“Papa Blong Yufala i Gat Sore Long Man”
“Papa Blong Yufala i Gat Sore Long Man”
“Yufala i mas gat sore long man, olsem we Papa blong yufala i gat sore long man.”—LUK 6:36.
1, 2. ?Olsem wanem toktok blong Jisas long ol tija blong loa mo ol Farisi, mo ol man blong hem tu, i soemaot se sore i wan fasin we i impoten tumas?
LOA we God i givim long Moses i gat samwe long 600 defren loa mo rul long hem. Ol man Isrel oli mas holem Loa ya blong Moses, be i impoten tumas we oli gat fasin sore tu. Tingbaot wanem we Jisas i talem long ol Farisi we oli no soem sore. Tu taem hem i tok agensem olgeta from samting ya, hem i mekem olgeta oli tingbaot tok ya blong God we i talem se: “Mi mi no wantem fasin ya we man i stap kilim anamol blong mekem sakrefaes long mi, mi mi wantem we oltaem man i gat sore long man.” (Matiu 9:10-13; 12:1-7; Hosea 6:6) Klosap long en blong minista wok blong Jisas, hem i talem se: “Ol tija blong Loa mo ol Farisi. Sore tumas long yufala. Yufala i gat tu fes. Yufala i stap mekem taet blong yufala long ol smosmol lif ya, min mo dil mo kamin, we man i stap putum long kakae. Hemia i stret, i folem Loa, be yufala i tanem baksaed long ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes blong hem.”—Matiu 23:23.
2 Ol tok ya blong Jisas oli soemaot klia se sore i wan fasin we i impoten tumas. Hem i talem long ol man blong hem se: “Yufala i mas gat sore long man, olsem we Papa blong yufala i gat sore long man.” (Luk 6:36) Be blong ‘folem fasin blong God’ long saed ya, yumi nidim blong save trufala mining blong sore. (Efesas 5:1) Mo, sipos yumi kasem save long ol gudfala frut we oli kamaot from sore, bambae samting ya i pusum yumi blong traehad moa blong soemaot fasin ya long laef blong yumi.
Sore We i Go Long Man We i Nidim Help
3. ?From wanem yumi mas lukluk long Jeova blong lanem trufala mining blong sore?
3 Man blong raetem Ol Sam i singsing se: “Hae God, hem i God we i lavem yumi, mo i gat sore long yumi. Hem i no save kros kwik, oltaem hem i stap lavem yumi. Hem i mekem olgeta samting we i gat laef, mo oltaem hem i gat sore long olgeta. Oltaem hem i stap mekem i gud tumas long yumi evriwan.” (Ol Sam 145:8, 9) Jeova “hem i Papa blong yumi we i gat sore, hem i God we i stamba blong fasin blong givhan.” (2 Korin 1:3) Man we i gat sore, hem i mekem i gud long narafala from we hem i kasem save filing blong narafala ya. Fasin sore hemia wan impoten haf blong ol fasin blong God. Eksampol blong hem mo toktok we hem i givim long yumi i save tijim yumi long trufala mining blong sore.
4. ?Aesea 49:15 i tijim yumi long wanem long saed blong sore?
4 Long Aesea 49:15 (NW) Jeova i talem se: “?Yufala i ting se wan waef i save fogetem pikinini blong hem we i stap titi yet, nao hem i no save sore long pikinini ya we i kamaot long bel blong hem?” Hibru tok we oli tanem i kam “sore” long ples ya, i klosap sem mak long ol Hibru tok we oli bin yusum blong tokbaot sore blong God long Ol Sam 145:8, 9, we i stap long las haf ya antap. Filing ya we i pusum Jeova blong gat sore i olsem strong filing we wan mama i gat blong keagud long pikinini blong hem. Maet pikinini i hanggri no i nidim wan narafala samting. Filing ya blong sore, blong kasem save filing blong pikinini blong hem, bambae i pusum mama ya blong i mas givim samting we pikinini blong hem i nidim. Hemia semfala filing blong kea we Jeova i gat long ol man we hem i soem sore long olgeta.
5. ?Olsem wanem Jeova i soemaot se hem i “sore tumas” long ol man Isrel?
5 I gud tumas sipos man i gat filing ya we hem i sore long narafala, be i gud moa sipos hem i tekem aksen from sore ya, blong givhan long man we i nidim help. Samwe long 3,500 yia bifo, ol man Isrel oli stap wok slef long Ijip. Tingbaot filing blong Jeova long taem ya. Hem i talem long Moses se: “Yufala ol laen blong Isrel, yufala i man blong mi, mo mi mi luk finis ol rabis fasin ya we ol man Ijip oli stap mekem long yufala. Mi harem krae blong olgeta ya we oli stap long Ijip, we oli wantem mi mi tekemaot olgeta long han blong ol man ya we oli stap fosem olgeta blong oli wok slef blong olgeta. Mi mi save finis we oli harem nogud tumas, mo oltaem mi stap tingting long olgeta. Mo from samting ya, mi mi kamdaon blong tekemaot olgeta long han blong ol man Ijip, mo blong lidim olgeta oli aot long Ijip oli kam. Bambae mi tekem olgeta i go long wan gudfala kantri, we i bigfala tumas, we graon blong hem i gud tumas, oltaem i karem fulap kakae.” (Eksodas 3:7, 8) Samwe long 500 yia afta we ol man Isrel oli fri long Ijip, Jeova i pulum olgeta blong tingtingbak, hem i se: “Taem ol olfala bubu blong yufala bifo oli stap long Ijip, mi mi sevem olgeta. Mi mi tekemaot olgeta long han blong ol man Ijip, mo long han blong ol narafala man we oli stap mekem olgeta oli harem nogud.” (1 Samuel 10:18) Plante taem ol man Isrel oli harem nogud tumas from we oli no folem ol stret rul blong God. Be nating se i olsem, Jeova i gat sore long olgeta mo hem i sevem olgeta bakegen mo bakegen. (Jajes 2:11-16; 2 Kronikel 36:15) Hemia i soemaot filing we Jeova i gat taem hem i luk ol man we oli nidim help, oli stap long denja, no oli fesem hadtaem. Jeova i “sore tumas” long olgeta.—Efesas 2:4.
6. ?Olsem wanem Jisas i soemaot se hem i folem fasin blong Papa blong hem long saed blong fasin sore?
6 Taem Jisas i stap long wol, hem i bin soemaot fasin sore stret olsem Papa blong hem i mekem. ?Jisas i mekem wanem taem tu blaenman i plis long hem se: “!Laen blong King Deved! !Plis yu sore long mitufala!”? Tufala ya i wantem we Jisas i mekem wan merikel blong tufala i save luklukgud bakegen. Jisas i mekem merikel ya, be hem i no mekem olsem se i wan wok nomo. Baebol i talem se: “Nao Jisas i sore long tufala, i putum han blong hem long ae blong tufala, nao wantaem nomo, ae blong tufala i open.” (Matiu 20:30-34) Sore nao i pusum Jisas blong mekem plante merikel blong givhan long ol man we ae blong olgeta i nogud, ol man we rabis spirit i stap long olgeta, ol man we oli gat leprosi, mo ol papa mama we pikinini blong olgeta i safa.—Matiu 9:27; 15:22; 17:15; Mak 5:18, 19; Luk 17:12, 13.
7. ?Eksampol blong Jeova God mo Pikinini blong hem oli tijim yumi long wanem samting long saed blong fasin sore?
7 Eksampol we Jeova God mo Jisas Kraes oli givim i soemaot se fasin sore i gat tu haf blong hem. Man we i gat sore, hem i kasem save long filing blong narafala we i nidim help, nao biaen hem i tekem aksen tu blong givhan long narafala ya. Man i mas gat tufala samting ya blong soemaot fasin sore. Plante taem, Baebol i tokbaot sore olsem kaengud fasin we man i soemaot long narafala we i gat nid. ?Be olsem wanem God i soemaot sore taem hem i jajem man? ?Fasin sore i save mekem we God i slak, nao maet hem i no panisim man we i sin?
Sore We i Go Long Ol Sinman
8, 9. ?Olsem wanem God i soemaot sore long Deved afta we hem i sin wetem Batseba?
8 Tingbaot Deved we i King blong Isrel bifo, mo wanem i hapen afta we profet Natan i tok long hem from rabis fasin we hem i bin mekem wetem Batseba. Deved i tanem tingting blong hem from sin blong hem mo i prea se: “God, oltaem yu yu lavem man tumas, plis yu sore long mi. Fasin blong yu blong gat sore long man i bigwan tumas, plis yu ravemaot ol sin blong mi. Yu wasemaot ol fasin nogud ya long laef blong mi, yu tekemaot ol sin blong mi, yu mekem mi mi klin. Mi mi luksave ol rabis fasin blong mi, oltaem mi mi savegud ol sin blong mi. Sin ya we mi mekem i agens long yu nomo, mi mi mekem ol samting ya we i nogud tumas long fes blong yu.”—Ol Sam 51:1-4.
9 Deved i rili harem nogud tumas. Jeova i fogivim sin blong Deved mo hem i no givim wan panis we i strong tumas long Deved mo Batseba. Folem Loa blong Moses, Deved mo Batseba, tufala i mas ded. (Dutronome 22:22) I tru se tufala i no fri olgeta long ol trabol we i kamaot from sin blong tufala, be Jeova i letem tufala i laef. (2 Samuel 12:13) From we God i gat sore hem i fogivim ol mastik blong man. Be hem i no holembak panis we i stret blong man i kasem.
10. ?Nating se Jeova i gat sore taem hem i jajem yumi, from wanem yumi no mas ting nating long sore blong hem?
10 “Wan man nomo [Adam] i statem fasin blong sin long wol ya” mo “pei we man i kasem from sin, hemia ded,” taswe olgeta man oli mas ded. (Rom 5:12; 6:23, NW) !Yumi save gat bigfala tangkiu from fasin sore we Jeova i soemaot taem hem i jajem yumi! Be yumi mas lukaot blong no ting nating long sore blong God. Dutronome 32:4 (NW) i talem se: “Olgeta fasin blong [Jeova] oli stret.” Taem God i jusum blong soem sore, hemia i no min se hem i lego ol rul blong hem we oli stanap long stret fasin.
11. ?Olsem wanem Jeova i soemaot se hem i holem stret fasin taem hem i jajem Deved from sin blong hem wetem Batseba?
11 Fastaem God i mas fogivim Deved mo Batseba from sin blong tufala, blong biaen bambae hem i save karemaot strong panis ya blong ded. Ol jaj blong Isrel oli no gat raet blong mekem samting ya. Sipos oli jajem tufala from sin blong tufala, oli no save tekem wan narafala desisen, oli mas givim panis blong ded. Hemia nao wanem we Loa i talem. Be from kontrak we Jeova i gat wetem Deved, Jeova i wantem save sipos i gat wan risen blong fogivim Deved from sin blong hem. (2 Samuel 7:12-16) Taswe, Jeova God we hem i “Man blong jajem olgeta man blong wol,” mo we i “stap skelem tingting blong olgeta man,” hem i jusum blong jajem Deved. (Jenesis 18:25; 1 Kronikel 29:17) God i naf blong lukluk hat blong Deved mo skelem sipos hem i rili tanem tingting blong hem, ale Hem i save fogivim Deved.
12. ?Yumi ol sinman yumi mas mekem wanem blong God i soemaot sore long yumi?
12 Fasin sore we Jeova i soemaot long yumi taem hem i mekem yumi fri long panis blong sin ya we yumi kasem from Adam, i laenap wetem stret fasin blong hem. Blong mekem se Jeova i save fogivim ol sin mo long semtaem holemtaet stret fasin blong hem, Jeova i givim Pikinini blong hem, Jisas Kraes, olsem ransom sakrefaes—i no gat wan narafala we i soemaot bigfala sore olsemia. (Matiu 20:28; Rom 6:22, 23) Sipos yumi wantem we God i gat sore long yumi mo i blokem yumi blong no kasem panis blong sin blong Adam, yumi mas soemaot se yumi “bilif long Pikinini ya blong God.”—Jon 3:16, 36.
Wan God Blong Sore Mo Stret Fasin
13, 14. ?Olsem wanem? ?Fasin sore blong Jeova i stap mekem stret fasin blong hem i kam moagud? Eksplenem.
13 Fasin sore blong Jeova i neva go agensem ol loa blong hem long saed blong stret fasin. ?Be, olsem wanem? ?Fasin sore blong hem i save jenisim stret fasin blong hem? I tru se sore ya we God i gat i save mekem jajmen blong hem i no strong tumas. ?Be hemia i min se stret fasin blong Jeova i nogud, nao fasin sore blong hem i stap mekem i kam gud moa? No, i no minim olsem.
14 Tru long profet Hosea, Jeova i talem long ol man Isrel se: “Mi mekem promes se bambae yu yu stap wetem mi, yu olsem woman blong mi, blong olwe, mo promes ya se yu blong mi, hem i stanap long fasin we i stret mo long stret fasin blong jajem man, mo long lav we i kaengud mo long fasin sore.” (Hosea 2:19, NW) Vas ya i soemaot klia se taem Jeova i soem sore, oltaem sore ya i laenap wetem ol narafala fasin blong hem, olsem stret fasin. Jeova hem i wan “God we i gat sore mo gladhat, . . . i stap fogivim [ol man] from ol mastik, ol rong, mo ol sin blong olgeta. Be taem man i mas kasem panis, bambae hem i no blokem panis ya nating.” (Eksodas 34:6, 7, NW) Jeova i wan God blong sore mo stret fasin. Baebol i tokbaot hem i se: “Hem i Bigfala Ston ya, ol wok blong hem oli stret gud olgeta, from we olgeta fasin blong hem oli stret.” (Dutronome 32:4, NW) Stret fasin blong God wetem sore blong hem, tufala tugeta i stretgud olgeta. I no gat wan long tufala fasin ya we i winim narawan, mo wan fasin i no nidim narawan blong mekem hem i kam moagud. Defren olgeta, stret fasin mo sore oli wok tugeta long fasin we i stretgud olgeta.
15, 16. (a) ?Wanem i soemaot se stret fasin blong God i no strong tumas? (b) ?Taem Jeova i mekem jajmen blong hem i kamtru long rabis wol ya, ol man blong hem oli save sua long wanem samting?
15 Stret fasin blong Jeova i no strong tumas. Klosap oltaem, stret fasin i laenap wetem loa, minim se taem wan man i brekem loa, stret fasin bambae i mekem se man ya i kasem panis we i stret long rong blong hem. Be stret fasin blong God i min tu se hem bambae i sevem ol gudfala man. Tingbaot taem ya we ol rabis man long ol taon blong Sodom mo Gomora oli lus, Lot mo tufala gel blong hem oli sef.—Jenesis 19:12-26.
16 Yumi save sua se taem Jeova i mekem jajmen blong hem i kamtru long rabis wol ya, “bigfala kampani” blong ol man we oli mekem wosip long trufala God bambae oli sef. Olgeta ya “oli wasem klos blong olgeta finis blong mekem oli waet long blad blong Smol Sipsip ya.” Yes, olgeta ya bambae oli “pastru long bigfala trabol.”—Revelesen 7:9-14, NW.
?From Wanem Yumi Mas Soem Sore?
17. ?Wanem wan stamba risen blong soemaot sore?
17 Yes, eksampol we Jeova mo Jisas Kraes i soemaot i tijim yumi long trufala mining blong sore. Ol Proveb 19:17 i givim wan stamba risen from wanem yumi mas soem sore, hem i se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i [“givimbak,” NW] samting ya long yu.” Taem yumi folem fasin blong Jeova mo Pikinini blong hem mo yumi soemaot fasin sore long ol narafala, yumi mekem Jeova i glad. (1 Korin 11:1) Mo samting ya i pulum ol narafala tu blong oli soem sore, from we taem yumi soem sore long narafala bambae hem tu i soem sore long yumi.—Luk 6:38.
18. ?From wanem yumi mas traehad blong soemaot fasin sore?
18 Plante gudgudfala fasin i joen tugeta blong mekemap fasin ya sore. Hemia kaen fasin, lav, mo fasin blong wantem mekem i gud. Ol filing we man i gat from we hem i kea long narafala mo from we hem i putum hem wan long ples blong narafala, oli pusum hem blong soem sore long narafala ya. Nating se fasin sore blong God i no jenisim stret fasin blong hem, Jeova i no save kros kwik, mo hem i mekem tingting blong hem i longfala blong givim naf taem long ol nogud man, blong oli tanem tingting blong olgeta. (2 Pita 3:9, 10) Taswe, sore i joen wetem longfala tingting mo fasin blong stap kwaet taem man i wet long wan samting. Taem man i soemaot fasin sore, hem i gat janis blong lanem plante narafala gudgudfala fasin tu we oli mekemap fasin ya sore, olsem sam fasin blong frut blong tabu spirit. (Galesia 5:22, 23) !I impoten tumas we yumi traehad blong soemaot sore!
“Olgeta We Oli Gat Sore Long Man, Oli Save Harem Gud”
19, 20. ?Olsem wanem man we i gat sore i no save fraet long jajmen blong God?
19 Disaepol ya Jemes hem i talemaot from wanem yumi mas soemaot sore long narafala. Hem i raetem se: “Man we i gat sore, hem i no save fraet se God bambae i jajem hem.” (Jemes 2:13b) Jemes i stap tokbaot sore we wan man blong Jeova i soemaot long ol narafala. Sipos wan man i gat fasin sore, bambae hem i no save fraet long taem ya we hem i mas ‘talemaot olgeta fasin blong hem long fes blong God,’ from we bambae Jeova i tingbaot olsem wanem man ya i bin soemaot sore, nao bambae hem i fogivim man ya tru long ransom sakrefaes blong Pikinini blong Hem. (Rom 14:12) Yumi save sua se wan risen from wanem Jeova i bin soemaot sore long Deved taem hem i mekem sin wetem Batseba, hemia from we Deved hem wan i gat sore. (1 Samuel 24:4-7) Long sem fasin, “ol man we oli no gat sore, bambae hem i no gat sore long olgeta” taem hem i jajem olgeta. (Jemes 2:13a) !Hemia nao from wanem olgeta we “oli no gat sore” oli stap wetem ol man ya we long lukluk blong Jeova oli “mas ded”!—Rom 1:31, 32.
20 Long Bigfala Tok antap long Hil, Jisas i talem se: “Olgeta we oli gat sore long man, oli save harem gud, from we God bambae i gat sore long olgeta.” (Matiu 5:7) !Vas ya i talem stret se olgeta we oli wantem se God i sore long olgeta, olgeta tu oli mas gat sore! Nekiswan stadi bambae i tokbaot olsem wanem yumi save soemaot sore long laef blong yumi evri dei.
?Yu Yu Lanem Wanem?
• ?Fasin ya sore hem i wanem?
• ?Wanem sam rod we Jeova i stap soemaot sore?
• ?Olsem wanem Jeova i wan God blong sore mo stret fasin?
• ?From wanem yumi mas soem sore?
[Kwestin]