Wan Kwestin

?Ol tok blong Ol Proveb 22:6 i minim se sipos ol Kristin papa mo mama oli tijim gud pikinini blong olgeta, bambae ol pikinini ya oli no save lego rod blong Jeova?

Vas ya i talem se: “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.” Ol pikinini we papa mama i tijim gud olgeta taem oli smol yet, oli save gohed blong wosipim Jeova taem oli kam bigman, i olsem wan tri we sipos yu wantem we i gru stret, be yu no mas letem stamba blong hem i ben taem i smol yet. Evri papa mama i save se i tektaem blong tijim pikinini mo i nidim fasin traehad tu. Sipos papa mama i wantem se ol pikinini blong olgeta oli kam disaepol blong Kraes, oli mas lukaot gud taem oli tijim, givim advaes, leftemap tingting, mo stretem ol pikinini blong olgeta. I tekem plante yia blong mekem sem samting ya oltaem mo wetem lav.

?Be, sipos pikinini i lego rod blong Jeova, samting ya i soem se papa mama i tijim nogud hem? Samtaem maet i tru se papa mama i no rili traehad blong stretem mo tijim pikinini long rod blong Jeova. (Efesas 6:4) Be ol tok blong Proveb i no minim se gudfala tijing we papa mama i givim, bambae i mas karem gudfala frut oltaem. Ol pikinini oli sem mak long ol bigman we oli fri blong jusum wanem fasin nao oli wantem folem long laef. (Dutronome 30:15, 16, 19) Samtaem papa mama i harem nogud taem ol pikinini blong olgeta oli no moa holemstrong long bilif olsem Solomon i bin mekem we hem nao i raetem buk blong Ol Proveb. Jeova tu i gat ol pikinini blong hem we oli no moa folem tijing blong hem.

Taswe vas ya i no minim se evri pikinini we i kasem gudfala tijing bambae i “no save gowe” nating long stret rod, be i min se plante taem papa mama i save karem gudfala frut sipos tufala i gohed blong tijimgud pikinini. !Samting ya i save leftemap tingting blong ol papa mo mama! Papa mo mama i mas save se traehad we tufala i mekem blong tijim pikinini blong tufala long rod blong Jeova, bambae i karem gudfala frut. Wok blong tufala blong tijim pikinini i impoten tumas mo eksampol blong tufala tu i save gat bigfala paoa long fasin blong pikinini. Taswe ol papa mo mama oli mas tinghevi long wok ya blong olgeta.—Dutronome 6:6, 7.

Nating se ol pikinini oli stop blong folem rod blong Jeova, ol papa mo mama we oli bin mekemgud wok blong olgeta blong tijim ol pikinini blong olgeta, bambae oli gohed nomo blong putum tingting blong olgeta i stap strong se pikinini blong olgeta bambae i kambak yet. Trutok blong Baebol i gat paoa mo ol pikinini oli no save fogetem fulwan tijing we papa mo mama i givim.—Ol Sam 19:7.