Ol Impoten Lesen Blong Ol Yangfala

GLADYS i wok long wan skul long Mendoza hemia long Ajentina. Wan dei hem i stap pas klosap long wan klasrum mo i luk wan tija blong klas fo i stap ridim Buk Blong Ol Baebol Stori * long ol studen blong hem. Gladys i talem long tija ya se hem i wan Witnes blong Jeova mo hem i wantem soemaot long tija ya olsem wanem blong yusumgud buk ya mo kasem gudfala frut from. Tija ya i laekem tumas samting we Gladys i stap eksplenem long hem, ale, hem i wantem se buk ya bambae i stap olsem wan haf long program blong tij. Be fastaem, komiti blong skul i mas agri. Tija ya i glad tumas taem komiti i talem se hem i save yusum buk ya olsem wan haf blong program blong skul.

Biaen, long dei ya we skul i makem finis se hem i taem blong pulum ol studen blong oli laekem rid, tija ya i askem ol studen blong hem blong oli ridim wan japta blong buk ya long fored blong ol narafala studen long skul blong olgeta. Gudfala frut we i kamaot hemia se ol man long televisin oli wantem blong askem sam kwestin long tija ya, mo long semtaem storian blong olgeta bambae i kamaot long televisin. Ale, taem tija ya i tokbaot ol fasin blong ol studen blong hem, man blong televisin i askem long hem se, “?Yu yu mekem olsem wanem blong ol studen oli save stap kwaet insaed long klasrum?” Tija ya i eksplenem se hem i stap yusum wan buk hemia Buk Blong Ol Baebol Stori. Hem i eksplenem tu se hem i no yusum buk ya blong tijim wan kos long saed blong jos, be hem i yusum buk ya blong tijim ol studen long ol gudfala fasin olsem respek, longfala tingting, fasin joengud, wok tugeta, obei mo lav. Olgeta evriwan oli agri se ol fasin ya oli ol impoten lesen blong ol yangfala oli lanem.

?Yu yu wantem tijim ol pikinini blong yu long ol gudfala fasin ya? Sipos yu wantem gat nambawan buk ya Buk Blong Ol Baebol Stori, yu save askem long wan long ol Witnes blong Jeova.

[Futnot]