Tok Blong Jeova i Wan Samting We i Laef

Ol Bigfala Poen Long Buk Blong Esikel—Haf 1

LONG yia 613 B.K.T., * profet Jeremaea i stap long Juda mo hem i stap talemaot se i no longtaem bambae Jerusalem i lus mo kantri blong Juda bambae i kam ples nating nomo. King Nebukadnesa i tekem plante man Jiu finis oli go wok slef long Babilon. Long olgeta ya i gat yangfala man ya Daniel mo trifala fren blong hem, we oli wok long haos blong king blong Koldia. Bighaf blong ol man Jiu oli go wok slef long saed blong reva ya Kebara we i stap long “Babilonia,” hemia kantri ya blong ol man Koldia. (Esikel 1:1-3) Jeova i no save livim ol slef ya oli stap we oli no gat wan man blong karem tok blong hem i go long olgeta. Taswe, Jeova i putumap Esikel blong hem i kam profet blong talemaot tok blong hem. Long taem ya Esikel i gat 30 yia blong hem.

Buk blong Esikel i tokbaot ol samting we oli hapen long wan taem blong 22 yia. Esikel i finis blong raetemdaon buk ya long yia 591 B.K.T. Hem i lukaotgud se ol samting we hem i raetemdaon oli stret gud. Hem i raetemdaon stret taem we God i talemaot ol profet tok long hem, i talem stret dei, manis mo yia we hem i kasem ol profet tok ya. Faswan haf blong mesej we Esikel i talemaot, i tokbaot taem ya we ol enemi bambae oli kam spolem Jerusalem mo flatemgud taon ya. Seken haf blong mesej i talemaot ol toktok agensem ol neson raonabaot long ol man Isrel, mo laswan haf i tokbaot se bambae ol man Isrel oli mekem wosip long Jeova bakegen. Atikol ya i tokbaot ol bigfala poen blong Esikel 1:1–24:27. Hem i eksplenem ol vison, profet tok, mo sam samting we Esikel i aktem blong soemaot wanem bambae i hapen long Jerusalem.

“MI MI MEKEM YU YU KAM WAN WAJMAN”

(Esikel 1:1–19:14)

Jeova i givim wan vison long Esikel we i mekem hem i harem se hem i smol nomo long fored blong God. Long vison ya hem i luk bigfala jea blong King, we Jeova i stap sidaon long hem. Biaen Jeova i talemaot wok we Esikel i mas mekem, i se: “Mi mi mekem yu yu kam wan wajman blong lukaot long ol laen blong Isrel. Bambae yu tekem strong tok ya blong mi we mi talem long yu, yu go talem long olgeta blong wonem olgeta.” (Esikel 3:17) Jeova i talem long Esikel blong mekem ol aksen blong soemaot profet tok ya long saed blong Jerusalem, taem we ol enemi bambae oli raonem taon ya mo spolem hem. Tru long Esikel, Jeova i tokbaot kantri blong Juda, hem i se: “Mi bambae mi sanem ol enemi i kam wetem ol naef blong faet blong olgeta, blong oli spolem ol ples we ol laen blong Isrel oli stap go mekem wosip long ol aedol ya long hem.” (Esikel 6:3) Long olgeta we oli stap long kantri ya, hem i talem se: “Bambae yufala i lus olgeta.”—Esikel 7:7.

Long wan vison long yia 612 B.K.T., spirit blong God i tekem Esikel i go long Jerusalem. !Ol samting we hem i luk i stap hapen long tempol blong God, oli rabis olgeta! Bambae Jeova i sanem ol ami blong hem we oli stap long heven (we ol “sikis man” ya oli pija blong olgeta) blong mekem jajmen blong hem i kam long ol man blong apostasi. Long taem ya, ol man ya nomo we oli gat “mak long fored blong olgeta” bambae oli sef. (Esikel 9:2-6) Be fastaem, wan man we i werem klos we oli wokem long linen, i mas saksakem “sakol faea” olbaot long taon ya. Sakol faea ya i minim ol strong tok blong God we i talemaot se bambae hem i spolem Jerusalem. (Esikel 10:2) I tru se ‘[Jeova] bambae i panisim ol rabis man from ol samting ya we oli stap mekem,’ be hem i promes tu blong tekem ol man Isrel we oli stap olbaot long ol defdefren kantri oli kambak long kantri blong olgeta bakegen.—Esikel 11:17-21.

Spirit blong God i tekem Esikel i gobak long Koldia. Esikel i aktem olsem wanem King Sedekaea mo ol man blong Jerusalem bambae oli ronwe long taon ya. Hem i tok agensem ol man mo woman we oli giaman se oli ol profet. Hem i soemaot olsem wanem God i no laekem nating ol man we oli stap wosipim ol aedol. Hem i soemaot se Juda i olsem wan rop blong grep we i blong nating nomo. Nao hem i talem stori blong wan igel mo rop ya grep blong soemaot rabis frut we bambae i kamaot from fasin blong Jerusalem blong lukluk long Ijip blong givhan long hem. Long en blong stori ya, Jeova i givim promes ya se bambae ‘hem i holem top blong wan tri, i brekemaot top blong hem we i sofsof, i go planem antap long wan hil we i hae we i hae.’ (Esikel 17:22) Be long Juda, bambae  i no moa gat “wokingstik blong ol king.”—Esikel 19:14.

Ansa Blong Sam Kwestin Long Saed Blong Baebol:

1:4-28—?Bigfala kat ya long heven, hem i wanem? Bigfala kat ya i pija blong ogenaesesen blong Jeova long heven. Ol gudfala enjel oli mekemap ogenaesesen ya. Tabu spirit blong Jeova i givim paoa long kat ya. Man we i sidaon long kat ya, hem i pija blong Jeova, we i naes we i naes tumas. Naesfala renbo we i stap raonabaot long Jeova i soemaot kwaet fasin mo pis we i stap long hem.

1:5-11—?Hu ya ol fofala laef samting? Esikel i luk kat ya long wan narafala vison bakegen mo naoia hem i tokbaot ol fofala laef samting olsem ol jerubim. (Esikel 10:1-11; 11:22) Long narafala vison ya hem i talem se fes blong bul hem i “fes blong jerubim.” (Esikel 10:14, futnot) I stret we Esikel i talem olsem from ol jerubim oli ol enjel we oli gat bigfala paoa mo bul i pija blong wan samting we i strong mo i gat paoa.

2:6—?From wanem plante taem God i singaot Esikel se “man blong wol ya” no pikinini blong man? Jeova i singaot Esikel olsem from we hem i wantem we Esikel i no fogetem se hem i wan man we i gat mit mo blad nomo. Long rod ya, Jeova i soemaot klia se man we i gat wok blong pasem mesej i go long ol narafala, hem i no sem mak wetem God we Hem nao i Stamba blong mesej ya. Ol Gospel oli singaot Jisas se Pikinini blong Man klosap 80 taem. Samting ya i soemaot klia se taem Pikinini blong God i stap long wol ya hem i wan trufala man we i gat mit mo blad, hem i no olsem wan spirit man we i jenisim bodi blong hem nomo blong ol man oli save luk hem, nogat.

2:9–3:3—?Taem Esikel i kakae buk ya we oli raetem krae blong ol man long hem, from wanem hem i harem se tes blong hem i swit? Samting we i mekem se tes blong buk ya i swit, hemia tingting we Esikel i gat long saed blong wok we God i givim long hem blong mekem. Esikel i tangkiu long Jeova from we hem i gat janis blong wok olsem wan profet blong Hem.

4:1-17—?I tru se Esikel i aktem samting we bambae i hapen long taem ya we ol enemi oli raonem Jerusalem? Esikel i askem long Jeova sipos hem i save bonem wan narafala samting blong mekem faea long hem, i bitim sitsit blong man, mo Jeova i ansa se i oraet blong hem i mekem olsem. Samting ya nao i soemaot se profet ya i rili bin aktem samting ya blong ol man i save luk wanem bambae i hapen long Jerusalem. Hem i ledaon long lef saed blong hem blong makem ol 390 yia we ol ten laen blong Isrel oli mekem sin—stat long yia 997 B.K.T. go kasem taem we ol enemi oli spolem Jerusalem long yia 607 B.K.T. Ale, hem i ledaon long raet saed blong hem blong makem ol 40 yia we Juda i mekem sin, stat long taem ya we Jeremaea i kam profet long yia 647 B.K.T. go kasem yia 607 B.K.T. Long ol 430 dei we Esikel i stap aktem ol samting ya, hem i stap kakae smol nomo mo i stap dring smol wota nomo. Smol kakae mo wota ya i wan haf blong profet tok blong soemaot se long taem ya we ol ami oli raonem Jerusalem, bambae kakae i sot.

5:1-3—?I minim wanem taem Esikel i pikimap haf blong hea we hem i bin sakem i go long win mo i fasem long en blong klos blong hem? Esikel i mekem samting ya blong soemaot se afta we Juda i stap olsem ples nating blong 70 yia, bambae i gat wan smol grup blong ol man Isrel we oli gobak long Juda mo oli joen long trufala wosip bakegen.—Esikel 11:17-20.

17:1-24—?Tu bigfala igel ya oli pija blong hu? ?Olsem wanem samting ya we wan igel i mekem, blong brekem top blong wan sida, i kamtru? ?Mo, “sofsof” haf blong top blong sida we Jeova i planem antap long wan hil, i pija blong hu? Tufala igel ya oli pija blong ol rula blong tufala kantri ya Babilon mo Ijip. Faswan igel i flae i go long top blong tri ya sida, we i minim rula blong gavman ya we hem i blong laen blong Deved. Igel ya i brekem top blong tri ya taem hem i putumap Sedekaea i kam King blong Juda long ples blong Jehoeakin.  Nating se Sedekaea i mekem promes finis blong stap tru long Babilon, hem i lukaotem help blong narafala igel, hemia rula blong Ijip. Be, plan blong hem i no win nating. Ol man Babilon oli tekem hem i go kalabus mo biaen hem i ded long Babilon. Jeova i brekem top blong wan sida tu we i “sofsof,” hemia Mesaea King. Hem i planem top blong sida ya, hemia King ya, antap long wan “hil we i hae we i hae,” bigfala hil ya hem i Saeon we i stap long heven. Long ples ya nao bambae Mesaea King i kam wan “nambawan sida,” bambae hem i mekem plante blesing i kam long wol ya.—Revelesen 14:1.

Ol Lesen Blong Yumi:

2:6-8; 3:8, 9, 18-21. Yumi no mas fraet long ol rabis man. Yumi mas gohed blong talemaot mesej blong God long olgeta mo givim woning long olgeta. Yumi nidim strong tingting taem ol man oli no wantem lesin long yumi no taem oli agensem yumi. Yumi mas strong olsem ston ya daemon. Be, yumi mas lukaot tu se hat blong yumi i no kam strong, mo yumi no tingbaot filing blong narafala, no yumi no kea long narafala. Jisas i gat sore long ol man we hem i prij long olgeta, mo olsem hem, fasin sore i mas pusum yumi blong prij long narafala.—Matiu 9:36.

3:15. Afta we Esikel i kasem wok blong hem, hem i go stap long Telabib, hem i ‘harem nogud blong seven dei’ from hem i stap tingting dip long mesej we hem i mas talemaot. I gud we yumi tekem taem tu blong stadigud oltaem mo tingting dip long samting we yumi lanem blong yumi kasem save long ol dip trutok long saed blong spirit.

4:1–5:4. Esikel i mas gat tingting daon mo fasin no fraet blong aktem ol haf blong tufala profet tok blong Jeova. Yumi nidim tingting daon mo fasin no fraet tu blong mekem ol defdefren wok we Jeova i givim long yumi.

7:4, 9; 8:18; 9:5, 10. Yumi no nid blong gat sore no harem nogud from olgeta we oli kasem jajmen blong God.

7:19. Taem Jeova i karemaot jajmen blong hem long wol ya, bambae mane i no save givhan nating long ol man.

8:5-18. Apostasi i spolemgud fasin fren blong man wetem God. “Tok blong man we i no bilif long Hae God, hem i stap spolem ol man we oli stap raonabaot long hem.” (Ol Proveb 11:9) Yumi waes sipos yumi no tingbaot nating blong lesin long toktok blong ol man blong apostasi.

9:3-6. Sipos yumi wantem laef tru long “bigfala trabol” yumi mas gat mak ya—hemia samting we i soemaot se yumi givim laef blong yumi finis long God, yumi tekem baptaes, mo yumi stap soemaot ol Kristin fasin long laef blong yumi. (Matiu 24:21) Man blong raetemdaon ol samting, hem i pija blong ol tabu Kristin we oli stap lidim wok ya blong putum mak long ol man, hemia wok blong talemaot Kingdom mo pulum ol man oli kam disaepol. Sipos yumi no wantem lusum mak blong yumi, yumi mas wok strong blong givhan long ol tabu Kristin blong mekem wok ya.

12:26-28. Nating se ol man oli stap laf long mesej we Esikel i talemaot, hem i talem long olgeta se: “Bambae i no moa gat wan samting i save blokem tok blong [Jeova].” Yumi mas mekem evri samting we yumi naf blong mekem blong givhan long ol narafala blong oli save putum tras blong olgeta long Jeova bifo we hem i spolem wol ya.

14:12-23. I stap long yumi wanwan blong mekem wanem we yumi nidim blong mekem blong kasem laef. I no gat man we i save mekem samting ya long ples blong yumi.—Rom 14:12.

18:1-29. Yumi nomo i gat fol from ol frut we i kamaot long ol aksen blong yumi.

“BAMBAE MI SPOLEM TAON YA BLONG YU WE BAMBAE MI SPOLEMGUD”

(Esikel 20:1–24:27)

Long yia 611 B.K.T., we hem i namba seven yia we ol man Isrel oli stap wok slef long Babilon, ol olfala blong Isrel oli kam luk Esikel blong “faenemaot tingting blong Hae God.” Esikel i storebaot histri blong ol man Isrel mo olsem wanem oli bin rebel agens long Jeova plante taem, mo hem i givim woning long olgeta se bambae Jeova i ‘pulumaot naef blong faet blong hem’ agens long olgeta. (Esikel 20:1; 21:3) Jeova i toktok long rula blong ol laen blong Isrel (Sedekaea), hem i se: “Yu tekemaot hat ya blong king i gowe long hed blong yu, mo yu tekemaot spesel kaliko ya we yu stap fasem hed blong yu long hem. Olgeta samting long ples blong yu bambae i mas jenis. Yu mas leftemap ol puaman, yu mas givim paoa long olgeta, mo ol man we oli stap rul naoia, yu mas tekemaot hae nem blong olgeta. Yes, bambae mi spolem taon ya blong yu we bambae mi spolemgud. Be samting ya i no save kamtru, gogo kasem taem we man ya we mi jusumaot hem [Jisas Kraes] blong i panisim taon ya, i kamtru. Nao bambae mi givim taon ya long hem.”—Esikel 21:26, 27.

Jerusalem i gat kaon from rabis fasin blong hem. Nogud fasin blong Ohola (Isrel) mo Oholiba (Juda) i kam long klia ples. Ohola i go finis “long han blong ol man Asiria ya we hem i wantem olgeta tumas.” (Esikel  23:9) I no longtaem bambae Oholiba i lus. Long yia 609 B.K.T., ol ami blong Babilon oli raonem Jerusalem, mo bambae oli kamp raon long hem gogo kasem 18 manis. Taem taon ya i lus, bambae ol man Jiu oli harem nogud tumas, oli no save talemaot sore blong olgeta. Esikel i no mas talemaot mesej blong God long ol man Isrel we oli wok slef long Babilon gogo kasem taem ya we ‘wan man we i ronwe long trabol ya’ i kam talem long hem se taon ya i lus.—Esikel 24:26, 27.

Ansa Blong Sam Kwestin Long Saed Blong Baebol:

21:3—?Wanem “naef” ya we Jeova i pulumaot long paos blong hem? “Naef” ya we Jeova i yusum blong mekem jajmen blong hem i kamtru long Jerusalem mo Juda, hemia King Nebukadnesa blong Babilon wetem ami blong hem. Mo tu, maet naef ya i minim ogenaesesen blong Jeova long heven we ol strongfala enjel oli pat blong hem.

24:6-14—?Rosta blong sospen ya i minim wanem? Jerusalem we ol ami oli kamp raon long hem, i olsem wan sospen we oli wokem long bras. Rosta blong sospen ya hem i pija blong ol rabis fasin blong ol man long taon ya—ol doti fasin, ol krangke fasin we ol man oli no sem blong mekem, mo fasin blong kilim man i ded. Nating se oli putum emti sospen ya long sakol faea we i laet gud mo oli mekem sospen ya i kam hot we i hot, oli no save karemaot rosta ya, yes, doti fasin blong ol man Jerusalem i fulap tumas.

Ol Lesen Blong Yumi:

20:1, 49. Fasin blong ol lida blong Isrel i soemaot se oli no rili bilif long profet tok we Esikel i talemaot. Yumi neva wantem we tingting blong yumi i kam hafhaf long saed blong ol woning we God i talemaot.

21:18-22. Nating se Nebukadnesa i bilif long wok blong ol kleva, Jeova nao i yusum hiten rula ya blong faet agensem Jerusalem. Samting ya i soemaot se ol rabis enjel tu oli no save stopem ol man we Jeova i yusum blong mekem tingting mo jajmen blong hem i kamtru.

22:6-16. Jeova i no laekem nating fasin blong giaman blong spolem nem blong narafala mo ol krangke fasin we man i no sem blong mekem, hem i no laekem nating taem man i no yusum paoa blong hem long stret fasin, mo taem man i yusum kruked fasin blong kasem samting we hem i wantem. Yumi mas gat strong tingting blong stap longwe long ol fasin olsem we oli no stret.

23:5-49. Taem Isrel mo Juda oli mekem ol kontrak blong politik wetem ol narafala neson, samting ya i lidim tufala blong joen long giaman wosip we ol neson ya oli stap mekem. Yumi mas lukaotgud blong no fren wetem wol ya from we hem i save spolem bilif blong yumi.—Jemes 4:4.

Wan Mesej We i Laef Mo i Stap Wok

!Long ol fas 24 japta long buk blong Esikel long Baebol yumi lanem ol gudgudfala lesen! Ol stamba rul we yumi faenem insaed long ol japta ya oli soemaot ol samting we oli save mekem se God i no moa glad long yumi, wanem we yumi save mekem blong hem i gat sore long yumi, mo from wanem yumi mas givim woning long ol rabis man. Profet tok long saed blong taem ya we Jerusalem i lus, i soemaot klia se Jeova i wan God we i stap ‘talemaot long ol man blong hem ol niufala samting, we oli no stat nating blong kamtru.’—Aesea 42:9.

Ol profet tok olsem olgeta ya we oli stap long Esikel 17:22-24 mo 21:26, 27 oli tokbaot taem ya we Kingdom blong Mesaea bambae i stanap long heven. I no longtaem nao, Kingdom ya bambae i mekem ol samting we God i wantem oli kamaot long wol. (Matiu 6:9, 10) Yumi save gat strong bilif taem yumi tingbaot ol blesing we Kingdom bambae i mekem long wol ya mo yumi save trastem se bambae oli kamtru. Yes, “tok blong God i wan samting we i laef, mo i stap wok.”—Hibrus 4:12.

[Futnot]

[Tok blong pija long pej 8]

?Bigfala kat ya long heven i pija blong wanem?

[Tok blong pija long pej 10]

Taem yumi wok strong long wok blong prij hem i givhan long yumi blong yumi no lusum “mak” blong yumi