta ya we oli bin laef tru long taem ya we bigfala wota i bin spolem rabis wol blong bifo.

[Foto]

Ston we i gat Stori blong Gilgamesh long hem

[Credit Line]

The University Museum, University of Pennsylvania (neg. # 22065)

[Tok blong pija long pej 5]

Ol man tede oli gat sem fasin olsem ol Nefilim