?Yu Yu ‘Rijman Long Fes Blong God’?
?Yu Yu ‘Rijman Long Fes Blong God’?
“Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.”—LUK 12:21.
1, 2. (a) ?Sam man oli rere blong lego plante samting from wanem? (b) ?Wanem samting we i traem ol Kristin mo we i wan denja tu long olgeta?
OL PIKININI oli laekem pleplei ya we wan bigman i haedem loli no wan presen samples, nao oli mas traem faenem. Yes, hemia pleplei blong pikinini, be plante bigman tu oli mekem samting we i sem mak nomo. Long ol handred yia we oli pas, long defdefren kantri, fulap man oli bin traehad blong faenem ol sas samting, olsem gol no ol sas ston, we i stap long graon. Long ol yia 1800, ol man oli harem nius se i gat gol long ol kantri olsem Ostrelia, Saot Afrika, Kanada, mo Yunaeted Stet. Ale plante man oli lego kantri blong olgeta mo famle blong olgeta blong go long kantri we oli neva go long hem bifo, mo we i no isi nating blong laef long hem. Oli putum laef blong olgeta long denja mo oli lego ol samting we oli gat finis long ples blong olgeta, blong traem kasem gol ya we oli wantem tumas.
2 Ating bighaf blong ol man tede oli no stap digim graon blong traem faenem sas ston, no gol, be oli mas wokhad yet blong kasem ol samting we oli nidim long laef. Blong kasem ol samting we oli nidim, oli mas wokhad, oli spenem fulap taem mo paoa blong olgeta, mo oli mas mekem samting ya nating se i wan baden long olgeta. Kwiktaem nomo oli save stat blong tingting tumas long saed blong kakae, klos, mo ples blong slip we oli nidim nao oli no moa tinghae no maet oli fogetem ol samting we oli rili impoten. (Rom 14:17) Jisas i talem wan stori, no parabol, we i givim klia save long saed blong fasin ya we plante man oli gat. Parabol ya i stap long Luk 12:16-21.
3. Wetem prapa toktok blong yu, talem parabol ya we Jisas i tokbaot long Luk 12:16-21.
3 Jisas i talem parabol ya long semtaem ya we hem i tokbaot fasin blong wantem samting blong narafala man, we yumi tokbaot long faswan stadi. Afta we Jisas i talem se yumi mas blokem fasin blong wantem samting blong narafala man, hem i storebaot wan rijman we i gat ol haos finis blong putum ol kakae i stap gud, be hem i no glad yet. Ale man ya i tekemaot ol haos ya mo i wokem sam narafala haos bakegen we oli bigwan moa blong holem plante moa samting we hem i save yusum long plante yia. Hem i mekem ol samting ya finis, nao hem i wantem spelgud mo haremgud long wan gudfala laef, be God i talem long hem se laef blong hem bambae i finis, mo olgeta gudfala samting ya we hem i putumgud i stap, bambae narafala man nomo i save haremgud long hem. Nao Jisas i finisim stori wetem toktok ya se: “Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.” (Luk 12:21) ?Wanem lesen we yumi save lanem long parabol ya? ?Olsem wanem yumi save mekem lesen ya i wok long laef blong yumi?
Wan Man We i Gat Wan Desisen Blong Mekem
4. ?Yumi save ting se man ya long parabol blong Jisas hem i wanem kaen man?
4 Plante man oli savegud parabol ya blong Jisas. Hem i statem storian blong hem wetem toktok ya se: “I gat wan rijman we garen blong hem i stap karem fulap kakae.” Jisas i no talem se man ya i kam rij from we hem i gat kruked fasin no from we hem i ravem ol man. Nogat. Jisas i no givim tingting se man ya i wan rabis man. Folem ol toktok ya blong Jisas, i stret nomo blong ting se man ya i wan man we i wokhad long laef blong hem. Ating hem i wan man we i mekemgud ol plan blong hem mo i putumgud ol samting i stap from we hem i tingbaot fiuja, maet i tingbaot ol pikinini blong hem. Taswe, long lukluk blong wol, hem i wan gudfala eksampol blong wan papa we i wok had mo we i tinghevi long wok blong hem long famle.
5. ?Wanem desisen we man ya long parabol blong Jisas i mas mekem?
5 Nomata se i olsem wanem, Jisas i talem se man ya i rij, i min se hem i gat plante samting finis long laef blong hem. Nao, Jisas i soemaot se rijman ya i gat wan desisen blong mekem. Ol garen blong hem oli karem kakae we i bitim mak, be hem i no bin rere long samting ya. Hem i luk se hem i no rili nidim olgeta kakae ya, mo ol haos we hem i gat finis oli no naf tu blong holem evri kakae ya. ?Man ya i mas mekem wanem?
6. ?Wanem sam desisen we plante long ol man blong God oli mas tingtinggud long hem tede?
6 Plante man blong Jeova tede oli gat sam bigfala desisen blong mekem olsem rijman ya. Ol trufala Kristin oli traehad blong no giaman, oli no stil, oli wokhad, mo oli tinghevi long wok we oli mas mekem. (Kolosi 3:22, 23) Nomata se oli wok blong narafala man no oli gat prapa bisnes blong olgeta, plante taem oli wingud long wok blong olgeta, mo oli bitim narafala man tu long wok blong olgeta. Be sipos masta blong olgeta i wantem putumap olgeta long wok we i hae moa, no maet janis i kam blong oli mekem bisnes blong olgeta i kam antap, oli gat bigfala desisen blong mekem. ?Bambae oli tekem posisen we i hae moa? ?Bambae oli mekem bisnes i kam bigwan moa? Ol pikinini blong ol Witnes we oli stap long skul, olgeta tu oli wokhad mo oli givim bes blong olgeta. From samting ya, skul maet i wantem givim skolasip * long olgeta blong oli save go long ol nambawan skul blong kam antap long edukesen blong olgeta. ?Olsem wanem? ?Oli tekem ol janis ya hareap nomo?
7. ?Man ya long parabol blong Jisas i mekem wanem desisen?
7 Tingbaot parabol ya blong Jisas bakegen. ?Rijman ya i mekem wanem, taem ol garen blong hem oli karem kakae we i bitim mak be hem i no gat haos blong putum ol kakae ya i stap gud? Hem i tekem desisen se bambae hem i tekemaot ol haos we hem i gat finis, mo bambae i wokem sam narafala haos we oli bigwan moa. Olsem nao bambae hem i save putum gud olgeta kakae ya wetem ol narafala samting tu we hem i gat. I luk olsem se plan ya i mekem rijman ya i harem se bambae hem i save laef gud blong plante yia, mo hem i glad long hem wan, taswe hem i tingting se: “!Man! !Mi mi wan laki man! Naoia mi gat plante samting we mi save yusum long plante yia. I stat naoia, mi save spel, mi save kakae, mi save dring, we mi gat hapi taem olwe nomo.”—Luk 12:19.
?From Wanem God i Talem Se Man Ya i “No Gat Hed”?
8. ?Wanem impoten samting we man ya long parabol blong Jisas i no tingbaot?
8 Jisas i soemaot se ol plan we rijman ya i ting se bambae oli mekem hem i laef gud blong plante yia, oli no samting we hem i save trastem fulwan. I tru, ol plan ya oli gudfala plan, be hem i fogetem wan impoten samting taem hem i mekem ol plan ya. Hem i no tingbaot samting we God i wantem hem blong mekem. Man ya i stap tingbaot hem wan nomo. Hem i tingbaot wanem we bambae hem i save mekem blong i spelgud, mo i kakae, i dring, mo i gat hapi taem. Hem i ting se from we hem i gat “plante samting” ale bambae hem i save laef “plante yia” tu. Be sore tumas, ol samting oli no kamtru olsem we hem i wantem. Olsem yumi ridim finis, Jisas i talem se, “maet man i gat plante samting blong hem, be stamba blong prapa laef blong man i no stap long ol samting ya.” (Luk 12:15) Long naet blong semfala dei ya nomo, man ya i lusum evri samting ya we hem i bin wokhad blong kasem, from we God i talem long hem se: “Yu yu no gat hed. Long naet ya nomo, bambae mi tekemaot laef blong yu. ?Nao hu man bambae i tekem ol samting ya we yu yu hivimap rere i stap?”—Luk 12:20.
9. ?From wanem God i talem long rijman ya long parabol se hem i no gat hed?
9 Naoia yumi kam long bigfala tingting biaen long parabol ya blong Jisas. God i talem se man ya i no gat hed. Wan buk (Exegetical Dictionary of the New Testament) i talem se long lanwis Grik i gat plante defdefren rod blong talem tok ya “no gat hed,” be oltaem ol man oli yusum tok ya ‘blong minim man we i no yusum save we hem i gat.’ Ale buk ya i talem se taem parabol i stori se God i yusum tok ya ‘no gat hed,’ hem i blong soemaot klia se “olgeta plan we rijman ya i mekem long saed blong fiuja oli blong nating nomo.” Tok ya i no min se man i no gat save no waes, be i minim “man we i no agri, no i no wantem luksave, se hem i nidim God.” Ol samting we Jisas i talem long saed blong rijman ya i pulum yumi blong tingbaot wanem we hem wan yet i talem plante yia biaen, long ol Kristin long kongregesen blong Laodisia, long Esia Maena, i se: “Yufala i stap talem se yufala i rijman, yufala i gat evri samting, yufala i no sot long wan samting, be yufala i no save. Yufala i puaman we yufala i trabol gud, we olgeta man oli sore tumas long yufala, mo ae blong yufala i blaen mo yufala i neked.”—Revelesen 3:17.
10. ?From wanem ol samting we yumi gat, nating se oli “plante” be oli no save mekem we yumi laef “plante yia”?
10 I gud yumi tingting gud long lesen we yumi save lanem long parabol ya. ?Maet yumi olsem man ya long parabol blong Jisas? ?Yumi stap wokhad blong kasem “plante samting” be yumi no mekem ol samting we oli save mekem yumi laef blong “plante yia”? (Jon 3:16; 17:3) Baebol i talem se: “Ol samting we rijman i gat bambae oli no save givhan long hem” mo “man we i ting se ol gudgudfala samting we hem i gat i save holem hem i stap gud, hem bambae i foldaon olsem lif blong narara long koltaem.” (Ol Proveb 11:4, 28) Taswe, las toktok we Jisas i talem long parabol ya, hemia: “Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.”—Luk 12:21.
11. ?From wanem yumi westem taem nomo blong ting se yumi save gat gudfala fiuja sipos yumi gat plante samting?
11 Taem Jisas i talem se “bambae i mas olsem” hem i soemaot se ol samting we i hapen long rijman ya long parabol blong hem, bambae i mas hapen tu long olgeta we oli ting se ol samting long saed blong bodi, oli naf blong givim wan gudfala laef mo mekem we oli no wari long saed blong fiuja. I no rong blong ‘hivimap plante samting blong yumi’ be i rong taem samting ya i blokem yumi blong yumi ‘no kam rijman nating long fes blong God.’ Disaepol Jemes i givim woning we i klosap sem mak taem hem i talem se: “Sam long yufala oli save talem se, ‘Tede no tumora bambae mifala i go long wan narafala taon. Nao long ples ya, bambae mifala i stap wan fulyia, bambae mifala i mekem wok blong kasem plante mane.’ Yufala i lesin long mi. Yufala i no save nating wanem bambae i save kamtru long laef blong yufala tumora. Yufala i olsem smok blong hil nomo. Smok ya i save kamtru we i stap smoltaem nomo, nao biaen i lus bakegen. I stret blong yufala i talem se, ‘Sipos Hae God i wantem, bambae mifala i stap laef, nao bambae mifala i save mekem olsem, no olsem.’ ” (Jemes 4:13-15) Maet wan man i gat mane, no maet hem i gat graon no haos no nara samting we i blong hem, be olgeta samting ya oli nating nomo sipos hem i no rijman long fes blong God. ?Ale, i minim wanem blong kam rijman long fes blong God?
Rijman Long Fes Blong God
12. ?Wanem i save mekem we yumi kam rijman long fes blong God?
12 Toktok blong Jisas i soemaot se man we i rijman long fes blong God hem i defren long man we i hivimap plante samting blong hem nomo, no i wantem kam rij. Taswe, Jisas i stap talem se samting we yumi mas wari long hem moa, long laef, hemia i no blong hivimap plante sas samting mo i no blong haremgud long ol samting we yumi gat. Defren olgeta, yumi mas yusum olting we yumi gat long wan wei we i save mekem fasin fren blong yumi wetem Jeova i kam strong moa, no i kam rij moa. Sipos yumi mekem olsem bambae yumi kam rijman long fes blong God. ?From wanem? From we fasin ya i save mekem we yumi kasem plante blesing blong hem. Baebol i talem long yumi se: “Sipos Hae God [Jeova] i stap mekem i gud long man, fasin ya bambae i mekem man ya i kam rijman, mo hem i no save mekem man ya i trabol.”—Ol Proveb 10:22.
13. ?Olsem wanem blesing blong Jeova i mekem ‘man i kam rijman’?
13 Taem Jeova i mekem i gud, no i blesem, ol man blong hem, hem i givim samting we i beswan oltaem. (Jemes 1:17) Eksampol, kantri ya we Jeova i givim long ol man Isrel blong oli stap long hem, hem i wan kantri we ‘graon blong hem i gudfala tumas, mo ol kakae i save gru gud long hem.’ I tru se kantri blong Ijip tu i gat gudfala graon, be i gat wan samting we i mekem kantri ya we Jeova i givim long ol man Isrel i defren long Ijip. Moses i talem long ol man Isrel se, Jeova God ‘i stap lukaot long kantri ya.’ Tok ya i soemaot se ol man Isrel bambae oli gat gudfala laef long ples ya from we Jeova nao bambae i lukaot long olgeta. Sipos ol man Isrel oli obei long Jeova, bambae hem i blesem olgeta bigwan mo bambae oli harem gud long wan laef we i nambawan moa i bitim ol neson raonabaot. Yes, blesing blong Jeova nomo i stap mekem ‘man i kam rijman.’—Namba 16:13; Dutronome 4:5-8; 11:8-15.
14. ?Ol man we oli rijman long fes blong God oli glad from we oli kasem wanem?
14 Bighaf blong ol man we oli rij long saed blong bodi, oli wari se ol narafala bambae oli luk no tingbaot olgeta olsem wanem. Plante taem, fasin blong laef blong olgeta nao i soemaot se oli tingting tumas long saed ya. Oli wantem pulum ae blong ol man taem oli flas blong soemaot ‘ol samting we oli gat,’ olsem Baebol i talem. (1 Jon 2:16) Be, ol man we oli rijman long fes blong God oli defren olgeta. God i agri mo i glad long olgeta, hem i kaengud wetem olgeta long gladhat blong hem, mo oli frengud wetem hem. From we oli gat ol samting ya, oli harem gud mo oli no wari long saed blong fiuja, hemia i bitim samting we mane i save givim. (Aesea 40:11) Kwestin we i stap nao se, ?Yumi mas mekem wanem blong kam rijman long fes blong God?
?Olsem Wanem Blong Kam Rijman Long Fes Blong God?
15. ?Yumi mas mekem wanem blong kam rijman long fes blong God?
15 Long parabol blong Jisas, olgeta samting we man ya i mekem, ol plan blong hem mo ol hadwok blong hem, oli blong kasem samting blong hem wan nomo. Mo God i talem se man ya i no gat hed. Taswe, blong kam rijman long fes blong God yumi mas wokhad mo joen fulwan long ol wok we oli rili gat mining mo we oli impoten long lukluk blong God. Wan long ol wok ya hemia: “Yufala i mas go long ol man long olgeta ples long wol, blong pulum olgeta oli kam man blong mi.” (Matiu 28:19) Yumi no yusum taem, paoa, no save blong yumi blong gat gud laef, be yumi yusum long wok blong talemaot Kingdom mo blong pulum man i kam disaepol. Taem yumi mekem hemia, i olsem we yumi stap putumgud plante gudgudfala samting blong yumi i stap. Olgeta we oli mekem olsem, oli kasem plante blesing long saed blong spirit. Ol stori we oli kam biaen oli soemaot samting ya.—Ol Proveb 19:17.
16, 17. ?Wanem sam stori we yu save talem blong soemaot laef ya we i mekem man i rijman long fes blong God?
16 Tingbaot stori blong wan Kristin man long wan kantri blong Esia. Hem i wok olsem man blong fiksimap ol kompiuta mo i kasem gudfala pei from. Be wok ya i tekem bighaf blong taem blong hem, mo hem i harem se hem i no mekem plante samting long wosip blong Jeova, i olsem we hem i pua long saed blong spirit. Ale, hem i no gat intres nating blong mekem moa long wok ya blong kompiuta, nao hem i finis long wok ya mo i mekem aeskrim we hem i salem long ol man long rod. Samting ya i givim moa taem long hem blong mekem wok blong God mo blong stadi long Tok blong God. Olgeta we oli bin wok wetem hem bifo oli stap jikim hem. ?Be wanem samting we brata ya i kasem from desisen blong hem? Hem i se: “Tru ya, mi win moa i bitim taem we mi stap fiksimap ol kompiuta. Desisen ya i mekem mi mi hapi moa from we tingting blong mi i no moa wari tumas olsem fastaem. Be samting we i nambawan moa, hemia se naoia mi harem se mi klosap moa long Jeova.” Desisen ya we hem i mekem i givhan long hem blong statem wok blong fultaem paenia, mo tede, hem i stap wok long branj ofis blong ol Witnes blong Jeova long kantri blong hem. Yes, taem Jeova i blesem man, hem i mekem man ya i “kam rijman” tru.
17 Narafala stori hem i long saed blong wan woman we i gruap long wan famle we oli tinghae long edukesen. Hem i go skul long ol yunivesiti long Franis, Meksiko, mo Swiselan, mekem se hem i gat janis blong faenem wan gudfala wok. Hem i talem se: “Long lukluk blong ol man, mi mi wingud, oli gat respek long mi, mo mi gat janis blong kasem plante samting. Be insaed long mi wan, mi harem olsem se mi emti nomo, mi no harem nating se mi stap kasem wan gudfala samting.” Biaen, hem i kasem save long saed blong Jeova. Hem i se: “Moa mi kasem save blong Jeova, moa mi wantem mekem hem i glad, ale mi wantem givim wan samting long hem blong talem tangkiu from olgeta samting we hem i givim long mi. Samting ya nao i pulum mi blong luksave stret rod blong folem—hemia blong joen long wok blong fultaem paenia.” Woman ya i finis long wok blong hem mo i tekem baptaes. Hem i glad we long ol 20 yia we oli pas, hem i save mekem wok blong fultaem paenia. Hem i stori se: “Samfala oli ting se mi westem olgeta save we mi bin lanem long skul. Be oli luksave se mi mi glad we mi glad. Oli luk ol rul we mi mi stap folem long laef blong mi mo oli tinghae long samting ya. Evri dei mi mi prea long Jeova blong i halpem mi blong holem tingting daon oltaem blong bambae hem i save glad long mi oltaem.”
18. ?Olsem wanem yumi save kam rijman long fes blong God, olsem Pol?
18 Taem aposol Pol i no wan Kristin yet, hem i gat janis blong kam wan haeman long wok blong hem. Be, hem i raetem se: “Naoia mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi.” (Filipae 3:7, 8) Long lukluk blong Pol, ol samting we hem i kasem long wok blong Kraes oli sas moa i winim olgeta narafala samting we wol ya i save givim. Long sem fasin, taem yumi no traem ronem ol samting we yumi nomo yumi wantem kasem, be yumi traem putum laef blong yumi i stap nomo long ol wok we i soem se yumi fasgud long God, ale yumi tu yumi save glad from we long taem ya nao bambae yumi rili rijman long fes blong God. Tok blong God i leftemap tingting blong yumi blong yumi mas sua se: “Man we i obei long Hae God, mo i mekem tingting blong hem i stap daon, hem bambae i kam rijman. Bambae hem i gat longfala laef, mo ol man bambae oli ona long hem.”—Ol Proveb 22:4.
[Futnot]
^ Ol samting we wan kampani no gavman i givim long studen, blong i save kasem moa edukesen, maet i go skul long nara kantri.
?Yu Yu Save Eksplenem?
• ?Long parabol blong Jisas, wanem desisen we man ya i mas mekem?
• ?From wanem God i talem se rijman ya i no gat hed?
• ?I minim wanem se man i kam rijman long fes blong God?
• ?Olsem wanem blong kam rijman long fes blong God?
[Kwestin]
[Tok blong pija long pej 29]
?From wanem maet i had long yumi blong tekem desisen taem janis i kasem yumi blong yumi save winim wan gudfala samting long laef?
[Tok blong pija long pej 30]
“Sipos Hae God i stap mekem i gud long man, fasin ya bambae i mekem man ya i kam rijman”