Wan Kwestin
Wan Kwestin
Sol i bin sanem tok i go long Jese blong i letem Deved i kam wok blong hem. Be, afta we Deved i kilim Golaeat i ded, Sol i askem long Deved se, “?Yangfala, papa blong yu hu?” ?From wanem Sol i askem Deved olsem?—1 Samuel 16:22; 17:58.
Wan risen from wanem Sol i fogetem se Deved hem i hu hemia from we faswan taem we tufala i mitim tufala, tufala i no bin storian longtaem blong savegud tufala. Be, vas long 1 Samuel 16:18-23 i soemaot se King Sol i sanem toktok from Deved se hem i mas kam mo biaen hem i laekem Deved tumas, nao i putum Deved i wok blong karem ol tul blong faet blong hem. Taswe, i sua se Sol i mas savegud Deved.
Sam man we oli stadi long Baebol oli talem se 1 Samuel 17:12-31 mo 17:55–18:5 oli ol vas we oli jes ademap nomo from we ol vas ya oli no stap long sam hanraet blong Grik Septuagint, we hemia wan translesen blong Hibru haf blong Baebol we oli finisim blong raetem long ol yia 100 B.K.T. Be, i no waes blong givim ansa long kwestin ya wetem ol save we i stanap long Septuagint Baebol hem wan from we ol vas ya oli stap long sam narafala hanraet blong Baebol long lanwis Hibru. *
Taem Sol i askem kwestin long Abnere fastaem mo biaen long Deved, i klia we Sol i no jes wantem faenemaot nem blong papa blong Deved nomo. Be, hem i wantem savegud se wanem kaen man nao i papa blong boe ya we i gat strong bilif mo strong tingting taem i kilim bigfala man ya, Golaeat, i ded. Maet taem Sol i luk strong tingting mo fasin no fraet we Deved i soem long taem ya, samting ya i mekem hem i stap tingbaot Jese, we i papa blong Deved, no sam narafala famle blong Deved tu we maet oli gat sem fasin olsem Deved, we oli save joen long ami blong hem.
Fas Samuel 17:58 i tokbaot sot ansa blong Deved nomo we i se “Papa blong mi Jese. Hem i man Betlehem, mo oltaem hem i stap ona gud long yu.” Be ol vas we oli kam biaen long vas ya, oli soemaot se Sol mo Deved tufala i bin storian plante. From samting ya, i gud blong makem tok blong C. F. Keil mo F. Delitzsch we i se: “Tok ya blong [1 Samuel 18:1] we i talem se ‘king wetem Deved, tufala i stap stori long ol samting ya,’ i soemaot klia nomo se Sol i bin storian plante wetem Deved long saed blong famle blong Deved from we tok ya i soemaot wan storian blong longfala taem.”
From samting ya, yumi save talem se taem Sol i askem kwestin ya se, “?Yangfala, papa blong yu hu?” Sol i wantem save laef blong Deved mo famle blong hem be i no jes blong save se hu ya Deved.
[Futnot]
^ Blong yu kasem save sipos ol vas ya we Septuagint Baebol i tekemaot oli tru, plis lukluk Insight on the Scriptures, Buk 2, pej 855 long Inglis, we ol Witnes blong Jeova oli wokem (long Franis: Étude perspicace des Écritures, Buk 2, pej 886).
[Tok blong pija long pej 22]
?From wanem Sol i askem long Deved se papa blong hem i hu?