Jeova i Tinghae Long Yu Taem Yu Obei Long Hem
Jeova i Tinghae Long Yu Taem Yu Obei Long Hem
“Pikinini blong mi, yu yu mas kam waes. Sipos yu kam waes, bambae mi glad we mi glad.”—OL PROVEB 27:11.
1. ?Wanem ya spirit blong wol tede?
SPIRIT blong wol tede, hemia se ol man oli wantem folem prapa tingting blong olgeta mo oli no wantem obei long narafala. Long leta we aposol Pol i raetem long ol Kristin long Efesas, hem i talem from wanem i olsem, i se: “Bifo, yufala i stap holem ol fasin nogud blong wol ya, yufala i stap obei long Setan, we hem i jif blong [“paoa blong win, hemia spirit ya,” NW] we i stap mekem wok blong hem long ol man ya we oli no save obei long God.” (Efesas 2:1, 2) Yes, Setan we i ‘jif blong paoa blong win,’ hem i fulumap wol wetem tingting ya blong no wantem obei. Hem i stap mekem samting ya finis long faswan handred yia mo i stap mekem yet tede, be hem i kam strong moa afta we oli sakemaot hem long heven, raonabaot long taem blong Wol Wo Wan.—Revelesen 12:9.
2, 3. ?From wanem i stret nomo we yumi obei long Jeova?
2 Be yumi ol Kristin, yumi save se i stret nomo we yumi obei long Jeova God wetem fulhat blong yumi. Hemia from we Jeova i mekem yumi, hem i stap mekem laef blong yumi i gohed, hem i King blong yumi we i lavem yumi, mo hem i Man blong sevem yumi. (Ol Sam 148:5, 6; Ol Wok 4:24; Kolosi 1:13; Revelesen 4:11) Ol man Isrel long taem blong Moses, olgeta tu oli bin save se Jeova i givim laef long olgeta mo i sevem olgeta. Taswe, Moses i talem long olgeta se: “!Olgeta! Hae God i God blong yumi mo yufala i mas lukaot gud blong mekem evri samting we hem i talem long yumi.” (Dutronome 5:32) Yes, i stret nomo we oli mas obei long Jeova. Be kwiktaem nomo oli lego fasin ya blong obei long King blong olgeta, Jeova.
3 ?Olsem wanem? ?I rili impoten blong obei long Jeova we i mekem heven mo wol? Long taem bifo, God i talem long profet Samuel blong i go talemaot long King Sol se: “I tru we [Hae God] i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem.” (1 Samuel 15:22, 23) ?From wanem i moa impoten blong obei?
?Olsem Wanem ‘i Moagud Blong Obei i Bitim We Yumi Mekem Sakrefaes’?
4. ?Olsem wanem yumi save givim samting long Jeova?
4 From we Jeova i wokem olgeta samting, evri samting we yumi gat oli blong hem. ?Olsem wanem? ?I no moa gat wan samting we yumi save givim long hem? Si, yumi save givim wan samting we i sas tumas long tingting blong hem. ?Wanem samting ya? Ansa blong kwestin ya i stap long ol advaes ya: “Pikinini blong mi, yu yu mas kam waes. Sipos yu kam waes, bambae mi glad we mi glad, mo [“bambae mi save ansa long hemia we i stap jikim mi,” NW].” (Ol Proveb 27:11) Yumi givim samting long God taem yumi obei long hem. Nating se laef blong yumi wanwan i defdefren mo yumi kamaot long ol defren ples, be sipos yumi obei long God, yumi save givim ansa long Setan we i sakem rabis tok ya se ol man bambae oli no stap tru long God sipos oli kasem traem. !Hemia wan nambawan janis we yumi gat!
5. ?Taem yumi no obei long God, yumi mekem wanem long filing blong hem? Talem wan eksampol.
5 God i intres long ol desisen we yumi mekem. Sipos yumi no obei long hem, samting ya i gat paoa long filing blong hem. ?I gat paoa olsem wanem? God i harem nogud taem wan man i folem rod we i no waes. (Ol Sam 78:40, 41) Tingbaot wan man we i gat sik blong suga, nao dokta i talem long hem blong lego sam kakae we oli nogud long hem. Be man ya i no wantem folem advaes blong dokta ya we i rili kea long laef blong hem, hem i gohed nomo blong kakae ol samting we oli stap spolem helt blong hem. ?Bambae dokta ya i harem olsem wanem? Hem i mas harem nogud ya. Taswe, yumi save se Jeova tu i harem nogud taem ol man oli no obei long hem, from we hem i save nogud frut we i kamaot taem oli no lesin long advaes blong hem we i save sevem laef long olgeta.
6. ?Wanem bambae i givhan long yumi blong obei long God?
6 ?Wanem i save givhan long yumi wanwan blong obei? I gud we yumi askem long God blong yumi gat ‘wan hat we i save mekem yumi obei,’ olsem King Solomon i askem. Solomon i wantem gat wan hat olsem, blong hem i save “luksave samting we i gud mo samting we i nogud” taem hem i jajem ol man Isrel. (1 King 3:9, NW) Yumi tu yumi nidim ‘wan hat we i save mekem yumi obei’ sipos yumi wantem luksave samting we i gud mo samting we i nogud, long wol ya we ol man oli gat spirit blong no obei. God i givim Tok blong hem long yumi, wetem ol buk we oli givhan long yumi blong stadi Baebol, ol Kristin miting, mo ol elda long kongregesen we oli rili kea long yumi. Olgeta samting ya oli save givhan long yumi blong wokem ‘wan hat we i mekem yumi obei.’ ?Olsem wanem? ?Yu yu stap yusumgud ol samting ya we God i givim wetem lav?
7. ?From wanem Jeova i talem se i moa impoten blong obei i bitim we yumi mekem sakrefaes?
7 I gud blong tingbaot samting we Jeova i soemaot long ol man blong hem long taem bifo. Nating we i impoten blong oli kilim anamol blong mekem sakrefaes, be fasin blong obei i moa impoten i bitim sakrefaes blong ol anamol. (Ol Proveb 21:3, 27; Hosea 6:6; Matiu 12:7) ?From wanem i olsem? ?I no Jeova we i bin talem long ol man blong hem se oli mas kilim anamol blong mekem sakrefaes? Si. Be traem tingbaot: ?Wanem tingting i pusum man blong mekem sakrefaes? ?Hem i wantem mekem God i glad? ?No hem i stap folem wan kastom long saed blong wosip nomo? Sipos wan man i wantem tumas we wosip blong hem i mekem God i glad, bambae hem i mas lukaotgud blong obei long olgeta tok we God i talem. God i no nidim sakrefaes blong ol anamol. Be taem yumi obei, hemia wan samting we i sas tumas we yumi givim long hem.
Wan Woning
8. ?From wanem God i sakemaot Sol i no moa king?
8 Stori blong Baebol long saed blong King Sol i makemgud se i impoten tumas blong obei. Taem Sol i jes kam king, hem i no tinghae tumas long hem wan. Hem i gat tingting daon, ‘hem i ting se hem i wan man nating nomo.’ Be sloslo, hem i kam flas long tingting blong hem mo i no moa holem stret tingting, ale hem i mekem plante nogud desisen. (1 Samuel 10:21, 22; 15:17) Wan taem, Sol i mas faet agensem ol man Filistia. Be Samuel i talem long Sol blong wet long hem, nao hem bambae i mekem sakrefaes i go long Jeova mo talem nekis samting we Sol i mas mekem. Be Samuel i no kam kwik ale ol man oli stat blong go wanwan. Taem Sol i luk samting ya, hem i “gohed i bonem sakrefaes ya we i blong bonem i bon evriwan.” Jeova i no glad long Sol. Taem Samuel i kamtru, king i mekem eskius from fasin blong hem blong no obei. Eskius blong hem se, from we Samuel i let, ‘hem i harem se hem i mas mekem sakrefaes ya’ blong mekem Jeova i glad. Long tingting blong King Sol, sakrefaes ya i moa impoten i bitim we hem i obei long oda we hem i kasem blong wet long Samuel blong kam mekem sakrefaes. Ale Samuel i talem long Sol se: “!King, fasin ya i krangke ya! Hae God i God blong yu, be yu yu brekem tok blong hem.” From we Sol i no obei long Jeova, hem i lusum posisen blong hem olsem king.—1 Samuel 10:8; 13:5-13.
9. ?Olsem wanem Sol i gohed nomo blong no obei long God?
9 ?Olsem wanem? ?Trabol ya i tijim Sol? !Nogat! Samtaem biaen, Jeova i talem long Sol blong spolem ol man Amalek. Hemia from we bifo finis, ol man Amalek oli bin kam faet agensem ol man Isrel blong nating nomo. Jeova i talem long Sol se hem i no mas sore long ol anamol blong olgeta tu, hem i mas kilim olgeta evriwan i ded. Ale Sol i obei go kasem mak we hem i ‘kilim olgeta long distrik ya Havila go kasem distrik ya Suru.’ Taem Samuel i kam, Sol i glad we i glad se hem i bin winim faet ya, i se: “!Hae God bambae i blesem yu! Mi mi mekem olgeta samting we hem i talem.” Be Sol mo ol man blong hem oli no bin folemgud evri tok we God i talem. Oli no kilim i ded King Agag mo “ol nambawan buluk . . . , mo ol nambawan sipsip, mo ol nambawan smosmol buluk, mo ol nambawan smosmol sipsip, mo ol narafala samting moa long taon ya we oli luk se i gud.” King Sol i mekem eskius from fasin blong hem blong no obei, i se: ‘Ol man blong mi oli tekemaot ol nambawan sipsip wetem ol nambawan buluk blong mekem sakrefaes long Hae God we i God blong yu.’—1 Samuel 15:1-15.
10. ?Wanem samting we Sol i no lanem?
10 Nao Samuel i talem long Sol se: “?Wanem nao we Hae God i wantem moa? ?Hem i wantem blong yumi obei long tok blong hem, no blong yumi mekem sakrefaes long hem? I tru we hem i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem.” (1 Samuel 15:22) From we Jeova i bin talem se oli mas spolem ol anamol ya, i no stret we oli mekem sakrefaes long olgeta i go long Jeova, hem i no save glad long olgeta.
Obei Long God Long Evri Samting
11, 12. (a) ?Wanem tingting blong Jeova taem yumi traehad blong mekem wosip we hem i laekem? (b) ?Olsem wanem wan man we i no obei long God i save tekem giaman tingting ya se hem i stap mekem samting we God i wantem?
11 Jeova i glad tumas taem hem i luk we ol gudfala man blong hem oli holemstrong long hem nating se samfala oli mekem nogud long olgeta, mo oli gohed blong talemaot Kingdom nating se plante man oli no wantem lesin, mo oli go long ol Kristin miting nating se oli mas wok plante blong winim naf mane blong laef. !Taem yumi obei long Jeova long ol impoten samting long saed blong wosip, hem i glad we i glad! Hem i glad tumas taem yumi mekem bigfala traehad blong wosipim hem from we yumi lavem hem, hemia wan samting we i sas we i sas long hem. Maet ol narafala man oli no luk hadwok blong yumi, be God i makemgud ol presen we yumi givim long hem wetem fulhat blong yumi, mo hem i no save fogetem.—Matiu 6:4.
12 Be, blong mekem God i glad olgeta, yumi mas obei long hem long evri samting long laef blong yumi. Yumi no mas tekem giaman tingting ya se sipos yumi mekem wosip long hem long sam haf blong laef blong yumi, yumi no nid blong obei long sam narafala tok blong hem. Olsem nao, maet wan man i holem giaman tingting ya se sipos hem i mekem sam fasin blong wosip, hem i gat raet blong mekem rabis fasin long saed blong seks no wan narafala nogud fasin. !Be hem i rong olgeta!—Galesia 6:7, 8.
13. ?Wanem samting i save traem fasin blong yumi blong obei long Jeova, taem i no gat narafala we i luk yumi?
13 Taswe, yumi mas tingting gud long kwestin ya: ‘?Mi mi stap obei long Jeova long evri samting we mi mekem evri dei, wetem ol samting we ol narafala oli no luk tu?’ Jisas i talem se: “Man we i stap mekem i stret gud long ol smosmol samting, hem i save mekem i stret gud long ol bigfala samting tu. Mo man we i stap mekem i no stret long ol smosmol samting, bambae hem i save mekem i no stret long ol bigfala samting tu.” (Luk 16:10, NW) ?Olsem wanem? ?‘Long haos blong yumi’ taem ol narafala oli no stap luk yumi, yumi stap ‘folem ol fasin we i klin gud long fes blong God’? (Ol Sam 101:2) Yes, taem yumi stap long haos nomo stret fasin blong yumi i save kasem traem. Long plante kantri, klosap evri haos i gat wan kompiuta. I isi nomo blong lukluk ol doti pija long saed blong seks long kompiuta. Sam yia bifo, man i mas aot long haos blong hem, i mas wokbaot i go long wan spesel ples blong lukluk ol rabis pija olsem. Jisas i talem se: “Man we i luk wan woman, nao i wantem hem tumas, i olsem we hem i slip wetem woman ya finis.” ?Olsem wanem? ?Bambae yumi lesin mo obei long tok ya? ?Bambae yumi no lukluk nating ol rabis pija long saed blong seks? (Matiu 5:28; Job 31:1, 9, 10; Ol Sam 119:37; Ol Proveb 6:24, 25; Efesas 5:3-5) ?Olsem wanem long ol stori long televisin we oli soemaot raf fasin? ?Yumi gat sem tingting olsem God blong yumi, we “i no laekem nating olgeta we oli laekem tumas blong mekem faet”? (Ol Sam 11:5) ?Olsem wanem long fasin blong dring tumas taem narafala i no stap luk yumi? Baebol i talem stret se fasin drong i rong. Be hem i givim woning tu se ol Kristin oli no mas dring “plante waen.”—Taetas 2:3, NW; Luk 21:34, 35; 1 Timoti 3:3.
14. ?Olsem wanem yumi soemaot se yumi obei long God long ol bisnes long saed blong mane?
14 Yumi mas lukaotgud long wan narafala haf blong laef blong yumi, hemia taem yumi mekem bisnes no eni samting long saed blong mane. Tingbaot: ?Bambae yu joen long wan bisnes we i blong mekem yu yu kam rij kwik, nating se klosap yu mas mekem kruked fasin? ?Yu yu wantem folem sam rod we oli agensem loa blong mekem se yu no nid blong pem takis? ?No yu yu mekem narafala fasin ya, we yu lukaotgud blong obei long tok ya blong ‘pem hed takis long man we i tekem hed takis, mo pem takis blong ol samting blong yu i go long man we i tekem takis ya’?—Rom 13:7.
Yumi Obei From We Yumi Lavem God
15. ?From wanem yu yu obei long ol loa blong Jeova?
15 Taem yumi obei long ol loa blong God, yumi kasem blesing. Tingbaot: Sipos yumi no smok, mo yumi no slip olbaot, mo yumi respektem blad olsem samting we i tabu, ale yumi blokem plante sik. Sipos yumi folem ol trutok blong Baebol long sam narafala samting long laef, hemia i save givhan long yumi long saed blong mane, no blong stapgud wetem ol man, no blong gat wan hapi famle. (Aesea 48:17) Ol gudfala frut ya we yumi kasem, oli ol blesing we oli soemaot se ol loa blong God oli save givhan bigwan long laef blong man. Be bigfala risen from wanem yumi obei long Jeova, hemia from we yumi lavem hem. Yumi no mekem wok blong God blong kasem blesing nomo. (Job 1:9-11; 2:4, 5) God i wokem yumi we yumi fri blong jusumaot hu nao we yumi wantem obei long hem. Yumi jusum blong obei long Jeova from we yumi wantem mekem hem i glad, mo from we yumi stap traehad blong mekem samting we i stret.—Rom 6:16, 17; 1 Jon 5:3.
16, 17. (a) ?Olsem wanem Jisas i obei long God from we hem i lavem Hem wetem fulhat blong hem? (b) ?Olsem wanem yumi save folem fasin blong Jisas?
16 Jisas i obei long Jeova from we i lavem Hem wetem fulhat blong hem. Long rod ya, hem i givim wan eksampol we i stretgud olgeta. (Jon 8:28, 29) Taem Jisas i stap long wol, hem i “lanem mining blong fasin ya blong obei long God, long ol samting we oli mekem hem i harem nogud long bodi blong hem.” (Hibrus 5:8, 9) ?Olsem wanem hem i lanem blong obei? Jisas i “mekem tingting blong hem i stap daon blong i obei long God gogo i ded. Mo hem i ded long fasin ya we ol man oli nilim hem long [“pos,” NW].” (Filipae 2:7, 8) Jisas i obei long God finis long heven. Be taem hem i kam long wol, hem i kasem ol trabol we oli traem moa fasin blong hem blong obei. Yumi save sua se Jisas i nafgud long evri fasin blong mekem wok blong Hae Pris blong ol tabu brata blong hem wetem plante narafala man long wol we oli bilif long hem.—Hibrus 4:15; 1 Jon 2:1, 2.
17 ?Olsem wanem long yumi? ?Yumi save folem fasin blong Jisas? Yes yumi save folem, sipos fastaem yumi obei long samting we God i wantem, mo biaen yumi jes mekem ol narafala samting long laef blong yumi. (1 Pita 2:21) Samtaem tingting blong yumi wanwan no tingting blong wan narafala man i save pulum yumi no fosem yumi, nao klosap yumi folem rod we yumi no obei long God. Be sipos lav i pulum yumi blong mekem samting we Jeova i talem, yumi save kasem bigfala glad from. (Rom 7:18-20) Taem yumi obei long God, yumi glad blong obei tu long ol man we oli lukaot long trufala wosip long wol, nating se oli no stretgud olgeta. (Hibrus 13:17) Sipos yumi obei long ol loa blong God taem i no gat narafala man i save luk yumi, hemia i samting we i sas long tingting blong Jeova.
18, 19. ?Wanem i save hapen taem yumi obei long God wetem fulhat blong yumi?
18 Tede, blong obei long Jeova mo holemstrong long bilif blong yumi, maet yumi mas stanap strong tru long plante trabol we ol narafala oli mekem long yumi. (Ol Wok 5:29) Mo tu, blong obei long tok blong Jeova blong go prij mo tijim ol man, i nidim we yumi stanap strong go kasem en blong rabis fasin blong wol ya. (Matiu 24:13, 14; 28:19, 20) Yumi nidim fasin blong stanap strong longtaem, blong yumi save gohed blong joen wanples wetem ol Kristin brata blong yumi nating se yumi harem nogud long plante trabol we wol ya i putum long yumi. God blong yumi we i lavem yumi, i savegud olsem wanem yumi traehad blong obei long hem long ol samting ya. Be blong obei fulwan, yumi mas faet agensem sin we i stap long bodi blong yumi, tanem baksaed long ol fasin nogud, mo lanem blong laekem ol fasin we i gud.—Rom 12:9.
19 Jeova i “mekem i gud long olgeta we oli stap traem faenem hem.” (Hibrus 11:6) Taem yumi mekem wok blong hem from we yumi lavem hem mo yumi gat bigfala tangkiu long hat blong yumi, hem i mekem i gud long yumi tu. Yumi mas mekem ol stret sakrefaes, mo Jeova i wantem we yumi mekem olsem. Be sipos yumi lavem hem, nao lav ya i pulum yumi blong obei long hem long evri samting long laef blong yumi, bambae hem i glad fulwan.—Ol Proveb 3:1, 2.
?Bambae Yu Yu Ansa Olsem Wanem?
• ?From wanem yumi save talem se yumi gat samting blong givim long Jeova?
• ?Wanem ol mastik we Sol i mekem?
• ?Olsem wanem blong soemaot we yu yu bilivim tok blong God se i moa gud blong obei i bitim we yu mekem sakrefaes?
• ?Wanem i stap pulum yu blong obei long Jeova?
[Kwestin]
[Tok blong pija long pej 16]
?Sipos wan sikman i no folem advaes we dokta i givim, dokta ya we i rili kea long laef blong man ya bambae i harem olsem wanem?
[Tok blong pija long pej 18]
?From wanem Jeova i no glad long King Sol?
[Tok blong pija long pej 20]
?Yu yu stap obei long ol loa blong God taem i no gat narafala man i save luk yu, maet long haos blong yu nomo?