Tijim Pikinini Blong Yu Blong Lavem Jeova
Tijim Pikinini Blong Yu Blong Lavem Jeova
“Ol pikinini we man i bonem taem i yang yet . . . oli olsem ol ara long han blong soldia.”—OL SAM 127:4.
1, 2. ?Olsem wanem ol pikinini oli olsem ol “ara long han blong soldia”?
WAN soldia i stap rere blong sutum wan ara i go stret long mak blong hem. Hem i lukaotgud olsem wanem hem i putum ara ya long string blong bonara, ale hem i taetem ol masel blong hem mo hem i pulum bonara. I wan bigfala traehad blong holemtaet ara, soldia ya i tekem taem blong hem blong makemgud ara ya blong i go stret long mak we hem i wantem kasem. !Ale, hem i letem ara ya i flae! ?Olsem wanem? ?Bambae ara ya i kasem mak blong hem? I dipen long sam samting, olsem win we i blu, mo sipos soldia ya i gat gudhan blong sutum ara no nogat, mo sipos ara ya i wan gudfala ara no nogat.
2 King Solomon i talem se ol pikinini oli olsem ol “ara long han blong soldia.” (Ol Sam 127:4) Tingbaot olsem wanem pijatok ya i stret long ol pikinini. Wan soldia i holem wan ara sot taem nomo long bonara blong hem. Blong kasem mak blong hem, kwiktaem nomo hem i mas letem ara ya i flae. Long sem fasin, ol papa mama oli gat sot taem nomo blong bildimap lav long Jeova long hat blong pikinini blong olgeta. Afta we sam yia nomo i pas, ol pikinini oli kam bigman, mo oli aot long papa mama. (Matiu 19:5) ?Taem pikinini i aot long papa mama, bambae hem i gohed blong kasem mak ya blong lavem Jeova mo mekem wok blong Hem? Ansa blong kwestin ya i dipen long plante samting. Tri samting, hemia se sipos papa mama i gat gudhan blong tijim pikinini, wanem kaen famle we pikinini i gruap long hem, mo desisen blong ‘ara,’ no pikinini ya hem wan, blong folem trening we hem i kasem. Bambae yumi stadi long ol trifala poen ya. Fastaem, bambae yumi tokbaot sam fasin blong ol papa mama we oli gat gudhan blong tijim pikinini.
Ol Papa Mama We Oli Gat Gudhan, Oli Soemaot Wan Gudfala Eksampol
3. ?From wanem aksen blong ol papa mama i mas laenap wetem toktok blong olgeta?
3 Jisas i soemaot eksampol blong ol papa mama oli folem. Hem i mekem ol samting we hem i stap tijim. (Jon 13:15) Be hem i tok agens long ol Farisi from we oli stap “talem” ol loa blong God be oli “no mekem olsem we oli talem.” (Matiu 23:3) Sipos papa mama i wantem pulum ol pikinini blong olgeta blong lavem Jeova, ol aksen blong olgeta i mas laenap wetem toktok blong olgeta. Toktok we i no gat aksen i folem, i blong nating nomo. Hem i olsem wan bonara we i no gat string long hem.—1 Jon 3:18.
4. ?Wanem ol kwestin we i gud blong ol papa mama oli tingbaot, mo from wanem?
4 ?From wanem eksampol blong papa mama i impoten tumas? Long sem fasin we ol bigman oli lan blong lavem God taem oli folem eksampol blong Jisas, ol pikinini tu oli save lan blong lavem Jeova taem oli folem gudfala eksampol blong papa mama blong olgeta. Ol fren we ol pikinini oli gat, oli save givhan long olgeta no “oli save spolem fasin blong olgeta.” (1 Korin 15:33) Long bighaf blong laef blong pikinini, papa mama nao oli ol fren blong hem we oli klosap moa long hem mo oli gat bigfala paoa long fasin mo tingting blong pikinini. Samting ya i tru tumas taem pikinini i smol yet. Taswe, i gud we ol papa mama oli tingbaot ol kwestin ya se: ‘?Mi mi wanem kaen fren? ?Eksampol blong mi i givhan long pikinini blong mi blong hem i wokem ol gudfala fasin? ?Mi mi soemaot wanem eksampol long saed blong ol impoten samting olsem prea mo Baebol stadi?’
Ol Papa Mama We Oli Gat Gudhan, Oli Prea Wetem Pikinini
5. ?Ol pikinini oli save lanem wanem long ol prea blong papa mama?
5 Ol pikinini blong yu oli save lanem plante samting long saed blong Jeova taem oli lesin long ol prea blong yu. ?Sipos oli harem we yu yu prea blong talem tangkiu long God bifo yu kakae mo taem yu mekem Baebol stadi, bambae oli lanem wanem? Bambae oli lanem se Jeova nao i stap givim ol samting we yumi nidim long saed blong bodi mo i stret we yumi talem tangkiu long hem from. Oli save lanem tu se Jeova i stap tijim yumi long ol trutok blong Baebol. Hemia ol sas lesen blong lanem.—Jemes 1:17.
6. ?Olsem wanem ol papa mama oli save givhan long ol pikinini blong oli harem se Jeova i intres long olgeta wanwan?
6 Be tu, yu save givhan moa long famle blong yu sipos yu prea wetem olgeta long defren taem bakegen, i no long taem blong kakae mo long taem blong famle stadi nomo. Long ol narafala taem ya, sipos yu tokbaot stret ol samting we oli stap afektem yu mo ol pikinini blong yu, bambae yu givhan long pikinini blong yu blong harem se Jeova tu i pat blong famle blong yu, mo se hem i kea bigwan long wan long yufala. (Efesas 6:18; 1 Pita 5:6, 7) Wan papa i talem se: “Stat taem we gel blong mitufala i bon, mitufala i stat blong prea wetem hem. Taem hem i stap kam bigwan, mitufala i prea wetem hem long saed blong ol fren blong hem mo ol narafala samting we i stap hapen long laef blong hem. Go kasem taem ya we hem i mared mo hem i aot long mitufala, i no gat wan dei i pas we mitufala i no prea wetem hem.” ?Olsem wanem? ?Yu tu yu save prea wetem ol pikinini blong yu evri dei? ?Yu save givhan long olgeta blong tingbaot Jeova olsem Fren blong olgeta? ?Wan Fren we i stap givim ol samting we oli nidim long saed blong bodi mo spirit, mo we oltaem hem i stap tingbaot filing blong olgeta?—Filipae 4:6, 7.
7. ?Ol papa mama oli nidim blong save wanem blong mekem se prea blong olgeta i laenap wetem nid blong pikinini?
7 I tru, blong mekem se ol prea blong yu oli laenap wetem nid blong pikinini, yu mas save wanem i stap hapen long laef blong hem. Makem toktok blong wan papa we i gat tu pikinini, i se: “Long en blong evri wik, mi tingtinggud long tufala kwestin ya: ‘?Long wik ya, wanem samting i mekem ol pikinini blong mi oli wari? ?Mo wanem gudfala samting i hapen long laef blong olgeta?’ ” ?Papa mama, yufala i save askem sam kwestin olsem mo biaen, tokbaot ol ansa blong ol kwestin ya long ol prea we yu mekem wetem pikinini blong yu? Sipos yu mekem olsem, bambae yu tijim olgeta blong oli prea long Jeova we i Man blong harem prea. Be i no hemia nomo. Bambae yu tijim olgeta tu blong oli lavem Hem.—Ol Sam 65:2.
Ol Papa Mama We Oli Gat Gudhan, Oli Leftemap Fasin Blong Stadi Long Baebol
8. ?From wanem papa mama i mas givhan long pikinini blong i lanem fasin ya blong stadi oltaem long Tok blong God?
8 ?Tingting we papa mama i gat long saed blong Baebol stadi i save gat paoa olsem wanem long fasin fren blong pikinini wetem God? Blong wan man i frengud wetem narafala, tufala i mas toktok tugeta, mo tufala i mas gat fasin blong lesin tu. Wan rod blong lesin long Jeova hemia taem yumi yusum ol buk we ‘slef we i stret mo waes’ i givim blong stadi long Baebol. (Matiu 24:45-47, NW; Ol Proveb 4:1, 2) Taswe, i gud we papa mama i leftemap tingting blong pikinini blong lanem fasin ya blong stadi oltaem long Tok blong God. Olsemia, oli stap givhan long pikinini blong i wokem wan strong fasin fren wetem Jeova we i stanap long lav.
9. ?Olsem wanem ol pikinini oli save lanem blong stadi oltaem?
9 ?Olsem wanem papa mama i save givhan long pikinini blong lanem fasin blong stadi oltaem? Bakegen, beswan rod blong tijim hem, hemia tru long eksampol blong papa mama. ?Olsem wanem? ?Ol pikinini oli luk we oltaem yu haremgud blong ridim Baebol mo stadi yu wan? I tru, ating yu bisi tumas blong lukaot long ol pikinini, mo maet yu stap tingting se wetaem bambae yu faenem taem blong rid mo stadi. Be tingbaot kwestin ya, ‘?Ol pikinini oli luk we mi stap lukluk televisin oltaem?’ ?Sipos yes, yu yu save katem taem ya we yu spenem blong lukluk televisin, mo yusum taem ya blong givim wan gudfala eksampol long ol pikinini blong yu long saed blong stadi yu wan?
10, 11. ?From wanem i gud we oltaem papa mama i mekem famle stadi?
10 Wan narafala rod blong tijim ol pikinini blong oli lesin long Jeova, hemia taem famle i joen tugeta oltaem blong tokbaot Baebol. (Aesea 30:21) Be, maet yu wantem save se, ‘?Sipos oltaem papa mama i tekem pikinini i go long ol miting blong kongregesen, from wanem pikinini i nidim wan famle stadi?’ I gat plante gudfala risen. Jeova i givim bigfala wok ya blong tijim pikinini long papa mama. (Ol Proveb 1:8; Efesas 6:4) Famle stadi i tijim pikinini se wosip i no wan samting we oli mekem nomo taem oli stap wetem ol narafala man, be i wan haf blong famle laef tu.—Dutronome 6:6-9.
11 Mo tu, famle stadi i givim janis long papa mama blong luksave tingting we pikinini i gat long saed blong ol rul mo ol samting long saed blong spirit. Olsem nao, taem pikinini i smol yet, papa mama i save yusum ol buk olsem Learn From the Great Teacher. * Buk ya i blong givhan long pikinini blong stadi Baebol. Klosap evri haf blong hem i gat ol kwestin blong pikinini i talemaot tingting blong hem long saed blong samting we haf i tokbaot. Taem papa mama i pulum pikinini blong tingtinggud long ol vas we oli stap long buk ya, oli givhan long pikinini blong hem i trenem tingting blong hem, blong hem i kam naf blong “jusumaot wanem fasin i gud mo wanem fasin i nogud.”—Hibrus 5:14.
12. ?Olsem wanem papa mama i save mekem se famle stadi i laenap wetem ol nid blong pikinini, mo blong mekem olsem, wanem rod we yu yu faenem se i wokgud?
12 Taem ol pikinini oli stap kam bigwan, papa mama i mas mekem stadi i laenap wetem nid blong olgeta. Tingbaot wan papa mama we tufala i bin givhan long ol pikinini blong tufala long ol yangtaem blong olgeta. Makem olsem wanem tufala i pulum tufala gel blong tufala blong tingting gud taem oli askem blong go long wan danis long skul. Papa ya i talem se: “Mitufala i eksplenem long tufala pikinini se long nekis famle stadi, mi wetem waef blong mi bambae mitufala i aktem se mitufala i pikinini, mo tufala gel i save aktem se wan i papa mo wan i mama. Tufala i save jusum weswan long tufala i aktem papa mo weswan i aktem mama, be tufala i mas wok tugeta blong mekem ol risej mo biaen oli mas givim advaes long mitufala long saed blong ol danis long skul.” ?Wanem frut i kamaot? Papa ya i gohed blong eksplenem se: “Mitufala i sapraes olsem wanem tufala gel (we oli aktem se tufala i papa mo mama) tufala i save luksave wanem i stret mo wanem i no stret. Ale, tufala i eksplenem long mitufala (we mitufala i aktem se mitufala i pikinini) wetem Baebol ol risen from wanem i no waes we mitufala i go long danis. Narafala samting we i mekem mitufala i glad, hemia se oli bin talemaot sam narafala gudfala samting we mitufala i save mekem. Samting ya i givhan long mitufala blong luksave tingting blong tufala mo samting we tufala i wantem.” Blong mekem se famle stadi i gohed gud mo i laenap wetem nid blong famle, papa mama i nidim longfala tingting mo tufala i nidim blong yusum gud tingting blong tufala. Be, bigfala traehad ya bambae i karem ol gudgudfala blesing.—Ol Proveb 23:15.
Mekem Se i Gat Pis Long Famle
13, 14. (a) ?Olsem wanem papa mama i save mekem se famle i gat pis? (b) ?Wanem gudfala frut i kamaot taem wan papa no wan mama i talemaot mastik blong hem?
13 Ating sipos wan soldia i makemgud mo sutum ara blong hem long wan weta we i kwaetgud, i klia se bambae ara ya i kasem mak blong hem. Long sem fasin, sipos ol pikinini oli gruap long wan famle we i gat pis long hem, bambae i isi moa long olgeta blong lanem blong lavem Jeova. Jemes i raetem se: “Taem ol man blong mekem pis oli wok long kwaet fasin, i olsem we oli planem sid we frut blong hem, laef we i stret gud.” (Jemes 3:18) ?Olsem wanem papa mama i save mekem se i gat pis long famle? Man mo woman we oli mared, tufala i nidim blong gat wan strong fasin fren. Wan hasban mo waef we tufala i gat lav mo respek long tufala, tufala i gat gudfala janis blong tijim pikinini blong hem tu i gat lav mo respek long ol narafala, mo long Jeova tu. (Galesia 6:7; Efesas 5:33) Lav mo respek i mekem pis i kamaot. Taem i gat pis bitwin wan hasban mo waef, bambae tufala i nafgud blong fesem ol trabol we i save kamaot long famle.
14 Long taem blong yumi, i no gat wan mared long wol ya we i stretgud olgeta, mo long sem fasin i no gat wan famle we i stretgud olgeta. Maet samtaem ol papa mama oli save mestem long fasin blong olgeta mo oli no soemaot ol frut blong tabu spirit taem oli tijim ol pikinini blong olgeta. (Galesia 5:22, 23) ?Taem samting ya i hapen, papa mama i mas mekem wanem? ?Sipos tufala i talemaot mastik blong tufala, bambae pikinini i no moa respektem tufala? Tingbaot eksampol blong aposol Pol. Plante brata sista oli tingbaot hem olsem papa blong olgeta long saed blong spirit. (1 Korin 4:15) Nating se i olsem, hem i talemaot long klia ples se hem i mekem ol mastik. (Rom 7:21-25) Be, tingting daon mo fasin blong hem blong tok tru i no daonem respek we yumi gat long hem, hemia i mekem se yumi gat moa respek long hem. Nating se samtaem Pol i mestem, hem i save raet long kongregesen blong Korin mo talem se: “Oltaem, yufala i mas folem fasin blong mi, olsem we mi mi stap folem fasin blong Kraes.” (1 Korin 11:1) Sipos yutufala tu i talemaot ol mastik blong yutufala, bambae ol pikinini oli save fogivim yutufala.
15, 16. ?From wanem ol papa mama oli mas trenem ol pikinini blong oli lavem ol Kristin brata sista, mo olsem wanem oli save mekem samting ya?
15 ?Wanem narafala samting we papa mama i save mekem blong pikinini i save gruap we i laekem Jeova? Aposol Jon i raetem se: “Man we i stap talem se hem i lavem God, be i no laekem nating Kristin brata no sista blong hem, i stap agens long hem, hem i man blong giaman. ?Be sipos hem i no save lavem brata no sista blong hem we hem i stap luk oltaem, olsem wanem bambae hem i save lavem God we hem i no luk samtaem?” (1 Jon 4:20, 21) Taswe, taem yu trenem ol pikinini blong yu blong oli lavem ol Kristin brata sista, yu stap tijim olgeta blong oli lavem God. Papa mama, tingbaot ol kwestin ya, ‘?Taem mi stap tokbaot kongregesen, mi talem ol gudfala toktok, no mi stap faenem ol poen nomo?’ ?Olsem wanem blong save? Lesin gud olsem wanem ol pikinini blong yu oli tokbaot ol miting mo ol memba blong kongregesen. Ating bambae yu harem ol tingting blong yu long toktok blong olgeta.
16 ?Wanem samting we papa mama i save mekem blong givhan long pikinini blong lavem ol Kristin brata sista? Peter, wan papa we i gat 2 yangfala boe, i talem se: “Stat taem tufala boe blong mitufala i smol, oltaem mitufala i singaot ol brata sista we oli bigman long saed blong spirit blong oli kam kakae wetem mifala mo spenem taem wetem mifala long haos, mo mifala i rili haremgud long ol taem ya. Tufala boe i gruap wetem ol man we oli lavem Jeova, mo naoia tufala i luksave se taem yumi mekem wok blong Jeova, hemia i wan fasin blong laef we yumi save haremgud long hem.” Dennis, wan papa we i gat faef gel, i talem se: “Mitufala i leftemap tingting blong ol gel blong mifala blong frengud wetem ol olfala paenia long kongregesen, mo mifala i traehad blong tekem evri janis blong singaot seket elda mo waef blong hem blong kam long haos blong mifala.” ?Olsem wanem? ?Yu save mekem sam samting blong givhan long pikinini blong yu blong hem i tingbaot kongregesen olsem haf blong famle blong yufala?—Mak 10:29, 30.
Pikinini i Mas Tekem Desisen
17. ?Wanem desisen we ol pikinini oli mas mekem?
17 Tingbaot bakegen pijatok blong soldia we i sutum ara. Nating se hem i gat gudhan blong sutum ara, be sipos ara blong hem i ben no i kruked, maet soldia ya i no save kasem mak blong hem. Yumi sua se ol papa mama bambae oli traehad blong stretem pikinini sipos tingting blong hem i no stret, olsem we oli traehad blong stretem wan ara we i ben. Be taem ol pikinini oli gruap, oli mas tekem desisen blong olgeta se bambae oli letem wol ya i benem olgeta, no bambae oli letem Jeova i mekem ‘ol rod blong olgeta i stret.’—Ol Proveb 3:5, 6, NW; Rom 12:2.
18. ?Jus we pikinini i mekem i save gat wanem paoa long ol narafala?
18 Ol papa mama oli gat impoten wok ya blong “gohed blong stretem olgeta, mo blong trenem tingting blong olgeta olsem we Jeova i wantem.” Be pikinini hem wan i jusum se bambae hem i kam wanem kaen man taem hem i gruap. (Efesas 6:4, NW) Taswe ol pikinini, tingbaot kwestin ya, ‘?Bambae mi mi folem trening we papa mama i givim long mi wetem lav?’ Sipos yu mekem olsem, yu stap jusum wan fasin blong laef we i beswan. Bambae yu mekem papa mama blong yu i glad tumas. Mo, samting we i impoten moa, hemia se bambae yu mekem hat blong Jeova i glad.—Ol Proveb 27:11.
[Futnot]
^ Ol Witnes Blong Jeova oli wokem buk ya.
?Yu Yu Tingbaot?
• ?Olsem wanem ol papa mama oli save soemaot gudfala eksampol long saed blong prea mo stadi Baebol?
• ?Olsem wanem ol papa mama oli save mekem se i gat pis long famle?
• ?Ol pikinini oli gat wanem jus blong mekem, mo jus ya i save gat paoa olsem wanem long ol narafala?
[Kwestin]
[Tok blong pija long pej 30]
?Olsem wanem? Yu yu stap givim wan gudfala eksampol long pikinini blong yu long saed blong stadi wanwan?
[Tok blong pija long pej 31]
Taem i gat pis long famle, famle i hapi moa