?Yu Yu Bin Mekem Sin Agensem Tabu Spirit?
?Yu Yu Bin Mekem Sin Agensem Tabu Spirit?
“I gat sin we i blong ded.”—1 JON 5:16.
1, 2. ?Olsem wanem yumi save se wan Kristin i save mekem sin agensem tabu spirit?
WAN woman Jemani we i stap mekem wok blong God i raetem se: “Mi no save sakemaot tingting ya se mi bin mekem sin agensem tabu spirit.” ?Olsem wanem? ?Wan Kristin i save mekem sin agensem tabu spirit we i paoa blong God?
2 Yes, wan Kristin i save mekem sin agensem tabu spirit. Jisas Kraes i talem se: ‘Evri sin we man i mekem, mo evri tok nogud we man i talem agens long God, bambae God i save tekemaot. Be tok nogud long tabu spirit, bambae God i no save tekemaot sin ya.’ (Matiu 12:31) Wan woning i kam long yumi evriwan se: “Yumi ya we yumi kasem save long trutok finis, sipos yumi girap, yumi stap gohed blong mekem sin, bambae i no moa gat wan sakrefaes i stap we i save tekemaot ol sin ya blong yumi. Bambae yumi stap fraet nomo long God, mo yumi wet blong hem bambae i jajem yumi se yumi mas panis.” (Hibrus 10:26, 27) Aposol Jon tu i raetem se: “I gat sin we i blong ded.” (1 Jon 5:16) ?Hemia we i mekem bigfala sin, hem nao i mas jajem sipos hem i bin mekem ‘sin ya we i blong ded,’ no olsem wanem?
God i Save Fogivim Man We i Tanem Tingting Blong Hem
3. ?Sipos yumi harem nogud tumas long wan sin we yumi bin mekem, ating hemia i soemaot wanem?
3 Jeova i bigfala Jaj blong ol man we oli mekem sin. Yes, yumi evriwan i mas talemaot olgeta fasin blong yumi long hem, mo oltaem hem i jajem man long stret fasin. (Jenesis 18:25; Rom 14:12) Jeova nao i tekem desisen sipos yumi bin mekem sin we hem i no save fogivim, mo hem i save tekemaot tabu spirit blong hem i gowe long yumi. (Ol Sam 51:11) Be sipos yumi harem nogud tumas long wan sin we yumi bin mekem, ating yumi tanem tingting blong yumi finis. ?I minim wanem blong tanem tingting blong yumi from sin?
4. (a) ?Tanem tingting i minim wanem? (b) ?Olsem wanem Ol Sam 103:10-14 i save leftemap tingting blong yumi?
4 Tanem tingting i min se yumi jenisim tingting blong yumi long saed blong sin ya we yumi bin mekem no yumi bin tingting blong mekem. I min se yumi sore, yumi harem nogud, mo yumi gowe long fasin ya we i nogud. Sipos yumi bin mekem bigfala sin, be biaen yumi mekem ol samting blong soemaot se yumi rili tanem tingting blong yumi, ale yumi save haremgud long Sam ya we i talem se: “Hem [Jeova] i no save panisim yumi stret long mak blong ol sin blong yumi, mo hem i no save givimbak ol fasin nogud ya long yumi we yumi stap mekem long hem. Fasin ya blong hem we oltaem hem i stap lavem ol man we oli stap ona long hem, hem i gud tumas. Lav ya blong hem i bigfala tumas, i hae moa i bitim skae antap. Ol sin ya blong yumi, hem i stap tekemaot olgeta i go longwe we longwe long yumi, olsem we saed long is i stap longwe long saed long wes. Fasin blong Hae God, oltaem hem i stap mekem i gud tumas long olgeta we oli stap ona long hem, olsem we ol papa oli stap mekem long ol pikinini blong olgeta. Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.”—Ol Sam 103:10-14.
5, 6. Talem bigfala tingting we i stap insaed long 1 Jon 3:19-22, mo eksplenem mining blong ol tok blong aposol ya.
5 Tok blong aposol Jon tu i leftemap tingting blong yumi. Hem i se: “Sipos yumi stap mekem fasin ya long laef blong yumi, bambae yumi save we yumi man blong trutok. Mo yumi save kam long fes blong God we yumi no fraet, i nomata sipos yumi harem long tingting blong yumi se yumi mekem wan samting we i rong, from we God i hae moa long tingting blong yumi, mo hem i save evri samting. Ol fren. Sipos long tingting blong yumi yumi harem se yumi no mekem samting we i rong, yumi save stanap strong long fes blong God we yumi no fraet. Nao sipos yumi askem sam samting long hem, bambae yumi save kasem, from we yumi stap folem ol tok blong hem, mo yumi stap mekem ol fasin, we hem i glad long hem.”—1 Jon 3:19-22.
6 Yumi “save we yumi man blong trutok” from we yumi soemaot lav long ol Kristin brata blong yumi mo yumi no gohed long rod blong sin. (Ol Sam 119:11) Sipos yumi harem long tingting blong yumi se yumi mekem samting we i rong, yumi mas tingbaot se “God i hae moa long tingting blong yumi, mo hem i save evri samting.” Jeova i sore long yumi from we hem i save se ‘yumi lavlavem yumi long olgeta tingting blong yumi, long fasin we i no save jenis.’ Hem i luk olsem wanem yumi stap faet agens long sin, mo hem i luk ol traehad blong yumi blong mekem samting we hem i wantem. (1 Pita 1:22) Sipos yumi trastem Jeova, lavem ol brata blong yumi, mo yumi no gohed blong mekem ol samting we yumi save se oli rong, long tingting blong yumi, bambae yumi “harem se yumi no mekem samting we i rong.” Olsem nao, bambae yumi “no fraet” blong prea long God, mo bambae hem i ansa long ol prea blong yumi from we yumi obei long ol loa blong hem.
Oli Mekem Sin Agensem Tabu Spirit
7. ?Yumi mas lukluk long wanem samting blong faenemaot ol sin we God i no save fogivim?
7 ?Wanem ol sin we God i no save fogivim? Blong ansa long kwestin ya, bambae yumi tokbaot sam man long Baebol. Sipos yumi tanem tingting finis from sam bigfala mastik we yumi bin mekem be yumi harem nogud yet, stori blong ol man ya bambae i leftemap tingting blong yumi. Bambae yumi luksave se blong faenemaot ol sin we God i no save fogivim, yumi no lukluk long wanem sin we man i mekem. Be yumi mas lukluk long tingting we i pusum man blong mekem sin, hat blong man ya, mo sipos hem i minim blong mekem sin ya no nogat.
8. ?Olsem wanem sam lida blong skul blong ol man Jiu long faswan handred yia oli mekem sin agensem tabu spirit?
8 Long faswan handred yia, sam lida blong skul blong ol man Jiu oli mekem sin agensem tabu spirit taem oli no laekem Jisas nating mo oli girap agensem hem. Ol enemi ya blong Kraes oli luk olsem wanem tabu spirit blong God i stap wok long Jisas taem hem i mekem ol merikel we oli givim ona long Jeova. Be oli girap, oli talem se paoa ya i kamaot long Setan. Jisas i talem se olgeta ya oli tok nogud agensem tabu spirit, mo hemia wan sin we God i no save fogivim “long wol ya mo long niufala wol we bambae i kam.”—Matiu 12:22-32.
9. ?Tok nogud i minim wanem, mo Jisas i talem wanem long saed ya?
9 Tok nogud, hemia tok we i daonem, i spolem, no i agensem wan samting. Tabu spirit i kamaot long God, taswe taem man i tok agensem spirit ya, i olsem we hem i tok agensem Jeova stret. God i no save fogivim man we i tok olsem mo i no tanem tingting blong hem. Ol tok blong Jisas oli soemaot we hem i stap tokbaot olgeta we oli girap agensem wok we tabu spirit i mekem. From we tabu spirit blong Jeova i wok long Jisas, be ol Farisi oli talem se hem i mekem ol samting ya long paoa blong Setan. Hemia, oli mekem sin ya blong tok nogud long tabu spirit. Taswe Jisas i talem se: ‘Tok nogud long tabu spirit, bambae God i no save tekemaot samting ya samtaem. Ol man we oli tok nogud olsem, oli gat sin we bambae i stap oltaem long olgeta, gogo i no save finis.’—Mak 3:20-29.
10. ?From wanem Jisas i talem se Judas i “man blong lus”?
10 Tingbaot Judas Iskariot tu. Hem i mekem kruked fasin, hem i stil long basket blong mane we hem i mas lukaot long hem. (Jon 12:5, 6) Biaen Judas i go luk ol lida blong ol man Jiu, i mekem plan blong putum Jisas long han blong olgeta from 30 silva mane. Biaen Judas i harem nogud mo i sore, be hem i neva tanem tingting blong hem from sin ya we hem i minim nomo blong mekem. From samting ya, Judas i no save laef bakegen. Taswe Jisas i talem se hem i “man blong lus.”—Jon 17:12; Matiu 26:14-16.
Oli No Mekem Sin Agensem Tabu Spirit
11-13. ?Wanem sin we King Deved i mekem wetem Batseba? ?Olsem wanem fasin blong God blong stretem bisnes ya i leftemap tingting blong yumi?
11 Sam Kristin oli talemaot bigfala sin we oli mekem nao ol elda long kongregesen oli givhan long olgeta blong kam strong bakegen. Be oli harem nogud yet mo oli wari long sin we oli bin mekem we i brekem loa blong God. (Jemes 5:14) Sipos yu yu wan long olgeta ya we tingting blong yu i stap trabol yet, ating bambae yu harem gud blong luk ol tok blong Baebol long saed blong samfala long taem bifo we Jeova i fogivim olgeta.
12 King Deved i mekem wan bigfala sin wetem Batseba, woman blong Uria. Naesfala woman ya i stap swim long wan ples antap long haos blong hem klosap long haos blong Deved. Deved i luk hem, nao i givim oda blong oli tekem woman ya i kam long haos blong hem, nao i slip wetem hem. Biaen, hem i harem nius se woman ya i gat bel, ale hem i mekem wan plan blong haedem rabis fasin blong hem. Hem i singaot man blong woman ya we nem blong hem Uria, mo i traem fosem hem blong slip wetem woman blong hem. Be plan ya i no wok. Ale, Deved i sanem Uria i go faet long wan ples we faet i strong tumas, nao hem i ded. Nao Deved i tekem Batseba i kam woman blong hem, mo Batseba i bonem pikinini ya. Be biaen pikinini ya i ded.—2 Samuel 11:1-27.
13 Jeova i stretem bisnes ya wetem Deved mo Batseba. Hem i fogivim Deved from we Deved i tanem tingting blong hem, mo from kontrak long saed blong Kingdom we Jeova i bin mekem wetem hem. (2 Samuel 7:11-16; 12:7-14) I luk olsem we Batseba tu i tanem tingting blong hem, from we hem i kasem blesing blong kam mama blong King Solomon, mo bubu blong Jisas Kraes. (Matiu 1:1, 6, 16) Sipos yumi bin mekem wan bigfala sin, i gud blong rimemba se taem yumi tanem tingting blong yumi, Jeova i luksave samting ya.
14. ?Olsem wanem stori blong King Manase i soemaot se Jeova i rere blong fogivim ol bigfala sin?
14 Stori blong Manase, king blong Juda, i soemaot olsem wanem Jeova i rere blong fogivim bigfala sin. Manase i mekem ol samting we i nogud tumas long tingting blong Jeova. Hem i wokem ol olta blong mekem wosip long Bal, hem i wosipim “ol sta,” mo hem i stanemap olta long tu vranda blong tempol blong mekem wosip long ol giaman god. Hem i tekem ol pikinini boe blong hem, i bonem olgeta long faea blong mekem sakrefaes long ol god ya. Hem i leftemap ol fasin blong wok wetem ol devel mo go luk kleva, mo hem i pulum ol man Juda mo Jerusalem blong mekem ol fasin we oli ‘nogud moa, i winim ol rabis fasin blong ol hiten man bifo, we Hae God i bin kilim olgeta.’ Ol profet blong God oli givim plante woning long Manase, be hem i no lesin. Biaen, king blong Asiria i holem Manase, mo i tekem hem i go kalabus. Taem Manase i stap kalabus, hem i tanem tingting blong hem, mo i prea long God wetem tingting daon. God i fogivim hem mo i mekem hem i kam king long Jerusalem bakegen. Nao Manase i leftemap trufala wosip long ples ya.—2 Kronikel 33:2-17.
15. ?Wanem samting we i hapen long laef blong aposol Pita we i soem se Jeova i save fogivim man “long bigfala fasin”?
15 Plante handred yia biaen, aposol Pita i mekem bigfala sin. Hem i giaman se hem i no save Jisas. (Mak 14:30, 66-72) Be Jeova i fogivim Pita “long bigfala fasin.” (Aesea 55:7, NW) ?From wanem? From we Pita i tanem tingting blong hem fulwan. (Luk 22:62) Fifti dei biaen, long lafet blong Pentekos, Pita i kasem blesing ya blong givim wan strong witnes long saed blong Jisas. Samting ya i soemaot klia se God i fogivim hem. (Ol Wok 2:14-36) Taswe, yumi save se God i glad blong fogivim ol Kristin tede tu, sipos oli rili tanem tingting blong olgeta from sin we oli bin mekem. Man blong raetem Ol Sam i singsing se: “?Sipos yu [Jeova] yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem? Be yu yu stap fogivim mifala, yu stap tekemaot ol sin blong mifala.”—Ol Sam 130:3, 4.
Daonem Wari Long Saed Blong Sin Agensem Tabu Spirit
16. ?Man i mas mekem wanem blong God i save fogivim hem?
16 Stori blong ol man ya i mas givhan long yumi blong daonem wari ya se yumi bin mekem sin agensem tabu spirit. Samting we i hapen long olgeta i soemaot se Jeova i stap fogivim ol man we oli tanem tingting blong olgeta from bigfala sin we oli bin mekem. Samting we i impoten tumas blong mekem, hemia prea wetem fulhat blong yumi. Sipos yumi bin mekem sin, yumi save plis long Jeova blong i fogivim yumi from ol risen ya: from we Jisas i ded blong pemaot yumi, from we Jeova i gat sore, from we yumi bon wetem sin, mo from we yumi bin holemstrong long Jeova longtaem finis. Yumi save askem Jeova blong fogivim yumi, mo from we yumi save se hem i gat gladhat blong fogivim man, yumi save gat strong tingting se bambae hem i fogivim yumi.—Efesas 1:7.
17. ?Yumi mas mekem wanem sipos yumi bin mekem sin mo yumi nidim help blong kam strong bakegen?
17 Maet yumi bin mekem sin be yumi harem se yumi no save prea, from we sin ya i spolem fasin fren blong yumi wetem Jeova. ?Yumi save mekem wanem? Disaepol Jemes i tokbaot samting ya i se: “I gud [man we i mekem sin] i singaot ol elda blong [“kongregesen,” NW] blong oli kam luk hem. Nao olgeta oli save prea long hem, mo oli save kafsaedem oel i go long hem long nem blong Masta blong yumi. Mo prea blong man we i bilif bambae i hilim sikman ya. Masta blong yumi bambae i mekem . . . hem i strong bakegen, mo sipos hem i bin mekem sam sin, Masta bambae i fogivim hem.”—Jemes 5:14, 15.
18. Taem kongregesen i putumaot wan man, hemia i no min se man ya i mekem sin we God i no save fogivim. ?From wanem yumi talem olsem?
18 Maet wan man i mekem sin be i no tanem tingting blong hem long taem ya, ale kongregesen i mas putumaot hem. Hemia i no min se hem i mekem sin we God i no save fogivim, nogat. Pol i tokbaot wan tabu Kristin long Korin we i mekem sin nao kongregesen i putumaot hem, i se: “Panis ya we bighaf blong yufala i givim long man ya finis, hemia i naf ya. Naoia i gud yufala i fogivim hem, yufala i leftemap tingting blong hem bakegen. Sipos no, bambae hem i harem nogud tumas, nao bambae tingting blong hem i foldaon olgeta.” (2 Korin 2:6-8; 1 Korin 5:1-5) Blong frengud wetem Jeova bakegen, olgeta we oli bin mekem sin oli mas glad blong lesin long advaes blong Baebol we ol elda blong kongregesen oli givim long olgeta, mo oli mas soemaot pruf se oli rili tanem tingting blong olgeta. Yes, oli mas ‘soemaot samting ya long laef blong olgeta.’—Luk 3:8.
19. ?Wanem i save givhan blong mekem ‘bilif blong yumi i stret gud’?
19 ?From wanem yumi save harem se yumi bin mekem sin agensem tabu spirit? Maet from tufala samting ya: yumi traehad bitim mak blong mekem ol samting long fasin we i stretgud, no, maet yumi gat wan sik long bodi no tingting blong yumi. Sipos i from tufala samting ya, yumi mas prea mo yumi mas spel moa. I impoten tumas we yumi no letem Setan i daonem yumi gogo yumi lego wok blong God olgeta. Tingbaot se, Jeova i no glad taem rabis man i ded from ol rabis fasin blong hem. Nao traem tingbaot olsem wanem Jeova i mas harem nogud tumas taem hem i lusum wan gudfala man blong hem. Taswe, sipos yumi fraet se yumi bin mekem sin agensem tabu spirit, yumi mas gohed blong stadi long Tok blong God, wetem ol haf blong Baebol we oli save leftemap tingting blong yumi, olsem buk blong Ol Sam. Yumi mas gohed blong joen long ol miting blong kongregesen mo long wok blong talemaot Kingdom. Ol samting ya bambae oli givhan blong mekem ‘bilif blong yumi i stret gud,’ mo bambae tingting blong yumi i no moa trabol se maet yumi bin mekem sin we God i no save fogivim.—Taetas 2:2.
20. ?Wanem i save givhan long wan man blong luksave se hem i no mekem sin agensem tabu spirit?
20 Sipos eniwan long yumi i gat tingting se hem i bin mekem sin agensem tabu spirit, hem i mas askem se: ‘?Mi mi rili bin tok nogud agensem tabu spirit? ?Mi mi rili tanem tingting blong mi finis? ?Mi mi rili bilif se God i stap fogivim man? ?Mi mi wan man blong apostasi * we i sakemaot mo i agensem trutok?’ Sipos hem i askem ol kwestin olsem, ating bambae hem i luksave se i no bin tok nogud agensem tabu spirit, mo i no wan man blong apostasi tu. Hem i tanem tingting blong hem finis, mo hem i bilif yet se Jeova i glad blong fogivim man. Sipos i olsem, hem i no bin mekem sin agensem tabu spirit.
21. ?Wanem tufala kwestin we bambae yumi tokbaot long nekis stadi?
21 !Taem yumi sua se yumi no bin mekem sin agensem tabu spirit, yumi gat pis long tingting blong yumi! Be i gat sam narafala kwestin we oli joen wetem bisnes ya. Long nekis stadi, bambae yumi tokbaot olgeta. Kwestin we maet yumi askem, hemia: ‘?Mi mi letem tabu spirit blong God i lidim mi? ?I gat frut blong tabu spirit long laef blong mi?’
[Futnot]
^ Fasin blong lego trutok mo agensem hem.
?Wanem Ansa Blong Yu?
• ?From wanem yumi talem se man i save mekem sin agensem tabu spirit?
• ?Tanem tingting from sin, i minim wanem ?
• ?Taem Jisas i stap long wol, hu i mekem sin agensem tabu spirit?
• ?Olsem wanem yumi save winim wari ya se yumi bin mekem sin we God i no save fogivim?
[Kwestin]