Wan Kwestin
Wan Kwestin
?Snek ya we i toktok long Iv i gat leg?
Long Jenesis 3:14, Jeova God i stap toktok long snek ya we i giaman long Iv long garen blong Iden. God i talem se: “From we yu yu mekem samting ya, bambae mi mi givim panis long yu. Long olgeta anamol, yu nomo, bambae yu karem panis ya. I stat naoia, bambae yu stap wokbaot long bel blong yu, mo bambae yu stap kakae asis blong graon oltaem nomo, gogo laef blong yu i finis.” Baebol i no talem stret se anamol ya we Setan i yusum blong giaman long Iv i bin gat leg be biaen i lusum ol leg blong hem. Maet samfala oli ting se Jenesis 3:14 i minim olsem. Be, yumi no mas ting se from we vas ya i talem olsem nao i minim se snek i bin gat leg. Nogat. ?From wanem?
From we i no snek ya we Jeova i wantem jajem. Defren olgeta, Jeova i wantem jajem Setan—spirit man ya we i yusum snek ya long wan rod we i no stret. Baebol i tokbaot Setan olsem “papa blong ol giaman toktok” mo “snek ya blong bifo.” Tufala tok ya, i blong tokbaot Setan taem hem i yusum wan snek blong talemaot ol tok blong hem blong trikim Iv blong i no moa obei long ol loa blong God.—Jon 8:44, NW; Revelesen 20:2.
God i wokem ol snek mo Adam nao i bin putum nem blong olgeta bifo we Setan i yusum snek ya blong trikim Iv. Yumi no save talem se snek ya, we i no gat save nating, i stamba blong fasin ya blong trikim Iv. Snek ya i no save se Setan i stap yusum hem mo tu hem i no kasem save jajmen ya we God i talem agensem olgeta ya we oli no obei long hem, hemia Setan, Adam mo Iv.
?Ale, be from wanem God i toktok long snek ya stret? Taem God i wokem snek, fasin blong hem hemia blong wokbaot long bel blong hem mo tang blong hem we i stap muvmuf i olsem we hem i stap kakae das. Fasin ya blong snek i pija blong Setan taem God i daonem hem. Fastaem hem i gat wan gudfala laef, hem i wan long ol enjel blong God long heven be biaen God i daonem hem olgeta, nao hem i stap long tudak long saed blong spirit we Baebol i kolem se Tataros.—2 Pita 2:4, NW.
Mo tu, from we God i daonem Setan, bambae Setan i ‘givim kil long leg’ blong “laen” ya we i kamaot long God, sem mak olsem wan trufala snek i save givim kil long leg blong man. (Jenesis 3:15, NW) Stamba haf blong laen ya hemia Jisas Kraes, we hem i safa blong smoltaem long han blong ol man blong Setan. Be biaen, Kraes mo ol fren blong hem, hemia ol tabu man we oli laef bakegen long ded, bambae oli givim kil long hed blong snek ya we i minim se bambae oli kilim Setan i ded blong olwe. (Rom 16:20) Taswe, tok panis ya we God i talem long prapa snek ya, i minim fasin blong God blong daonem mo kilim i ded Devel Setan we i “snek ya blong bifo” we yumi no save luk hem.