Gudfala Samting We Yumi Kasem Sipos Yumi Stanap Strong Taem Yumi Safa
Gudfala Samting We Yumi Kasem Sipos Yumi Stanap Strong Taem Yumi Safa
“From we olgeta oli stap stanap strong longtaem, yumi talem se God i mekem olgeta oli harem gud.”—JEMES 5:11.
1, 2. ?Wanem i soem se i no tingting blong Jeova blong ol man oli safa?
I NO gat man we i wantem safa, mo Jeova God tu we i wokem yumi, i no wantem se ol man oli harem nogud. Yumi luksave samting ya taem yumi ridim Tok blong hem mo taem yumi makem samting we i hapen afta we hem i wokem tufala faswan man mo woman. Fastaem, God i wokem man. “Hae God i tekem graon, i mekem wan man long hem, mo i blu long nus blong hem blong mekem hem i gat laef. Nao long fasin ya, man ya i laef.” (Jenesis 2:7) Bodi mo tingting blong Adam i stret gud olgeta, mo hem i no save kasem sik mo ded.
2 ?Adam i gat wanem kaen laef? Baebol i talem se: “Nao long saed i go long is, long wan ples we nem blong hem Iden, Hae God i mekemrere wan gudfala ples, mo i tekem man ya we i bin mekem, i putum hem i stap long hem. Mo hem i mekem we ol naranarafala tri oli stap gru olbaot long hem. Ol tri ya oli gud tumas blong luk, mo frut blong olgeta i gud tumas blong kakae. Mo long medel blong ples ya, i gat tu narafala tri i stap, wan we frut blong hem i save givim laef, mo narawan we frut blong hem i save mekem man i save ol fasin we i nogud mo ol fasin we i gud.” (Jenesis 2:8, 9) Yes, Adam i gat wan nambawan hom. Hem i no save safa long Iden.
3. ?Wanem laef we tufala faswan man mo woman tufala i save gat?
3 Jenesis 2:18 i talem long yumi se: “Nao Hae God i talem se, ‘I nogud we man ya i stap hem wan. I moa gud mi mekem wan fren blong hem we i olsem hem, blong i givhan long hem.’ ” Ale Jeova i wokem wan woman we i stret gud blong i kam waef blong Adam, nao tufala i save gat wan famle we i hapi. (Jenesis 2:21-23) Mo tu Baebol i talem se: “Nao [God] i blesem tufala, mo i talem long tufala se, ‘I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.’ ” (Jenesis 1:28) Tufala faswan man mo woman tufala i gat nambawan janis ya blong mekem Paradaes long Iden i kam bigwan gogo i kavremap olgeta ples long wol, nao fulwol i kam wan paradaes. Mo tufala i save gat ol pikinini we oli glad, we bambae i no gat samting blong mekem oli safa. !Tufala i gat wan nambawan stat long laef blong tufala!—Jenesis 1:31.
Fasin Safa i Stat
4. ?Laef blong ol man i olsem wanem long ol handred yia we oli pas?
4 Be, taem yumi luk laef we ol man oli gat long ol handred yia we oli pas, i klia se wan samting i gorong nao laef blong ol man i kam nogud olgeta. Ol rabis samting oli stap hapen mo ol man oli safa bigwan. Long ol handred yia we oli pas, ol pikinini blong Adam mo Iv oli stap sik, oli kam olfala, mo biaen oli ded. Wol ya i no wan paradaes, mo ol man we oli stap long hem oli no glad. Rom 8:22 i klia taem i tokbaot samting ya se: “Olgeta samting ya we God i mekem oli stap krae, from we olgeta oli stap harem nogud.”
5. ?Olsem wanem tufala faswan bubu blong yumi oli gat fol from fasin safa we i kasem ol man?
5 I no fol blong Jeova we ol man oli stap safa bitim mak longtaem finis i kam. (2 Samuel 22:31) Ol man nao oli gat fol from trabol ya. Baebol i talem se: “Olgeta ya evriwan oli rabis man nomo, oli stap mekem ol samting nomo we i nogud we i nogud.” (Ol Sam 14:1) Long stat blong laef blong tufala faswan bubu blong yumi, tufala i kasem evri samting we i gud. Adam mo Iv tufala i mas obei long God sipos tufala i wantem gohed blong kasem ol gudfala samting ya, be tufala i jusum blong folem prapa tingting blong tufala nomo. Stat long taem ya we tufala faswan bubu blong yumi oli gowe long Jeova, tufala i no moa stretgud olgeta long ae blong Jeova. Sloslo bodi blong tufala i kam nogud gogo kasem we tufala i ded. Tufala i pasem samting ya i kam long yumi, mekem se taem yumi bon, yumi tu yumi no moa stret gud olgeta.—Jenesis 3:17-19; Rom 5:12.
6. ?Setan i gat wanem fol blong mekem se fasin safa i stat?
6 Wan enjel we biaen i kam Devel Setan, hem tu i gat fol from ol man oli safa. Jeova i wokem enjel ya we hem i fri blong jusum wanem samting we hem i wantem. Be enjel ya i no yusum gud fasin fri ya taem hem i traem blong pulum ol man oli wosipim hem. Yumi mas wosipim Jeova nomo, i no ol samting we Jeova i wokem. Setan nao i pulum Adam mo Iv blong tufala i gowe long Jeova mo folem prapa tingting blong tufala. Hem i pulum tufala blong ting se tufala i save “kam olsem [God], we i save ol fasin we i nogud mo ol fasin we i gud.”—Jenesis 3:5.
Jeova Nomo i Gat Raet Blong Rul
7. ?Frut we i kamaot from fasin stronghed, i soemaot wanem?
7 Rabis frut we i kamaot from fasin stronghed ya i soemaot se Jeova, we i Hae King blong heven mo wol, hem nomo i gat raet blong rul mo rul blong hem nomo i stretgud olgeta. Long ol taosen yia we oli pas, Setan i “rulum wol ya.” Mo ol samting we oli hapen long ol yia ya oli soemaot se rul blong hem i rabis, i no stret, i raf, mo i no mekem ol man oli glad. (Jon 12:31) Rul blong ol lida blong man we oli stap aninit long paoa blong Setan, i soemaot se ol man tu oli no naf blong rul long stret fasin. (Jeremaea 10:23) From samting ya, enikaen rul we man i stanemap bambae i no save win. Histri blong man i pruvum samting ya.
8. ?Wanem stamba tingting blong Jeova long saed blong ol defren kaen rul we ol man oli stanemap? ?Mo olsem wanem bambae hem i mekem stamba tingting ya blong hem i kamtru?
8 Jeova i letem plante taosen yia oli pas finis blong ol man oli traem prapa rul blong olgeta, taswe naoia i stret we hem i tekemaot ol rul ya long wol mo putum gavman blong hem long ples blong olgeta. Wan profet tok i tokbaot samting ya i se: “Nao long taem blong ol king ya [gavman blong man], God ya we i stap long heven bambae i stanemap wan king [Kingdom blong hem long heven we Kraes i King blong hem] we rul blong hem bambae i no save finis samtaem. . . . Bambae hem i save flatemgud paoa blong ol narafala king, nao bambae hem i rul oltaem gogo i no save finis.” (Daniel 2:44) Rul blong Setan wetem rul blong ol man bambae oli finis, Kingdom blong God nomo long heven bambae i stap mo i rul antap long wol. Jisas bambae i King, mo i gat 144,000 man blong God, we hem i tekemaot olgeta long wol ya, we bambae oli rul wetem Jisas.—Revelesen 14:1.
Gudfala Samting We Yumi Kasem Taem Yumi Safa
9, 10. ?Olsem wanem ol samting we oli mekem Jisas i safa oli givhan long hem?
9 I gud we yumi luk wanem ol fasin we i mekem se ol man ya oli naf blong go rul long Kingdom blong heven. Fastaem, Jisas Kraes i soemaot se hem i nafgud blong mekem wok ya blong King. Hem i spenem plante plante yia wetem Papa blong hem, Jeova, mo hem i mekem ol samting we Papa blong hem i wantem, hem i stap olsem “nambawan man blong wok blong hem.” (Ol Proveb 8:22-31, NW) Taem Jeova i rerem rod blong Jisas i kamdaon long wol ya, Jisas i agri nomo. Taem Jisas i stap long wol, hem i wok strong blong talemaot hae rul mo Kingdom blong Jeova long ol man. Jisas i soem wan nambawan eksampol long yumi evriwan taem hem i obei fulwan long hae rul ya.—Matiu 4:17; 6:9.
10 Jisas i safa taem ol man oli mekem i nogud long hem, mo biaen oli kilim hem i ded. Taem hem i stap prij, hem i luk ol trabol we ol man raonabaot long hem oli stap kasem. ?Olsem wanem? ?Ol samting we hem i luk oli givhan long hem? ?Mo taem hem i safa bigwan, hemia i givhan long hem? Yes, ol samting ya oli givhan long hem. Hibrus 5:8 i talem se: “Kraes i Pikinini blong God, be hem i lanem mining blong fasin ya blong obei long God, long ol samting we oli mekem hem i harem nogud long bodi blong hem.” Ol samting we Jisas i fesem taem hem i stap long wol oli mekem se hem i kasem save moa taem man i safa mo hem i gat sore. Hem tu i kasem ol trabol we ol man long wol oli stap kasem. Taswe, hem i save soem sore long olgeta we oli stap safa mo hem i kasem savegud long wok blong hem blong sevem olgeta. Makem olsem wanem aposol Pol i soemaot samting ya long buk blong Hibrus se: “Fastaem hem i kam stret olsem ol brata ya mo ol sista ya blong hem, blong hem bambae i save gat sore long olgeta, mo blong olgeta bambae oli save trastem hem. Taswe hem i save mekem ol wok blong hem, we hem i Hae Pris blong olgeta, nao hem i mekem rod blong God i fogivim olgeta i tekemaot ol sin blong olgeta. Mo naoia, hem i save givhan long olgeta we ol samting oli stap traem olgeta, from we hem tu i harem nogud finis, mo ol samting ya oli traem hem finis.” “Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin. Nao from samting ya, i gud yumi mekem tingting blong yumi i strong, nao yumi kam long fes blong God we hem i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.”—Hibrus 2:17, 18; 4:14-16; Matiu 9:36; 11:28-30.
11. Ol man we bambae oli kam king mo pris long fiuja, oli man we oli bin laef long wol ya. ?Olsem wanem samting ya i save givhan long olgeta taem bambae oli rul?
11 Yumi save talem sem samting long saed blong ol 144,000 man we “God i pemaot olgeta” long wol blong oli rul wetem Jisas Kraes long Kingdom blong heven. (Revelesen 14:4) Olgeta evriwan oli bon long wol ya, oli gruap long medel blong ol man we oli stap safa, mo olgeta tu oli safa. Plante long olgeta, ol man oli mekem i nogud long olgeta, mo samfala oli ded from we oli no wantem lego Jeova mo oli glad blong biaenem Jisas. Be oli ‘no sem blong tokbaot Masta blong olgeta. Oli rere blong harem nogud tu from gud nius ya blong Kraes.’ (2 Timoti 1:8) Ol samting we oli kasem long laef blong olgeta long wol ya i givhan long olgeta blong oli kam nafgud blong jajem ol man, taem bambae oli stap long heven. Oli lanem blong kasem save moa long ol trabol we ol narafala oli fesem, blong oli kaen moa, mo blong oli wantem moa blong givhan long ol man.—Revelesen 5:10; 14:2-5; 20:6.
Olgeta We Oli Gat Hop Blong Laef Long Wol Oli Save Haremgud
12, 13. ?Taem olgeta we oli gat hop blong laef long wol ya oli safa, olsem wanem oli save kasem gudfala samting from?
12 Ol man we oli gat hop blong laef olwe long wan paradaes long wol we i no gat sik, sore mo ded long hem, olgeta tu oli stap safa tede. ?Be olsem wanem? ?Oli kasem wan gudfala samting from? Yumi no laekem blong harem soa mo wari taem yumi safa. Be taem yumi stanap strong long wan traem olsem, we i mekem yumi safa, yumi kamgud moa long ol fasin blong yumi mo yumi kasem glad from.
13 Tingbaot wanem we Tok blong God i talem long saed ya, i se: “Sipos samtaem ol man oli mekem yufala i stap harem nogud long bodi blong yufala from gudfala fasin blong yufala, be long tingting blong yufala, yufala i save harem gud.” “Sipos ol man oli tok nogud long yufala from we yufala i man blong Kraes, yufala i save harem gud.” (1 Pita 3:14; 4:14) “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud. Yufala i mas harem gud yufala i glad, from we i gat bigfala pei blong yufala i stap long heven.” (Matiu 5:11, 12) “Taem ol samting oli kam blong traem bilif blong man, be hem i stap stanap strong, hem i save harem gud, from we taem hem i winim ol samting ya we oli kam blong traem hem, God bambae i flasem hem olsem we oli flasem man we i win long faet. Mo praes we God bambae i givim long hem, hemia laef ya we hem i promes finis blong givim long olgeta we oli lavem hem.”—Jemes 1:2.
14. ?From wanem ol man blong Jeova oli harem gud taem oli stap safa?
14 Yumi no kasem glad from we yumi safa long bodi blong yumi. Yumi glad mo yumi harem gud from we yumi save se yumi mekem samting we Jeova i wantem mo yumi stap folem eksampol blong Kraes. Olsem nao, long faswan handred yia, ol lida blong skul oli putum sam aposol long kalabus mo biaen, oli karem olgeta i go long hae kot blong ol man Jiu mo oli tok nogud long olgeta from we oli stap talemaot Jisas Kraes long ol man. Oli wipim ol aposol ya mo biaen oli lego olgeta oli go fri. ?Ol aposol oli harem olsem wanem? Baebol i talem se: “Oli goaot long Kaonsel, nao oli stap harem gud tumas from we God i luk olgeta olsem we oli naf blong kasem sem long fes blong ol man, from nem blong Jisas.” (Ol Wok 5:17-41) Ol aposol oli no harem gud from we ol man oli wipim olgeta mo we bodi blong olgeta i soa. Be oli kasem save se oli safa from we oli holemstrong long Jeova mo oli folem eksampol blong Jisas. Samting ya i mekem se oli harem gud tumas.—Ol Wok 16:25; 2 Korin 12:10; 1 Pita 4:13.
15. ?Taem yumi safa be yumi stanap strong, olsem wanem hemia i save givhan long yumi long fiuja?
15 Sipos yumi stanap strong taem ol man oli agensem yumi mo mekem trabol long yumi, mo yumi gat stret tingting long saed ya, bambae yumi kam gud moa long fasin blong stanap strong. Hemia i save givhan long yumi blong stanap strong taem yumi kasem ol narafala trabol we i save mekem yumi safa. Yumi ridim long Baebol se: “Taem plante samting oli stap kam blong traem yufala, bambae yufala i save luk olgeta olsem samting blong harem gud, from we yufala i save se taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem.” (Jemes 1:2, 3) Long sem fasin, Rom 5:3-5 i talem se: “Taem yumi kasem hadtaem, yumi save glad, from we yumi save we hadtaem i stap mekem yumi strong, nao yumi save mekem tingting blong yumi i longfala. Nao taem yumi mekem tingting blong yumi i longfala, God i save glad long yumi. Mo taem hem i glad long yumi, hemia i save mekem tingting blong yumi i stap moa long hem. Mo taem tingting blong yumi i stap strong long hem, yumi no save harem nogud.” From we yumi Kristin, bambae yumi fesem plante moa traem long rabis wol ya. Taswe, sipos yumi stanap strong naoia, bambae yumi save stanap strong tu long ol narafala traem we bambae yumi fesem.
Jeova Bambae i Mekem i Gud Long Olgeta
16. ?Wanem samting we Jeova bambae i mekem blong ol man we bambae oli kam king mo pris from we oli stap safa?
16 Taem ol narafala oli agensem yumi no oli mekem trabol long yumi from we yumi folem Kristin rod, nao yumi lusum olting blong yumi, yumi save harem gud from we yumi save se Jeova bambae i mekem i gud long yumi. Olsem nao, aposol Pol i raet i go long samfala we oli gat hop blong go laef long heven, i se: “Taem ol man oli tekemaot olting blong yufala, be yufala i harem gud nomo, from we yufala i save finis we yufala i gat ol narafala samting ya blong yufala i stap, we oli moa gud, mo ol samting ya bambae oli no save lus samtaem.” Ol ‘narafala samting ya’ we Pol i tokbaot, hemia se bambae oli kasem blesing blong rul long Kingdom blong God. (Hibrus 10:34) Tingbaot bigfala glad we bambae oli kasem taem oli joen wetem Jeova mo Jisas blong givimaot ol nambawan blesing long ol man long niufala wol. Tok blong aposol Pol i tru nomo taem hem i talem long ol Kristin man we oli holemstrong long God, i se: “Long tingting blong mi, taem we yumi stap tingbaot gudfala laef ya blong heven we bambae i save kamtru long yumi, ol samting ya we naoia oli stap mekem yumi harem nogud tumas, oli olsem nating nomo.”—Rom 8:18.
17. ?Wanem samting we Jeova bambae i mekem blong ol man we oli gat hop blong laef long wol mo we oli holemstrong long hem?
17 Long sem fasin, nomata sipos olgeta we oli gat hop blong laef blong olwe long wol, oli lusum no oli lego ol samting blong olgeta from we oli mekem wok blong Jeova, Jeova bambae i mekem i gud long olgeta bitim mak taem bambae hem i mekem ol samting long fiuja. Bambae hem i givim laef we i stretgud mo we i no save finis long olgeta long wol ya we i kam wan paradaes. Long niufala wol ya, Jeova “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” (Revelesen 21:4) !Hemia i wan nambawan promes! Olgeta samting we yumi glad nomo blong lego, no we narafala i fosem yumi blong lego, from wok blong Jeova, be i no gat wan long ol samting ya we i moa gud bitim nambawan laef we bambae i kam, we Jeova bambae i givim long ol man blong hem we oli holemstrong long hem mo we oli stap stanap strong taem oli safa.
18. ?Wanem gudfala promes we Jeova i givim long yumi long Tok blong hem?
18 Olgeta samting we oli mekem yumi safa tede, oli no save blokem glad we bambae yumi kasem from laef we i no save finis long niufala wol blong God. Ol gudgudfala samting we bambae yumi kasem long niufala wol bambae oli tekem ples blong ol trabol we oli stap mekem yumi safa tede. Aesea 65:17, 18 i talem se: “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta. Bambae yufala i glad tumas long ol niufala samting ya we bambae mi mi mekem, mo bambae yufala i harem gud, gogo i no save finis.” From samting ya, i stret nomo we Jemes, haf brata blong Jisas, i talem se: “Olgeta oli stap stanap strong longtaem, yumi talem se God i mekem olgeta oli harem gud.” (Jemes 5:11) Yes, sipos yumi stanap strong taem yumi stap safa tede, hemia i save givhan long yumi naoia mo long fiuja tu.
?Bambae Yu Yu Ansa Olsem Wanem?
• ?Olsem wanem fasin safa i stat?
• ?Fasin safa i save karem wanem gudfala samting long ol man we bambae oli rul antap long wol mo long ol man we bambae oli laef long wol?
• ?From wanem yumi save harem gud naoia, nating se yumi stap safa?
[Kwestin]
[Tok blong pija long pej 13]
Tufala faswan papa mama blong yumi oli bin gat wan gudfala fiuja long fored blong tufala
[Tok blong pija long pej 15]
Taem Jisas i luk olsem wanem ol man oli safa, hemia i rerem hem blong kam wan gudfala King mo Hae Pris