“Oli Raetem Blong Tijim Yumi”

“BAMBAE ol man oli stap raetem ol buk gogo i no save finis.” (Prija 12:12) Tede, ol man oli raetem fulap buk we i givim save long ol defdefren samting. Samting ya i soemaot se ol tok ya blong Solomon oli tru tumas tede olsem we oli bin tru bifo. ?Ale, olsem wanem wan man we i save jusumgud ol buk i save tekem desisen se bambae hem i ridim wanem buk?

Taem ol man we oli stap ridim ol buk oli stap jusum buk we oli intres long hem, oli wantem save sam samting long saed blong man we i raetem buk ya. Samtaem ol man we oli printim ol buk ya, oli putum wan smol haf long buk we i talemaot ples blong man ya, ol pepa we hem i kasem, mo wan lis blong ol narafala buk blong hem. I impoten blong save hu man we i raetem wan buk. Long ol faswan handred yia, plante taem ol woman oli yusum nem blong wan man taem oli raetem ol buk. Oli mekem olsem from we oli no wantem se ol man oli daonem buk blong olgeta taem oli luk we woman nao i raetem.

Sore tumas, olsem faswan haf blong magasin ya i talem, sam man oli no ridim Hibru haf blong Baebol from we oli bilif se God we Hibru haf ya i tokbaot, i raf tumas. Oli ting se hem i no gat sore nating taem hem i spolem ol enemi blong hem. * Bambae yumi luk wanem we Hibru mo Kristin Grik haf blong Baebol i talem long saed blong Man ya we i Stamba blong Baebol.

Man We i Stamba Blong Baebol

Folem Hibru haf blong Baebol, God i talem long neson blong Isrel se: “Mi mi [“Jeova,” NW] mo mi no save jenis samtaem.” (Malakae 3:6) Samwe 500 yia biaen, Jemes we i raetem wan haf blong Baebol, i tokbaot God i se: “Fasin blong hem i no save jenis, mo hem i no save tanem baksaed long yumi blong livim yumi long tudak.” (Jemes 1:17) ?Sipos i olsem, from wanem sam man oli gat tingting ya se God ya we Hibru haf blong Baebol i tokbaot i defren long God we Kristin Grik haf i tokbaot?

Ansa blong kwestin ya hemia se ol defdefren haf blong Baebol oli soemaot ol defdefren fasin blong God. Buk blong Jenesis hem wan i tokbaot God se hem i harem “nogud tumas long hat blong hem,” hem i “mekem skae mo graon” mo hem i “man blong jajem olgeta man blong wol.” (Jenesis 6:6; 14:22; 18:25) ?Olsem wanem? ?Ol defdefren tok ya oli stap tokbaot semfala God? Yes oli tokbaot semfala God nomo.

Tingbaot pijatok ya. Maet ol man we oli pas long kot oli savegud wan lokol jaj from we hem i wan man we i strong blong holem loa. Be maet ol pikinini blong hem oli tingbaot hem olsem wan papa we i lavem olgeta mo i kaengud long olgeta. Ol gudfala fren blong hem oli luk hem olsem wan fren we i isi blong storian wetem mo we i  laekem blong laf. Jaj, papa, mo fren ya, hem i semfala man. Be ol man oli save hem olsem from we hem i soemaot ol defdefren fasin long ol defdefren taem mo ples.

Long sem fasin, Hibru haf blong Baebol i tokbaot Jeova olsem wan God we i ‘gat sore long man, mo i stap givhan long man long gladhat blong hem. Hem i no save kros kwik. Oltaem hem i stap lavem man mo oltaem hem i stap holemstrong promes blong hem.’ Be yumi lanem tu se ‘olgeta we oli stap holem ol fasin nogud, hem i stap panisim olgeta.’ (Eksodas 34:6, 7) Ol fasin ya oli soemaot mining blong nem blong God. “Jeova” i minim “Hem i Mekem i Kamaot.” I min se God i save kam wanem samting we hem i nidim blong mekem ol promes blong hem i kamtru. (Eksodas 3:13-15, NW) Be hem i semfala God nomo. Jisas i talem se: “[“Jeova,” NW] i God blong yumi, mo hem wan nomo i [Jeova].”—Mak 12:29.

?Grik Haf Blong Baebol i Tekem Ples Blong Hibru Haf?

Tede, taem ol man oli faenemaot ol niufala save long saed blong wan samting no taem fasin blong ol man i jenis, plante taem oli printim ol buk blong ol niufala save ya we i tekem ples blong ol buk we oli olfala. ?Olsem wanem? ?Hemia i min se Grik haf blong Baebol i tekem ples blong Hibru haf? Nogat.

Sipos Jisas i bin wantem se ol buk blong Baebol we oli tokbaot minista wok blong hem mo ol leta we ol disaepol blong hem oli raetem oli tekem ples blong Hibru haf blong Baebol, i sua se bambae hem i talemaot samting ya. Defren olgeta, Gospel blong Luk i tokbaot Jisas, jes bifo we hem i go long heven, i se: “Jisas i stat long buk blong Moses, mo i gotru long ol tok blong ol profet [long Hibru haf blong Baebol], i talemaotgud long tufala [disaepol blong hem], olgeta tok blong Baebol we oli bin raetem blong tokbaot hem.” Biaen, Jisas i kamtru long ol gudfala aposol blong hem mo sam narafala bakegen. Luk i gohed i se: “Nao Jisas i talem long olgeta se, ‘Ol samting ya oli soemaot mining blong ol tok ya we mi stap talem long yufala, long taem ya we mi stap wetem yufala yet. Bifo, mi mi stap talem se olgeta samting we oli bin raetem long buk blong Moses, mo long ol tok blong ol profet, mo long Ol Sam, blong tokbaot mi, bambae oli mas kamtru.’ ” (Luk 24:27, 44) Go kasem en blong minista wok blong Jisas long wol hem i stap gohed yet blong yusum Hibru haf blong Baebol. Taswe, Jisas i soemaot klia se Hibru haf blong Baebol i no blong taem bifo nomo.

 Afta long taem ya we Kristin kongregesen i stanap, ol man blong Jisas oli gohed blong yusum Hibru haf blong Baebol blong makemgud ol profet tok we oli no kamtru yet, ol rul blong Loa blong Moses we oli tijim ol gudfala lesen, mo ol stori blong ol man blong God bifo we gudfala eksampol blong olgeta i leftemap tingting blong ol Kristin blong oli gohed blong stanap strong. (Ol Wok 2:16-21; 1 Korin 9:9, 10; Hibru 11:1–12:1) Aposol Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud.” * (2 Timoti 3:16) ?Olsem wanem Hibru haf blong Baebol i stret gud long yumi tede?

Advaes Long Saed Blong Laef Blong Yumi Evri Dei

Tingbaot problem ya tede we man i no laekem narafala from kala blong skin blong hem. Long wan taon blong Is Yurop, wan man Itiopia we i gat 21 yia blong hem i talem se: “Sipos mifala i wantem go samples, mifala i mas mekem wan plan blong goaot olsem wan grup. Sipos i gat wan grup blong mifala maet oli no kilim mifala.” Hem i gohed i se: “Mifala i no save aot long haos afta 6 klok long naet from i denja tumas speseli sipos mifala i mas go long tren. Taem ol man oli luk mifala oli jajem mifala finis from kala blong skin blong mifala.” ?Olsem wanem? ?Hibru haf blong Baebol i tokbaot bigfala problem ya?

God i talem long ol man Isrel bifo se: “Yufala i no mas spolem ol narafala man we oli kam stap long kantri blong yufala. Yufala i mas tingbaot taem ya we yufala i stap long Ijip, we yufala i strenja nomo long ples ya. Nao from samting ya, yufala i mas lavem ol narafala man olsem we yufala i stap lavem yufala, mo yufala i mas lukaot gud long olgeta, sem mak olsem we yufala i stap lukaot gud long ol laen blong yufala nomo.” (Levitikas 19:33, 34) Yes, loa ya i talem long ol man Isrel bifo se oli mas soem respek long ol man we oli blong narafala ples, no “ol narafala man we oli kam stap long kantri blong” olgeta. Loa ya i stap gud yet long Hibru haf blong Baebol. ?Olsem wanem? ?Yu yu agri se sipos ol man tede oli laef folem ol rul we oli stap long loa ya, maet oli save winim problem ya blong no laekem narafala from kala blong skin blong hem?

I tru se Hibru haf blong Baebol i no givim fulap advaes long saed blong mane, be advaes we hem i givim i wokgud mo i save mekem yumi waes long fasin blong yusum mane. Tingbaot wan eksampol. Ol Proveb 22:7 i talem se: “Sipos yu kaon long wan man, bambae yu kam slef blong hem nao.” Tede, plante man we oli givim advaes long saed blong mane, oli agri se i no waes blong wan man i kaon long ol samting  long stoa, from fasin ya i save lidim hem blong gat bigfala trabol long saed blong mane.

King Solomon i bin wan long ol rijman long histri we mane blong hem i bitim plante narafala rijman. Hem i tokbaot wan fasin we i kam antap tumas long wol tede. Hemia fasin blong ronem ol sas samting nomata wanem frut bambae i kamaot from. Hem i raetem se: “Sipos yu laekem mane tumas, nating we mane blong yu i plante olsem wanem, be neva yu save talem se yu harem gud, mane blong yu i naf. Mo sipos yu wantem tumas blong kam rijman, neva yu save kasem ol samting we yu yu wantem. Tingting ya i blong nating nomo.” (Prija 5:10) !Woning ya i waes tumas!

Wan Hop Long Fiuja

Ful Baebol i gat wan stamba tok nomo: God bambae i yusum Kingdom blong hem we i stap aninit long paoa blong Jisas Kraes, blong leftemap hae rul blong Hem mo blong leftemap tabu nem blong Hem.—Daniel 2:44; Revelesen 11:15.

Long Hibru haf blong Baebol, yumi lanem plante save long saed blong laef aninit long Kingdom ya blong God we i save mekem yumi haremgud mo i pulum yumi blong kam klosap moa long Jeova we hem nao i stap mekem yumi haremgud. Profet Aesea i bin talemaot se bambae ol man mo anamol oli joengud tugeta long pis, hem i se: “Wael dog mo pikinini blong sipsip bambae tufala i save stap wanples nomo, we tufala i fren gud. Bigfala puskat ya leped we i stap kakae nani, bambae i save go ledaon wetem pikinini blong nani, we tufala i save slip gud long wan yad nomo. Ol pikinini blong buluk mo ol pikinini blong laeon bambae oli stap kakae wanples nomo, mo smol pikinini nomo bambae i naf blong lukaot long olgeta.” (Aesea 11:6-8) !Promes ya i naes tumas!

?Be olsem wanem long ol man we narafala i stap mekem i nogud long olgeta from kala blong skin blong olgeta no kalja blong olgeta, no olgeta we oli gat wan nogud sik, no oli puaman? Long wan profet tok, Hibru haf blong Baebol i tokbaot Jisas Kraes, i se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting.” (Ol Sam 72:12, 13) Ol promes ya oli impoten from we sipos man i bilif long olgeta hem i save lukluk i go long fiuja wetem strong tingting mo hop.—Hibrus 11:6.

Taswe, yumi no sapraes we tabu spirit i pulum aposol Pol blong raetem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong [no “yumi save gat hop,” NW], from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Yes, Hibru haf blong Baebol i wan impoten haf blong Tok blong God. Hem i save givhan bigwan long yumi tede. Mifala i hop se bambae yu traehad blong lanem moa long saed blong wanem we ful Baebol i rili tijim, mo long rod ya, bambae yu kam klosap moa long Jeova God we Hem nao i Stamba blong Baebol.—Ol Sam 119:111, 112.

[Ol Futnot]

[Bokis blong pija long pej 6]

?OLTESTEMAN NO HIBRU HAF BLONG BAEBOL?

Long King James Version yumi faenem tok ya “Oltesteman” long 2 Korin 3:14. Tok we long vas ya oli tanem i kam “testeman,” long lanwis Grik hemia di·a·theʹke. Long plante niufala Baebol, olsem Baebol ya New International Version, oli no tanem tok ya di·a·theʹke i kam “testeman” be oli tanem i kam “kontrak.” ?From wanem?

Wan man we i raetem ol diksonari, Edward Robinson, i talem se: “From we kontrak ya blong bifo i stap long ol buk blong Baebol we Moses i raetemdaon, tok ya [di·a·theʹke] i minim buk blong kontrak, no ol buk we Moses i raetemdaon, olsem loa blong Moses.” Long 2 Korin 3:14, aposol Pol i stap tokbaot Loa blong Moses we i wan haf nomo blong Hibru haf ya blong Baebol we oli raetemdaon bifo long Kristin taem.

?Taswe, wanem tok i stret blong yusum blong tokbaot ol faswan 39 buk blong Tabu Baebol? Jisas mo ol man blong hem, oli no singaot haf ya wetem wan tok we i givim tingting se i blong bifo no i olfala finis. Oli tokbaot haf ya se hem i “Baebol” mo “tabu buk ya Baebol.” (Matiu 21:42; Rom 1:2, NW) Taswe, folem toktok ya we tabu spirit i pulum Jisas mo ol man blong hem blong talem, ol Witnes blong Jeova oli singaot Oltesteman se Hibru haf blong Baebol from we bighaf blong hem oli bin raetem long lanwis Hibru fastaem. Long sem fasin, haf ya we plante man oli singaot se Niutesteman, ol Witnes blong Jeova oli singaot hem se Grik haf blong Baebol. Hemia from we ol man we tabu spirit blong God i pulum olgeta blong raetemdaon haf ya oli bin yusum Grik lanwis.

[Tok blong pija long pej 4]

Wan man i save gat fasin blong wan jaj we i strong blong holem loa, wan papa we i lavem pikinini blong hem, mo wan fren

[Tok blong pija long pej 5]

Jisas i bin yusum Hibru haf blong Baebol long minista wok blong hem

[Tok blong pija long pej 7]

?Wanem sam rul blong Baebol we i save givhan long wan man blong tekem wan gudfala desisen?