Tok Blong Jeova i Wan Samting We i Laef

Ol Bigfala Poen Long Buk Blong Hosea

OL TEN laen long not blong Isrel, klosap oli no moa mekem trufala wosip nating. Taem Jeroboam 2 i rul, ol man Isrel oli gat plante samting, be afta we hem i ded, oli kam pua bakegen. Nao i no moa gat pis mo i gat wan taem blong trabol long saed blong politik. Long ol sikis king we oli rul afta long Jeroboam 2, fo oli ded long han blong narafala man. (2 King 14:29; 15:8-30; 17:1-6) Profet Hosea i stat blong talemaot tok blong God long 804 B.K.T., mo i gohed blong 59 yia gogo kasem taem blong ol trabol ya.

Ol samting we i hapen long mared blong Hosea oli soemaot klia ol filing blong Jeova long saed blong stronghed neson blong Isrel. Hosea i talemaot ol mastik blong ol man Isrel mo ol tok panis agensem olgeta mo ol laen blong Juda. Taem Hosea i raetemdaon ol samting ya long buk blong hem, hem i yusum ol tok we i soemaot filing mo lav, be ol tok ya oli strong tu mo oli klia. Buk blong Hosea i wan haf blong Baebol we i kamaot long God, mo tok blong hem i wan samting we i laef mo i gat paoa.—Hibrus 4:12.

‘YU GO YU MARED, BE WOMAN BLONG YU BAMBAE I MEKEM I KRANGKE’

(Hosea 1:1–3:5)

Jeova i talem long Hosea se: “Yu go, yu mared. Be taem yutufala i mared finis, bambae woman ya blong yu i girap, i go stap mekem i krangke wetem ol narafala man.” (Hosea 1:2) Hosea i mekem olsem Jeova i talem, nao hem wetem woman blong hem Goma, tufala i gat wan pikinini boe. Biaen, Goma i gat tu narafala pikinini, be i klia se tufala i blong ol narafala papa. Nem blong tufala, Lo-ruhamah mo Lo-ammi, mo mining blong tufala nem ya i soemaot se Jeova i no wantem sore long Isrel mo se bambae hem i sakemaot olgeta from we oli no stap tru long hem.

?Wanem filing blong Jeova long ol man blong hem we oli mekem stronghed? Hem i talem long Hosea se: “Yu go luk woman blong yu bakegen. Nating we hem i stap mekem i krangke wetem narafala man, be yu mas soemaotgud long hem we yu yu lavem hem. Yu mas lavem hem mo yu mas mekem i gud long hem, stret olsem we mi mi lavem yufala. Nating we ol man ples blong yu oli stap folem ol narafala god, . . . be mi mi stap lavem yufala yet.”—Hosea 3:1.

Ansa Blong Sam Kwestin Long Saed Blong Baebol:

1:1—?From wanem Hosea i tokbaot ol fo king we oli rul long Juda long ol yia we hem i mekem wok blong profet, be hem i talem nem blong wan king nomo blong Isrel? Hemia from we ol king long laen blong Deved nomo oli gat raet blong rul long ol man we God i putum nem blong hem long olgeta. Ol king blong Juda nao oli kamaot long laen blong Deved, be ol king long not blong Isrel, nogat.

1:2-9—?I tru se Hosea i bin tekem wan woman we biaen hem i mekem i krangke wetem ol narafala man? Yes i tru. Hosea i mared long wan woman we biaen hem i slip wetem ol narafala man. I no gat wan tok blong profet ya we i soem se samting we hem i raetem long saed blong mared blong hem i olsem wan drim no wan vison nomo.

1:7—?Wetaem Jeova i soem se hem i lavem ol laen blong Juda mo i sevem olgeta? Hemia long yia 732 B.K.T., taem King Hesekia i stap rul. Long taem ya, Jeova i finisim trabol we Asiria i stap mekem long Jerusalem, taem hem i sanem wan enjel blong kilim i ded 185,000 soldia blong Asiria long wan naet nomo. (2 King 19:34, 35) Olsem nao, Jeova i no yusum “wan samting blong faet olsem naef, no bonara, no hos mo man blong faet we i ron long hos,” blong sevem Juda, be hem i yusum wan enjel nomo.

1:10, 11—Ol enemi oli spolem ol laen blong Isrel long not long yia 740 B.K.T. ?Olsem wanem ol man Isrel oli “joen wanples bakegen” wetem ol man Juda? Ol man Juda oli go kalabus long Babilon long yia 607 B.K.T. Be bifo long taem ya,  plante man blong ol laen long not oli godaon blong stap long Juda. (2 Kronikel 11:13-17; 30:6-12, 18-20, 25) Long 537 B.K.T., taem ol man Isrel oli aot long kalabus oli kambak long ples blong olgeta, sam pikinini blong ol man we oli bin kamdaon long not bifo, oli stap wetem olgeta.—Esra 2:70.

2:21-23, NW—?Jeova i stap talemaot wanem, taem hem i se: “Bambae [Jisrehel] i kam olsem sid we mi mi saksakem long graon, mo bambae mi sore long hem”? Nem blong faswan boe blong Hosea mo Goma, hemia Jisrehel. (Hosea 1:2-5) Mining blong nem ya, “God Bambae i Saksakem Sid,” mo hemia i soemaot samting we Jeova i mekem long 537 B.K.T., taem hem i hivimap smol grup blong ol man we oli stap tru long hem mo i putum olgeta oli gobak long Juda, olsem we i saksakem sid long garen. Graon ya we i bin stap nating blong 70 yia, naoia i mas karem plante kakae, mo ol man oli mas gat plante gudfala waen mo oel. Long ol tok we profet ya i yusum, i olsem we ol kakae ya i askem long graon blong givim ol gudfala samting blong hem long olgeta, mo graon i askem long skae blong givim ren. Nao skae i askem long God blong givim ol klaod we oli fulap long ren. Olsem nao, smol grup blong man ya bambae oli gat olgeta samting we oli nidim taem oli kambak long ples blong olgeta. Aposol Pol mo Pita tufala i yusum tok blong Hosea 2:23 blong tokbaot smol kampani blong ol man Isrel long saed blong spirit we God bambae i hivimap.—Rom 9:25, 26; 1 Pita 2:10.

Ol Lesen Blong Yumi:

1:2-9; 3:1, 2. !Tingbaot olsem wanem i hadwok long Hosea blong stap long wan mared olsem! Be hem i mekem, from we hemia samting we God i wantem. ?Olsem wanem long yumi? ?Yumi rere blong lego samting we yumi wantem blong mekem samting we God i wantem?

1:6-9. Jeova i no laekem nating man no woman we i mekem i krangke wetem narafala, olsem we i no laekem nating man no woman we i no stap tru long hem.

1:7, 10, 11; 2:14-23. Samting we Jeova i talemaot long saed blong Isrel mo Juda, i kamtru. Oltaem tok blong Jeova i kamtru.

2:16, 19, 21-23; 3:1-4. Jeova i glad blong fogivim olgeta we oli rili tanem tingting blong olgeta from sin we oli mekem. (Nehemaea 9:17) Yumi mas mekem olsem Jeova mo soemaot sore long ol narafala.

“HAE GOD I GAT POEN FINIS BLONG TALEMAOT AGENS LONG YUFALA”

(Hosea 4:1–13:16)

‘Hae God i gat poen finis blong talemaot agens long olgeta long kantri ya.’ ?From wanem? From we ‘fasin blong holem promes mo fasin blong lavem man i no gat nating long olgeta, mo oli no save nating we hem i God.’ (Hosea 4:1) Ol stronghed man Isrel oli man blong giaman mo stil, oli kilim man i ded, oli stilim woman blong narafala man, mo oli mekem wosip long ol narafala god. Oli no lukluk i go long God blong givhan long olgeta, be oli ‘askem long kantri ya Ijip blong i kam givhan long olgeta, mo biaen, oli resis i go long kantri ya Asiria blong i givhan long olgeta.’—Hosea 7:11.

 Jeova i talemaot panis blong olgeta i se: “Ol enemi bambae oli spolem Isrel.” (Hosea 8:8, NW) Kingdom blong Juda tu i gat fol long fes blong God. Hosea 12:2 i talem se: “Hae God i gat poen agens long ol man Juda, be bambae hem i panisim yufala tu from ol rabis fasin ya we yufala i stap mekem. Bambae hem i givim stret pei long yufala from ol samting nogud ya we yufala i stap mekem.” Be bambae ol samting i kamgud bakegen from we God i promes se: “Bambae mi pemaot olgeta long han blong Seol. Bambae mi tekembak olgeta long ded.”—Hosea 13:14, NW.

Ansa Blong Sam Kwestin Long Saed Blong Baebol:

6:1-3—?Hu i talem se: “Olgeta. I moa gud yumi gobak long Hae God”? Ating ol man Isrel nao we oli no stap tru long Jeova oli stap taltalem long olgeta se oli mas gobak long Hem. Sipos i olsem, oli stap giaman nomo se oli tanem tingting blong olgeta from sin blong olgeta. Oli lavem Jeova blong smoltaem nomo, lav ya i lus kwiktaem olsem “smok blong hil long eli moning . . . [mo] wota blong naet, we taem san i girap, be kwiktaem nomo i mekem i kam drae.” (Hosea 6:4) Sipos i no ol man Isrel be Hosea we i bin talem tok ya, hem i stap askem ol man blong oli kambak long Jeova. Nomata hu i bin talem, ol stronghed man blong ten laen blong Isrel oli mas soemaot se oli rili tanem tingting blong olgeta, mo oli mas kambak long Jeova wetem fulhat blong olgeta.

7:4—?Olsem wanem ol man Isrel we oli no stap tru long Jeova oli olsem “faea [we] i laet bigwan”? Hemia wan pijatok blong soem olsem wanem oli wantem tumas ol nogud samting we i stap long hat blong olgeta.

Ol Lesen Blong Yumi:

4:1, 6. Sipos yumi wantem stap oltaem we Jeova i glad long yumi, yumi mas gohed blong kasem save long hem mo yumi mas mekem ol save ya i wok long laef blong yumi.

4:9-13. Jeova bambae i panisim olgeta we oli mekem rabis fasin long saed blong seks mo we oli mekem wosip we i no klin long fes blong hem.—Hosea 1:4.

5:1. Ol man blong God we oli gat wok blong lukaot long kongregesen oli mas agensem fulwan enikaen tingting blong apostasi. Sipos no, oli save pulum samfala blong mekem wosip we i no tru, olsem wan ‘trap mo net’ we i kasem olgeta.

6:1-4; 7:14, 16. Man we i talem nomo se hem i tanem tingting blong hem, hem i gat tu fes mo i blong nating nomo we hem i talem olsem. Blong God i sore long wan man we i bin mekem nogud, man ya i mas soemaot se hem i rili tanem tingting blong hem. Blong mekem olsem, hem i mas kambak long samting we i “hae moa” (NW), hemia i min se fasin blong wosip we i hae moa long ol narawan. Ol samting we man ya i mekem oli mas laenap wetem tingting blong God we i hae moa.—Hosea 7:16, futnot NW.

6:6. Taem man i gohed nomo blong mekem samting we hem i save se i no stret, hem i soemaot se hem i no lavem God. Nating se hem i mekem hamas wok long saed blong spirit, samting ya i no save tekem ples blong lav ya we hem i mas gat long God.

8:7, 13; 10:13. Stamba trutok ya se “wanem sid we man i planem fastaem long garen blong hem, be frut blong hem nomo, man ya bambae i mas kakae,” i kamtru long ol man Isrel we oli wosipim ol aedol.—Galesia 6:7.

8:8; 9:17; 13:16. Ol profet tok long saed blong ol laen blong Isrel long not, oli kamtru taem ol ami blong Asiria oli winim bigfala taon blong not, hemia Sameria. (2 King 17:3-6) Yumi save bilif strong se ol tok blong God bambae i kamtru mo bambae i mekem ol samting we hem i promes blong mekem.—Namba 23:19.

8:14. Long yia 607 B.K.T., Jeova i ‘sanem faea i kam long ol bigbigfala taon’ blong Juda, taem ol ami blong Babilon oli spolem Jerusalem nao kantri blong Juda i kam olsem draeples nomo. (2 Kronikel 36:19) Tok blong God i mas kamtru, Hem i no save giaman.—Josua 23:14.

9:10. Ol man Isrel oli givim olgeta i go long trufala God blong mekem wosip long hem, be biaen, “oli go long hil ya Peoro, mo oli [“givim olgeta i go,” NW] long god ya Bal. Oli stap mekem gogo, fasin blong olgeta i kam nogud we i nogud.” Yumi waes sipos yumi lesin long woning we yumi kasem from nogud fasin blong olgeta. Yumi mas lukaotgud se yumi no brekem promes we yumi  mekem taem yumi givim yumi i go long Jeova.—1 Korin 10:11.

10:1, 2, 12. Taem yumi mekem wosip long God, yumi no mas gat tu fes. Yumi mas ‘mekem ol fasin we i stret gud, mo karem ol gudfala frut long laef blong yumi. Fasin ya i olsem we man i planem ol gudfala sid, mo biaen, i karem ol gudgudfala frut’ from lav mo kaen fasin blong Jeova.

10:5. Betaven (we i minim “Haos Blong Ol Samting We i Mekem Man i Harem Nogud”) i wan narafala nem we i blong daonem taon ya Betel (we i minim “Haos Blong God”). Taem ol man we oli go kalabus long Babilon oli karem aedol blong smol buluk we i stap long Betaven i go wetem olgeta, ol man Sameria oli krae from we oli lusum god blong olgeta. !I krangke nomo blong trastem wan aedol we i no gat paoa blong sevem man, mo we i no save sevem hem wan tu!—Ol Sam 135:15-18; Jeremaea 10:3-5.

11:1-4. Oltaem Jeova i soemaot lav long ol man blong hem. Hem i neva mekem i strong tumas blong oli obei long hem.

11:8-11; 13:14. Jeova i talem se bambae hem i karem ol man oli kambak blong oli stanemap trufala wosip bakegen, mo tok ya i kamtru, “i no mestem.” (Aesea 55:11) Long 537 B.K.T., wan smol grup blong man oli aot long kalabus long Babilon, oli kambak long Jerusalem. (Esra 2:1; 3:1-3) Ol tok we Jeova i talemaot tru long ol profet blong hem, bambae i sua blong kamtru.

12:6. Yumi mas traehad oltaem blong soemaot lav mo kaen fasin, mekem i stret, mo trastem Jeova.

13:6. Ol man Isrel oli ‘harem gud tumas, tingting blong olgeta i go antap tumas, nao oli no moa tingbaot [Jeova].’ Yumi mas lukaotgud se yumi no stat blong leftemap yumi wan.

“OLGETA FASIN BLONG HAE GOD I STRET GUD OLGETA”

(Hosea 14:1-9)

Hosea i plis long ol man Isrel se: “Hae God i God blong yumi, mo yufala i mas kambak long hem. Ol sin blong yufala i plante tumas, i mekem yufala i stambol, yufala i foldaon.” Hem i talem long ol man blong oli talem long Jeova se: “Plis yu fogivim mifala, yu tekemaot ol sin blong mifala, mo yu lesin long prea blong mifala, nao bambae mifala i stap presem yu bakegen, olsem we mifala i promes bifo.”—Hosea 14:1, 2.

Taem wan man i tanem tingting blong hem from sin, hem i mas kambak long Jeova, agri long ol rod blong hem, mo presem hem. ?From wanem? From we “olgeta fasin blong Hae God i stret gud olgeta, mo oltaem, ol stret man . . . oli stap folem ol fasin ya.” (Hosea 14:9) !Yumi glad tumas se plante moa man yet bambae ‘oli ona gud long Hae God, mo bambae oli glad blong karem ol presen we hem i givim long olgeta’!—Hosea 3:5.

[Tok blong pija long pej 13]

Ol samting we oli hapen long mared blong Hosea oli soemaot fasin we Jeova i mekem long ol man Isrel

[Tok blong pija long pej 15]

Taem Sameria i lus long 740 B.K.T., ol ten laen blong Isrel oli lus tu